Nagbata si Elisabet

Pagligad sang 400 ka tuig sa tapos mapatindog liwat ang mga pader sang Jerusalem, ang saserdote nga si Zacarias kag ang iya asawa nga si Elisabet nag-istar malapit sa siudad. Madugay na sila nga mag-asawa pero wala sila sing bata. Isa ka adlaw, sang naghalad si Zacarias sing incienso sa santuaryo sang templo, nagpakita sa iya ang anghel nga si Gabriel. Hinadlukan si Zacarias, pero si Gabriel nagsiling: ‘Indi magkahadlok. May maayo ako nga balita sa imo halin kay Jehova. Ang imo asawa nga si Elisabet magabun-ag sing isa ka bata nga lalaki kag ngalanan ninyo sia nga Juan. Ginpili ni Jehova si Juan para sa pinasahi nga hilikuton.’ Nagsiling si Zacarias: ‘Daw indi ako magpati sa imo. Tigulang na kami nga mag-asawa kag indi na makabata.’ Si Gabriel nagsiling: ‘Ginpadala ako sang Dios sa pagsugid sa imo sini nga balita. Pero bangod indi ka magpati sa akon, indi ka makahambal asta sa adlaw nga mabun-ag ang lapsag.’

Nadugayan si Zacarias sa sulod sang santuaryo. Gani sang naggua sia, ginahulat sia sang mga tawo kay gusto nila mabal-an kon ano ang natabo. Indi makahambal si Zacarias. Nagasenyas lang sia. Dayon nahibaluan sang mga tawo nga nakabaton si Zacarias sing mensahe halin sa Dios.

Sang ulihi, nagbusong si Elisabet kag nagbata sang lapsag nga lalaki, suno sa ginsiling sang anghel. Nagkadto ang iya mga abyan kag mga paryente para makita ang lapsag. Nalipay gid sila para sa iya. Si Elisabet nagsiling: ‘Juan ang iya ngalan.’ Nagsiling sila: ‘Wala sa pamilya ninyo nga Juan ang ngalan. Zacarias na lang para pareho kay tatay niya.’ Pero si Zacarias nagsulat: ‘Juan ang iya ngalan.’ Sa sina mismo nga tion, nakahambal liwat si Zacarias! Naglapta sa bilog nga Judea ang balita parte sa lapsag, kag nagapamensar ang mga tawo: ‘Ano ayhan ang himuon sini nga bata pagdaku niya?’

Dayon napuno si Zacarias sang balaan nga espiritu. Nagtagna sia: ‘Dayawon si Jehova. Nagpromisa sia kay Abraham nga magapadala Sia sing manluluwas, ang Mesias, agod luwason kita. Si Juan mangin manalagna, kag ihanda niya ang dalan para sa Mesias.’

May pinasahi man nga natabo sa paryente ni Elisabet nga si Maria. Istoryahan naton ini sa masunod nga leksion.