Ang “Pungsod” nga Nagapakaon sa Minilyon nga Gutom

ANG binilyon nga populasyon sang duta gutom sang “pagkaon” nga magasakdag sa ila para sa kabuhi nga walay katapusan diri sa duta, kon ang duta pagahimuon nga mangin tugob-globo nga paraiso. Apang sin-o ukon diin sila magaliso? Ang Republika sang Israel wala nagatinguha sa pagtuman sa tagna sang Biblia sa Isaias 27:6 nahanungod sa pagpuno sa duta sing “bunga” para sa mapinadayunon nga kaayohan sang katawhan.

² Sadtong nahaunang siglo sang aton Kumon nga Dag-on, nadula sang pungsod sang Israel ang iya komisyon nga magabenepisyo sa tanan nga katawhan. Sa amo sa isa na lamang ka diutay nga nagkalabilin sang kinaugali nga mga Judiyo ginpatuhoy sang Mesias ang iya pinamulong: “Ang bug-os nga awtoridad sa langit kag sa duta natugyan sa akon. Busa lakat kamo kag himuon nga mga disipulo ang tanan nga kapungsoran, nga nagabawtismo sa ila sa ngalan sang Amay kag sang Anak kag sang balaan nga espiritu . . . Kag, yari karon! ako kaupod ninyo sa tanan nga adlaw tubtob sa konklusion sang sistema sang mga butang.” (Mateo 28:18-20) Apang kamusta mga 19 ka siglo sang ulihi? Sin-o sa aton tion ang nagahunahuna sa katumanan sang Isaias 27:6? Kag paano ka kag ang imo mga hinigugma nadalahig?

³ Bisan pa nga mga dekada na nga malayo kita gikan sa espesipiko nga mga hitabo, mas maayo nga usisaon naton sing makadali ang pila ka mga hitabo sadtong mga tuig sang Inaway Kalibutanon I. Sadto anay si Jehova nga Dios may nagakaigo nga rason sa pagbatyag sing “kasingkal” batok sa mga pungsod sang Cristiandad bangod sang ila pagpakigbahin sa nagapatulo sang dugo nga inaway. (Ipaanggid ang Isaias 27:4.) Ginhimo nila yadto sa baylo nga iampo ang ila pungsodnon nga pagkasoberano sa Labing Mataas nga Dios sang ang iya Ginharian gintukod sa mga langit sang 1914 sa mga kamut sang iya ginhimaya nga Anak, nga si Jesucristo. Gingatongan nila ang iya kasingkal paagi sa paghingabot sa nagkalabilin sang espirituwal nga Israel, kag hungod nga gin-upangan ining debotado nga Cristianong mga Estudyante sang Biblia gikan sa pagbantala sing hilway sang iya natukod na nga Ginharian. Sa katunayan, madamo sang nagkalabilin sang espirituwal nga Israel ang nagpadala sa mga pag-ipit sang kalibutan, sa amo nakulangan sang ila mga responsabilidad subong pinili nga katawhan nga ginkuha sa sining kalibutanon nga sistema sang mga butang. Wala pa nila sadto anay mahangpi ang hulusayon tuhoy sa bug-os nga pagkaneutral sa mga inaway sining kalibutan, gani nakasala sila sa dugo kag makadali nga naagom man nila ang “kasingkal” sang Dios.

⁴ Kon nabuhi ka sadto anay, ano sa banta mo ang imo reaksion sa mga pag-ipit sadtong panahon sang inaway? Dapat mo binagbinagon ina, kay sa amo mapalig-on mo ang imo pamat-od kon ano ang imo himuon sa atubangan sang bisan ano nga pag-ipit sa ulihi. Sadto anay daw subong bala nga panahon ini sa pag-untat sa pagbantala sang Ginharian kag maghulathulat sing kahigayunan. Madamo ang naghimo sina, nagbatyag nga hulaton na lang nila ang paghimaya sa ila nga mangin kaupod sang ginpalingkod na nga si Jesucristo. (Lucas 22:28-30) Apang, ang pagbaton sang “kasingkal” ni Jehova isa ka nagadisiplina nga eksperiensia nga gin-apresyar sang matuod nga mga Cristiano sadto anay, gani indi ini wala sing bunga. Ginpabaskog sini sila para sa palaabuton nga hilikuton nga ibantala ang adlaw sang pagtimalus sang aton Dios batok sa isa nga ginatawag ni manalagna Isaias nga “Leviatan” sa Isaias 27:1, diin aton mabasa:

