Himua nga Tulumuron ang Paghanas sa Diosnon nga Debosyon

“Himoa nga tulumuron ang paghanas sa diosnon debosyon.”—1 TIMOTEO 4:7.

SIA ang pinakamadasig nga manugdalagan sang team sa iya hampang. Nakadaug na sia anay sa pungsodnon nga hampang. Gani ginapaabot nga magadaug sia sa sining bantog nga palumba sa dalagan. Apang, sa kapaslawan sang iya ­coach, mga kaupod sa team, kag sang iya mismo kaugalingon, amo ini ang pinakamalain nga palumba sa iya. Ngaa? “Naghinay ako sa praktis kag wala ako maghanas sing lakas,” siling sang lamharon nga babayi, nga nahuya gid katama. “Ginpapraktis ako sing lakas sang akon ­coach kag ginpaandaman ako, apang wala ako mamati.” Ang iya indi paghanas sing nagakaigo nagbili sa iya sang kadalag-an nga iya ginahimud-osan.

² Subong isa ka Cristiano, labi na kon isa ikaw ka pamatan-on, may yara ka man importante nga paghanas. “Himoa nga tulumuron ang paghanas sa diosnon nga debosyon.” (1 Timoteo 4:7) Ang Griegong tinaga para sa “paghanas” (gy·mnaʹzo) nagalaragway sa lakas kag sing masami masakit nga mga ehersisyo nga ginahimu sang humalampang sa gym­na­sium. Busa, nahanungod sa diosnon nga debosyon kag sa mga padya sini, si apostol Pablo nagdugang: “Kag sa sining katuyoan nagapangabudlay kita kag nagapanikasog.” (1 Timoteo 4:10) Ining importante nga kinaiya wala nagaabot sing kinaugali lamang ukon nga mapanubli gikan sa diosnon nga mga ginikanan. Apang anong mga tikang ang dapat nga himuon? Dapat ini hibaluon sang tanan sing pangedaron nga mga Cristiano.

Maayo nga Komunikasyon Upod sa Dios

³ Sanglit ang diosnon nga debosyon nagadalahig sang tinagipusuon nga apresasyon sa mga kinaiya ni Jehova, dapat mo hibaluon kon ano gid sia. Ginapaalinton ini ni Jehova sa Biblia. Apang dapat mo ton-an sing maayo ang iya Pulong kag ang napasad sa Biblia nga mga publikasyon, kag sa amo “ginsagud sa mga pulong sang pagtuo kag sang maayong pagtolon-an.” (1 Timoteo 4:6) Ina nga pagtuon magabulig sa imo nga makita ang “kaayo ni Jehova.”—Salmo 27:4.

⁴ “Kon ginaton-an mo sing labi ang tuhoy kay Jehova, labi pa gid sia nga nagasuod sa imo,” siling sang 22-anyos nga bug-os nga ebanghelisador (payunir). “Kon ginabasa ko ang mga tagna kag makita kon paano ini nagakatuman, nahayanghag gid ako sa iya. Ang personal nga pagtuon tunay nga nakabulig sa akon.” Isa ka 16-anyos, nga nasub-an gid anay, ang nagsulat nahanungod sa isa sang mga artikulo sa serye nga “Ang mga Pamatan-on Nagapamangkot” nga nagaguwa sing regular sa magasin nga Magmata!: “Sang halos daw wala na ako sing paglaum, nagguwa ini nga artikulo. Nalangkag gid ako katama nga indi ko ini mabutang! Nagpasuod pa gid ini sa akon kay Jehova, kag narealisar ko nga nakahangop sia kag nagaulikid gid sing daku. Sa banta ko malandas ko na ini karon.”a Ginatinguhaan mo gid bala nga basahon ang kada guwa sang amon mga balasahon? Bisan pa nga nagakinahanglan ini sing panikasog, ginahatagan mo bala sing tion nga saguron ang imo hunahuna kag tagipusuon paagi sa personal nga pagtuon sa Biblia? Paagi sa imo kaugalingon nga pagpanalawsaw, mapamatod-an mo gid sa imo kaugalingon nga yara sa imo ang kamatuoran. Kon ina nga ihibalo magalab-ot sa tagipusuon, sa gilayon magapahulag ini sa imo, kay amo ini “ang panudlo nga nahisuno sa diosnon nga debosyon.”—1 Timoteo 6:3; Roma 12:2.

