Nahiusa sa Manunuga sang Bug-os Uniberso nga Organisasyon
“Yari karon! Daw ano kaayo kag daw ano katahom sang mag-ulutod nga magpuyo sing tingob sa paghiliusa!”—SALMO 133:1.
1, 2. (a) Anong makatulublag nga bagay ang nagluntad mga 6,000 ka tuig ang nagligad? (b) Ano ang pagtawag sang Biblia sa sining balingag, kag paano niya gintinguhaan nga himuon ang iya kaugalingon nga kaangay sa Labing Mataas?
LUYAG sang Manunuga sang bug-os uniberso nga organisasyon nga huptan ini nga putli, matarong, kag nahiusa. Apang dili madugay pagkatapos sang pamuno sang pagluntad sang tawo mga 6,000 ka tuig ang nagligad, nagluntad sa bug-os uniberso nga danyag ang makatulublag nga bagay. Natabo ini sang ang labaw sa tawo nga manugpamatok nagpahilayo gikan sa organisasyon sang Manunuga kag nagtukod sang iya kaugalingon hilway nga organisasyon.
2 Bangod ginpamatokan sining balingag ang iya Manunuga, gintawag sia sang Biblia nga Satanas, nga nagakahulugan “Manugpamatok.” Sia amo ang panguna nga manugpamatok ni Jehova, ang may kinamatarong nga Soberano sang uniberso. (Job 1:6, 7) Ambisyuso nga himuon ang iya kaugalingon nga kaangay sang Labing Mataas sa paghimu sang iya kaugalingon nga organisasyon, ang Manugpamatok pirme nagtinguha sa paghulag subong karibal nga manug-organisar kag dios. Busa ginhimu ni Satanas ang iya kaugalingon nga makagalanyat. Ang panimuot ni Satanas ginpadayag sang dinastiya kag mataas kalibutanon nga posisyon nga ginkuha sang “hari sang Babilonia,” sa diin ang mga termino nga “isa nga nagasiga” kag “Lucifer” nagakaigo nga ginhatag. (Isaias 14:4, 12-14; King James Version; An American Translation) Tubtob karon, paagi lamang sa pagpahanugot ni Jehova, si Satanas amo ang “dios sining sistema sang mga butang.”—2 Corinto 4:4.
3. (a) Sa ano nga bahin sang organisasyon ni Jehova una nga nagsalakay ining manugpamatok? (b) Ano nga mga hitabo ang nagresulta sa pagkamangin gumalahom sang Yawa sa mga demonyo?
3 Ayhan agod paluyahon ang organisasyon ni Jehova, una nga ginsalakay ni Satanas ang iya pinakamanubo nga bahin, si Adan, ang gintangdo nga ulo sang tawhanon nga panimalay. (Genesis 3:1-24; Salmo 8:3-5; Roma 5:12) Sang ulihi, madamung mga manugtonda ang dimatinumanon nga nagsikway sang ila “orihinal nga posisyon,” ukon nagakaigo nga puloy-an sa langit, kag nagmateryalisar sa unod agod mangasawa kag magpuyo upod sa magayon, bisan dihimpit, nga mga babayi. (Judas 6) Ang ila mestiso nga mga anak, nga indi normal sa kadakuon kag kusog, gintawag nga Nefilim. Ini nga termino, ginpatihan nga nagakahulugan sing, “ginhulog,” nagakaigo sanglit ila ginpahanabo ang tawo nga mahulog paagi sa kasingki. Sadto anay sang panahon sang Anaw, ang dimatinumanon nga mga manugtonda nagmateryalisar liwat kag nagbalik sa espirituhanon nga duog. (Genesis 6:1–7:23) Paagi sa paghamulag sang ila kaugalingon gikan sa organisasyon ni Jehova, ginhimu nila ang ila kaugalingon nga mga demonyo, kag si Satanas nga Yawa nangin ila gumalahom.—Deuteronomio 32:17; Salmo 106:37; Mateo 12:24; Lucas 11:15-19.
4. Ano ang ginhimu sang tawhanon nga mga nakalampuwas sa Anaw, apang ano ang ginsugdan nga himuon ni Satanas, kag upod ang ano nga tuyo?
