Ano ang Yabi sa Matuod nga Cristianismo?
SA KARON, madamo sa mga katawhan ang nagapangangkon nga bahin sang Cristianismo sang sa iban nga sahi sang relihioso nga grupo. Apang ang mga pagpati sining mga himo-sa-kaugalingon nga mga Cristiano nagasumpakilay, wala sila sing paghiusa, kag kon kaisa nagapatyanay pa sila sa isa kag isa. Maathag, nga ang madamo indi matuod nga mga Cristiano. Si Jesus nagsiling nga sa aton adlaw, madamo ang magasiling sa iya, “Ginuo, Ginuo,” sa iban nga pulong, nagapangangkon nga mga Cristiano, apang sia magasiling sa ila: “Wala ako makakilala sa inyo! Palayo sa akon kamo nga manughimo sing kalautan.” (Mateo 7:21, 23) Sa pagkamatuod, wala sing isa sa aton ang maluyag nga mangin bahin sini nga mga grupo! Kon amo paano naton mahibaluan kon bala kita matuod nga mga Cristiano?
Ang matuod, madamo nga mga butang ang kinahanglanon agod mangin isa ka matuod nga Cristiano. Ang matuod nga Cristiano dapat may mabaskog nga pagtuo bangod “kon wala sing pagtuo imposible ang pagpahamuot sa [Dios].” (Hebreo 11:6) Ining mabaskog nga pagtuo dapat updan sing husto nga mga buhat. Ang disipulo nga si Santiago nagpaandam nga ang “pagtuo nga wala sing buhat patay.” (Santiago 2:26) Dugang pa, ang Cristiano dapat magkilala sa awtoridad sang“ matutom kag mainandamon nga ulipon.” (Mateo 24:45-47) Apang ang yabi sa matuod nga Cristianismo tuhay pa sa sining mga butang.
Ano ang yabi? Ang apostol nga si Pablo nagpaathag sa iya una nga sulat sa mga taga Corinto. “Kon nagapamulong ako sing hambal sang mga tawo kag sang mga manugtunda, apang walay gugma, subong ako sang saway nga nagatunog ukon apiping nga nagatagsing. Kag kon may pagkamanalagna ako, kag makahibalo sang tanan nga tinago kag tanan nga pagkilala, kag kon may akon ako sang bug-os nga pagtuo, sa bagay nga makahalin sang mga bukid, apang walay gugma, wala ako sing kapuslanan. Kon ipanghatag ko ang tanan ko nga pagkabutang agod pakaunon ang iban, kag kon itugyan ko ang akon lawas nga sunugon, apang wala sing gugma wala ini sang kapuslanan sa akon.” —1 Corinto 13:1-3.
Kon amo ang gugma amo ang yabi sang matuod nga Cristianismo. Ang pagtuo, binuhatan, kag ang husto nga pagpakig-upod importante, kag indi masikway. Apang kon wala sing gugma, ang ila kabilihanan indi matigayon. Ngaa subong sini?
Ang sadsaran nga rason, amo ang sahi sang Dios nga aton ginasimba. Si apostol Juan naglaragway kay Jehova, ang Dios sang matuod nga Cristianismo, sa sini nga mga pulong: “Ang Dios gugma.” (1 Juan 4:8) Si Jehova nga Dios may yara pa iban nga mga kinaiya, subong sang gahom, katarungan, kag kaalam, apang sanglit sa ginsuguran sia ang Dios sang gugma, ano nga sahi sang mga katawhan ang luyag niya nga iya mangin sumilimba? Sa pagkamatuod, mga indibiduwal nga nagailog sa iya kag nagapatubo sing gugma.—Mateo 5:44, 45; 22:37-39.
Isa Ka Husto Nga Motibo
Huo, ang gugma makahimo sa mga Cristiano nga mangin kaanggid sang Dios nga ila ginasimba. Buot silingon nga ang ila motibo kaanggid sang motibo sang Dios. Anong motibo labi sa tanan ang nagpahulag kay Jehova nga Dios, nga ipadala si Jesus sa duta sa paghatag sa aton sing kahigayunan nga makatigayon sing kabuhi nga dayon? Amo ang gugma. “Ginhigugma gid sang Dios ang kalibutan sa bagay nga ginpadala niya ang iya bugtong nga anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Ti, ano nian, ang aton mangin motibo sa paghimo sang kabubut-on sang Dios. Sa liwat, amo ang gugma. “Kay ini amo ang gugma sang Dios, nga bantayan ta ang iya mga sugo.” 1—Juan 5:3.
