Ang Kabuhi kag Ministeryo ni Jesus

Madamong mga Samariahanon ang Nagtuo

PAGBALIK halin sa Sicar nga dala ang pagkaon, nakita sang mga disipulo si Jesus sa bubon ni Jacob diin nila sia ginbilin. Apang nagapakighambal sia karon sa isa ka Samariahanon. Sang mag-abot ang mga disipulo, naglakat ang Samariahanon, nga nagbilin sang iya banga kag nagkadto sa siudad.

Interesado katama sa mga butang nga ginsugid ni Jesus sa iya, ginsilingan niya ang katawhan sa siudad: “Kari kamo, tan-awa ang tawo nga nagsugid sa akon sang tanan nga butang nga nahimo ko.” Nian, agod pukawon ang ila kalangkag, namangkot sia: “Amo ayhan ini ang Cristo?” Epektibo ang pamangkot—ang katawhan naglakat agod tan-awon ini.

Samtang, ginpalig-on sang mga disipulo si Jesus nga kan-on ang pagkaon nga gindala nila gikan sa siudad. Apang nagsabat sia: “May kalan-on ako nga wala ninyo mahibaloi.”

“May nagdala ayhan sa iya sing kalan-on?” pamangkot sang mga disipulo sa isa kag isa. Si Jesus nagpaathag: ‘Ang akon kalan-on amo ang paghimo sang kabubut-on sang nagpadala sa akon kag ang pagtuman sang iya buluhaton. Wala kamo nagasiling, may apat pa ka bulan nian mag-abot ang ani?’ Apang tuhoy sa espirituwal nga alanihon, si Jesus nagsiling: ‘Ang nagaani nagabaton sing mga suhol kag nagatipon sing bunga tungod sa kabuhi nga walay katapusan.’

Ayhan nakita na ni Jesus ang daku nga epekto sang pagpanaksi sang Samariahanon—nga madamo ang magatuo sa iya bangod sang iya pagpanaksi. Sang ang katawhan sang Sicar nagkari sa iya sa bubon, ginpangabay nila sia nga magpabilin agod makighambal sa ila sing labi pa. Ginbaton ni Jesus ang pangagda kag nagpabilin sa duha ka adlaw.

Samtang nagapamati ang mga Samariahanon, madamo pa ang nagtuo. Nian nagsiling sila sa babayi: “Karon nagatuo kami indi tungod sang imo hambal; kay kami gid nakabati kag nakakilala nga ini amo gid ang manluluwas sang kalibutan.” Sa pagkamatuod ang Samariahanon naghatag sing matahom nga halimbawa kon paano kita makapanaksi nahanungod kay Cristo paagi sa pagpukaw sing kalangkag agod ang mga manugpalamati magausisa sing labi!

Dumduma nga apat pa ka bulan ini antes sang tig-alani—ayhan ang tig-alani sang sebada, nga sa Palestina nagakatabo kon tigpamulak. Gani mga Nobiembre ukon Disiembre ini. Nagakahulugan ini nga pagkatapos sang Paskwa sang 30 C.E., si Jesus kag ang iya mga disipulo naghinguyang sing walo ka bulan ukon kapin pa sa Judea nga nagapanudlo kag nagabawtismo. Manuglakat na sila karon pauli sa ila tumandok nga teritoryo sa Judea. Ano ang nagahulat sa ila didto? Juan 4:27-42.

◆ Ano nga pagpanaksi ang ginhimo sang Samariahanon kag ano ang resulta?

◆ Paano may kahilabtanan sa tig-alani ang kalan-on ni Jesus?

◆ Paano naton mahibaloan ang kalawigon sang ministeryo ni Jesus sa Judea pagkatapos sang Paskwa sang 30 C.E.?

[Bug-os pahina nga retrato pahina 25]