Report sang mga Manugbantala sang Ginharian

Pagtipon sa “Iban nga mga Karnero” sang Ginuo sa Australia

“UYUGON ko ang tanan nga pungsod, kag ang bilidhon nga mga butang sang tanan nga pungsod magaabot,” sulat ni manalagna Hageo kapin sa 2,500 ka tuig ang nagligad. (Hageo 2:7) Sa karon, inang mga bilidhon nagapanong gid sa balay sang pagsimba ni Jehova. Apang, kon kaisa, mahimo nga daw indi sila bilidhon sa ila panagway, subong ginapakita sini nga eksperiensia gikan sa Australia.

◻ Ang isa ka utod nga lalaki nga nagalakbay padulong sa miting sang isa ka Domingo may butang nga ginhimo nga wala pa gid niya anay mahimo. Ginpasakay niya ang isa ka tawo. Indi mahangpan sang utod kon ngaa ginhimo niya ini, kay ang buhok sang isa ka pamatan-on nga lalaki malaba kag gumon kag may burangos, indi desente ang panapton, kag wala gani sia magpapara. Sa hinali daw gintiklod ang utod sang iya balatyagon nga dapat sia magdulog kag pasakyon sia. Sang makasakay na ang pamatan-on sa awto, sia nagsiling: “Indi bala makadto ka sa simbahan?” Nakibot, ang utod nagsabat: “Huo, makadto ako sa Kingdom Hall.” “Maupod ako sa imo,” siling sang pamatan-on.

Bangod sang iya panagway, gintinguhaan sang utod nga palas-ayon sia sa pag-upod. Apang namilit ang pamatan-on kag gin-asoy niya ining sugilanon: Naghalin sia sa ila balay sang 16 anyos sia kag kutob sadto nadalahig sia sing tuman sa mga droga kag imoralidad. Nagaistar sia sa balaybalay nga plastik sa likod sang bungyod nga balas malapit sa baybay. Samtang didto, serioso nga ginbinagbinag niya ang kahulugan sang kabuhi. Indi niya naluyagan ang natabo sa iya, gani nangamuyo sia sa Dios kag nangayo sing bulig. Nagsiling sia nga ginsingganan niya ang Dios nga makadto sia sa dalan kag nangamuyo nga tuytuyan Niya ang isa ka tawo nga pasakyon sia kag dalhon sia sa husto nga simbahan. Malaka lang nga nagalakbay ang mga awto sa sining mamingaw nga dalan. Tatlo lamang ang naglabay sa sulod sang pila ka oras, kag wala sia ginpadulugan. Malakat na sia kuntani sang maglabay ang aton utod kag ginpasakay sia.

Gintambongan niya ang tanan nga miting sadto nga semana kag naninlo sia sang iya kaugalingon. Ginhukas pa gani niya ang krus sa iya liog. Namat-od sia nga mapauli sa Tasmania, kag isa ka bulan nga ginbasa niya didto ang Biblia kag nagapangamuyo. Bangod narealisar niya nga kinahanglan niya ang personal nga bulig agod mag-uswag pa, nagkadto sia sa sanga talatapan sang Watch Tower Society sa Australia. Ginkadtoan sia sang mga payunir agod magtuon upod sa iya, kag madasig sia nga nag-uswag. Ang kamatuoran sang Biblia naghatag sing katuyoan sa iya kabuhi kag sing paglaum sa palaabuton. (Hulubaton 10:28) Sa sulod sang pito ka bulan nagpabawtismo sia kag nag-auxiliary payunir, kag karon nagaalagad sia subong regular payunir sa Sydney.

◻ Aton ‘mapunihan ang panudlo sang aton Manluluwas, ang Dios,’ paagi sa pagsunod sang mga prinsipio sang Biblia sa aton paggawi. (Tito 2:10) Gin-ilustrar ini sa kaso sang isa ka utod nga lalaki nga nagatrabaho sa isa ka kompanya nga may ginamo tuhoy sa pag-eksport sing mga karnero kag mga baka. Ang tagsa ka mamumugon ginpaamot sing isa ka dolyar agod ibulig sa protesta. Sang mangindi ang utod, ginpahog sia sang opisyal sang unyon nga pahalinon sia sa trabaho. Nagpaathag ang utod nga ang iya konsiensia indi magtugot sa iya nga sakdagon ang ginamo nga ginaorganisar. Ginhatagan sia sang opisyal sang unyon sing isa ka oras sa pagpamensar.

Ginyaguta ang utod sang iya kaupod nga mga mamumugon. Ginpaathag niya sa ila nga indi dolyar ang problema, kundi bangod may mga pusil sila kag mga batuta, makasala sia sa dugo kon sakdagon niya sila kag kon may masamad ukon mapatay. Ang isa ka mamumugon nagsiling nga wala pa gid niya mabatii ina nga pagtamod kag luyag niya nga makatuon sing dugang pa. Sang ulihi, nasugdan sang utod ang pagtuon sa Biblia upod sa mamumugon, kag walay sapayan sang pagpamatok sang iya asawa, ini nga tawo nagsugod sa pagtambong sa mga miting sa wala madugay. Sa karon isa na sia sang aton dedikado nga kauturan. Tuhoy sa opisyal sang unyon, wala na sia magbalik agod pamangkuton ang utod.

Sa pagkamatuod ang mga nagahigugma sa Dios kag sa pagkamatarong, sa isa ka paagi ukon lain, ipadayag sa kamatuoran kag magakilala sini. Si Jesus nagsiling: “May iban ako nga mga karnero . . . Dapat ko dalhon, kag magapamati sila sa akon tingog.” (Juan 10:16) Kapin sa 42,000 sining “iban nga mga karnero” sa Australia ang namati na sa tingog sang Maayong Manugbantay, kag kada adlaw dugang pa ang ginatipon padulong sa natuo nga bahin sang pabor ni Jesus.—Mateo 25:31-34.

[Kapsion sa pahina 22]

Aton ‘mapunihan ang panudlo sang aton Manluluwas, ang Dios’ paagi sa aton paggawi