⁵ Ang maayo nga komunikasyon upod sa Dios nagadalahig man sing tinagipusuon kag espesipiko nga mga pangamuyo. Nagabulig ini sa pagtukod sang personal nga pagpakig-abyan kay Jehova. Kon makahimu ka sing sayop, mangin handa sa pagpangabay kasubong sang ginhimu ni David: “Dili pagpanumduma ang mga sala sang akon pagkapamatan-on kag ang akon mga paglalis.” (Salmo 25:7, 11) Kag hibaloa nga patawaron niya ikaw kon mahinulsulon ka. Ton-i ang magpangamuyo sing padayon, nga nagabubo sang imo tagipusuon. Bisan pa ginpadaku sa diosnon nga puluy-an, gintugotan sang isa ka pamatan-on ang sablag sa panghambal nga mag-upang sa iya pagkanadalahig sa matuod nga relihion. “Nian isa ka gab-i,” siling sining 22-anyos, “nakiluoy ako kay Jehova, ‘Buligi ako nga alagaron ka, kag indi lamang bangod luyag sang mga gulang kag sang akon mga ginikanan nga mag-alagad ako.’” Ang iya kabuhi nagbag-o! Walay sapayan sang iya pag-utal-utal, nadalahig sia sing bug-os sa ministeryo. Sing malipayon, nagsiling sia: “Nagasalig ako karon kay Jehova sing labi pa bangod nahibaloan ko nga pirme sia nagabulig.”—Salmo 62:8.

⁶ Ang isa ka lamharon nga Cristiano nangamuyo sing espesipiko nahanungod sa iya mga plano sa pagpayunir. Sang ang iya mga pangamuyo ginsabat, nagsiling sia: “Nahibaloan ko nga si Jehova matuod kag nagaulikid gid sia sa aton! Abi ko anay may kaangtanan ako sa iya, apang karon labi pa sia sa isa ka abyan—ang akon pinakamahirup.” Si Jehova indi pirme magasabat sa pila ka talalupangdon nga paagi, apang kon ikaw hanuot kag mangabudlay sing nahisuno sa imo pangamuyo, maapresyar mo ang iya mahigugmaon nga panuytoy.—Salmo 145:18.

Hupti ang Maayo nga Konsiensia

⁷ Sang ginlaygayan ni Pablo si Timoteo nga ‘padayon nga huptan . . . ang maayo nga konsiensia,’ nahibal-an sang apostol nga nagakinahanglan ini sing determinado nga panikasog. (1 Timoteo 1:19) Ngaa? Ang aton konsiensia amo ang aton hatag-Dios nga ikasarang sa pag-usisa sang aton kaugalingon kag paghangop sang aton nahimu ukon ginabinagbinag nga himuon. Mahimu ini ‘magsumbong’ sa aton, nga nagapakamalaut sing masakit sang aton dalanon, ukon ‘magpasaylo’ sa aton, nga nagaugyon sa aton ginahimu subong husto. (Roma 2:15) Apang kon ini magtiku, magahatag ini sing sayop nga mga mensahe. Ang iban nga may tiku nga konsiensia mahimu magahulag kaangay sang mapintas nga sapat, apang ang ‘nasulod nga tingog’ wala ‘nagasumbong’ sa ila. Mahimu sila nga “makapahayag sing dayag nga nakilala nila ang Dios” apang “ginasikway niya ang ila mga binuhatan.” Paano ka makapangandam batok sa pagpalambo sang tiku nga konsiensia?—Tito 1:10-16.