Posible bala ang pag-alagad sa Dios nga may sayop nga motibo? Huo. May pila nga ginsambit si Pablo sang iya adlaw nga nagaalagad nga may kahisa kag paindis-indis. ( Filipos 1:15-17) Mahimo ini matabo sa aton. Tuman ka mapaindis-indison ining kalibutan, kag ang amo nga espiritu mahimo makaepekto sa aton. Mahimo nga bugalon nga maghunahuna kita nga mas maayo kita magpamulongpulong ukon makasarang magpahamtang sing madamo nga literatura sang sa iban. Mahimo nga ipaanggid naton ang aton pribilehiyo sa pag-alagad sa iban kag magpaimportante sang kaugalingon—ukon mahisaon. Ang isa ka gulang mahimo nga mangin maimon sa iya posisyon, tubtob sa punto nga iya balabagan ang isa ka huben nga may ikasarang sa pag-uswag. Ang handum sa personal nga daug mahimu magapahulag sa aton nga magpakig-abyan sa mga may sarang nga Cristiano kag sikwayon ang mga kubos lamang.
Mahimu matabo ining mga butang bangod indi pa kita himpit. walay sapayan, kon—katulad ni Jehova—himuon naton ang gugma nga amo ang aton pangunang motibo, awayon naton ang amo nga mga huyog. Ang kakagod ang handum nga pakataason ang kaugalingon, ukon ang sobra nga pagpabugal makatabon sang gugma, amo kon ngaa—kita wala gid sing pulos.”—Hulubaton 11:2; 1 Corinto 13:3.
Gugma sa Makagod nga Kalibutan
Si Jesus nagsiling nga ang iya mga sumulunod indi “bahin sang kalibutan.” (Juan 17:14) Paano kita makalikaw nga madaug sang impluwensia sang kalibutan sa palibot naton? Ang gugma makabulig gid. Halimbawa, sa karon ang mga tawo “mahigugmaon sa kinasadya sa baylo sang sa Dios.” (2 Timoteo 3:4) Si Juan nagpaandam sa aton nga indi mangin kasubong sang amo. Sia nagsiling: “Indi ninyo paghigugmaa ang kalibutan ukon ang mga butang nga yara sa kalibutan. Kon ang bisan sin-o nagahigugma sang kalibutan, ang gugma sang Amay wala sa iya; kay ang tagsa ka butang sa kalibutan—ang kailigbon sa unod kag ang handum sang mata kag ang bugal sang kabuhi—indi iya sang Amay, kundi iya sang kalibutan.”—1 Juan 2:15,16.
Apang, indi mahapos nga sikwayon sing bug-os ang “kailigbon sang unod” kag ang “kailigbon sang mata.” Ining mga butang nahamut-an gid tungod tuman sila ka makaglanyat sa unod. Dugang pa, may madamo kag nanarisari nga mga kalingawan sa karon sang sa sadtong adlaw ni Juan, gani kon ang kailigbon sang mata problema na sadto, ilabi na gid sa karon.
Sing makawiwili, madamo sing moderno nga mga kalingawan nga ginatanyag karon sang kalibutan nga indi naman malain. Wala sing malain sa pagtigayon sing daku nga balay, matahom nga kotse, telebisyon, ukon stereo. Indi man paglapas sa kasuguan sa Biblia, ang pagbiyahe sing malawig kag ang masadya nga pagbakasyon. Ano kon amo ang punto sang paandam ni Juan? Sa isa ka rason, nga kon ang amo nga mga butang mangin tuman ka importante sa aton, magatubo sa aton ang espiritu sang kakagod, materyalismo, kag bugal. Kag ang panikasog sa pagtigayon sing kuwarta para sa ila makaupang sang aton pag-alagad kay Jehova. Ang pagtigayon sini nga mga butang nagakinahanglan sing tion, kag bisan pa ang rasonable nga pagpahunayhunay nagahatag sing paumpaw, ang aton tion limitado, bangod sang aton obligasyon sa pagtuon sang Biblia, pagpakig-upod sa mga masigka Cristiano sa pagsimba, kag pagbantala sing maayong balita sang ginharian.—Salmo 1:1-3; Mateo 24:14; 28:19, 20; Hebreo 10:24, 25.
