Ang Kabuhi kag Ministeryo ni Jesus

Mga Mensahe Gikan sa Langit

ANG bug-os nga Biblia, sa katunayan, mensahe gikan sa langit, nga gin-aman sang aton langitnon nga Amay sa pagtudlo sa aton. Apang, duha ka pinasahi nga mga mensahe ang ginhatag sang halos 2,000 ka tuig nga nagligad sang isa ka manugtonda nga “nagatindog malapit sa atubangan sang Dios.” Ang iya ngalan amo si Gabriel. Usisaon naton ang mga sirkunstansia sining duha ka importante nga pagduaw sa duta.

Ang tuig amo ang 3 B.C.E. Sa kabungyoran sang Judea, ayhan indi malayo sa Jerusalem, nagapuyo ang isa ka saserdote ni Jehova nga ginahingalanan Zacarias. Tigulang na sia, kag amo man ang iya asawa nga si Elizabeth. Kag wala sila sing bata. Si Zacarias nagahimu anay sadto sang iya turno sa saserdotenhon nga pag-alagad sa templo sang Dios sa Jerusalem. Sing hinali nagpakita si Gabriel sa natuo nga bahin sang altar sang insenso.

Hinadlokan katama si Zacarias. Apang ginpakalma ni Gabriel ang iya kahadlok kag nagsiling: ‘Ginpamatian sang Dios ang imo mga pangamuyo. Si Elizabeth magabata, kag hingalanan mo sia nga Juan. Ihanda niya para kay Jehova ang isa ka nahanda nga katawhan.’ Apang indi makapati si Zacarias. Daw imposible gid katama nga, sa ila edad, sia kag si Elizabeth, makabata pa. Gani si Gabriel nagsiling, ‘Bangod wala mo ako pagpatihi, indi ka makahambal tubtob matabo ining mga butang.’

Bueno, samtang, ang mga tawo sa guwa natingala kon ngaa si Zacarias tuman kadugay sa templo. Sang magguwa sia sang ulihi, indi na sia makahambal apang makasenyas lamang paagi sa iya kamut, kag nahibal-an nila nga may nakita sia nga labaw sa kinaugali.

Pagkatapos sang pag-alagad ni Zacarias sa templo, nagpauli sia. Kag wala madugay sang ulihi natabo gid ini—si Elizabeth nagmabdos! Samtang nagahulat sia nga mabun-ag ang iya bata, si Elizabeth nagpabilin sa balay malayo gikan sa mga tawo sa lima ka bulan.

Yari karon! Si Gabriel nagpakita liwat. Kag kay sin-o sia nakighambal? Sa isa ka lamharon nga lin-ay nga nagahingalan kay Maria gikan sa banwa sang Nasaret. Ano nga mensahe ang ginhatag niya sa sini nga tion? Pamatii! ‘Magamabdos ka kag magaanak sing anak nga lalaki, kag hingalanan mo sia nga Jesus,’ siling ni Gabriel. ‘Mangin daku sia nga hari, kag ang iya ginharian wala sing katapusan.’

Mapat-od naton nga ginbatyag ni Gabriel nga pribilehiyo nga ihatag ining mga mensahe. Kag samtang ginabasa naton sing dugang ang tuhoy kay Juan kag kay Jesus sa palaabuton nga mga guwa sining magasin, makita naton sing maathag kon ngaa ining mga mensahe gikan sa langit importante gid. 2 Timoteo 3:16; Lucas 1:5-33.

◆ Anong duha ka importante nga mensahe ang ginhatag gikan sa langit?

◆ Sin-o ang naghatag sang mga mensahe, kag kay sin-o ini ginhatag?

◆ Ngaa ang mga mensahe tuman kabudlay patihan?