Armagedon—Gikan sa Dios sang Gugma?
“ARMAGEDON”—ano ang kahulugan sining ngalan sa Biblia? Sugdan kada pirme sang makahulugan nga panghapin, ipaguwa ang mga serye sang importante nga mga artikulo sa sini nga topiko sa apat ka guwa sang Ang Lalantawan para sa Hulyo kag Agosto 1985. Ginalauman nga ining Makasulatanhon nga paghinun-anon magapahalipay sa imo bangod sang paghibalo kon ano gid ang matuod nga ARMAGEDON.
ANO ang imo ginahunahuna kon makita mo ang tinaga nga “Armagedon”? Para sa madamu nagakahulugan ini sing masingki nga pag-inaway sa ulot sang mga superpower sang kalibutan. Ginalaragway sang madamu ang katapusan nga kapahamakan—ang nuklear nga kalaglagan nga magahimu sang aton duta nga isa ka nahapay, may radyo aktibo nga aso nga may pila lamang, kon may yara gid man, nga makalampuwas. Apang, kabaliskaran sa sinang bantog nga mga opinyon, indi amo ina kon ano gid ang Armagedon.
Ang tinaga nga “Armagedon” naghalin sa Biblia. Kag didto makita ini sing makaisa lamang—sa ika-16 nga kapitulo sang libro sang Bugna. Sa tapos masugid kon paano “ang tanan nga hari sang kalibutan” pagatipunon “sa inaway sang Dakung Adlaw sang Dios nga Labing Gamhanan,” ang tagna nagsiling: “Gintipon nila ang mga hari sa duog nga ginatawag, sa Hebreo, Armagedon.”—Mga bersikulo 13 tubtob 16, The Jerusalem Bible.
“Inaway sang Dakung Adlaw sang Dios nga Labing Gamhanan”! Sing maathag, ang Armagedon inaway sang Dios. Matuod, nagadalahig ini sa mga hari, ukon sa mga pungsod, sang kalibutan. Apang nagkari sila, indi agod makig-away sa isa kag isa, kundi agod makig-away batok sa Dios kag sa langitnon nga hangaway nga ginapangunahan sang iya gintangdo nga si Hari Jesucristo—nga ginlaragway subong nagasakay sa kabayo nga maputi. Kag ano ang resulta? Ang kasaysayan sang Biblia mabasa: “Ang mga hari sang duta kaupod sang ila mga hangaway nagtipon sing tingob sa pagpakig-away batok sa iya nga nagasakay sa kabayo kag batok sa iya hangaway. . . . Ginpatay [sila] paagi sa malaba nga espada sang isa nga nagasakay sa kabayo . . . Kag nabusog ang tanan nga pispis sa ila unod.”—Bugna 19:19-21.
Isa ka Maduguon nga Inaway
Tuman gid ka makahalapay ang Armagedon amo kon ngaa ang pagpamatay ginpatuhoyan subong ang “pag-ani sang alanyon sang duta” paagi sa matalom nga galab. “Kag ginhabyog sang manugtonda ang iya galab sa duta kag gintipon ang mga uyas sang duta, kag ginpilak niya ini sa dakung linasan sang kasingkal sang Dios. Kag ang linasan sang ubas ginlinasan sa guwa sang siudad, kag nag-ilig ang dugo gikan sa linasan tubtob sa busal sang kabayo sa kataason, sa kalayuon nga isa ka libo kag anum ka gatos ka estadyo.”—Bugna 14:15-20.
Huo, magaagay ang dugo sa idalom sang manugpatay nga hubon sang Dios. Ang 69 ka milyon nga napatay sa duha ka inaway kalibutanon diutay lamang kon ipaanggid sadtong patyon sa inaway sang Dios sa Armagedon. Nahanungod sa ila si manalagna Jeremias nagsulat: “Ang pinatay ni Jehova sa sadto nga adlaw mangin kutob sa isa ka ukbong sang duta tubtob sa isa ka ukbong sang duta. Indi sila paghayaan, ukon tipunon, ukon ilubong. Mangin ipot sila sa kadaygan sang duta.”—Jeremias 25:30-33.
Ang nagadabdab nga mga misil, kalayuhon nga talithi, kag iban pa makahalapay nga puwersa nga magaupod sa paghukom sang Dios magapakurog sa tagipusuon sang katawhan sa bug-os nga duta. Sa kagumon sila magaliso, ang kada isa batok sa iya isigkatawo, samtang ang manugpatay nga hubon sang Dios nagalatas nga wala sing pili sa edad ukon sa sekso. Kay ang Dios nagsugo sa ila nga indi magpakita sing kaluoy: “Magpanglabo kamo. Dili magpasaylo ang inyo mga mata ukon magkaawa. Patya sing bug-os ang tigulang nga lalaki, ang pamatan-on nga lalaki kag ang ulay kag ang kabataan nga magamay kag ang mga kababayin-an—sing bug-os.”—Ezequiel 9:5, 6; Zacarias 14:12, 13.
Apang paano ini mahanabo? Paano ang Dios sang gugma makahatag sina nga sugo? Ukon isa bala sia ka indi interesado, wala sing pag-ulikid, kag matimaluson nga Dios nga wala gid nagasapak sa iya tawhanon nga tinuga? Pahanabuon gid bala sang Dios sang gugma ina nga inaway sang Armagedon?