4 Sa sina nga paagi, gintukod ni Satanas ang dimakita, labaw sa tawo nga espirituhanon nga bahin sang iya organisasyon. Ang mga nakalampuwas sa Anaw, si Noe kag ang iya panimalay, nagpabilin nga nahiusa upod sa dimakita langitnon nga organisasyon ni Jehova. (Genesis 6:9; 8:18-21) Apang ginsugdan ni Satanas nga bungkagon ang katutom sang kaliwat sang matutom nga si Noe. Ano ang tuyo sang Yawa? Ti, agod paluntaron ang makita nga bahin sang iya malaut nga organisasyon!
5. Paano ginapanugda sang The Watch Tower sang Mayo 1, 1921, nga si Satanas may organisasyon?
5 Nagkinahanglan sing pila ka tion para sa International Bible Students nga mahangpan nga si Satanas may organisasyon. Apang ang The Watch Tower sang Mayo 1, 1921, nagsiling: “Indi kontento sang iya na nahimu, ginsulay ni Satanas ining langitnon nga kasoldadosan kag ginpakalain nila ang katawhan kag ginpuno ang duta sang kasingki. Gin-organisar niya ang isa ka sistema nga dimakita sang tawhanon nga mga mata, subong man ang isa ka sistema sa duta nga makita sang tawhanon nga mga mata, kag nagtinguha nga paslawon ang kada bahin sang ginbuyagyag nga plano sang Dios.”
6. Ano ang ginsiling sang The Watch Tower sang Disiembre 1, 1922, nahanungod sa katuyoan ni Satanas?
6 Ang “Katuyoan ni Satanas” amo ang subtitulo nga sa diin ang The Watch Tower sang Disiembre 1, 1922, maathag nga nagsiling: “Yara na kita karon sa malaut nga adlaw. Ang pagpakig-away amo ang sa tunga sang organisasyon ni Satanas kag sa organisasyon sang Dios. Makatalagam ini nga inaway. Ginatinguhaan ni Satanas nga laglagon ang kapagsik sang organisasyon sang Ginuo kag, kon posible, laglagon ang mga katapo sang panimalay sang mga anak. Bangod sini ginahimu niya ang bisan anong posible nga plano.”
7, 8. (a) Ngaa mabuligon nga hantupon ang duha ka antagonistiko nga mga organisasyon? (b) Sa The Watch Tower sang Marso 1, 1925, ano ang ginpakita nga batok sa malaragwayon nga “bata nga lalaki”?
7 Ang paghantup sa duha ka antagonistiko nga organisasyon nagabulig nga maathagan ang madamu nga mga panudlo kag mga tagna sang Biblia. Halimbawa, ang Bugna kapitulo 12 wala mahangpan sing husto tubtob sang magguwa ang artikulo nga “Pagkabun-ag sang Pungsod” sa The Watch Tower sang Marso 1, 1925. Ang iya teksto sang tema (Bugna 12:5, KJ) mabasa: “Kag nag-anak sia sang bata nga lalaki, nga magagahom sa tanan nga kapungsoran sa bilugon nga salsalon: kag ginsagmit ang iya bata paibabaw sa Dios, kag sa iya trono.”
8 Sa mga pahina 67 kag 68 ini nga artikulo nagsiling:
“Ano ang talalupangdon nga bahin sang balaan nga plano sa sining dag-on? . . . Ang pagtukod sang ginharian nga gintudlo sa aton ni Jesus nga ipangamuyo. Nagakahulugan ina sang pagkabun-ag sang bag-o nga pungsod, nga magagahom kag magapakamaayo sa tanan nga panimalay sa duta. . . . . Ano ang nagapamatok nga gahom nga naghimu sa mga tawo nga wala sing hinalung-ong sa sining mahimayaon nga bag-ong pungsod kag sa pagpakamaayo nga dalhon sini sa ila? . . . Si Satanas nga Yawa kag ang iya organisasyon. . . . Ang matuod nga inaway amo ang sa Dios batok sa Yawa, ang ginharian sang pagkamatarong nga magapukan sa ginharian sang kalautan kag kadudulman, kag sa baylo magatukod sang ginharian sang kamatuoran. . . . Pagkatapos sang 1918 ang organisasyon, pinansial, politikal kag eklesiastikal sang yawa, labi na ang naulihi, hayag nga nagsikway sa Ginuo kag sa iya ginharian; kag didto dayon nga ang kasingkal sang Dios batok sa pungsod nagsugod nga ipabutyag. Kutob sadto nga tion padayon ang inaway ginaaway sa duta. Antes sina natabo ang isa ka inaway sa langit.”
