Kon Ngaa Wala Pa Paghimua sang Dios ang Iya Paghukom

MGA duha ka dekada pagkatapos mapatay si Jesus, ang iban nga mga Cristiano nagpaabot na kay Jehova nga “mag-abot” sa paghukom. Nagtiklod ini kay apostol Pablo nga sulatan sila, nga nagasiling: “Ang adlaw ni Jehova . . . indi mag-abot kon indi anay mag-abot ang apostasya kag mapahayag ang tawo sang pagkamalinapason, ang anak sang kalaglagan.” Bisan pa nga ginbaton ni Pablo nga ang “misteryo sining pagkamalinapason” “nagapanghikot na” sa iya kaadlawan, maathag nga indi ini sa kasangkaron nga ginakinahanglan, agod magaabot ang balaan nga paghukom.—2 Tesalonica 2:2, 3, 7, 8.

Ang Duha ka Pagtipon

Ang apostasya, bisan pa sigurado nga magaabot, indi magaupang sa katuyoan sang Dios nga pilion ang 144,000 ka matutom nga mga Cristiano nga mangin kaupod nga gumalahom sang iya Anak, si Jesus, sa langit. (Tan-awa ang Bugna 14:1-5.) Pagkatapos lamang nga makompleto ang ila kadamuon kag mapat-inan gid man sila sang ulihi sang Dios nga ang paghukom ni Jehova mahanabo. Ang Bugna 7:2, 3 nagapaathag: “Sa apat ka manugtonda [ginsiling ini]: ‘Dili ninyo pagsamara ang duta ukon ang dagat ukon ang kakahoyan [paagi sa pagpahuyop sa malaglagon nga mga hangin sang paghukom sang Dios batok sa mga pungsod], tubtob sa tapos mapat-inan namon ang mga ulipon sang aton Dios sa ila mga agtang.’” Subong sang nahibaloan na naton, ini nga hilikuton wala matapos sang ang Ginharian gintukod sang 1914.

Busa, bisan pa nga ang iban malaumon nga basi pa lang, ang paghukom sang Dios wala mag-abot sadto nga tion. Ang Enero 1, 1914, nga guwa sang The Watch Tower naghatag sing hulot sa sini nga hitabo, nagasiling nga bisan pa “ang Tuig 1914 amo ang katapusan sang ginatawag sang Biblia nga ‘Panag-on sang mga Gentil’ . . . makasalig gid kita nga ini nga tuig, 1914, magasaksi sing subong kahinali kag kaabtik nga mga pagbalhin sang pagpalapnag subong sang ginapaabot naton.” Apang, subong sang padayon nga ginpaathag sang artikulo, ang mga Cristiano mapasalamaton nga ang kronolohiya sang Biblia nagpabugtaw sa ila sa pagkalapit sang balaan nga paghukom. Nagsiling ini: “Nagapati kami nga ang kronolohiya isa ka pagpakamaayo. Kon ginapabugtaw kita sini sing pila ka minuto sing mas temprano ukon pila ka oras sing mas temprano sa aga sang sa indi kita magbugtaw, maayo ini! Ang mga nagabugtaw amo ang makatigayon sang pagpakamaayo.”

Sa tunga man sadtong makatigayon sang pagpakamaayo amo ang ginalaragway sang Biblia nga “dakung kadam-an, nga wala sing tawo nga makaisip, gikan sa mga pungsod kag mga kabikahan kag katawhan kag hambal.” Tubtob lamang sang 1935 nga nahangpan sing bug-os nga ining “dakung kadam-an” pagahumanon sang mga tawo nga “nagguwa gikan sa dakung kapipit-an,” nga buot silingon, yadtong nagbiya sa organisasyon ni Satanas kag nagdampig sa Dios, agod makalampuwas sa paghukom sang Dios. Sing mga lima na ka dekada karon, ang hilikuton nga pagtipon sa sining “dakung kadam-an” ginahimu nahisuno sa katuyoan sang Dios. Nagakalipay kita nga ang balaan nga paghukom wala paghimua tubtob ining nagaluwas kabuhi nga hilikuton matapos.—Bugna 7:9, 14.

Mga Hitabo sa Politika

Gintagna man ang mga hitabo sa politika nga mahanabo antes ang paghukom sang Dios. Ang katuyoan sang tagna sang Biblia nahanungod sa “duha ka hari” (kapitulo 11) maathag na karon nga makita nga nagapadulong sa katapusan.a Sa katapusan sini nga katumanan, ang Dios magahukom.—Daniel 2:44.

Bisan pa nga nagainaway sa isa kag isa, ang mga su­per­pow­er kag ang ila mga bloke—“ang hari sang bagatnan” kag “ang hari sang aminhan”—lunsay nagarepresentar sa tugob-globo nga organisasyon sa politika nga nagatiklod sa mga tawo sa karon nga “magkatingala sing makadalayaw.” Daw ano ka nagakaigo nga paglaragway sa tapos ang Inaway Kalibutanon I nga Liga de Nasyones kag sa iya pagkatapos ang Inaway Kalibutanon II nga tal-us, ang organisasyon sang Nasyones Unidas.—Daniel 11:40; Bugna 17:8.