⁸ Ginsilingan anay ni Pablo si Timoteo nga ang pila ka mga Cristiano ‘nagsikway’ sang ila maayo nga konsiensia, paagi sa ‘patupato nga sugilanon’ kag “walay pulos nga pagwakal nga nagasumpong sa kon ano ang balaan.” (1 Timoteo 1:4, 19, 20; 6:20; 2 Timoteo 2:16-18) Bangod namati sila sa sini nga mga butang, ang ila pagtuo nagtiku, kag nagresulta ini sa espirituwal nga pagkalunod. Apang, ginpakita ni Pablo nga ang iban nga mga butang luwas sa apostata nga mga panudlo “supak sa maayo nga pagtolon-an.” Sa 1 Timoteo 1:9, 10 ginlista niya ina nga mga butang subong sang pagpatay, pakighilawas kag homoseksuwalidad.

⁹ Ang kasingki kag seksuwal nga imoralidad lapnag karon sa mga palaguwaon sa sine kag TV kag subong man sa mga balasahon. Kon pakaunon naton ang aton mga hunahuna sa sina, ang aton konsiensia amat-amat nga mahirohan. Natabo ini sa isa ka lamharon nga Cristianong mag-asawa nga nakahimu sing pakighilawas antes sang ila adlaw sang kasal. “Sa banta ko may kahilabtanan ini sa kon ano ang amon gintan-aw sa TV,” panugiron sang lamharon nga babayi. “Pirme mo makita ang mga tawo nga nagaromansahanay, gani daw indi ini serioso. Maanad ka sa sini. Gani ginsugdan namon nga himuon ini. Kon nahunahuna ko lamang anay kon daw ano ka serioso ini!” Sa wala pa sia makamarasmas, nadula niya ang iya maayo nga konsiensia. Ang lamharon nga lalaki nagdugang: “May problema man ako sa masturbasyon, kag ginahirohan sini ang imo konsiensia amo kon ngaa indi gid mabudlay nga magromansahanay kag sa ulihi makighilawas.” Bisan pa nga daw nagapahamtang sila sing maayo nga halimbawa sa atubangan sang iban, ang ila ginatan-aw sa paglingawlingaw upod ang tago mahigku nga buhat nagresulta sa pagtig-a sang ila konsiensia subong sang unod nga dalayon nga ginasunog sang nagabaga nga salsalon.—1 Timoteo 4:2.

¹⁰ Magatig-a man bala ang imo konsiensia bangod sang imo ginatan-aw ukon ginabasa sa paglingawlingaw? Nagapangabudlay ka gid bala sing lakas nga malandas ang bisan anong malain nga batasan nga makadagta sa imo konsiensia? Para sa imo pangamlig, sarang ka makahimu sang positibo nga aksion paagi sa pagbasa—kag sa pagbasa liwat—sang napasad sa Biblia nga literatura nga espesipiko nga may kaangtanan sa imo problema ukon paagi sa pagpakighambal sang imo problema sa isa ka gulang. Ang maayo, matinlo nga konsiensia amo ang hamili nga dulot halin sa Dios nga magabulig sa imo nga mapalambo ang diosnon nga debosyon. Indi pagtugoti ang bisan ano nga mawasi mo ini!

Pilia ang Maayo nga mga Kaupdanan

¹¹ Si apostol Pablo nagsulat: “Sa dakung balay [ang kongregasyon] yara indi lamang ang mga suludlan nga bulawan kag pilak kundi man mga suludlan nga kahoy kag lunang, kag ang iban sa paggamit nga dungganon kag ang iban sa didungganon. Kon ang bisan sin-o magpaninlo sang iya kaugalingon gikan sa didungganon, nian mangin suludlan sia nga galamiton sa kadungganan, nga pinakabalaan, mapuslanon sa agalon sang balay, nga handa sa bisan anong maayo nga buhat.” (2 Timoteo 2:20, 21) Ang aton mga balatyagon kag paggawi naapektohan sing daku sang ginpili naton nga mga abyan. Sing hayag, ang mga ditumuluo indi ang labing maayo nga mga kaupdanan. Apang ginapakita diri ni Pablo sing prangka nga bisan sa sulod sang kongregasyon may mga tawo nga indi maayo nga mga kaupdanan. Matuod, mahimu nga nasadyahan ka nga mangin kaupod sila, apang ang ila impluensia indi gid magabulig sa imo nga ‘palagyohan ang mga kailigbon nga pinamatan-on’ ukon palambuon ang diosnon nga debosyon. Pangitaa ang makapalig-on nga mga kaupdanan sa sulod sang kongregasyon. Si Pablo nagapadayon sa bersikulo 22: “Tuyoa ang pagkamatarong, pagtuo, gugma, paghidait, kaupod sang mga nagapanawag sa Ginuo gikan sa tagipusuon nga putli.”—Ipaanggid ang Filipos 4:8, 9.

