Kon Paano Himuon ang Imo Pagbasa sang Biblia nga Mabungahon

“BULAHAN ang imol sa espiritu.” Amo ina ang nagabukas nga pinamulong sang bantog nga Sermon sa Bukid ni Jesus, suno sa madamu Iningles sing pamulong nga Biblia. (Mateo 5:3, Revised Standard Version, Protestante kag Katoliko nga mga edisyon) Mahangpan mo bala kon ano gid ang buot silingon ni Jesus sang “imol sa espiritu”? Ginapatuhoyan niya bala yadtong napaslawan? Ukon buot niya bala silingon yadtong buang-buang? Ayhan ang naulihi indi gid mahimu, apang importante gid nga mahibaloan ini.

Ang mga Saksi ni Jehova, nga ginakilala bisan sang ila mga kritiko subong ekselente nga mga estudyante sang Biblia, nakatukib nga ang New World Translation of the Holy Scriptures dalayawon nga nagatuman sang mga kinahanglanon nga kaathag kag kasibu. Ginabadbad sini ina nga teksto gikan sa Sermon sa Bukid: “Malipayon yadtong nabalaka sa ila espirituwal nga kinahanglanon.”

Ginabaton sang pila ka mga komentaryo sa Biblia nga amo gid ini ang buot silingon sang “imol sa espiritu.” Ngaa, nian, madamung karon nga mga binadbad, subong sang Katoliko nga Jerusalem Bible kag New International Version, ang padayon nga nagagamit sang ekspresyon nga “imol sa espiritu”?

Ginapakita sini nga halimbawa nga agod himuon ang pagbasa sang Biblia nga mabungahon, nagakaigo nga pilion ang binadbad nga matutom, maathag, kag mahangpan.

Nagakaigo nga Panimuot

Ang mabungahon nga pagbasa sang Biblia nagakinahanglan sing nagakaigo nga panimuot sa bahin sang bumalasa. Yadtong amo man gihapon nga pinamulong sa Sermon sa Bukid matahom nga nagatingob sa kon ano dapat ang aton mangin panimuot, nga nagasiling: “Malipayon yadtong nabalaka sa ila espirituwal nga kinahanglanon.” Kulang bala sang matuod nga espirituwal nga katakus ang imo kabuhi? Alisto ka bala sa kamatuoran nga dapat mo pakaunon ang imo hunahuna kag tagipusuon sang espirituwal nga kalan-on? Ang Biblia sarang makabulig sa imo nga mapun-an ina nga kinahanglanon.

Apang, indi mo masapwan ang kalan-on sa hunahuna kag tagipusuon sa Biblia kon ginabasa mo ini kasubong sang pagbasa mo sa bisan ano iban pa nga literatura. Dapat mo ini kilalahon, “indi subong pulong sang mga tawo, kundi, subong amo gid, pulong sang Dios.” (1 Tesalonica 2:13) Mabasa mo, indi ang pilosopiya sang tawo ukon makipungsodnon nga maragtas, kundi ang mga panghunahuna kag ang maragtas sang iya pagpakig-angot upod sa iya mga alagad sa duta. Nagaunod man ini sang makatilingala nga mga tagna, ang iban sini natuman na, samtang ang iban pa nagakatuman sa atubangan sang aton itololok ukon matuman pa para sa daku nga ikaayo sang katawhan.

Sanglit ang Biblia amo ang Pulong sang Dios, agod basahon ini sang mabungahon, ang isa dapat mangayo sang Iya bulig. Busa, ang pagpangamuyo sa Dios isa gid ka nagakaigo nga buhaton sing una sa pagbasa sang Biblia. Sa simple nga hambal, ipabutyag gikan sa imo tagipusuon, pangabaya sia nga buligan ikaw nga mahangpan ang imo ginabasa kag kon paano ini iaplikar sa imo personal nga kabuhi. Kon kaisa wala kita sing ikasarang sa paggamit sa ihibalo nga aton naagom, kag ina nga ikasarang amo ang kaalam. Ang Biblia mismo nagalaygay: “Kon may yara sa inyo nga nakulangan sing kaalam, papangayoa sia sa Dios, nga nagahatag sing maalwan sa tanan nga tawo kag wala nagabasol; kag hatagan sia sini. Apang papangayoa sia nga may pagtuo, sa walay pangduhaduha.”—Santiago 1:5, 6.