Nabahinbahin sa ideolohiya kag politika, apang sa amo man nga tion “nahiusa,” ining “duha ka hari” madamu sing masiling nahanungod sa pag-amlig sa bug-os kalibutan nga “paghidait kag kalig-onan.” Ini, man, importante, kay ang tagna sang Biblia nagasiling nga “kon sila magasiling: ‘Paghidait kag kalig-onan!’ nian sa hinali ang kalaglagan magaabot sa ila.” Kon tubtob diin ining “duha ka hari,” sing nabahinbahin kag sing nahiusa sa organisasyon sang Nasyones Unidas, makalubad sa mga problema sa politika, ekonomiya, palibot, kag sosyal sang kalibutan agod makatarunganon nga masinggit ini, wala kita karon makahibalo.—1 Tesalonica 5:2, 3.

Apang, nahibaloan naton nga sa sulod sang iya pagginahom, ang organisasyon sang Nasyones Unidas, kaupod sang iya tanan katapo nga mga pungsod—lakip ang pinakabantog sining “duha ka hari”—magaagom sang paghukom sang Dios kag ‘pagalaglagon.’ Nahibaloan naton nga ang 1914 nga kaliwatan yara na sa kagab-ihon sang iya pagluntad, hanti nagahatag lamang sing diutay nga tion nga matuman pa ini nga tagna. Apang nahibaloan man naton—kay si Jesus mismo nagsaad sa aton—nga “ining kaliwatan indi nga mas-a magataliwan tubtob ining tanan nga mga butang mahanabo.”—Bugna 17:11; Marcos 13:30.

Indi Magapalantang si Jehova—Ikaw Bala?

Kon nagatuon ikaw sang Biblia kag nakahibalo nahanungod sa mga katuyoan ni Jehova, indi magpalantang sa pagpalagyo sa simbuliko nga duog sang pagpangamlig sang Dios. “Pangitaa ang pagkamatarong, pangitaa ang kalum-ok,” agod nga “basi pa lang malipdan ka sa adlaw sang kasingkal ni Jehova.”—Sofonias 2:1-3.

Panumdoma ang nahaunang-siglo nga mga Cristiano nga nalagyo gikan sa Jerusalem sang 66 C.E. sang matalupangdan nila ang tanda nga ginhatag ni Jesus tuhoy sa nagahilapit nga paghukom sa sini. Ang bisan sin-o nga nagpalantang sang ila pagpalagyo—bangod sang bisan ano nga mga rason—mahimu nga pakalmahon sang sayop nga igbalatyag sang kalig-onan sang ang mga Romano, nga naglikop sa siudad kag nian wala ginapaabot nga nag-isol, wala makabalik. Nagligad ang mga senemana. Ang senamana nangin binulan. Ang binulan nangin tinuig. Ang iban mahimu nga naghunahuna nga ginpalantang ni Jehova ang paghimu sang iya paghukom. Apang sing hinali nagbalik ang mga Romano sang 70 C.E. Yadtong yara sa sulod sang siudad, wala makapalagyo.—Lucas 21:20-22.

Sa pihak nga bahin, ang mga tawo karon, nga nagdedikar na sang ila kabuhi nga himuon ang kabubut-on sang Dios kag nalagyo na sa iya duog sang kaluwasan, indi dapat magpalantang sa pagtuman sang ila Cristianong mga obligasyon. Indi sila dapat maglikaw nga ibantala ang mensahe sang paghukom ni Jehova subong sang gintinguhaan nga himuon ni Jonas sang ginsugo sia nga paandaman ang mga taga-Nineve tuhoy sa balaan nga paghukom. Indi man kita mag-untat sa pagpangabudlay, subong sang ginhimu niya, bangod ang mga bagay wala mahanabo subong sang ila ginapaabot ukon subong kadasig sang ila ginlauman.—Jonas 1:1, 2; 4:2, 5, 10, 11; 2 Pedro 3:15.

Sing nagakaigo ang The Watch Tower sang Hunyo 1, 1906, nagsiling nahanungod sa paghukom sang Dios: “Bug-os nga ipadayag sang tion ang balaan nga kaalam sa daw walay kaluoy nga pagpalantang para sa makitid sing hunahuna nga mga tawo . . . Maluluy-on nga gindala kita sang Dios sa iya pagtamod kag nag-agda sa aton nga tan-awon ang mahimayaon nga palaabuton . . . kag sa proporsion nga masarangan naton hangpon kag sa pagpati sini, mahimu kita magapahuway kag magakasadya sa sini. Apang sa karon, subong nga maluluy-on nga napreskohan sang makalilipay nga palaabuton, mapailubon naton nga hulaton ang katapusan, bisan kon daw ano man kasakit ang panag-on sang paghulat.”

Kag magahulat kita, upod ang bug-os nga pagpati nga: “Magaabot ini. Indi ini magpalantang.”—Habacuc 2:3.

[Footnote]

[Kahon sa pahina 6]

KON ANO ANG MAGAUNA SA PAGHUKOM

Ang apostasya—2 TESALONICA 2:2, 3

Ang pagpat-in sa 144,000—BUGNA 7:2, 3

Ang pagtipon sa “dakung kadam-an” agod makalampuwas—BUGNA 7:14

Ang pagluntad sang Liga de Nasyones kag sang ulihi sang Nasyones Unidas—BUGNA 17:8

Ang katapusan nga pag-inaway sang duha ka dalagku nga bloke sang mga pungsod—DANIEL 11:40, 44, 45

Ang tugob-globo nga pagsinggit sang “Paghidait kag kalig-onan”—1 TESALONICA 5:2, 3

[Laragway sa pahina 7]

Ginkabig ni Pedro ang pagpailob sang Dios nga kaluwasan, samtang si Jonas nagyamo. Kay sin-o halimbawa ang imo sundon?