⁵ “Sa sadtong adlaw si Jehova, nga may iya nga espada nga matig-a kag daku kag mabakud, magasilot sang Leviatan, ang man-ug nga madasig, kag sang Leviatan, ang man-ug nga tikutiku, kag patyon niya ang daku nga sapat nga yara sa dagat.”

Sadtong dumaan nga panahon, ginliso ni Jehova ang iya igtalupangod sa mga nagbihag sa iya katawhan. Subong sang nakita naton sang nagligad, naglakip yadto sa emperyo sang Babilonia, kag subong man sa Egipto kag Asiria. (Isaias 27:12, 13) Nakita mo bala ang moderno nga aplikasyon sang simbuliko nga pinamulong sang Isaias 27:1? Sadtong Inaway Kalibutanon I, ang katawhan sang Dios indi bihag sang bisan anong pungsod ukon emperyo. Apang kinahanglan nga talupangdon ni Jehova ang simbuliko nga Leviatan, nga amo, si Satanas nga Yawa. Madasig sia nga nagasaug sing malimbungon sa dagat sang katawhan kag nagagamit sang mga butang sa duta nga nagabutang sa katalagman ukon nagaupang sa mga alagad sang Dios.—Ipaanggid ang Bugna 17:15.

⁶ Sadtong tuig 1919 sang ang nagkalabilin sang espirituwal nga Israel mapagsik nga nagpadayon sang ila pagbantala sang Ginharian, panahon yadto para kay Jehova sa pagsiling:

“Wala sa akon ang kasingkal. Sin-o ang magahatag sa akon sang mga sapinit kag mga talongon sa inaway? Tapakon ko sila. Sunugon ko sila sing tingob.”—Isaias 27:4.

⁷ Sang matapos ang Inaway Kalibutanon I, gintukod ang Liga de Nasyones bilang pagpamatok sa Ginharian sang Dios paagi kay Cristo. Mapaanggid naton ini sa “mga sapinit kag mga talongon” nga ginbutang sa banas ni Jehova nga Dios, subong sablag ukon upang. Gintal-usan karon sang organisasyon sang Nasyones Unidas inang Liga. Paagi sa Nasyones Unidas ginpahibalo sang madamong katapo nga mga pungsod ang ila determinasyon nga pamatokan ang ginbantala nga Ginharian ni Cristo kag ang ila tuyo nga amligan ang ila kaugalingon nga pagkasoberano sa kalibutan. Sa “inaway sang dakung adlaw sang Dios nga Labing Gamhanan” sa Har–Magedon, malaragwayon niya nga tapakon ang tanan nga “mga sapinit kag mga talongon,” nagadugmok sa ila kag sa ulihi magatutod sa ila, kon sa aton pa, nagahimo sa ila nga mga abo. Sa amo ipasundayag niya kon sin-o gid ang Bug-os Uniberso nga Soberano. Nian, makita mo nga bisan wala ka nagakabuhi sa tunga sang hinaplas nga mga Cristiano sadtong Inaway Kalibutan I, maapektuhan ka—sa maayo ukon malain—sa katapusan nga mga resulta sang mga hitabo nga kaanggid sa Isaias 27:1.—Bugna 16:14-16; 17:1–18:4.

