Kon Ngaa Dapat Awayon ang Armagedon
“ANG DIOS GUGMA.” Indi lamang nga ang Dios nagapakita sing gugma, siling ni apostol Juan, kundi sia amo ang gugma—ang dagway mismo sang gugma.—1 Juan 4:8.
Apang, ining amo man nga Dios sang gugma masami ginalaragway sang iban subong matimaluson nga Dios nga nagahatag sing mapintas nga sa silot sadtong wala niya ginakahamut-i. Gani, madamu ang nadulaan sing pagtuo sa Dios ukon nagayaguta sa Biblia, nagasiling nga indi ini mahimu nga naghalin sa sina nga Dios. Labi na gid nga ginatamay amo ang bahin sang tolon-an sang Bugna diin ang paghukom sang Dios sa mga malauton ginlaragway, nga nagahingapos sa inaway sang Armagedon.
Halimbawa, si Joseph Wheless nagsulat sa iya libro nga Is It God’s Word?: “Sa pagkamatuod indi mabatas sang mabuot nga bumalasa ang apokaliptiko nga palanan-awon nga nagapakita sang duna mahinulsulon nga kalag sa tunga sang makaluluoy nga mga makasasala (ayhan sang orihinal ukon sang mortal nga sala), nga yadto didto nga ‘ginasilotan paagi sa kalayo kag asupre sa presensia sang balaan nga mga manugtonda, kag sa presensia sang Kordero,’ nga ang tanan nagatulok sing indi mainulikdon samtang ‘ang aso sang ila kasakit nagatub-ok sa katuigan kag katuigan: wala sila sing pahuway sing adlaw ukon gab-i’ bangod sang kapintas sang kasingkal sang Dios nga Labing Gamhanan (Bug. xiv, 10, 11). Amo ini ang inspirado nga pagpahayag sang Dios sang bug-os nga gugma.”
Nagabinagbinag man tuhoy sa kasaysayan sang Bugna, si Propesor Gerald A. Larue sang University of Southern California nagsulat sining karon lang sa magasin nga Free Inquiry: “Ang ditumuluo gintagbong sa kadadalman sang pag-antos nga nagapalibog sa panghunahuna. Ang silot indi ang lex talionis, ang mata sa mata nga hustisya; ukon kaangay sang matimaluson nga hustisya, diin ang kabilogan nga grupo mahimu hapayon (cf. Gen. 4:23, [24]; Jos. 6; kbp). Ang silot diri dayon. Wala sing kaluoy, ang silot wala sing katapusan. Wala sing kapatawaran, kundi pagsilot lamang nga nagadingot sang paghidait sang paglaglag. Wala sing malulo kag malum-ok nga Jesus nga larawan.” Nian, nagakutlo sang Bugna 14:9-11, nagpadayon sia: “Wala sing pagliso sang pihak nga guya diri—kundi mapintas, maakigon nga balus lamang sa kapintas nga nagapakadiutay kon ipaanggid sa pagsakit sang Nazi.”
Sing halangpunon, ang mga panghunahuna tuhoy sa mapintas nga pag-antos samtang ang mga makasasala ginasakit sing dayon nagapautwas sing mga pamangkot tuhoy sa ‘Dios sang gugma.’ Apang ina nga mga ideya pasad sa indi paghangop sa Biblia kag sa simbulismo nga gingamit diri. Ang Biblia wala gid nagatudlo nga ang kalag indi mamalatyon. Sa baylo, ang Biblia nagasiling nga “ang kabayaran sang sala amo ang kamatayon”—indi ang dayon nga silot—kag kon mapatay nagakadula ang igbalatyag, lakip na ang ikasarang sa pagbatyag sing kasakit.—Roma 6:23; Manugwali 9:5, 10.
Ang nagalawig sing dayon amo ang silot, indi ang pagsilot—kay ang malauton bug-os nga ginlaglag sa “linaw nga kalayo,” ang simbulo sang bug-os nga kalaglagan. (Bugna 20:14, 15; 21:8) Apang, ang inaway sang Armagedon magadala sang indi mabanabana nga pag-antos kag kabudlayan sa katawhan kag mangin amo ang pinakamaduguon nga inaway nga naaway na. (Mateo 24:21, 22; Bugna 14:20; 19:17, 18) Naghalin bala ini gikan sa ‘Dios sang gugma?’ Pahanabuon gid bala sang Dios ina nga inaway?
