Ginaabiabi Kamo sa 1985 “Mga Nagahupot Integridad” nga Kombension!

ANG mga Saksi ni Jehova bantog indi lamang bangod sang ila makugi nga pamalaybalay nga pag-alagad kundi bangod man sang ila dalagku nga Cristianong mga kombension. Ginahimu na ini sa kapin sa isa ka gatos ka tuig karon, kutob pa sadtong 1879. May yara maayong Makasulatanhon nga pagsulondan para sa sining mga kombension.

Tatlo ka beses kada tuig ang mga Israelinhon ginkinahanglan nga magtipon sing tingob para sa ila mga kapiestahan. Ginkabig ini ni Jehova nga tuman ka importante amo kon ngaa ginsulitsulit niya nga ipapadaku kay Moises ini sa Pentateuch. Tan-awa ang Exodo 23:14-17; 34:22-24; Levitico 23:4-22; Numeros 28:16–29:12; Deuteronomio 16:1-16. Mabasa man naton nga ang mga ginikanan ni Jesus regular nga nagkadto sa Jerusalem para sa kapiestahan sang Paskua.—Lucas 2:41, 42.

Sa sulod sang 38 ka tuig na karon, ang mga asambleya sang mga Saksi ni Jehova nagasunod sa talaksan nga kaanggid sa iya sang dumaan nga Israel. Makaduha kada tuig nagakalipay kita nga magtipon sing tingob sa aton sirkito nga mga asambleya, nga nagalakip sang mga 8 tubtob 20 ka kongregasyon. Nian malangkagon naton nga ginahulat ang pagtipon sing makaisa kada tuig para sa aton distrito, nasyonal, ukon internasyonal nga mga kombension. Ginaapresyar gid bala naton sing daku ini nga mga pagtinipon? Indi tanan sang aton mga kautoran sa bug-os nga duta ang may amo sini nga pagpakamaayo. Busa ang ulihi nga report gikan sa Balkan nga pungsod diin ang hilikuton madugay na nga gindumilian nagasugid nga “sa nahauna nga tion makahiwat na kami sing distrito nga kombension sa publiko nga tiliponan . . . Ang mga kautoran nalipay gid katama sa sini.”

May rason sila nga magmalipayon, kay daw subong bala nga kon mas madamu nga mga Saksi ang nagatipon sing tingob mas daku ang kalipay. Ang isa ka pungsod nagreport sang 1983 nga “ang ‘Nahiusa sa Ginharian’ nga Kombension sang Disiembre amo gid ang pinakaimportante sa tuig,” kag ginlaragway ini sang isa subong ang “putokputokan sang tuig.” Indi katingalahan nga kalabanan sang mga Saksi ni Jehova nagaplano na, sing masami nga nagasakripisyo sing daku sang kaugalingon, nga tambongan ang distrito nga mga kombension sa bug-os nga tatlo kag tunga ka adlaw.

Sang nagligad nga tuig may pribilehiyo kita nga makatambong sa “Pag-uswag sa Ginharian” nga mga kombension. Nagakaigo gid ang tema sang programa bangod sang dalagku nga mga pag-uswag sa mga manugbantala sang Ginharian sa bug-os nga kalibutan. Dugang pa, ginpadaku sini ang mga obligasyon sang kada indibiduwal nga Saksi may kahilabtanan sa sina nga pag-uswag. Kag isa gid ka matahom nga instrumento ang nabaton naton para sa aton ministeryo—ang Re­fer­ence Edi­tion sang New World Translation of the Holy Scriptures, ang bulig sa pagtuon sang Biblia nga Surv­iv­al Into a New ­Earth, kag ang brosyur nga The Di­vine Name That Will En­dure For­ev­er! Sini nga tuig isa pa ka pagpakamaayo ang ginatigana! Malipay kita nga magatipon sa “Mga Nagahupot Integridad” nga kombension! Ini nga tema nagatawag sing igtalupangod sa importansia sang aton pagpakigbahin sa pagbindikar sa ngalan ni Jehova paagi sa paghupot sang integridad tubtob sa katapusan sang sistema ni Satanas.

Daw ano gid ka importante ina nga tema! Puno ini sang pinakaimportante nga hulusayon nga ginaatubang sang tanan intelihente nga mga tinuga, nga amo, ang pagkamaminatud-on sang pagkasoberano ni Jehova, subong ginsakdag sang mga tinuga nga nagahupot sang ila integridad walay sapayan sang tanan nga masarangan nga himuon ni Satanas nga Yawa. Indi mahapos nga mangin nagahupot integridad sa sining “ital-ital nga tion nga mabudlay atubangon.” (2 Timoteo 3:1-5) Indi ini mahapos. Nagakahulugan ini sang ‘pag-agi sa makitid nga gawang kag sa paglakat sa makipot nga dalan nga nagapadulong sa kabuhi.’—Mateo 7:13, 14.

Ang paghupot sang integridad subong mga ministro ni Jehova nga Dios nagadalahig sa duha ka sadsaran nga mga kinahanglanon. Sa isa ka bahin yara ang kinahanglanon nga ipadayag ang bunga sang espiritu agod nga aton mahimu nga “mapunihan ang panudlo sang aton Manluluwas, ang Dios, sa tanan nga butang.” (Tito 2:10) Sa pihak nga bahin may hilikuton kita nga magbantala kag maghimu-disipulo, samtang nagapakigbahin kita sa katumanan sang tagna sang Biblia.—Mateo 24:14; 28:19, 20.