‘Magkaput sa Kuta ni Jehova’

⁸ Ang mga katapo sang Nasyones Unidas nagasalig sa ila kaugalingon nga kusog kag nagasalig sa ila hinimo-tawo nga kuta. Apang, ang ila pagsalig sa sini indi tuman ka kusog sa pag-upang sa ila gikan sa pag-imbento sang makamamatay nga mga hinganiban, ang katapusan sang mga hinganiban sa inaway, ang bomba nuklear. Sing kaanggid, ang kahadlok sa pagtimalus paagi sa paggamit sang bomba nuklear amo ang nagaupang sa ila, indi ang Nasyones Unidas.

⁹ Apang, subong sang natalupangdan naton, ang nagabutang gid sa katalagman sang dalayon nga pagluntad sang mga pungsod amo “ang inaway sang dakung adlaw sang Dios nga Labing Gamhanan.” Ano ang ginalauman nga himuon sang mga pungsod batok sa Dios nga Labing Gamhanan, ang Isa nga nagabutang sing makatilingala nga gahom sa sulod sang nukleus sang tagsa ka atomo sang materya? Ayhan kombinsido ka nga ang Manunuga indi gid matupongan nga mas gamhanan sang sa mga pungsod upod ang ila tanan nga mga hinganiban. Yadtong nagaapresyar sini nga katunayan—kag ang mga Saksi ni Jehova nagaapresyar sini—may isa lamang ka dalangpan. Amo ini ang ginasiling sang dugang nga pinamulong ni Jehova:

“Kon indi, magkaput sia sa akon kuta, agod makighidait sia sa akon; makighidait sia sa akon.” (Isaias 27:5)

Wala sing tawhanon nga ahensia ang kuta nga madangpan para sa kalig-onan ukon matapna ang inaway sa duta, kag sa pagkamatuod wala sing kuta para sa panimalay sang duta ang mapalagyohan agod indi maano.

¹⁰ Nahibaloan mo nga madamo nga tawo karon ang nadalahig sing emosyonal sa mga debate kag mga hublag may kahilabtanan sa nuklear nga mga hinganiban kag pagbuhin sa mga armas. Sing masubo, nagaupang ina sa ila gikan sa katunayan nga ang indi malikawan nga inaway sang Dios nga Labing Gamhanan sa Armagedon amo ang magalaglag sa tanan nga mga pungsod. Kon ginaapresyar mo ina nga katunayan, nian maalamon para sa imo nga magliso kay Jehova. Ang iya “kuta” amo ang butang nga dapat kapyutan sang tanan nga nagapangita sing kaluwasan, nga amo, ang iya wala nagakaubos nga kusog. Ang bug-os nga organisasyon ni Satanas nga Yawa indi makadaug sa indibiduwal nga Cristiano nga nagkaput sa sina nga “kuta.”

¹¹ Si Jehova kag ang iya kasoldadosan sa idalom sang Kapitan, nga si Jesucristo, kon hambalon pa, nagamartsa karon. Samtang malayo pa sila, ang dalanon nga ginadikta sang sentido kumon, kon indi gid man matuod nga kaalam, amo ang para sa isa ka tawo nga magpadala, sing malaragwayon, sing misyon sa paghidait sing abanse kag magpakiluoy sing paghidait sa atubangan sang daku nga problema. Ginlaygay sang dimalupig nga Kapitan sang kasoldadosan ni Jehova ina nga dalanon sang yari pa sia sa duta. (Lucas 14:31-33) Kag kon usisaon mo sing maid-id ang ginsiling didto ni Jesus, makita mo nga gin-angot niya ang aton panimuot sa aton “mga pagkabutang.” Kon bala nagapuyo kita sa mauswagon kag mabuganaon nga pungsod ukon nagapuyo kita sa Ikatlo nga Kalibutan nga pungsod diin kinahanglan ang matuod nga panikasog agod matigayon ang kalig-onan sa pinansial, dapat naton usisaon ang aton pagtamod. Pamangkota ang imo kaugalingon: Nagasalig gid bala ako sa kusog ni Jehova subong akon kuta ukon ginapahanugotan ko bala ang “mga pagkabutang” nga amo ang importante? Sa sining kaangtanan, basaha palihug ang Lucas 12:15-21.