¹² Binagbinaga ang halimbawa sang isa ka Cristianong pamatan-on nga, walay sapayan sang diosnon nga paghanas, pirme nga nadalahig sa gamo. “Bangod gid ini sa mga tawo nga akon ginapakig-updan,” siling niya. Sang makita niya ang iya kabuhi nga nangin kapaslawan, ginbaylohan niya ang iya mga abyan. Nagsiling sia: “Kon ang imo mga abyan nagahigugma kay Jehova, nagabulig ini sa imo nga mahuptan ang sensitibo nga konsiensia kag mapahilayo sa problema. Kon magapabutyag sila sing kangil-ad sa sala, amo man sina ang imo ginabatyag.” Paagi sa pagpahilayo sa indi maayo nga mga kaupdanan, nangin suludlan sia nga “mapuslanon sa [iya] agalon, nga handa sa bisan anong maayo nga buhat.” Subong nakaalagad na sing napulo ka tuig subong payunir, nagdugang sia: “Nasapwan ko karon nga gingamit ako ni Jehova nga buligan ang iban.”—2 Timoteo 2:21; Hulubaton 15:31.

¹³ Busa, hunahunaa sing realistiko ang imo mga kaupdanan. Nagatinguha bala sila sang pagkamatarong, pagtuo, may prinsipio nga gugma, kag paghidait? Puno bala sila sang Cristianong kakugi? Paagi sa pagpakig-upod sing suod sa subong sina nga mga tawo, ikaw mismo mangin halimbawa sa panghambal, sa pagginawi, sa gugma, sa pagtuo, sa kaputli, kaangay kay Timoteo, nga suod nga kaupod ni Pablo. Wala ini nagakahulugan nga maglas-ay ka ukon indi magmainabyanon sa mga indi huaran. Ang imo masinadyahon nga halimbawa mahimu nga magapukaw man sa ila nga tadlungon ang mga banas sang ila mga tiil.—1 Timoteo 4:12; Hebreo 12:12-15.

Maghimu sing mga Sakripisyo Para sa Dios

¹⁴ Sadto anay sang kaadlawan ni Timoteo, samtang ang mga humalampang nagahanas ila “ginapunggan ang ila kaugalingon sa tanan nga mga butang,” ginadingotan ang ila kaugalingon sang madamu maayong mga kalingawan. (1 Corinto 9:25) Ginasunod nila ang estrikto nga pagkaon. Suno kay Horace, nga manugbinalaybay sang nahaunang siglo B.C.E., ila “ginlihian ang mga babayi kag alak” agod “malab-ot ang madugay na ginahimud-osan nga tulumuron.” Ang paghimu nga tulumuron sang paghanas sa diosnon nga debosyon nagakinahanglan man sang sakripisyo. Si Pablo nagsiling tuhoy kay Timoteo: “Wala ako sing tawo nga kaangay sa iya . . . kay sila tanan nagapangita sang ila kaugalingon nga kaayohan, indi ang iya ni Jesucristo. Apang . . . nag-alagad sia upod sa akon sa maayong balita.”—Filipos 2:19-22.