9. Sang 1925, ano ang ginpaathag nga amo ang “babayi” sang Bugna kapitulo 12?
9 Sayop anay nga ginhunahuna nga ang Isaias 66:7 kag ang Bugna 12:5 nagtagna sang pagkatawo sang amo man nga “bata nga lalaki.” (KJ) Gani ang ginkutlo sa hitaas nga Watch Tower nagsiling man:
“Ang ‘babayi’ maathag nga nagasimbulo sa sinang bahin sang Sion, ang organisasyon sang Dios, nga nagbun-ag sang bag-o nga pangulohan ukon pungsod nga magagahom sa mga pungsod kag sa mga katawhan sang duta paagi sa bilugon nga salsalon kag paagi sa pagkamatarong. . . . (Galacia 4:26) Sa iban nga hambal ang Sion ukon ang Jerusalem, ang organisasyon sang Dios, amo ang iloy nga nagbun-ag sa bag-o nga pungsod, ukon mga gumalahom. Ang mga hinaplas sa duta bahin sang ‘babayi’, kag pat-od nga nagarepresentar sa iya. Ang babayi nga ‘napanaptan sang adlaw’ nagakahulugan sang Sion sa langit kag sa mga nahamut-an sa duta sang organisasyon sang Dios sadtong tion nga ang Ginuo nagkari sa iya templo. . . . Karon ang iya templo nagalakip sa templo nga klase ukon nagapanapot sa ila sa iya panapton sang pagkamatarong, ang iya organisasyon nagapatubas sing bag-o nga pungsod, nga ginhingalan man nga Sion, nga nagasilak subong sang adlaw.”
10. Ano ang natabo sa espirituhanon nga bahin sang organisasyon ni Satanas, kag ano nga inaway ang ginaaway karon?
10 Ang “dragon,” ginhangop karon nga amo si Satanas nga Yawa mismo, napaslawan sa pagtukob sa “bata nga lalaki,” ang Mesianiko nga Ginharian nga nabun-ag sa langit sang matapos ang Panag-on sang mga Gentil sang 1914. (Lucas 21:24, KJ) Sang panahon sang inaway nga nagsunod sa langit, ang espiritu nga bahin sang organisasyon ni Satanas, gintagbong sa duta, nga indi na gid makasulod sa langit, kag makahimu sang wala nagapahiusa nga impluensia didto. Inang ginpaubos nga organisasyon nagahingamo karon sa makita nga bahin sang bug-os uniberso nga organisasyon ni Jehova, padayon nga nagapakig-away upod sa “nagkalabilin sang iya binhi, nga nagatuman sang mga sugo sang Dios kag nagapanaksi kay Jesus.”—Bugna 12:17.
Nahiusa nga Pag-alagad
11. (a) Kay sin-o maaplikar karon ang pinamulong ni Jesus nahanungod sa “Jerusalem nga sa ibabaw”? (b) Ano ang ginsiling ni David nahanungod sa dutan-on nga Jerusalem, diin nahamtang ang balay sa pagsimba kay Jehova?
11 Ang malaragwayon nga “babayi” sang Dios ginpaanggid sa pinili nga siudad sang Jerusalem, sing mabinalaybayon nga gintawag Sion. Busa, ang ginsiling ni Pablo nahanungod sa hilway nga “Jerusalem nga sa ibabaw” sarang karon maaplikar sa “nagkalabilin sang iya binhi” nga batok sa ila ang “dragon,” si Satanas nga Yawa, padayon nga “nagapakig-away.” (Galacia 4:26) Ang dutan-on nga Jerusalem mabakud nga gintukod kag nahiusa sing tingob sa mga adlaw ni David, nga nagsiling: “Nagkasadya ako sang magsiling sila sa akon: ‘Makadto kita sa balay ni Jehova.’ Ang aton mga tiil nagatindog sa sakop sang imo mga gawang, O Jerusalem. Ang Jerusalem amo ang ginpatindog subong sang banwa nga nabilog sing tingob, diin nagatiklod ang mga kabikahan, ang mga kabikahan ni Jah, subong pahanumdum sa Israel sa pagpasalamat sa ngalan ni Jehova.”—Salmo 122:1-4.
