Mga Pamangkot Gikan sa mga Bumalasa
◼ Kon ang isa ka Cristiano indi makatambong sa pagsaulog sang Panihapon sang Ginuo, ano ang dapat niya nga himuon?
Importante nga tambongan sang mga Cristiano ang tuigan nga pagsaulog sang Panihapon sang Ginuo, kay si Jesus nagsiling sang ginsugdan ini: “Padayon nga himoa ini sa handumanan nakon.” (Lucas 22:19) Ginhimu ina sang dumaan nga mga Cristiano. Busa si apostol Pablo sarang makasulat tuhoy sa taga-Corinto nga mga kautoran nga kada tuig ‘nagatipon subong kongregasyon,’ ukon ‘nagakadto sing tingob,’ para sa Memoryal sang mahalaron nga kamatayon ni Jesus. (1 Corinto 11:20, The New English Bible; NW) Apang ano ang ginhimu nila tuhoy sa Memoryal sa mabudlay nga mga kahimtangan? Halimbawa, ano ang ginhimu ni Pablo sang tinuig nga nabilanggo (nga ginaguardiahan kag ayhan ginakadenahan) sa Cesaria?—Binuhatan 23:35; 24:26, 27.
Bangod sang maathag nga sugo ni Jesus, bisan si Pablo yadto sa bilanggoan sa panahon sang Panihapon sang Ginuo, pat-od nga ginrepaso niya ang Makasulatanhon nga bahin sang hitabo. Subong hinaplas sang espiritu nga Cristiano, mahimu nga ginhimu niya ang tanan nga panikasog nga mag-ambit sa labi ka nagakaigo nga mga butang nga magamit niya nga mga emblema. Ang alak kinaandan sadto nga ilimnon, busa walay sapayan nga isa ka bilanggo mahimu nga gingamit ni Pablo ang alak kag pila ka sahi sang tinapay. Labi pa gid nga amo sina sang ginbilanggo sia sang ulihi sa Roma, diin ginpahanugotan sia nga makabaton sing mga bisita. Ayhan ang iban nga mga kautoran gikan sa Roma nagtinguha sa “pagtipon sing tingob” upod sa iya sa diutay nga grupo agod saulogon ang Panihapon sang Ginuo.—Binuhatan 28:30.
Sa palibot sang duta karon, ang mga kongregasyon sang mga Saksi ni Jehova nagatipon sa petsa nga katumbas sa Nisan 14 para sa Memoryal sang kamatayon ni Cristo. Apang kon kaisa nagautwas ang dikinaandan nga mga upang. Kon kaisa ang nagabalingaso nga mga bagyo ukon baha nag-upang sa isa ka kongregasyon, ukon sa pila sang iya mga katapo, nga makigtipon sing tingob subong sang ginplano. Sa malaka nga kaso, ginpatuman ang martial law kag ang armado nga mga soldado nagadumili sa mga banwahanon nga magguwa sa balay pagkatunod sang adlaw. Ang iban nga mga Cristiano wala makatambong sa pagselebrar sang kongregasyon bangod nga naospital ukon nagmasakit sing grabe. Ano ang himuon sa sina nga mga kahigayunan?
Samtang nagakaigo para sa bug-os nga kongregasyon nga magtipon para sa sining importante nga hitabo, ang mga kahimtangan subong sang ginsambit sa ibabaw mahimu nga magapaimposible sini. Kon ang grabe nga paniempo, ang kinaugali nga kapahamakan, ukon ang kasubong sina, magapugong sa isa ka pamilya ukon sa isa ka bahin sang kongregasyon nga magtipon upod sa kongregasyon, ang mga napain mahimu makatipon kag makahinun-anon sang Makasulatanhon nga mga kasaysayan subong sang makita sa Lucas 22:7-23, 28-30 kag 1 Corinto 11:20-31, subong man makahinun-anon sang kahulugan sang okasyon. Sing kaanggid, kon ang ginapatuman nga curfew nagapaimposible para sa kongregasyon nga magtipon sa isa ka nagakaigo nga gab-i, ang pagtipon sa mga grupo sang Pagtinuon sa Libro sang Kongregasyon ukon mga grupo sang magkaingod mahimu nga amo ang pinakamaayo nga tal-us, ang kabilogan sadtong nagtalambong amo ang report sa tumalambong sang kongregasyon. Ang malip-ot nga pamulongpulong mahimu ihatag sang isa ka sangkol, dedikado nga utod nga yara sa grupo. Indi na dapat kabalak-an nga wala sing nagakaigo nga emblema nga matigayon basta nga wala sa sining emerhensia nga kahimtangan ang nag-ambit anay sa tinapay kag alak subong hinaplas nga Cristiano.
Ang Kasugoan sang Dios sa Israel may pinasahi nga kahimusan para sa isa nga wala sa posisyon nga mag-ambit sa regular nga panihapon sa Paskua; ang indibiduwal makahimu sina isa ka bulan (30 ka adlaw) sa ulihi. (Numeros 9:10, 11; 2 Cronica 30:1-3, 15) Sing kaanggid, sa isa ka sobra nga sitwasyon diin ang espirituwal nga Israelinhon indi gid makatambong ukon maserbehan sang emblema sa Nisan 14, sia makapakig-ambit 30 ka adlaw sa ulihi. Maaplikar lamang ini sa kaso sang hinaplas nga Cristiano nga napaidalom sa mando nga makig-ambit sa tinapay kag alak.—Galacia 6:16.
Sa Marso 24, 1986, pagtunod sang adlaw, ang mga kongregasyon sang matuod nga mga Cristiano sa palibot sang duta magatipon bilang pagtuman sa sugo ni Jesus: “Himoa ini sa handumanan nakon.” —1 Corinto 11:25, NE.