Pagpabutyag sang Gugma sang Dios
Sing aktuwal, bangod sang gugma sang Dios nga ang inaway sang Armagedon dapat awayon. Ang tuyo sang Dios para sa duta amo nga ipasag-uli ini sa iya orihinal nga Paraiso nga kahimtangan kag papuy-on sa sini ang katawhan sa kalinong kag kahimpitan “kag wala na sing magapahadlok sa ila.” (Ezequiel 34:28; Miqueas 4:3, 4; Bugna 21:4) Ano, nian, ang himuon sadtong, bangod sang ila krimen kag kasingki, magaupang sa kalig-onan sang ginpasag-uli nga Paraiso? Wala sing sistema nga ginhimu sang tawo ang madinalag-on nga nakalubad sa palaligban. Ang lamang nga paagi nga siguraduhon ang himpit nga paghidait amo ang pagdula bisan sang pamahog sang kalautan. Huo, dapat laglagon sang Dios ang indi matadlong nga malauton tungod sadtong maluyag maghimu kon ano ang husto. Bangod sang gugma, tinloan niya ang duta sadtong nagalaglag sini.—Bugna 11:18.
Apang indi na kinahanglan nga mapatay. “Buot sang [Dios] nga ang tanan nga tawo maluwas,” sulat ni apostol Pablo. (1 Timoteo 2:4) Kag si Pedro, nagsulat man sa idalom sang inspirasyon, nagsiling: “Wala sia nagahandum nga mawala ang bisan sin-o kundi nga tanan makadangat sa paghinulsul.” (2 Pedro 3:9) Ginhimus sang Dios nga ang “maayong balita sang ginharian” ibantala agod ang kada indibiduwal may kahigayunan nga mangabudlay tungod sa iya kaugalingon nga kaluwasan. (Mateo 24:14; Filipos 2:12; Galacia 6:5) Mahimu ikaw mabuhi sing dayon sa kahimpitan sa Paraiso nga duta. Imo ang pagpili. (Roma 2:5-9; Ezequiel 18:23, 32) Indi bala amo sini ang dapat paabuton gikan sa Dios sang gugma?
Ang Hulusayon Tuhoy sa Pagkasoberano
Agod pat-uron ang himpit nga paghidait kag kalinong, may isa lamang ka pangulohan ang magagahom sa bug-os nga duta—ang Ginharian sang Dios. Indi bala nga ang madamu tawhanon nga pangulohan, ang tanan nga mga pangulohan, ang tanan nagapanikasog sa ila kaugalingon makagud nasyonalistiko nga kaayohan, ang nagtuga sang daku nga binangig kag pagpatulo sang dugo sa bug-os nga duta? Ini nga mga pangulohan dapat dulaon agod magahatag sing dalan para sa matarong nga kasugoan sang Ginharian sang Dios sa idalom ni Cristo. (Daniel 2:44) Ginpangamuyo mo inang langitnon nga pangulohan, sang ginsulat mo ang modelo nga pangamuyo nga ginhatag ni Jesus sa iya mga disipulo: “Pakaria ang imo ginharian. Himoa ang imo kabubut-on, kon ano sa langit, amo man sa duta.”—Mateo 6:10.
Apang diin nga pangulohan ang nahibal-an mo nga handa nga ihatag ang iya pagkasoberano kag magapasakop sing bug-os sa Ginharian sang Dios? Indi bala nga sa baylo ang mga pangulohan makusog nga magapanguyapot sa ila kaugalingon nga mga pagkasoberano, padayon nga nagapanikasog nga pasangkaron ang ila mga teritoryo supak sa gintukod na nga Ginharian sang Dios? (Salmo 2:1-9) May tanda bala nga ang mga pungsod magaampo sang ila pagginahom sa Dios kag kay Cristo? Ang pagkaindi epektibo sang organisasyon sang Nasyones Unidas subong instrumento para sa bug-os kalibutan nga paghidait nagapakita sang indi kinabubut-on nga pagtalikod sang mga pungsod kon tuhoy sa makagud pungsodnon nga mga intereses kag sa pagpasakop sa isa ka awtoridad. Determinado ang mga pungsod nga palakaton ang hitabo sa kalibutan sa ila paagi. (Bugna 17:13, 14; 19:19) Gani ang inaway sang Armagedon dapat awayon agod bugtuon ini nga lambay kag lubaron sing dayon ang hulusayon sa kon sin-o ang may kinamatarong sa paggahom sa duta.
