Nakita Mo Na Bala ang Yabi?
NGAA importante gid ang gugma para sa mga Cristiano? Bangod sang sahi sang Dios nga ila ginasimba. Ginlaragway sia ni apostol Juan sa sining mga pulong: “Ang Dios gugma.” (1 Juan 4:8) Subong nga madamo nga ginikanan ang nagalaum nga ang ila kabataan magsunod sa ila mga tikang, gani man luyag ni Jehova nga Dios nga mangin kaangay sa iya ang mga Cristiano. Sa amo, si apostol Pablo naglaygay: “Magmanug-ilog kamo sang Dios, subong nga mga anak nga hinigugma, kag maggawi sa gugma.”—Efeso 5:1, 2.
Ginabalanse man sang gugma ang iban pa nga Cristianong mga kinaiya. Sang mga adlaw ni Jesus, ang mga Judiyo—labi na ang ila mga lider—maukod nga mga estudyante sang Biblia. Apang binagbinaga ang ginsiling ni Jesus sa ila: “Ginausisa ninyo ang mga Kasulatan, bangod nga nagahunahuna kamo nga paagi sa ila makatigayon kamo sing kabuhi nga walay katapusan, . . . apang nahibaloan ko gid nga wala kamo sang gugma sang Dios sa inyo kaugalingon.” (Juan 5:39, 42; Lucas 11:42) Kon may gugma sila subong man may ihibalo, ginkilala nila kuntani si Jesus subong Mesias. Apang madamo sa ila ang nakawasi sang kahigayunan nga mangin una nga mga katapo sang Cristianong kongregasyon.
Dumduma, man, ang Romano Katoliko nga mga manugbihag nga nagdala sang ila relihion sa Bag-ong Kalibutan. Pat-od gid nga malig-on ang ila pagtuo kag may daku nga kakugi sa paghimo sang ila nahimo. Apang wala gid yadto sing gugma. Kay kon may yara, wala kuntani sila mangawat, magpaantos, manglugos, kag magpatay sang tumandok nga mga pumuluyo sang mga kontinente sang Amerika.
Sa amo, ang gugma amo ang importante nga Cristianong kinaiya. Sin-o ang dapat pakitaan sini nga gugma? Si Jesus nagsiling sa aton: “‘Dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang labing daku kag nahauna nga sugo. Ang ikaduha, kaangay sini, amo ini, ‘Dapat mo higugmaon ang imo isigkatawo subong sang imo kaugalingon.’”—Mateo 22:37-39.
Sa kamatuoran, kapin pa ang mahimo sang Cristianong gugma. Si Jesus nagsiling man: “Higugmaa ang inyo mga kaaway kag pangamuyo kamo para sa mga nagahingabot sa inyo; agod nga mangin anak kamo sang inyo Amay nga yara sa langit, kay nagapasubang sia sang iya adlaw sa mga malauton kag sa mga maayo, kag nagapaulan sa mga matarong kag sa mga dimatarong.” (Mateo 5:44, 45) Sa iban nga pulong, ang gugma sang Cristiano nagalakip sa halos tanan! Apang ano ang kahulugan sini sa buhat?
Kon Ginahigugma Gid Naton ang Dios
Una, kon luyag gid naton higugmaon ang Dios, dapat naton sia makilala sing dugang pa. Ginpahapos ina sang Dios paagi sa pag-aman sing Biblia, nga subong daw isa ka sulat gikan sa iya para sa aton. Kon makabaton kita sing sulat gikan sa isa nga hinigugma, ginabasa naton ini sa gilayon bisan pa masako kita. Dapat bala mangin tuhay sa pagbasa sing Biblia? Indi dapat. Matuod, para sa madamo, ang kabuhi puno sing mga tublag, kag daw luyag pa sang kalabanan nga magtan-aw sing telebisyon sang sa magbasa. Apang wala ina ginatugutan sang matuod nga mga Cristiano nga magpugong sa ila sa pagbasa sang Pulong sang Dios. Sa amo, kaangay sila sang salmista nga nagsulat: “Ang akon kalag nagtuman sang imo mga pahanumdom [nga sa karon masapwan sa Biblia], kag ginahigugma ko sila sing lakas.”—Salmo 119:167.