¹² Sa palibot sang duta, linibolibo ka mga Saksi ni Jehova ang nagliso na sing bug-os kay Jehova, kag nagapakighidait sa iya. Ginhimus sang madamo ang ila mga hilikuton agod makahinguyang sing madamo nga inoras sa hilikuton nga paghimo-disipulo. Ang tagsatagsa nga nagapanikasog gid nga alagaron si Jehova yara sa posisyon nga makaeksperiensia sang ginsaad nga “paghidait sang Dios” nga nagalabaw sa tawhanon nga panghunahuna kag paghangop. (Filipos 4:7) Samtang may tion pa, padayon nila nga ginabuligan ang iban nga makasulod sa sining mahidaiton nga kahimusan ni Jehova sang kasoldadosan. Ano ang lugar sinang nagaluwas-kabuhi nga hilikuton sa imo kabuhi?

Pagpuno sa “Mapatubason nga Duta” sing “Bunga”

¹³ Ano ang mangin bug-os kalibutan nga katungdanan sang espirituwal nga Israel sa tapos ini mapasag-uli sa kahamuot sang Dios sang matapos ang Inaway Kalibutanon I? Ginpakita ini sa aton sa sining makalilipay nga pinamulong sang Isaias 27:6:

“Sa palaabuton nga mga adlaw si Jacob magapanggamut, ang Israel magapamulak kag magapanalingsing; kag pun-on nila sang bunga ang kadaygan sang mapatubason nga duta.”

Usisaa ang kamatuoran sining mga pinamulong karon. Magahatag ini sa imo sang dugang nga rason nga mangin isa sang katawhan sang Dios ukon, kon isa na ikaw sa ila, magapamat-od sing mas malig-on pa gid nga magpabilin sa tunga sang matuod nga mga sumilimba bisan ano man nga pagtilaw ukon palaligban ang magautwas.

¹⁴ Ang kahimtangan nga kasubong sa gintagna sang Isaias 27:6 dugang nga makit-an sa tunga sang mga sumilimba ni Jehova kutob sang 1919, sang ginhiwat ang nahauna nga heneral nga kombension sang mga Saksi ni Jehova sa Cedar Point, Ohio. Halimbawa, wala madugay pagkatapos sini nga ang Watch Tower Society nagsugod sa pag-imprinta sang iya bag-o nga magasin, ang The Gold­en Age, nga ginatawag karon Awake! Daw subong bala nga ang espirituwal nga Juda nagapanggamut na sadto.

¹⁵ Gani sadtong nahauna nga tinuig sang kahilwayan kag pagpasag-uli sa kahamuot ni Jehova, ang matuod nga mga Cristiano nagsugod sa pagpamulak subong “tinanum ni Jehova.” (Isaias 61:3) Sadtong 1918, ang katapusan nga tuig sang Inaway Kalibutanon I, ginpahayag ang pamulongpulong nga “Mil­lions Now Liv­ing May Nev­er Die” ni J. F. Ruth­er­ford. Bangod diutay na lamang nga nagkalabilin sang ginpanganak sang espiritu nga mga disipulo sang nagagahom nga Hari, si Jesucristo, ang nabilin sa duta sa pagtuman sang gintangdo sang Dios nga hilikuton nga ginliton anay sa ila, sobra bala ina nga pagbantabanta?