Agod matuman ining duha ka kinahanglanon, dapat nga padayon naton nga pangitaon anay ang Ginharian kag ang pagpakamatarong sang Dios. Dapat naton awayon ang tanan nga mga padugi ni Satanas nga Yawa, ang tanan nga mga pagsulay nga ginahatag sining daan nga kalibutan sa dagway sang materyalismo kag pagpaninguha sing kalipayan, kag dapat naton nga himuon ang ginhimu ni Pablo nga, ‘pagsakit sang aton mga lawas kag pagtuytoy sa sini subong sang mga ulipon.’ (1 Corinto 9:27; 1 Pedro 5:8; 1 Juan 2:15-17) Indi mahapos ang madinalag-on nga paglandas sa mga pamahog sa aton integridad.

Kon ginaapresyar naton sing bug-os ang hangkat nga huptan ang aton integridad, magakadto kita sa kombension nga ‘nabalaka sa aton espirituwal nga kinahanglanon.’ (Mateo 5:3) Magapamati kita sing maayo sa kon ano ang ginasiling gikan sa plataporma, nagakuha sing nota, nagabuylog sa tinagipusuon nga pag-amba, kag nagasulod sa espiritu sang mga pangamuyo nga ginapangamuyo. Subong man, magapamati kita sing maayo sa laygay nga ginhatag nga huptan ang aton integridad kay Jehova nga Dios, sa aton mga tiayon, kag sa aton mga masigka Cristiano. Paagi sa mga pamulongpulong, mga interbyu, mga demonstrasyon, kag mga drama mapalig-on kag masangkapan kita nga mangin determinado pa gid sang sa nagligad nga huptan ang aton integridad tubtob sa katapusan sining daan, malaut nga sistema sang mga butang.

Indi man naton pagkalipatan ang katunayan nga ang aton dalagku nga pagtinipon nagapangalagad subong panaksi sa kalibutan. Sining nagligad nga Enero ang “Pag-uswag sa Ginharian” nga kombension ginhiwat sa Riv­er ­Plate Sta­dium, sa Buenos Aires, Argentina, sa apat ka adlaw. Daku ini nga balita! Ang lokal nga pamantalaan nga Ahora nagpresentar sang may matahom, de-kolor sing laragway nga report tuhoy sa kombension, nga may pangulong dinalan, “Ang Pagtuo Nagapuno sa Estadyum.”

Sa idalom sang daku nga dinalan, “Ang Ginharian nga Nagatubo—ang Iya sang mga Saksi ni Jehova,” ang duha ka pahina nga artikulo nagsiling sing bahin: “Indi gid mapatihan. Ang pagtan-aw nagapapati. Ang pagtuo nagasaylo sa mga bukid. Ang pagtuo amo ang nagpahulag sa promedyo nga 42,000 ka mga tawo nga mahipos kag mahim-ong sing dalayawon nga pun-on ang foot­ball grand­stand sang Riv­er ­Plate Sta­dium sa sulod sang apat ka adlaw sining nagatagiti nga tig-ilinit. Ang pagtuo, man, ang nagpatipon sa indi magkubos sa 46,000 ka matutom, wala sing kinatuhayan sa sekso, edad, kultora, rasa ukon nasyonalidad para sa katapusan nga adlaw sang distrito nga kombension sang mga Saksi ni Jehova. . . . Ginapaambitan man namon ukon wala ang ila mga ideya kag mga doktrina, ining bug-os nga kadam-an nagakabagay sang amon pinakadaku nga pagtahod. Ginapakita nila ang ila kaugalingon nga mapainubuson, nga tuhay katama sa mabudlay nga mga butang sang matag-adlaw nga pagkabuhi kag sang modernong katilingban nga aton ginapakigbahinan; may prinsipio sila sang paghidait kag gugma sa tunga sang mga kautoran.”

Ang artikulo nagpadayon sa pagsiling: “Kamusta ang ila organisasyon? Ang tanan himpit. Ang mga polis nga gintangdo didto natak-an bangod wala sila sing hilimuon. . . . Wala sing diutay nga hitabo, pag-inaway, ukon kagamo sa apat ka adlaw. . . . Ginbilinan kita sang indi matakus nga paghidait nga daw yara sa mga Saksi . . . Sayop ukon indi, nakuha nila ang amon pagtahod. Ano ang nagapahulag sa ila? Ina nga pagtuo. Ina nga pagtuo nga nagasaylo sa mga bukid.”

Wala sing duhaduha nga, paagi sa aton pagginawi subong Cristianong mga ministro ni Jehova nga Dios, makahatag kita sing matahom nga panaksi sa mga taga-guwa. Matuod man, ang mangin isa ka Cristiano indi gid mahapos. Si Jesus nagsiling nga nagakahulugan ini sang pagkuha sang usok sang pag-antus. Ang pagbenepisyo sa aton “Mga Nagahupot Integridad” nga kombension magabulig sa aton nga mangin maayong mga sumulunod ni Jesucristo.—Mateo 16:24.