Mga Pamangkot Gikan sa mga Bumalasa
Kon ang isa ka Cristiano nagamasakit ukon nagabiyahe kag bangod sini indi makatambong sa pagsaulog sang Memoryal, mahimo bala niya saulugon ini pagligad sang isa ka bulan?
Sa dumaan nga Israel ang Paskuwa ginsaulog tagsa ka tuig sa ika-14 nga adlaw sang una nga bulan, nga ginhingalanan Nisan (ukon, Abib). Apang makita naton ang isa ka pinasahi nga kahimusan sa Numeros 9:10, 11: “Ipamulong sa katawhan sang Israel, nga nagasiling, ‘Kon bisan sin-o nga tawo sa inyo ukon sa inyo mga kaliwatan magdimatinlo bangod sang bangkay, ukon yadto sa panlakatan sa malayo, wala sing sapayan maghiwat sia sing paskuwa kay Jehova. Sa bulan nga ikaduha [ginhingalanan Iyyar, ukon Ziv], sa ikanapulo kag apat nga adlaw sang bulan sa kahapunon hiwaton nila ini. Kaunon nila ini nga may tinapay nga walay tapay kag may gamhon nga mapait.’ ”
Talupangda nga wala ini maghatag sing duha ka pililian nga petsa para sa Paskuwa (Nisan 14 ukon Ziv 14), sa kay bisan sin-o nga Israelinhon ukon pamilya sing kahilwayan sa pagpili, depende sa kombeniente nga kahimtangan. Ang kahimusan sa pagkaon sang Paskuwa sa ikaduha nga bulan limitado. Isa ini sadto ka eksepsion para sa isa ka Israelinhon nga mahigko sa seremonyal nga paagi sa Nisan 14 ukon malayo sa duog diin ginhiwat ang regular nga pagsaulog.
Ang narekord lamang nga hitabo nga ini lapnag nga gingamit amo ang tion diin ginpasag-uli sing matutom nga si Hari Ezequias ang pagsaulog sang Piesta sang Tinapay nga walay Tapay. Wala sadto sing tion sa paghanda para sa una nga bulan (kay indi handa ang mga saserdote ukon wala pa matipon ang mga tawo), gani ginhiwat yadto sang ika-14 nga adlaw sang ikaduha nga bulan.—2 Cronica 29:17; 30:1-5.
Magluwas sa sadtong pinasahi nga mga kahimtangan, ang mga Judiyo naghiwat sang Paskuwa sa petsa nga ginpatuman sang Dios. (Exodo 12:17-20, 41, 42; Levitico 23:5) Si Jesus kag ang iya mga disipulo nagsaulog sini suno sa ginpatuman sang Kasuguan, wala nagatamod sini nga petsa subong indi importante. Si Lucas nagareport: “Nian ang adlaw sang tinapay nga walay tapay nag-abot, nga kinahanglan ihalad ang kordero sang paskuwa. Gani ginpadala ni Jesus si Pedro kag si Juan, nga nagasiling: ‘Kadto kamo kag ihanda ninyo sa aton ang paskuwa, agod nga magkaon kita sini.’ ”—Lucas 22:7, 8.
Sa sadto nga okasyon ginpatok ni Jesus ang tuigan nga pagsaulog nga nakilal-an sang mga Cristiano subong ang Panihapon sang Ginuo. Ang kabilihanan sang pagtambong sang mga Cristiano tuman ka importante. Para sa mga Saksi ni Jehova amo ini ang pinakaimportante nga hitabo sang tuig. Ginapakita sang mga pulong ni Jesus kon ngaa; nagsiling sia: “Padayon nga himua ninyo ini sa akon handumanan.” (Lucas 22:19) Sa amo, ang tagsa sang mga Saksi ni Jehova dapat nga magplano binulan sing abanse agod nga wala sing iban nga hilimuon sa sini nga petsa sang pagsaulog. Ang Panihapon sang Ginuo lokal nga pagasaulugon sa Martes, Abril 6, 1993, pagtunod sang adlaw.
Sa malaka nga mga kaso ang pila ka wala ginapaabot nga hitabo, subong sang pagbalatian ukon indi malikawan nga pagbiyahe, mahimo makaupang sa isa ka Cristiano nga makatambong suno sa iya ginplano. Ano ang dapat himuon sa sina nga kahimtangan?
Sa tion sang pagsaulog ginapasa ang tinapay nga walay tapay kag ang mapula nga alak, kag yadtong mga hinaplas sing balaan nga espiritu sang Dios kag ginpili para sa kabuhi sa langit nagapakig-ambit. (Mateo 26:26-29; Lucas 22:28-30) Kon ang isa nga nagaambit tagsa ka tuig nagamasakit sa balay ukon sa ospital, ang mga gulang sang lokal nga kongregasyon magahimo sing kahimusan nga isa sa ila ang magadala sang pila ka tinapay kag alak sa nagamasakit, agod ipaathag sa iya ang nagakaigo nga mga teksto sa Biblia tuhoy sa topiko, kag agod iserbe ang mga emblema. Kon ang isa ka hinaplas nga Cristiano malayo sa iya kaugalingon nga kongregasyon, dapat nga magkadto sia sa kongregasyon sa duog nga didto sia sa amo nga petsa.
Bangod sini, sa idalom lamang sang tuman ka pinasahi nga mga kahimtangan nga ang isa ka hinaplas nga Cristiano magasaulog sang Panihapon sang Ginuo 30 ka adlaw pagkatapos (isa ka lunar nga bulan), nahisuno sa kasuguan sa Numeros 9:10, 11 kag sa halimbawa sa 2 Cronica 30:1-3, 15.
Yadtong mga katapo sang “iban nga karnero” nga klase ni Jesus nga may paglaum sing dayon nga kabuhi sa paraiso sa duta, wala napaidalom sa sugo nga makig-ambit sa tinapay kag sa alak. (Juan 10:16) Importante ang magtambong sa tuigan nga pagsaulog, apang wala sila nagapakig-ambit sa mga emblema. Gani kon nagamasakit ang isa sa ila ukon nagabiyahe kag gani wala sa bisan diin nga kongregasyon sa amo nga gab-i, sarang niya mabasa sing pribado ang nagakaigo nga mga kasulatan (lakip ang rekord sang pagpatok ni Jesus sang pagsaulog) kag mangamuyo sing pagpakamayo ni Jehova sa sining bug-os kalibutan nga kahiwatan. Apang sa sini nga kaso indi kinahanglanon ang dugang nga kahimusan para sa isa ka pagtilipon ukon isa ka pinasahi nga paghinun-anon sa Biblia isa ka bulan pagkatapos.