¹⁶ Paano gamiton ni Jehova ina nga mga Cristiano sa pagpuno sang kadaygan sang “mapatubason nga duta sing bunga”? Ang nagkalabilin sang espirituwal nga Israel nanguna, apang kamusta ang “bunga” nga ipuno sa mapatubason nga duta? Nasapwan sang nagkalabilin nga ang “bunga,” nga nagalakip sa maayong balita sang natukod na nga Ginharian ni Jehova sa mga kamut ni Cristo, tuman kanamit kag masustansia amo kon ngaa luyag nila ini ipaambit sa ila mga isigkatawo. Gintagna ni Jehova nga ang diutay mangin isa ka libo kag ang magamay mangin makusog nga pungsod, kag indi ini sayop nga pagbantabanta sa bahin sang Dios. (Isaias 60:22) Sang ulihi ang nagkalabilin sang espirituwal nga Israel ginbuylogan sang “dakung kadam-an” sang “iban nga mga karnero” sang Maayo nga Manugbantay, si Jesucristo.—Bugna 7:9-17; Juan 10:16.

¹⁷ Ayhan nahibaloan mo ang kahimtangan sang Cristianismo karon. Ang Watch Tower Society may yara na karon 94 ka sanga sa bug-os nga globo. Ang organisadong aktibo nga mga kongregasyon sang mga Saksi ni Jehova nagadamo na karon sing mga 48,000, kag makita ini sila sa 203 ka kadutaan. Ang kadungganan iya gid sang matuod nga Dios, kag ining talalupangdon nga mga hitabo nagabindikar sang iya wala nagasayop nga Pulong, samtang ang “katapusan” nga gintagna sa Mateo 24:14, wala pa mag-abot.

¹⁸ Huo, halos tatlo ka milyon ka Cristiano ang nagapangabudlay upod sa Watch Tower Society sa palibot sang globo. Minilyonmilyon sini ang iya sang “iban nga mga karnero” ni Cristo, nga madugay na nagahimo sang pinakamabudlay nga bahin sang bug-os kalibutan nga hilikuton sa pagpanaksi, kag ang ‘kalipay ni Jehova amo ang ila kusog, ukon kuta.’ (Nehemias 8:10) Gani, ang kada isa sa aton karon may kahigayunan nga mabusog sa espirituwal kag makigbahin sa ‘pagpuno sang kadaygan sang mapatubason nga duta sing bunga.’

¹⁹ Makasiguro kita nga indi gid pagpahanugotan ni Jehova ang karon nga “bunga” sang “mapatubason nga duta,” ang latagon sang mga hilikuton sang iya mga Saksi, nga malaglag. Ang hilikuton sang iya nagabantala nga mga Saksi indi gid mangin wala sing pulos! Ang espirituwal nga “bunga,” nga ginkultibar sang matuod nga mga Cristiano ipakaon sa tanan nga maluyag magtigayon sini. Magalakip ini, sa ulihi, sa binilyon ka mga patay nga pagabanhawon sa idalom sang Isa ka Libo ka Tuig nga Paggahom ni Jesucristo. Hunahunaa kon ano ang buot silingon sina sa imo sa ulihi! Sa ulihi, madamong kinaugali nga mga Israelinhon sang nagligad ang pagabanhawon. Ang iban sa ila mahimo nga nadalahig sa nahauna nga katumanan sang tagna sa Isaias kapitulo 27. Indi bala makawiwili para sa imo nga magkabuhi didto, nga sa amo mapaathag mo kon paano ka nakigbahin sa mas daku, karon nga adlaw nga ‘pagpuno sang mapatubason nga duta sing bunga’?—Ipaanggid ang Bugna 22:2, 3.