Sa Biblia, ginasugiran kita sang Dios kon ano ang luyag niya nga igawi naton. Subong nga ang mga ginikanan nagapahamtang sing mga talaksan sang paggawi para sa ila kabataan, si Jehova nagpahamtang sing mga talaksan nga iya ginapaabot nga sundon naton—mga talaksan nga indi mabali. Halimbawa, ang Biblia nagasiling sa aton: “Ang mga makihilawason, ukon mga diwatahan, ukon mga makihilahion, ukon babayinhon, ukon mga lalaki nga nagahulid sa mga lalaki, ukon mga makawat, ukon mga mahamkunon, ukon mga palahubog, ukon mga mapasipalahon, ukon mga malugos indi makapanubli sang ginharian sang Dios.” (1 Corinto 6:9, 10) Malaba ina nga listahan! Apang ang bisan sin-o nga nagahigugma gid sa Dios malipay sa pagbantay sini. Ngaa? Bangod subong ginpakita ni apostol Juan: “Ini amo ang gugma sang Dios, nga bantayan ta ang iya mga sugo.”—1 Juan 5:3.
Makapasubo nga madamo sang mga buhat nga ginpakamalaut sa Biblia ang ginabaton na karon, bisan sa tunga sang “Cristiano” nga mga tawo. Ang report sa Canada nga ginpaguwa sang Protestante nga denominasyon nagrekomendar nga binagbinagon ang pag-orden sa mga homoseksuwal subong mga ministro, nga ang sekso nga wala sing kasal mahimo mabaton sa idalom sang pila ka kahimtangan, kag nga ang pagkatutom sa pag-asawahay maglakip sang panghilahi. Wala sing duhaduha nga luyag ipakita sang mga awtor sadto nga report nga masangkad sila sing hunahuna kag mainulikdon. Apang nagapakita bala sila sing gugma sa Dios ukon sa mga tawo nga ila ginapalig-on sa imoral nga mga dalanon? Indi gid, kay si Pablo nagsiling nga ang nagabuhat sina nga mga butang indi magapanubli sang Ginharian sang Dios. Mas mahigugmaon nga sundon sing maisugon ang mga talaksan sang Dios, ginabuligan ang mga maluya sa pagsunod man sini, sa baylo nga palig-unon sila sa pagsunod sa isa ka mas mahapos nga dalanon nga sa ulihi magadul-ong sa kalaglagan!
Napahulag nga Ipaambit sa Iban
Kon basahon naton ang Biblia, maton-an man naton ang makatilingala nga mga butang nga gintuyo sang Dios para sa katawhan. Maton-an naton nga “ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Maton-an man naton ang katuyoan sang Dios nga dulaon sa duta ang kalautan kag paluntaron ang isa ka malinong, tulad-paraiso nga sistema sang mga butang paagi sa iya Ginharian sa idalom gihapon ni Jesus. (Mateo 6:9, 10; Bugna 21:3, 4) Subong ginasaad sang Biblia: “Kay sa diutay pa nga tion, kag ang malauton wala na . . . Apang ang mga mahagop magapanag-iya sang duta, kag magakalipay sila sa kabuganaan sang paghidait.”—Salmo 37:10, 11.
Sa kamatuoran, ang mensahe sang Biblia amo gid ang ginakinahanglan sang tawo. Amo kon ngaa makapasubo basahon nga ang mga misyonero sang Cristiandad nga natublag sang kaimulon kag inhustisya nga makita nila sa imol nga mga pungsod nagapahilabot sa politika kag sa pag-alsa pa gani. Ang pag-alsa indi magalubad sang mga palaligban sina nga mga pungsod. Ginahigugma gid bala sina nga mga misyonero ang Dios? Kon amo, indi bala sila magpakita sing pagtuo sa iya mga saad kag itudlo ang ila mga panong sa iya Ginharian? Dapat ipakita sang mga manugbantay nga nagahigugma sa ila panong kon paano ang pagkamatinumanon sa kasugoan sang Dios makabulig sa ila bisan sa karon, sa baylo nga hayluhon sila nga magpahilabot sa politikal nga mga plano nga magadul-ong lamang sa kapaslawan.
Ang kamatuoran amo, ang mensahe sang Biblia tuman ka dalayawon nga wala sing mahigugmaon nga tawo ang makatago sini sa iya kaugalingon lamang. Amo kon ngaa ang gugma nagapahulag sa matuod nga mga Cristiano nga ipaambit sa iban ang ila nahibaloan. Sa Cristiandad ang hilikuton sa pagpakighambal sa iban nahanungod sa Biblia masami nga ginabilin sa diutay nga klase sang mga propesyonal nga ginabayaran—ang mga klero. May malain ini nga mga resulta. Subong ginbaton sang isa ka Lutheran nga pastor sa magasin nga Christianity Today: “Ang Iglesia maluya karon bangod ang espirituwal nga mga lider napaslawan sa paghanas sing isa ka hubon sang mga tumuluo sa paghimo sang pareho nga sahi sang hilikuton nga ila ginahimo. Ukon bangod ang mga tumuluo napaslawan sa pagkilala kag sa pagbaton sina nga ministeryo.”
