Ginapalantang Bala sang Dios ang Iya Paghukom?

HANDURAWA nga may ginahulat ka nga isa ka bisita gikan sa iban nga banwa nga nagsugid sa imo sang adlaw sang iya pag-abot apang indi sang takna. Samtang nagaligad ang tion, kag wala pa sia gihapon mag-abot, nagasugod ka sa pagpalibog kon bala napalantang sia. Amo gid bala ini ang adlaw nga siling niya magakari sia? Ukon may yara bala nga dipaghangpanay? Sing amat-amat, ang indi lamang pagpailob primero, nangin makapagumon, isa ka butang nga ginatawag pangduhaduha.

Nagalaragway ini sing maayo kon ano ang ginabatyag sang iban nga mga tawo nahanungod sa ginsaad nga pagkari sang panahon sang paghukom sang Dios batok sa mga malauton. Ti, madugay na ini nga ginahulat sang iya mga sumilimba. Halimbawa, binagbinaga ang matutom nga si Hari David. Sang nagligad nga kapin sa 3,000 ka tuig nagsiling sia: “Si Jehova sa imo tuo nagabuno sa mga hari sa adlaw sang iya kasingkal. Magahukom [sia] sa tunga sang mga pungsod.” Busa mabasol bala ang bisan sin-o karon sa pagpamangkot, San-o?—Salmo 110:5, 6.

Paagi sa pagpaanggid sa mga kahimtangan sang kalibutan sa tagna sang Biblia kag sa pagbinagbinag sa kronolohiya sang Biblia, ang hanuot nga mga estudyante sang Biblia kombinsido gid nga ang adlaw sang paghukom sang Dios malapit na. Apang indi bala nga amo man sina ang ginbatyag sang madamu nga mga tawo sang nagligad, kag nasapwan nila sang ulihi nga nagsayop gali sila? May yara bala sigurado nga paagi sa paghibalo sing husto kon san-o magahukom ang Dios?

Sa “Gintalana nga Tion” sang Dios

Ginpakita ni Jesus nga ang paghukom mahanabo sa pat-od nga tion. Apang sang ginpaandaman ang iya mga sumulunod, nagsiling sia: “Padayon sa pagmata, kay wala kamo makahibalo kon san-o ang gintalana nga tion.”—Marcos 13:33.

Si Habacuc, gintangdoan sang Dios sang mga anum ka siglo sang nagligad nga isulat ang tuhoy sa balaan nga paghukom, nagsiling nga mahanabo ini “sa gintalana nga tion.” Kag subong paandam batok sa pagkadimapailubon, ukon ayhan sa pagkamaduhaduhaon, nanaad sia sa tuytoy sang Dios: “Ini indi magbutig. Bisan magpalantang, hulata ini; kay sa pagkamatuod magaabot ini. Indi ini magpalantang.”—Habacuc 2:2, 3.

Apang kon ang paghukom sang Dios “sa gintalana nga tion” kag “indi ini magpalantang,” ngaa nagsiling si Habacuc nga “bisan magpalantang”? Sing maathag agod ipakita nga ang iban sang katawhan sang Dios magapaabot sini sing mas temprano sang sa kon san-o gid ini mahanabo. Ngaa? Bangod ang eksakto nga tion sang pagkari sini magapabilin nga wala nila mahibaloi.

Samtang yari pa sa duta, bisan si Jesus wala makahibalo sang eksakto nga tion, kay sia nagsiling: “Nahanungod sa adlaw ukon sa takna wala sing nakahibalo, bisan ang mga anghel sa langit ukon ang Anak, kundi ang Amay lamang.” (Marcos 13:32) Apang, ang nahibal-an niya amo ang panag-on sang tion nga mahanabo ang paghukom. Busa, sa pangabay sang iya mga disipulo, naghatag sia sing tanda nga magahimu sa ila nga makilal-an ining panag-on sang tion kon magasugod na ini. Ang iya nahauna nga pamatuod, siling ni Jesus, mangin “kaangay sang nahauna nga kasakit sang pagbun-ag.” Karon, siempre pa, ang nagamabdos nga ginasakitan wala makahibalo sang eksakto nga tion nga mabun-ag ang iya bata. Apang, nahibal-an niya nga malapit na ang iya pagbun-ag.—Mateo 24:3-8, Today’s English Version.

“Ining Kaliwatan Indi nga Mas-a Magtaliwan”

Luwas sang paghibalo kon san-o magaabot ang panag-on sang tion para sa balaan nga paghukom, nalatiran ni Jesus ang kalawigon sini. Nagagamit sang ilustrasyon sang kahoy nga higuera, nagsiling sia: “Kon ang iya sanga manglumbay kag manghumlad ang iya mga dahon, mahibal-an ninyo nga malapit na ang tingadlaw. Amo man, kon makita ninyo ining tanan nga butang, mahibal-an ninyo nga sia malapit sa mga gawang na. Sa pagkamatuod nagasiling ako sa inyo ining kaliwatan indi nga mas-a magtaliwan tubtob ining tanan nga butang matuman.”—Mateo 24:32-34.