Ang Dalanon sang “Leviatan” Gintapos

²⁰ Nian ang malaragwayon nga Egipto, ang karon malauton nga sistema sa diin si Satanas nga Yawa nagagahom subong dios sini, indi na magaluntad. Iliso ni Jehova ang iya igtalupangod sa simbuliko nga Leviatan, ang nagasaug, nagatikutiku nga man-ug nga yara sa tunga sang dagat sang katawhan. Sia kag ang mga pungsod, kag bisan pa ang mga unyon sang pungsod, pagadulaon. Indi na sia makita subong ang hilway, aktibo nga manugpalain sang katawhan nga sa ila napatay si Jesucristo. (Isaias 27:1) Huo, si Satanas nga Yawa pagaitagbong sa kadadalman sa bug-os nga Isa ka Libo ka Tuig nga Paggahom ni Jesucristo, ang Anak ni David kag ang may kinamatarong nga Manunubli sang Ginharian. Ang 144,000 ka espirituwal nga Israelinhon mangin kaupod niya nga manunubli sa langit, ang malaragwayon nga Leon sang tribu ni Juda. (Roma 8:16, 17; Bugna 5:5, 9, 10; 7:1-4) Si Jehova nga Dios nga Labing Mataas pagabindikahon sa walay katubtuban subong ang Soberano nga Ginuo sang uniberso. Ang bug-os uniberso nga organisasyon ni Jehova sa langit kag sa duta malipayon nga magaeksperiensia sing mapinadayunon nga paghidait kag paghiusa. Tubtob sa tion nga wala sing pat-od, bisan sing dayon, si Jehova magakalipay sa iya nahiusa bug-os uniberso nga organisasyon.

Madumduman Mo Bala?

◻ Ngaa nabatyagan sang matuod nga mga Cristiano ang “kasingkal” ni Jehova sadtong temprano sini nga siglo, kag ano ang maton-an naton gikan sini nga eksperiensia?

◻ Kabaliskaran sa mga pungsod, paano kita ‘makakaput kay Jehova subong aton kuta’? (Isaias 27:5)

◻ Paano ang “mapatubasan nga duta” napuno sang “bunga” sa aton tion? (Isaias 27:6)

◻ Anong palaabuton nga katumanan sang Isaias 27:1 ang masaligon nga ginapaabot naton?

[Mga Pamangkot sa Pagtinuon]

1, 2. (a) Anong matuodtuod nga pagkinahanglan ang pagabatyagon sang populasyon sang duta? (b) Sa ano nga katawhan kita makatulok sa sini nga bahin?

3. Sin-o sa aton siglo ang nakaeksperiensia sang “kasingkal” sang Dios nga ginsambit sa Isaias 27:4?

4. Paano naapektuhan sang “kasingkal” sang Dios ang iya Cristianong mga alagad, kag ano nga leksion ang maton-an naton gikan diri?

5. Sa modernong panahon, paano ni Jehova ginliso ang iya igtalupangod kay “Leviatan” nga ginsambit sa Isaias 27:1?

6, 7. (a) Sa modernong panahon ano ang nangin kaangay sang “mga sapinit kag mga talongon”? (b) Ano ang mapaabot naton nahanungod sa ila sa palaabuton?

8. Sa ano nagasalig ang madamo nga mga pungsod karon?

9, 10. Ngaa maalamon para sa aton nga magsalig sa isa pa ka “kuta”?

11. Paano naton iaplikar ang pinamulong ni Jesus sa Lucas 14:31-33 samtang nagakaput kita sa “kuta” sang Dios?

12. Ano ang pamatuod nga madamo karon ang nagakaput sa kusog ni Jehova?

13. Ano ang ginapakita sang Isaias 27:6 nga mapaabot naton sa aton panahon?

14. Paano natuman ang Isaias 27:6 sa katawhan sang Dios?

15. Anong makalilipay nga palaabuton ang ginpresentar sa matuod nga mga sumilimba sugod sang 1918?

16. (a) Ano ang reaksion sang nagkalabilin sa palaabuton nga yara sa atubangan nila? (b) Ano nga “bunga” ang ginkalipayan nila, kag ano ang mga resulta?

17, 18. Ano ang mapamatod-an mo nahanungod sa ‘pagpuno sang kadaygan sang mapatubason nga duta sing bunga’?

19. Ano ang maagom mo sa “mapatubason nga duta,” kag ano ang imo balatyagon tuhoy sina?

20. Ano ang yara sa unahan para kay “Leviatan,” kag ano ang resulta nahanungod sa pagkasoberano sang Dios?