Mga Pamangkot Gikan sa mga Bumalasa

◼ Sin-o ukon ano ang ginalaragway sang “Leviatan” sa Isaias 27:1?

Ang Isaias 27:1 nagasiling: “Sa sadtong adlaw si Jehova, nga may iya nga espada nga matig-a kag daku kag mabakud, magasilot sang Leviatan nga man-ug nga madasig, kag sang Leviatan nga man-ug nga tikotiko, kag patyon niya ang dragon nga yara sa dagat.” Ginahangop naton nga ini nga tagna naaplikar kay Satanas nga Yawa kag sa iya malaut nga organisasyon sa duta.

Ang The Watchtower sang Oktubre 15, 1985, nagpaathag nga ang Isaias kapitulo 27 amo ang tagna sa pagpasag-uli. Ang nahauna nga katumanan sini nagdalahig sa dumaan nga pungsod sang Israel, nga ginpasag-uli sa ila tumandok nga duta pagkatapos sang 70 ka tuig nga pagkaulipon sa Babilonia. Bisan pa nga ang kalabanan sa mga tinapok naghalin sa Babilonia, ang iban magapauli gikan sa Egipto kag sa teritoryo sang Asiria. Ginpat-od ni Jehova nga Dios nga ang iya katawhan hilwayon, gani indi sia mahimo punggan sadto nga mga pungsod paagi sa isahanon ukon tingob nga mga panikasog. Kon sa tawo daw gamhanan sila kag malimbungon, kaangay sang dumaan nga Leviatan (ayhan isa ka buaya), apang si Jehova magamadinalag-on tungod sa dumaan nga Israel.—Ipaanggid ang Job 41:1-34.

Apang, ano ang ginalaragway sang “Leviatan” sa mas daku nga katumanan sang Isaias kapitulo 27? Sing halangpunon, si Satanas nga Yawa ang madumduman, kay ang Bugna 12:9 nagalaragway sa iya subong “ang dakung dragon” kag “ang orihinal nga man-ug.” Madugay na sia nga kaaway sang Dios kag sang Iya katawhan. Dugang pa, ginaathag sang Kasulatan nga si Satanas may katapusan. Ang Dios nagpat-od sang adlaw sa paggamit sang iya gahom paagi sa iya Anak sa pagdula sa Yawa. Gani inang “dragon” ukon “man-ug” pagautdon nga daw paagi sa daku kag mabakud nga espada.—Hebreo 2:14; Bugna 20:1-3, 10.

Dumduma nga ang malapit nga mga kaaway nga nagaatubang sa dumaan nga Israel amo ang makita nga mga pungsod nga kaaway, subong sang Egipto, Asiria, kag Babilonia. Sing kaanggid sa karon, ang Cristianong mga alagad sang Dios sa bug-os nga kalibutan ginaatubang sang makita nga mga manugpamatok sa tunga sang magamo nga dagat sang katawhan nga nahamulag sa Dios. (Bugna 17:1, 15) Kontrolado ni Satanas ang bug-os kalibutan nga organisasyon nga ginagamit niya sa pagpugong sa sadtong “nagatuman sa mga sugo sang Dios kag nagapanaksi kay Jesus.” (Bugna 12:17) Ining ginadominahan sang Yawa nga organisasyon napamatod-an nga malimbungon kag mapintas, kaangay sang leviatan. Apang, sang temprano sini nga siglo ining “Leviatan” nadulaan sang iya pagkontrol sa ibabaw sang espirituwal nga Israel, kon sayuron, ang hinaplas nga Cristianong mga saksi ni Jehova. Kag pagautdon ini kon, kaupod sang angheliko nga mga hangaway, si Jesus magasakay nga may “matalom nga malaba nga espada nga sa sini lab-on niya ang mga pungsod.”—Bugna 19:11-16.

Gani bisan pa nga sa isa ka bahin masiling nga si Satanas amo ang Leviatan sa Isaias 27:1, ina nga tagna nagalakip sing labi pa sa “orihinal nga man-ug” lamang. Nagasentro ini labi na sa makita dutan-on nga organisasyon nga ginagamhan niya. Sa amo, ang The Watchtower nga ginsambit kaina makatudlo sa mga bumalasa sa tion nga “ang karon nga malauton nga sistema nga ginadominahan ni Satanas subong dios niya, indi magaluntad. Iliso ni Jehova ang iya igtalupangod sa simbuliko nga Leviatan, ang nagasaug, nagatikotiko nga man-ug nga yara sa tunga sang dagat sang katawhan. Sia kag ang mga pungsod, kag bisan ang unyon sang mga pungsod, pagadulaon.”