Busa ang paghukom pagahimuon sa sulod sang kalawigon sang pagkabuhi sang mga tawo nga nakakita sang nahauna nga pamatuod sang panag-on sang tion nga gintagna ni Jesus. Ang ginsugoran sining panag-on sang tion magatanda sang pamuno sang katapusan sang kalibutan ni Satanas, nga batok sa iya ang bag-o natukod nga Ginharian sang Dios sa langit magapatuman sang balaan nga paghukom. Ang kronolohiya sang Biblia kag ang katumanan sang tagna sang Biblia nagahatag sing nagakaigo nga pamatuod nga ining panag-on sang tion nagsugod sang 1914.a

Busa antes ang kaliwatan sang 1914 bug-os nga madula, ang bug-os nga paghukom sang Dios dapat nga himuon. Madamudamu pa gawa ini nga kaliwatan. Halimbawa, sang 1980 may yara pa gihapon 1,597,700 ka tawo nga buhi sa Republika Pederal sang Alemanya nga natawo sang 1900 ukon antes pa. Mas madamu pa kuntani ang kadamuon kon ang minilyon nga mga banwahanon sini wala mapatay sadtong duha ka kalibutanon nga inaway.

Sang magsaad nga “ining kaliwatan indi nga mas-a magtaliwan,” gingamit ni Jesus ang duha ka Griegong negatibo nga ou kag me. Ang The Companion Bible nagapaathag sini nga paggamit subong sang masunod: “Ang duha ka negatibo kon tingubon nadulaan sang ila kaugalingon nga mga kahulugan, kag nagahuman sa pinakamakusog kag pinakaempatiko nga pagpasalig [pagpalig-on].” Karon lamang, sa tion nga daw ang kaliwatan magtaliwan kuntani antes ini tanan matuman, nga ang ginsiling ni Jesus nga “indi nga mas-a” may matuod nga importansia.

Pagtilaw sang Pagtuo

Ang nagapaandam nga pinamulong ni Habacuc nagapakita nga may daw hayag nga pagpalantang sa paghukom sang Dios, nagapangalagad subong pagtilaw sang pagtuo. Sing makatarunganon ini nga pagtilaw indi magaabot tubtob sa talipusposan sang kaliwatan nga ginahambalan ni Jesus. Nahanungod sa halimbawa sa ginsugoran sini nga artikulo, binagbinaga ini: San-o ka magasugod sa pagduhaduha nga ang imo bisita magaabot? Pat-od nga indi sa alas nuebe sa aga, ukon sa udto, ukon sa kahaponanon na. Apang mahimu nga ang imo pagtuo pagatilawan kon magaabot na ang kagab-ihon. Walay sapayan, dumduma nga bisan sa alas 11:30 s.g. ang imo bisita may yara gihapon bastante nga tion nga makaabot bilang pagtuman sa iya saad!

Wala sing rason nga paligban nga ang Pulong sang Dios indi matuman. Wala gid ini mapaslawi. Ang ginsiling ni Josue sa mga Israelinhon sang nagligad nga kapin sa 3,000 ka tuig matuod gihapon karon subong sang una: “Wala sing isa ka butang nga nakulang sa tanan nga butang nga maayo nga ginpamulong nahanungod sa inyo ni Jehova nga inyo Dios. Ang tanan nahanabo sa inyo. Wala sing isa ka butang nga nakulang sa ila.”—Josue 23:14.

“Nahanungod sa katumanan sang saad daw natural para sa aton, kag para sa katawhan, nga magmangin dimapailubon kag paabuton nga pagahimuon ang mga bagay sing mas madasig sang sa masami nga nagakatabo ini.” Amo ini ang ginsiling sang The Watch Tower sa iya Mayo 1, 1910, nga guwa, nga nagadugang: “Indi ini pagpalantang kon tuhoy sa aton pagpaabot, kundi makapat-od kita nga wala sing pagpalantang nahanungod sa balaan nga tinutuyo . . . wala kita sing pangduhaduha nga ang mga resulta matigayon sa kabug-osan sang tion—sa tion sang Dios.”

Sa pagpanumdom, ang matutom nga mga Cristiano nga nagakabuhi karon makakita sing maayong mga rason kon ngaa wala pa paghimua ang paghukom sang Dios. Sa kamatuoran, nagakalipay sila nga wala pa ini paghimua. Ang amon masunod nga artikulo magapaathag kon ngaa.

[Footnote]

[Laragway sa pahina 4]

Madamu sang kaliwatan sang 1914 ang nagalaum nga makita “nga mahanabo ining tanan nga mga butang”