¹⁵ Si Timoteo ginsugo: “Himoa ang hilikuton sang ebanghelisador, tumana sing bug-os ang imo ministeryo.” (2 Timoteo 4:5) Bisan pa kon daw ano ka makagalanyat ang iya personal nga mga kaayohan sadto anay, ginsakripisyo niya ini agod tapuson ang hilikuton sang Dios. Handa ka bala nga himuon man ina? Ang wala sing mabug-at Makasulatanhon nga mga responsalibilidad nga Cristianong mga pamatan-on karon nagahimud-os sang mas mataas nga edukasyon ukon mataas sing sueldo bug-os tion nga mga trabaho sa baylo nga himuon ang Cristianong ministeryo nga ila karera. Isa sa ila ang malangkagon nga naghulat sing kaanggid nga trabaho. Apang, sa wala pa sia magsugod sa pagtrabaho, ginbaton niya ang pangagda nga mangabudlay upod sa payunir nga mag-asawa sa pag-alagad sa latagon sa bug-os nga tig-ilinit. Naluyagan niya ini. Subong resulta, ginsakripisyo niya ang madugay na ginahandum nga bug-os tion nga trabaho kag ginkuha ang daw indi gid makawiwili ­part-time nga trabaho agod makapayunir. Paagi sa sining katulad man kay Timoteo nga espiritu, nagaalagad na sia karon sa bug-os kalibutan nga ulong-talatapan sang mga Saksi ni Jehova. Ang kahanda sa pagsakripisyo pamatuod sang matuod nga gugma, kag ang mga sakripisyo nagapatudok sina nga gugma, subong sang natukiban niya.

¹⁶ Subong “manugbantala kag apostol,” ginpadaku ni Pablo ang pagkahalandumon sang pagkamaugdang sa pamayo. Handa ka bala nga isakripisyo ang pila ka estilo sang pamayo ukon pamustora nga nagapasandad sa iban ukon nagaupang sang imo pagkaepektibo subong isa ka manugbantala? (1 Timoteo 2:7-10) Nagapadayon, si Pablo nagsulat: “Ang tanan nga buot magkabuhi sing diosnon nga debosyon . . . pagahingabuton man.” (2 Timoteo 3:12) Handa ka bala nga sakdagon ang kamatuoran bisan pa nga magakahulugan ini sang pagyaoyao, pagsakripisyo sang nahamut-an nga posisyon upod sa imo mga kabutho? Inang tanan nga pagsakripisyo nga ginahimu nga may husto nga motibo magabulig sa imo nga mapalambo ang diosnon nga debosyon kag sa amo man nga tion matudloan ikaw nga magsalig kay Jehova kag mabinagbinag ang iya mga balatyagon nga labaw sa tanan.

Padayon sa Pag-uswag

¹⁷ Ang pagpalambo sang diosnon nga debosyon isa ka dalayon nga proseso. Ginsilingan ni Pablo si Timoteo: “Himoa ining mga katungdanan; ukuri ini sila, agod nga ang imo pag-uswag makita sang tanan.” (1 Timoteo 4:15) Ang iban, bangod tuman pa kabata agod mangin ministeryal nga suluguon ukon gulang, mahimu magabatyag nga indi sila makasarang sa pag-uswag, nagahunahuna nga ang pag-uswag ginatakus lamang paagi sa mga responsabilidad kag mga pribilehiyo sa kongregasyon. Matuod, si Timoteo nangin kalipikado indi lamang bangod sang espirituwal nga pag-uswag kundi sang tinuig man niya nga pag-alagad subong gulang. Apang si Timoteo dapat nga magpadayon sa pag-uswag, kag sa sini nagpahamtang sia sing talalupangdon nga halimbawa para ilugon sang tanan lamharon nga mga ministro bisan ano man nga latagon ang mahimu nga bukas para sa ila.—1 Timoteo 4:12, 13.

¹⁸ Gani, kaangay kay Timoteo, ikaw nga nagahamtong nga alagad ni Jehova sarang mangin “halimbawa sa mga matutom” paagi sa pagpahanugot sa kamatuoran nga magaimpluensia sing tudok sa kon paano ikaw nagakabuhi kag paagi sa pagpauswag sang imo ministeryo. Mapanikasogan mo karon mismo nga mag-uswag paagi sa pagtuon nga palambuon ang mga kinaiya subong sang pagkahaganhagan sa batasan, mahim-ong, maabiabihon, kag serioso. Paagi sa pagkamangin handa nga magamit sang mga gulang kag paagi sa pagbuhat sing serioso sang bisan ano nga hilikuton nga ginapangabay nila nga himuon mo, sarang ka makapangabudlay sa pagpamatuod sang imo ‘pagkanagakaigo sa idalom sang pagtilaw.’ (1 Timoteo 3:1, 2, 8-10) Bisan pa nga ang imo pag-uswag indi gilayon madiparahan sang iban, makasalig ka nga nakita ini ni Jehova. Sa ulihi, makita man ini sang iban.—1 Timoteo 5:25.