Ang matuod nga mga Cristiano ‘nagakilala kag nagabaton sina nga ministeryo.’ Ginasunod nila ining mga pulong ni apostol Pablo: “Lig-unon ta ang pagtu-ad sang aton paglaum nga indi mationg, kay matutom sia nga nagsaad.” (Hebreo 10:23) Ang ila katuyoan? Amo man ang nagpahulag sa isa ka grupo sang mga Cristiano sang nahaunang siglo nga gindayaw ni apostol Pablo: “Ang naulihi nagabantala kay Cristo bangod sang gugma.”—Filipos 1:16.
Gugma Para sa mga Masigkacristiano
Huo, ang gugma amo ang yabi sa matuod nga Cristianismo bangod naapektohan sini ang tanan nga bahin sang kabuhi sang matuod nga mga Cristiano. Gani tuhay sila sa mga tawo sa palibot nila. Ngaa? Si apostol Juan nagsiling nahanungod sining kalibutan: “Ang bug-os nga kalibutan yara sa gahom sang malauton.” (1 Juan 5:19) Ang malauton amo si Satanas nga Yawa, kag ginabanaag sang kalibutan ang iya mga kinaiya sa daku nga ginahimo sini. Ang impluwensia ni Satanas makita sa lapnag nga pagkadibunayag, imoralidad, inhustisya, kahuol sa mga rasa, kag pagkadimakatarunganon sa ekonomiya nga nagaluntad karon. Ang Cristiano, nga nagasimba sa mahigugmaon nga Dios kag nagailog sa iya paagi sa pagpalambo sang kinaiya nga gugma, dapat mangin tuhay!
Indi ini mahapos himuon kon nagaisahanon. Busa, ginapalig-on kita sang Biblia nga pangitaon ang mga tawo nga subong naton nagaapresyar sa kinaiya nga gugma. Sa amo, ang mga Cristiano makabuligay sa isa kag isa. Gani ginsulat ni apostol Pablo ining makapalig-on nga mga pulong: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob, . . . nagalinaygayay ang isa kag isa.”—Hebreo 10:23-25.
Kon luyag mo mapalig-on, malipay ang mga Saksi ni Jehova sa pagpakilala sa imo sa grupo sang mga tawo nga nagatinguha sing lakas sa pagpakita sing diosnon nga gugma sa ila kabuhi. Wala sing duhaduha nga may yara grupo sina nga mga tawo sa inyo komunidad, kag ang espiritu sang Dios yara sa ila bangod, amo ina ang tuburan sang matuod nga Cristianong gugma. “Ang bunga sang espiritu amo ang gugma.” (Galacia 5:22) Ang pagpakig-upod sa ila magabulig sa imo sa pagpamati sa pagpalig-on ni apostol Pedro: “Higugmaa ang bug-os nga paghiliutod.”—1 Pedro 2:17.
Daw ano ka makapasubo kon sa tapos magtinguha sing lakas sa pag-alagad sa Dios, masapwan ikaw sa tunga sang mga tawo nga makabati sang mga pulong ni Jesus: “Wala gid ako makakilala sa inyo! Palayo sa akon, kamo nga mga manugbuhat sing kalautan.” (Mateo 7:23) Kon palambuon naton ang gugma, ang yabi sa matuod nga Cristianismo, indi ina matabo sa aton. Ang gugma magapahulag sa aton nga basahon ang Biblia, magkabuhi suno sa mga talaksan sini, pangitaon ang iban nga mga Cristiano agod makig-upod sa ila, kag maghambal sa iban nahanungod sa maayong mga butang nga ginaunod sang Biblia. Huo, ang gugma magapahulag sa aton sa paghimo sang luyag sang Dios nga himuon naton. Kag, subong ginsiling ni Jesus, ang “nagahimo sang kabubut-on sang [iya] Amay nga yara sa langit” amo ang magapanubli sang mga saad sang Dios. Si apostol Juan nagdugang: “Ang nagahimo sang kabubut-on sang Dios magapabilin tubtub sa walay katubtuban.”—Mateo 7:21; 1 Juan 2:17.
Huo, magpalambo sing gugma. Tuguti ini nga pahulagon ikaw sa paghimo sang kabubut-on sang Dios. Sa amo, mangin matuod ikaw nga Cristiano, kay si Jesus nagsiling: “Paagi sa sini makilala sang tanan nga kamo mga disipulo ko, kon maghigugmaanay kamo.” (Juan 13:35) Kag maagom ninyo ang dayon nga mga padya nga ginsaad sang Dios para sa mga nagahigugma sa iya.
[Laragway sa pahina 7]
Palamboa ang Gugma