Report sang mga Manugbantala sang Ginharian
Paggawi nga Nagapuni sang Aton Cristianong Ministeryo
SI APOSTOL Pedro nagalaygay sa mga Cristiano: “Hupti nga maayo ang inyo paggawi sa tunga sang mga pungsod.” (1 Pedro 2:12) Ginapakita ni apostol Pablo nga paagi sa aton maayong paggawi, ‘ginapunihan [naton] ang panudlo sang aton Manluluwas, ang Dios, sa tanan nga butang.’ (Tito 2:10) Ang mga Saksi ni Jehova sa bug-os nga kalibutan kilala sa maayong paggawi. Talupangda ang pila ka halimbawa.
Ang Impresyon sang Manunudlo sa Maayong Paggawi
◻ Ang sanga talatapan sang Watch Tower Society sa Costa Rica nagareport nga madamo nga pamatan-on sa sadto nga pungsod ang nagapakita sing maayong halimbawa. Ang isa ka utod nga lalaki nagasugid kon ano ang nagganyat sa iya sa kamatuoran. Sia nagaasoy: “Ang butang nga nagganyat sa akon sing labi amo ang maayong paggawi sang mga pamatan-on kag mga adulto apang labi na ang mga pamatan-on. Samtang nagatrabaho ako subong isa ka manunudlo, nakatigayon ako sing kahigayunan nga mapanilagan sing suod ang mga Saksi sa akon eskwelahan. Kag sanglit nagadayon ako sa isa ka pamilya nga mga Saksi ni Jehova, napanilagan ko man didto ang paggawi sang mga kabataan.
“Natalupangdan ko gid ang kinatuhayan sa ulot sang mga estudyante nga mga Saksi kag sang iban nga mga estudyante sa akon eskwelahan. Ang mga Saksi pirme lang husto sa oras kag mabuot, wala gid nagabutig, kag pirme lang nagahimo sang ila mga tulumanon. Natalupangdan ko man nga bunayag sila sa tion sang eksamin, bisan pa ang iban nga mga estudyante nagakodigo. Dugang pa, mabuot sila kag matinahuron sa akon subong manunudlo nila. Bangod nahamuot ako sa lamharon nga mga Saksi sa eskwelahan kag sa puluy-an nga akon ginadayunan, gin-usisa ko ining relihion kag sang ulihi ginbaton ko ang kamatuoran.”
Maayong mga Resulta sang Cristianong Paggawi sa Isa ka Kombension
◻ Ang isa sang mga Saksi ni Jehova sa isa ka kongregasyon sa nakatundan nga bahin sang El Salvador naghandum nga ipaambit ang maayong balita sang Ginharian sa iya duha ka undanon nga utod nga lalaki. Ang isa namati kag nagtuon sang Biblia upod sa mga Saksi ni Jehova. Ang isa pa ka utod natungod sa Evangelical nga relihion nga ginatawag Prince of Peace, kag ginsilingan niya ang iya utod: “Indi ako paghambala; nagaalagad ka para sa mga interes sang Yawa.”
Sang mag-abot ang tion para sa distrito nga kombension, gin-agda sang isa nga nagatuon ang iya utod nga mag-upod sa iya sa kombension. Ang utod nagsiling: “Sige, maupod ako; makadto ako agod tan-awon kon sa diin ko madakpan ang mga Saksi.” Nagtambong ang duha ka mag-utod sa kombension. Nahamuot gid ang Evangelical sa daku nga tumalambong kag sa maayong kahim-ong sa kombension, kag nagsiling sia nga wala pa sia anay makakita sing subong sini. Sang magpauli sia, nagsiling sia sa iya utod: “Idaho ang imo kamot sa akon.” “Ano ang buot silingon sini?” pamangkot sang iya utod. “Idaho lang ang imo kamot sa akon,” amo ang sabat. Nagkamustahanay sila, kag ang utod nga natungod sa Evangelical nga relihion nagsiling: “Sugod karon magatuon na ako upod sa mga Saksi ni Jehova. Sa pagkamatuod, wala gid ako makahibalo sang akon ginawasi.” Sia man karon isa ka aktibo kag makugi nga manugwali sang maayong balita sang Ginharian sang Dios.