Agod Paayawan ang mga Kinahanglanon sang Tawo
Ang mga buhat ni Jehova sa Armagedon nagahunahuna sang pinakamaayo nga intereses sang katawhan. Hunahunaa. Ano ang imo balatyagon tuhoy sa karon nga kahimtangan sang kalibutan? Luyag mo bala ini? Nagabatyag ka bala nga malig-on sa idalom sang pamahog sang nuklear nga kalaglagan? Nagakurog ka bala nga makita ang kasingki nga nagadugang, ang imo kasilingan labi nga peligruso? Nahadlok ka bala tungod sa imo kabataan kag sa ila palaabuton? Ano nga paumpaw ang imo nakita? Ginpakita bala sang bisan ano nga pangulohan nga sarang sini mapaluntad ang paghidait kag kabuganaan sa bug-os nga katawhan? May nakahimu bala sa pagdula sang balatian kag kamatayon gikan sa duta? Sa baylo, indi bala nga naglain ang kahimtangan sa bug-os nga kalibutan walay sapayan sang mga hinimoan sa teknolohiya sang tawo, kag sing masunson bangod sina nga mga pag-uswag? Ang matarong nga Ginharian sang Dios lamang ang bug-os nga magapaayaw sa mga kinahanglanon sang katawhan. Amo lamang ini ang paagi nga ang matuod nga paghidait magaluntad sa bug-os nga duta. Ang inaway sang Armagedon dapat awayon!
Apang kamusta ang pag-antos kag kabudlayan sang mga tawo nga magaresulta samtang ang Dios nagapanghikot agod tinloan ang duta? Amo sini ang pirme nga resulta sang inaway. Mahanabo ini sa Armagedon bangod lamang ang mga pungsod malig-on nga nagpamatok sa teokratikong kasugoan. Determinado sila nga makig-away kag magbato. (Salmo 2:2, 3) Indi ina sala sang Dios. Ginhatagan niya sila sing nagakaigo nga paandam: “Kag karon, O mga hari, mamati; mag-andam kamo, kamo nga gumalahom sang duta. Alagara ang Ginuo nga may kahadlok, kag magkasadya sa atubangan niya; kag sa may pagkurog padunggi sia, basi maakig sia kag mawala kamo gikan sa dalanon, kon ang iya kaakig magadabdab sing hinali. Malipayon yadtong nagadangop sa iya!”—Salmo 2:10, 11, The New American Bible.
Karon hunahunaa. Mangin kaangay sang ano ang kahimtangan sa kalibutan kon ang Dios indi magpasilabot agod tadlungon ang mga hitabo sa kalibutan? Indi bala nga ang mga inaway, kasingki, kag dumot padayon nga magakusog subong sang natabo na sa siniglo sang tawhanon nga pagginahom? Indi bala nagkusog ini karon tubtob sa punto diin ang tanan nga katawhan ginapahog sang mga kalahadlokan sang nuklear nga inaway kag sang paghilo sini sa radyasion? Ang Armagedon aktuwal nga amo ang pinakamaayo nga butang nga mahanabo sa aton globo! Dulaon sini ang makagud, mahikugon nga dalanon sang mga pungsod. Dulaon sini ang mga sistema nga nagadala sing kasubo sa katawhan kag magahatag sing dalan para sa matarong gid nga bag-ong sistema sang mga butang diin ang tanan himu-tawo nga mga kasubo, kasakit, kag kamatayon pagadulaon sing dayon. Nian, ‘ang nahaunang mga butang magataliwan,’ suno sa saad sang Dios.—Bugna 21:4; 2 Pedro 3:13.
Dapat naton dumdumon nga ang Dios sa iya kaalam makahibalo kon ano ang pinakamaayo para sa katawhan kag kon ano ang kinahanglan nga himuon. Bisan ang tawhanon nga pangulohan nagbuko nga makig-away agod tadlungon ang daw mga inhustisya ukon agod makig-away sa kon ano ang ginahunahuna nga isa ka dungganon nga kausa. Apang ang Dios lamang ang may kaalam nga makig-away sing makatarunganon gid nga inaway. Sia lamang ang makaaway sang mapilion gid nga inaway diin ang matarong sing tagipusuon nga mga indibiduwal, diin man sila sa duta, pagaamligan. (Mateo 24:40, 41; Bugna 7:9, 10, 13-17) Kag ang Dios lamang ang may kinamatarong nga ipatuman ang iya pagkasoberano sa bug-os nga duta, kay amo ini ang iya tinuga. Huo, agod dulaon ang tanan nga agi sang mga kalautan sing dayon, tapuson ang inhustisya, mapiguson butig nga pagsimba, bisan ang kabangdanan sang sala, kag bug-os nga pakabalaanon ang ngalan sang Dios—ang Armagedon dapat awayon. Kag mangin amo ini, bangod “ang Dios gugma!”
[Laragway sa pahina 6, 7]
ANG ARMAGEDON. . .. . . magahatag sing dalan para sa paghidait