¹⁹ Indi pagkalimti nga paagi sa pagpalambo sa diosnon nga debosyon nga mahimu mo matigayon ang nahamut-an personal nga kaangtanan kay Jehova. Ang indi paghanas sa espirituwal nagaresulta sa kapierdehan nga mas daku pa sang sa iya sang nahuy-an nga manugdalagan nga ginsambit sa ginsugoran sini nga artikulo. Ang pagpalambo sang diosnon nga debosyon lakas nga pagpangabudlay. Apang sa bug-os nga kalibutan, madamu sang masinadyahon nga mga tingog sang pamatan-on ang nagalanog: TAKUS GID INI SANG TANAN NGA PANIKASOG! Ang pagtigayon sini nga kalidad nagadul-ong sa makaalayaw nga paagi sang pagkabuhi karon, nga indi gid paghinulsulan, kag nagabukas ini sang paglaum nga magkalipay sing dayon. Gani padayon nga maghanas. Padayon nga himoa ang imo pinakamaayo bisan pa nga mabudlay ini. Magkalipay nga “ang Dios sang bug-os nga dibagay nga kaluoy . . . magatapos mismo sang imo paghanas, magapalig-on, kag magapabakud sa inyo. Sa iya kagamhanan sa walay katubtuban. Kabay pa.”—1 Pedro 5:10, 11.

[Footnotes]

Masabat Mo Bala?

◻ Ano nga panikasog ang kinahanglan agod mahuptan ang maayo nga komunikasyon upod sa Dios?

◻ Ano ang nadalahig sa paghupot sang maayo nga konsiensia?

◻ Paano maaplikar ang 2 Timoteo 2:20-22 sa pagpalambo sang diosnon nga debosyon?

◻ Paano ang lamharon nga mga Cristiano makahimu sing mga pag-uswag?

[Mga Pamangkot sa Pagtinuon]

1. Ngaa ang isa ka maayo nga humalampang wala magdaug?

2. Sa ano nga paagi ang mga Cristiano dapat maghanas, kag ngaa dapat hibaluon ini sang tanan?

3. (a) Ngaa tuman ka importante ang personal nga pagtuon? (b) Ano nga mga kinaiya sang Dios ang nagapapasuod sa imo sa iya?

4. Ano nga mga eksperiensia ang nagapakita sang balor sang personal nga pagtuon, kag ano nga mga pamangkot ang dapat mo binagbinagon sing serioso?

5, 6. Ano nga sahi sang mga pangamuyo ang nagapapasuod sa imo sa Dios? Iilustrar.

7. Ano ang konsiensia, kag ngaa dapat ini huptan sang isa sing maayo?

8. Paano ‘ginsikway’ sang iban sang nahaunang-siglo ang maayo nga konsiensia?

9, 10. (a) Ano ang maton-an naton gikan sa halimbawa sang isa ka Cristianong mag-asawa nga wala makahupot sang maayo nga konsiensia? (b) Paano naton mapunggan ang aton konsiensia nga mahirohan?

11, 12. (a) Ano nga paandam ang ginhatag sang 2 Timoteo 2:20, 21? (b) Paano mo matuman ina nga paandam?

13. Paano mo mapat-od kon sin-o ang maayo nga kaupdanan, kag paano ka nila maimpluensiahan?

14, 15. (a) Ano ang kinahanglan sa dumaan nga humalampang samtang nagahanas? (b) Ano nga hilikuton ang nagakinahanglan sing sakripisyo, kag ano ang aton maayo nga mga halimbawa?

16. Ano ang pila ka mga sakripisyo nga himuon sang mga pamatan-on?

17. Sa paghimu sing pag-uswag, paano si Timoteo isa ka halimbawa para sa lamharon nga mga ministro karon?

18. Sa anong mga paagi ang pamatan-on nga mga Cristiano makahimu sing pag-uswag?

19. Walay sapayan sang panikasog, ngaa dapat mo himuon nga tulumuron ang diosnon nga debosyon?