Doble ka Malipayon nga Okasyon

ANG Marso 3, 1985, isa ka doble ka malipayon nga okasyon, labi na para sa 42 ka estudyante sang ika-78 nga klase sang Watch­tow­er Bible ­School of Gil­ead. Indi lamang ini adlaw sang paggradwar—bastante na nga rason nga magmalipayon—kundi amo man ini ang nahauna nga tion nga ang gradwasyon sa Gil­ead ginhiwat sa bag-o nga As­sem­bly Hall sang Brook­lyn, nga gindedikahan sang kahapon lamang.

Mga 10:00 s.a., ang 2,400 pulungkoan nga tiliponan napuno na sang kadam-an nga ginahuman sang naggradwar nga mga estudyante, sang ila mga pamilya kag mga abyan, kag sa nahauna nga tion sa madamung tinuig sang gradwasyon sang Gil­ead, sang bug-os nga panimalay sang Brook­lyn Beth­el. Puno sing kasadya ang palibot. Kag ang paghinambalanay puno sang mga komento kon paano naliwat sang mga utod ang tiliponan sing matahom. Pamatuod ini nga wala sing isa nga nagapugong sa kalipay kag pasalamat diin ang iya tagipusuon nagakalipay.

Sang alas 10:00 s.a., si The­o­dore Ja­racz, ang tsirman sang adlaw, nagpahipos sa tumalambong. Nagadaguob nga ginpalakpakan sia sang tumalambong sang magkomento lamang sia: “Malipayon ang mangin diri, indi bala?” Sing maathag, nakuha niya ang igtalupangod paagi sa sining mga pinamulong.

Ang topiko tuhoy sa kalipay amo ang ginahunahuna sang mga humalambal sadto nga adlaw. Si ­George Gangas sang Nagadumala nga Hubon namulongpulong sa topiko nga “En­joy Hap­pi­ness in the Mis­sion­ary ­Field—How?” Ginsilingan niya ang naggradwar nga mga estudyante nga subong gingamit anay ni Jehova ang mga manugtonda sang nagligad, “si Jehova magagamit sa inyo sa pagluwas sa mga tawo gikan sa kahiolipnan sang bilanggoan ni Satanas.” Handurawa ang ila kalipay! Nian si Daniel Sydlik naglaygay sa mga estudyante nga updon “ang mahirop nga abyan” sa pagkadto nila sa ila mga asaynment sa luwas. Ang Biblia amo inang abyan. Makasalig sila sa sini sa ila inoras sang pagkinahanglan, siling niya sa ila. Tuman ini ka kusog nga ang isa lamang ka dinalan, ukon tinaga, gikan sa sini kon kaisa bastante na sa pagbulig sa isa ka tawo. Basaha ini kag pamatii ini adlaw-adlaw, laygay niya sa mga estudyante, kag buligan ang iban nga himuon man ini.

Sa pagpasangkad pa sang tema tuhoy sa kalipay, si Rob­ert Wal­len sang Beth­el Home Com­mit­tee naglaygay sa mga estudyante nga huptan ang “Yari ako! Ipadala ako” nga panimuot, kag si Joel Adams sang Ser­vice De­part­ment Com­mit­tee nagsiling sa klase: “Agod maagom ang kalipay sing bug-os, dapat kita maghugod sing bug-os sa paghimu sang kabubut-on sang Dios. Ang duha indi mahamulag.”

Nakabaton man ang mga estudyante sang pila ka nagapaalam nga laygay gikan sa ila duha ka instruktor. Si Ulys­ses ­Glass nagpahanumdom sa ila nga “ang pagkabuhi sang misyonero indi pirme silak sang adlaw kag kapawa.” Nagasugilanon sang matagnaon nga drama nanday Elias kag Eliseo, ginpalig-on niya sila nga ilugon ang modernong-adlaw nga Eliseo nga klase kag magpabilin sa ila hilikuton tubtob sa katapusan. Si Jack Red­ford nagkibot sa tanan sang magsiling sia: “Sang nagligad nga tuig may nakilala ako nga isa ka tawo nga wala pa makahimu sing sala sa 4,000 na ka tuig.” Ginpatuhoyan niya ang isa ka mum­my sa museo sang Egipto. Ang punto, siempre pa, amo nga ang patay lamang ang wala nagasala. Apang kon makasala gid man, kaangay bala kita kay Saul, nga nagtinguha sa pagpakamatarong sang iya mga sala, ukon kaangay ni David, nga gilayon nga nagbaton sini? Isa gid ka makapahunahuna nga pamangkot!

Ang katapusan nga humalambal sadto nga aga amo ang presidente sang Watch­tow­er Bible ­School of Gil­ead, nga si F. W. ­Franz. Nagtawag sang pagtukod sa Eskwelahan sang Gil­ead nga “isa ka makatilingala nga pagpakita sing pagtuo,” ginsugilanon niya kon paano ang eskwelahan nagpauswag sang hilikuton nga pagbantala sang maayong balita sang Ginharian sa kalibutan. Karon ang 42 ka estudyante sang ika-78 nga klase may pribilehiyo nga magkadto sa 14 ka kadutaan agod makabulig sa sining daku nga hilikuton.

Pagkatapos mabaton ang ila mga diploma, ang isa sa mga estudyante, nga si Gor­don ­Grant, nagkadto sa unahan kag nagbasa sang isa ka sulat sang apresasyon gikan sa klase. “Nagkari kami subong nagakinahanglan nga mga lalaki kag mga babayi, bisan pa nga wala pa namon ini anay madiparahan,” siling niya. “Karon, pagkatapos sang lima lamang ka bulan, magalakat kami nga malipayon kag bugana.” Namat-od sila nga gamiton sing maayo ang ila paghanas kag espirituwal nga manggad sa ila bag-ong mga asaynment.

Ang programa sang hapon ginsugdan paagi sa pagpakigbahin sang mga estudyante sa ginpalip-ot nga pagtinuon sa Watch­tow­er nga gindumalahan ni Cal­vin ­Chyke sang Fac­to­ry Com­mit­tee. Nian ang mga estudyante nagtu-ad sing mga eksperiensia kag musikal nga mga numero, nagpadaku sang ila naton-an paagi lamang sa pag-obserbar kag pagpakig-upod sa panimalay Beth­el kag sa iban pa. Sang ulihi, gindrama nila ang isa ka makatalandog nga drama sa Biblia pasad sa importante nga hitabo tuhoy kay Jose kag sa iya mga utod. Naghibi ang tumalambong.

Sang ginhinakpan sang tsirman ang hilikuton sadto nga adlaw, ang tanan nga tumalambong bug-os tagipusuon nga nag-ugyon nga makalilipay gid nga nakatambong sila didto. Huo, isa ini ka adlaw nga puno sang espirituwal maayong mga butang—doble ka malipayon nga okasyon!