12. (a) Sa ano nga paghiusa naaplikar karon ang pinamulong sang Salmo 122:1-4? (b) Ano ang labot sang Jerusalem kag sang sagrado nga tabernakulo sa paghiusa sang mga kabikahan sang Israel?
12 Daw ano katahom nga paglaragway sa paghiusa sang bug-os uniberso nga organisasyon ni Jehova! Labi na nga makita ang paghiusa sa pungsodnon nga mga kapiestahan, sang ang 12 ka kabikahan sang Israel nagbuylog sa nahiusa nga pagsimba kay Jehova sa sagrado nga tabernakulo sa Jerusalem. Kag sa panahon sang pagginahom sang ila manugbantay-hari nga si David, ang mga kabikahan nagpabilin nga nahiusa indi lamang bangod sang undanon nga higut kundi labi na bangod sang organisado nga pagsimba sa ila Dios. Huo, ang Jerusalem amo ang nahamut-an sang Dios nga sentro sang nahiusa, organisado nga pagsimba sa idalom sang isa ka pagkasaserdote nga ginkuha gikan sa kabikahan ni Levi kag sa panimalay sang nahauna nga mataas nga saserdote sang Israel, si Aaron, ang magulang nga utod ni manalagna Moises. Dugang pa, ang bug-os nga 12 ka kabikahan yara sa katipan sang Kasugoan nga nagpain sa ila gikan sa tanan nagasimba sa demonyo nga mga pungsod.
13. Ano ang ginsiling ni David nahanungod sa paghiusa nga ginaagom sang dumaan nga mga Israelinhon?
13 Daw ano anay ka nagahiusa nga mga bagay ini! Ginhuptan sini ang katawhan sang Dios nga nahiusa subong isa ka pungsodnon nga organisasyon para sa ila kaluwasan kag pagpakamaayo. Amo sini ang ginsiling ni David: “Yari karon! Daw ano kaayo kag daw ano katahom sang mag-ulutod nga magpuyo sing tingob sa paghiliusa! Kaangay ini sa bilidhon nga lana sa ulo, nga nag-ilig sa bungot, sa bungot ni Aaron, nga nag-ilig sa liab sang iya mga panapton. Kaangay sang tun-og sang Hermon nga nagailig sa mga bukid sang Sion. Gikan didto si Jehova nagsugo sang pagpakamaayo, ang kabuhi sa tion nga dinapat-od.”—Salmo 133:1-3.
14. (a) Sin-o karon ang nagailog sa pungsodnon nga paghiusa sang Israel? (b) Diin ang espirituwal nga Israelinhon ginalaragway nga nagatindog, kag ano nga “ambahanon” ang ginaamba nila sing nahiusa?
14 Ang pungsodnon nga paghiusa nga nagpukaw sinang tinagipusuon nga mga ekspresyon ginpaanggiran karon. Ni sin-o? Sang “Israel sang Dios,” ang espirituwal nga mga Israelinhon nga ang iya pagkailoy gindumdom ni Pablo sang magsiling: “Apang ang Jerusalem nga sa ibabaw hilway, sia aton iloy.” (Galacia 6:16; 4:26) Wala niya ginbutang ang iya ginpanganak sang espiritu nga mga anak sa idalom sang pagkaulipon sang katipan sang Kasugoan. Samtang ang “Israel sang Dios” ginlaragway subong ginahuman sang 12 ka kabikahan, ang tanan nga 144,000 ka katapo gintandaan sang amo man nga “tanda sang buhi nga Dios,” kag ang tanan ginlaragway nga nagatindog sa isa ka langitnon nga “Bukid nga Sion.” (Bugna 7:1-8; 14:1-4) Nagahuman gid sila sa isa ka grupo sang mga manug-amba samtang nahiusa nga ginaamba nila ang “ambahanon ni Moises ang ulipon sang Dios kag ang ambahanon sang Kordero,” si Jesucristo! (Bugna 15:3, 4; Juan 1:29, 36) Inang “ambahanon” nagapahalipay kay Jehova kag nagakahulugan sing kadalag-an!
15. (a) Luwas sa pag-amba, sa ano pa gin-organisar ang 144,000? (b) Paano ang tinaga nga “organisasyon” nagakahulugan sing paghiusa?