Pagbasa nga May Pagtuo

Basi magasiling ka: ‘Paano ako makapangamuyo sa pagtuo kag makabasa nga may pagtuo kon wala ako sing pagtuo?’ Bueno, kon sugdan mo ang pagbasa sang Biblia ‘nga nabalaka sa imo espirituwal nga kinahanglanon,’ ang imo pagtuo magadugang samtang nagakuha ka sing ihibalo tuhoy kay Jehova nga Dios kag sa iya makatilingala nga mga katuyoan nga nasentro kay Cristo. Ang matuod nga pagtuo indi dapat igumon sa bulag nga pagkamapatihon dayon. Ang Biblia mismo nagasaysay sang pagtuo subong “amo ang sigurado nga pagpaabot sang mga butang nga ginalauman, ang maathag nga pamatuod sang mga butang nga indi makita.”—Hebreo 11:1.

Ang matuod nga pagtuo nagakinahanglan sing sadsaran sang ihibalo, kag ina nga ihibalo magahimu sang mga butang nga ginsaad sang Dios nga mangin matuod nga daw subong bala nga sila makita. Busa, ang pagtuo isa nga dapat tigayunon. Nagasunod ini sa pagbasa kag pagpamati sa mga butang may kaangtanan sa Dios kag sa iya makatilingala nga mga katuyoan para sa katawhan. Subong sang ginsiling ni apostol Pablo, “Ang pagtuo nagaabot gikan sa ginapamatian. Kag ang ginapamatian paagi sa pulong ni Cristo.”—Roma 10:17.a

Samtang nagadugang ang imo pagtuo, ang imo pagbasa sang Biblia mangin labi ka mabungahon. Ngaa? Bangod ang imo “pagpaabot sang mga butang nga ginalauman” labi nga ‘masiguro.’ Mahimu ini mailustrar paagi sa bag-o nga pag-abyananay sa ulot nimo kag sang isa ka tawo. Samtang nagaligad ang panahon kag nagakilalahay kamo sing mas maayo, ang imo pagsalig sa iya nagatubo. Sa katapusan, sa tapos malampuwasan ang madamu nga mga kahimtangan diin wala ka gid pagpaslawa sang imo abyan, magasalig ka sing bug-os sa iya. Kon magasulat sia sa imo, mahibaloan mo kon ano gid ang iya buot silingon. Bisan pa nga ang isa ka dinalan indi tuman kaathag, kilala mo gid sia sing maayo amo kon ngaa wala ka mabudlayi sa paghangop. Mabasa mo ang sulat sang imo abyan sa masaligan nga paagi, nga wala sing pagsuspetsa.

Sing kaanggid, sa labi nga paghibalo mo sang Biblia kag sang iya Awtor, si Jehova nga Dios, labi nga magasalig ka sa Dios kag sa iya Pulong. Bisan ang pila ka hitabo sa maragtas sang Biblia nga daw mabudlay hangpon indi magalingkang sina nga pagsalig. Halimbawa, bisan pa nga ang rason sang hinali nga buhat sang Dios batok sa pila ka tawo ukon pungsod indi gilayon maathag, nagasalig ka nga nagakaigo ini. Daw subong ini sa imo pagsiling sa isa ka nasaligan nga abyan: ‘Bueno, kon ginhimu niya ina, mahimu nga may yara maayo nga rason.’

Siempre, ang imo pagtuo sa Dios mapalig-on kon sarang mo makita ang rason kon ngaa nagpanghikot sia sa sina nga paagi ukon kon ngaa kon kaisa nagapalantang sia sa pagpanghikot batok sa malaut. Apang kinahanglan mo ang bulig. Nagadul-ong ina sa aton sa isa pa ka bahin sang mabungahon nga pagbasa sang Biblia.

Ang Pagkinahanglan sing Bulig

Isa ka ekselente nga butang nga basahon ang bug-os nga Biblia. Paagi sa pagbasa sing isa ka kapitulo sa isa ka adlaw, magakinahanglan ka sing kapin sa tatlo ka tuig nga matapos ang Hebreo kag Griegong Kasulatan. Kon magabasa ka sing kapin sa tatlo ukon apat ka kapitulo sa isa ka adlaw, magakinahanglan ka sing mga isa ka tuig. Apang, agod matigayon ang kabilogan nga ideya sang kon ano ang ginaunod sang Biblia, mahimu nga magasugod ka sa Mga Salmo kag Hulubaton. Nian magabalik ka sa Genesis, Exodo, kag Nahaunang Samuel antes magkadto sa Cristianong dag-on, sa Mateo, sa Binuhatan, kag sa pila pa ka mga sulat nga ginsulat sang dumaan nga mga Cristiano, kaangay sang mga taga-Filipos, Santiago, kag Nahauna ukon Ikaduhang Pedro.