15 Ang 144,000 kag ang ila pangulo nga Manug-amba, ang “Kordero,” gin-organisar sing labi pa sang sa pagpaguob sang mga langit bangod sang ila pag-amba. Ang ila harianon nga organisasyon magagahom sa isa ka libo ka tuig para bindikahon ang bug-os uniberso nga pagkasoberano ni Jehova kag pakamaayuhon ang tanan mabinatunon nga katawhan. (Bugna 20:4-6) Ang tinaga nga “organisasyon,” ang kabaliskaran sang “indi organisado,” nagapatuhoy sa isa ka kahimusan sang mga butang kag ang tagsa ka bahin nabutang sa iya nagakaigo nga duog kag ginhatagan sang iya asaynment nga buluhaton agod ang tanan magapanghikot sing tingob sa pagpaluntad sang isa ka resulta. Busa, ang organisasyon nagapahanabo sang paghiusa, kooperasyon, kahim-ong, kag harmoniya—indi pagbinangig.
16. Suno sa Efeso 4:8, 11-16, ano nga tulumuron ang ginpahamtang sang nagligad nga kapin sa 19 ka siglo, kag ano ang natigayon sa tunga sang mga Saksi ni Jehova?
16 Ang tulumuron sang Cristianong paghiusa ginpahamtang sang nagligad nga kapin sa 19 ka siglo, sang “ang mga dulot sang mga tawo” ginhatag sa dagway sang mga apostoles, mga manalagna, mga ebanghelista, mga manugbantay, kag mga manunudlo. Sang ang Watch Tower nga magasin ginsugdan nga ibalhag sang 1879, ang Dios naghatag man sing espirituwal nga “mga manugbantay kag mga manunudlo.” Ini nga aman nagdul-ong sa mga Saksi ni Jehova sa ila karon “pagkaisa sa pagtuo kag sibu nga ihibalo sa Anak sang Dios.” (Efeso 4:8, 11-16) Mapasalamaton gid kita nga ginhimu ini ni Jehova pagkatapos sang siniglo nga bug-os kalibutan nga kagumon kag pagkaindi organisado sa relihion!
17. Paano naton mahibaloan nga kapin pa sa paghiusa sang hinaplas nga mga Cristiano ang ginhunahuna sang Dios, kag sa sini nga bahin ano ang gintagna ni Jesus?
17 Sing maathag, ginhunahuna sang Dios ang kapin pa sa paghiusa sa hinaplas nga mga Cristiano, kay “nagbuko sia sang iya kaugalingon sang isa ka administrasyon tungod sa kabug-osan sang mga panag-on, sa pagtingob sang tanan nga butang kay Cristo, ang mga butang sa langit kag ang mga butang sa duta.” (Efeso 1:9, 10) Sa sini nga bahin, si Jesus nagtagna: “May iban ako nga mga karnero, nga indi sa sining toril; sila man dapat ko dalhon, kag magapamati sila sa akon tingog, kag sila mangin isa ka panong, isa ang manugbantay.”—Juan 10:16.
18. (a) Sin-o ang nalakip sa “mga butang sa duta” nga pagatipunon sing tingob? (b) Sang 1935, paano ginhatag ang pinasahi nga igtalupangod sa “iban nga mga karnero”?
18 Ining “iban nga mga karnero” nalakip sa “mga butang sa duta” nga pagatipunon sing tingob. Gani, sa idalom sang impluensia sang espiritu sang Dios, mga 21 ka tuig pagkatapos ginsugdan ni Jesucristo ang paghari sang 1914, ginhatag ang pinasahi nga igtalupangod sa “iban nga mga karnero.” Sa isa ka kombension sang mga Saksi ni Jehova sa Washington, D.C., sang 1935, ang presidente sang Watch Tower Society nagpaathag nga ang “dakung kadam-an” amo ang “iban nga mga karnero” nga pagatipunon sa ulihi sang Maayo nga Manugbantay, si Jesucristo. (Bugna 7:9-17, KJ) Gintipon bala ni Jesus ang iban sang “iban nga mga karnero” sa sinang talalupangdon nga kombension? Huo, kay 840 ka nagtalambong sadto ang nagkilala sang ila kaugalingon subong gintipon sang Maayo nga Manugbantay kag ginbawtismohan bilang simbulo sang ila dedikasyon kay Jehova nga Dios.
19. (a) Tubtob karon, daw ano kadaku ang “dakung kadam-an”? (b) Paagi sa paghiusa upod sa makita nga organisasyon sang Dios, ang “dakung kadam-an” nahiusa upod kay sin-o, kag ano ang ila determinasyon?
19 Ginsugdan lamang sadto ang pagtipon sa “dakung kadam-an” sang “iban nga mga karnero,” nga nagadamu na karon sing kapin sa 2,800,000. Paagi sa paghiusa sa makita nga bahin sang organisasyon sang Dios—kon sayuron, sa nagkalabilin sang “diutay nga panong” “sining toril” sang Maayo nga Manugbantay—nangin nahiusa sila upod sa Daku nga Manunuga sa bug-os nga uniberso nga organisasyon. Kag determinado sila nga huptan ina nga paghiusa sa bug-os nila nga pagkabuhi sing dayon sa Paraiso nga duta nga iaman sang Supremo nga Manugbantay, si Jehova, para sa ila.—Lucas 12:32; 23:43.
20. Samtang ginapamalandogan sang hinaplas nga nagkalabilin kag sang “dakung kadam-an” kon ano ang ginhimu sang Supremo nga Manugbantay kutob sang 1914, anong mga ekspresyon ang napahulag nga ipabutyag nila?
20 Samtang ginapamalandongan sang hinaplas nga nagkalabilin kag sang nagadugang nga “dakung kadam-an” ang nahimu sang Supremo nga Manugbantay sa bug-os nga uniberso kutob sang matapos ang Panag-on sang mga Gentil sang 1914, ang bug-os tinagipusuon nga pasalamat nagpahulag sa ila nga iamba sing tingob ang daku Hallelujah nga salmo: “Dayawa ninyo si Jah! Dayawa ang Dios sa iya balaan nga duog. Dayawa sia sa kahawaan sang iya gahom. Dayawa sia tungod sa iya gamhanan nga mga buhat. Dayawa sia suno sa pagkahalangdon sang iya pagkadaku. Dayawa sia sa tunog sang budyong. Dayawa sia sa salterio kag arpa. Dayawa sia nga may pandereta kag sinaot. Dayawa sia sa mga tulunggon nga may mga kuerdas kag sa lantoy. Dayawa sia nga may mga apiping nga matagsing. Dayawa sia nga may mga apiping nga mataas sing tunog. Ang tagsa ka butang nga may ginhawa—magdayaw kay Jah. Dayawa ninyo si Jah!”—Salmo 150:1-6.
21. (a) San-o ang “tagsa ka butang nga may ginhawa” magadayaw kay Jehova? (b) Kay sin-o kag sa anong katuyoan ang tanan nga katapo sang bug-os uniberso nga organisasyon nagapangabudlay?
21 Sa dili madugay ang karon nga “mga langit” kag “duta” dulaon sa tunga sang “inaway sang dakung adlaw sang Dios nga Labing Gamhanan,” kag ang madugay na ginahulat nga “bag-ong mga langit kag bag-ong duta” tukoron sing dimapukan. (2 Pedro 3:7-13; Bugna 16:14, 16) Nian, sa pagkamatuod, ang “tagsa ka butang nga may ginhawa” nga makalampuwas sa sining natinloan nga duta magadayaw kay Jah, ang Daku nga Manunuga sang bug-os uniberso nga organisasyon sang pagkamatarong. Ang tanan nga mga katapo sina nga organisasyon sa langit kag sa duta malipayon nga magadayaw kay Jehova kag matutom kag mahigugmaon nga magapangabudlay upod sa iya para sa dayon nga pagbindikar sa iya bug-os uniberso nga pagkasoberano kag pagpakabalaan sa iya labing takus nga ngalan. O daw ano ka halangdon nga paghiusa ang ginapakita sini tanan!
Paano Mo Sabton?
◻ Ano nga mga hitabo ang nagdul-ong sa pagkamangin gumalahom ni Satanas sa mga demonyo?
◻ Ngaa mabuligon nga hantupon ang sa ulot sang duha ka dalagku nga organisasyon?
◻ Sa ano nga paghiusa naaplikar ang Salmo 122:1-4 karon?
◻ Ngaa masiling nga kapin pa sa paghiusa sa hinaplas nga sumulunod ni Jesus ang ginahunahuna ni Jehova?
◻ San-o ang “tagsa ka butang nga may ginhawa” magadayaw kay Jehova nga Dios?
[Mga Laragway sa pahina 16, 17]
Ang katawhan ni Jehova pirme nga nahiusa sa isa kag isa kag sa Manunuga sang bug-os uniberso nga organisasyon