Samtang ginahimu ini, mahibaloan mo nga agod matigayon ang praktikal kag espirituwal nga benepisyo gikan sa Biblia, maayo nga hibaluon kon ano ang ginasiling sini sa isa ka bagay. Ang mga teksto nga may kahilabtanan sa isa ka bagay mahimu nga nagahilayoay. Mahimu nga magabatyag ka sing pagkinahanglan sang mga bulig sa pagtuon sang Biblia nga magabulig sa imo sa paghibalo kon ano ang ginasiling sang Kasulatan, topiko sa topiko. Subong man, sanglit ang mga tolon-an sang Biblia wala naareglo sa kronolohiko nga pasunod, ina nga mga bulig magabulig sa imo nga mahangpan ang pagkasunodsunod sang tion. Ang materyal tuhoy sa geograpiko kag maragtason nga ginhalinan mapuslanon man sa paghantop sang Kasulatan.

Diin makita inang bulig sa pagtuon sang Biblia? Sining ulihi nga tinuig ang Katoliko nga mga manunulat nagbalhag sang madamung mga libro nga daw gintuyo sa pagbulig sa mga Katoliko sa ila pagbasa sang Biblia. Apang nasapwan sina nga mga awtor ang ila kaugalingon sa mga sungay sang problema. Kon tunay gid nga ginabuligan sina nga mga awtor ang mga Katoliko nga mahangpan ang Biblia, madali matukiban sang mga Katoliko nga ang kalabanan nga mga panudlo sang Katoliko indi makita diri. Sa pihak nga bahin, kon ginapakamatarong sang mga awtor ang doktrina sang Katoliko, ginapakadiutay nila ang pagsalig sang mga bumalasa sa pagbasa sang Biblia bangod ginapaidalom nila ang Kasulatan sa tradisyon sang simbahan.—Ipaanggid ang Marcos 7:13.

Dugang kag dugang nga hanuot nga mga Katoliko ang nagabaton sing bulig gikan sa mga Saksi ni Jehova. Sa madamung kadutaan, linibo ka mga Katoliko ang nagapanikasog nga basahon ang Biblia nga may paghangop apang diutay lamang ukon wala gid sing natigayon nga bulig gikan sa ila lokal nga mga pari. Daw kaangay sila sa Etiopianhon nga opisyal nga nagbasa sang tolon-an ni Isaias. Sang ginpamangkot sia sang ebanghelisador nga si Felipe kon nahangpan niya ang iya ginabasa, ang Etiopianhon mapainubuson nga nagsabat: “Paano bala nga pagkahangop ko, kon walay isa nga magtuytoy sa akon?” (Binuhatan 8:31, RS, Katoliko nga edisyon) Ginbuligan sia ni Felipe, kag pila lamang ka tion sang ulihi, ining sinsero nga tawo nangin bawtismado nga Cristiano. Sing kaanggid, samtang nagapamalaybalay sila ang mga Saksi ni Jehova nakasugata sang mga Katoliko, kag kon magasiling sila nga may yara na sila Biblia sa ila balay, ginapamangkot sila sang mga Saksi kon bala luyag nila nga mabuligan nga himuon ang ila pagbasa sang Biblia nga mabungahon.

Pagbasa nga Nagapatubas sing Bunga

Sa ila hikikuton sa pagtudlo sang Biblia, ang mga Saksi ni Jehova nagagamit sing madamu nga mga bulig sa pagtuon sang Biblia, subong sang Ang Akon Libro sang mga Sugilanon sa Biblia (ang 116 ka mga sugilanon sa Biblia nga ginpresentar sa simple nga pamulong kag sa kronolohiko nga pasunod), sang Is the Bi­ble Real­ly the Word of God? (para sa sientipiko kag maragtason nga pamatuod sang pagkamasaligan sang Biblia), sang “All Scrip­ture Is Ins­pired of God and Be­ne­fi­cial” (ang libro por libro nga pagsumaryo sang kaundan sang Biblia, lakip ang impormasyon sa geograpiko kag maragtason nga ginhalinan), kag sang You Can Live For­ev­er in Pa­ra­dise on ­Earth (nga nagatipon sang mga kasulatan sa 30 ka importante nga mga topiko, lakip ang makatilingala nga paglaum nga ginapahamtang sang Pulong sang Dios sa sinsero nga mga bumalasa sang Biblia karon).

Ining mga bulig sa pagtuon sang Biblia, upod ang personal nga bulig nga malipayon nga ginatanyag sa imo sang mga Saksi ni Jehova nga wala sing bayad, magahimu sang imo pagbasa sang Biblia nga makalilipay kag mabungahon. Masapwan mo ang tuytoy para sa matag-adlaw nga pagkabuhi kag ang makatilingala nga paglaum para sa kabuhi sa ginsaad nga Bag-ong Kahimusan sang Dios, diin, sa ulihi gid man, ang kabubut-on sang Dios “pagahimuon, sa duta subong sang sa langit.”—Mateo 6:10, JB.

[Footnote]

[Laragway sa pahina 7]

Ginkilala sang Etiopianhon kon ano ang kinahanglanon agod mahangpan ang Biblia