Sa sining materyalistiko nga tion, kinahanglan ang determinasyon sa ‘pag-una sang Ginharian sang Dios’ kag pamatukann ang ‘paggamit sing bug-os sining kalibutan.’ (Mateo 6:33; 1 Corinto 7:31) Ang makusog nga pagtuo makabulig man. Apang sing labi, ang putli nga gugma kay Jehova kag sa isigkatawo makapabakod sa aton sa pagpamatok sa mga ganyat nga, samtang indi malain, mahimo makapugong sa aton sa ‘pagtuman sing bug-os sang aton ministeryo.’ (2 Timoteo 4:5) Kon wala ina nga gugma, ang aton ministeryo mahulog lamang sa isa ka wala sing pulos nga panikasog.
Gugma sa Tunga sang Kongregasyon
Si Jesus nagpadaku sang pagkaimportante sang gugma sang sia magsiling: “Sa sini ang tanan makahibalo nga kamo mga gintutun-an ko, kon may gugma sa tunga ninyo.” (Juan 13:35) Ngaa pa ang mga gulang maghinguyang sing madamo nga tion sa pagtatap kag pagbulig sa masigka Cristiano kon wala nila sila ginahigugma? Ngaa ang kongregasyon magabatas sang mga kaluyahon sang isa kag isa—lakip ang mga gulang—kon indi bangud sang gugma? Ang gugma nagapahulag sa mga Cristiano nga buligan ang isa kag isa sa pisikal nga paagi kon mahibaluan nila nga nagakinahanglan sing bulig ang iban. (Binuhatan 2:44, 45) Sa tion sang paghingabot, ang mga Cristiano nagaamlig sa isa kag isa kag handa nga mapatay para sa isa kag isa. Ngaa? Bangod sang gugma.—Juan 15:13.
Kon kaisa, ang pinakadaku nga pamatuod sang gugma nagahalin sa magagmay nga mga butang. Ang isa ka gulang, nga nabudlayan na sa mga mabug-at nga hilikuton, mahimo palapitan sang isa ka utod nga magasugid sing amo gihapon nga reklamo nga para sa gulang daw indi importante. Dapat bala nga maakig ang gulang? Sa baylo nga himuon ini nga kabangdanan sang pagbahinbahin, mapailubon kag malulo nga magapakig-angot sia sa iya utod. Hambalan nila ini nga bagay, kag magapabakod man ini sang ila pag-abyanay. (Mateo 5:23, 24; 18:15-17) Sa baylo nga magpilit sang diretso sang isa kag isa, dapat tinguhaan sang tanan nga palambuon ang maalwan nga tagipusuon nga ginpanugda ni Jesus, handa sa pagpatawad sa ila utod sing “kapituan kag pito ka beses.” (Mateo 18:21, 22) Sa amo ang mga Cristiano nagapanikasog nga isul-ob ang gugma, “kay amo ini ang higot sang kahimpitan.”—Colosas 3:14.
Pagpadaku sang Aton Gugma sa Isa kag Isa
Huo, ang gugma amo ang husto nga motibo sa pag-alagad kay Jehova. Ang gugma magapabakod sa aton nga padayon nga napain sa kalibutan, kag ang gugma magapasalig nga ang kongregasyon magapabilin nga matuod nga Cristiano. Samtang wala nagapakadiutay sang pagkahanas, makabulig ini sa mga may awtoridad nga indi mangin tuman ka mahunahunaon sa paghanas nga nalipatan na nila ang pagkamaluluy-on kag pagkamalulo, kon nagapakig-angot sa iban. Ang gugma nagabulig sa aton tanan “nga mangin matinumanon sa mga nagapanguna . . . kag nagapasakop saila.”—Hebreo 13:17.
Si apostol Pedro naglaygay sa aton nga maghupot sing “mainit nga gugma” sa isa kag isa bangod “ang gugma nagatabon sang madamo nga mga sala.” (Pedro 4:8) Paano naton mahimo ini? Ang tawo gintuga suno sa larawan sang Dios kag sa amo may kinaugali nga ikasarang sa paghigugma. Apang ang sahi sang gugma nga ginahambalan naton diri may dugang nga kinahanglanon. Sa pagkamatuod, amo ini ang panguna nga bunga sang espiritu. (Galacia 5:22) Sa amo, agod patubuon ang gugma, dapat man naton ipadayag ang aton kaugalingon sa espiritu sang Dios. Paano? Paagi sa pagtuon sang Biblia, nga ginbugna sang espiritu ni Jehova. (2 Timoteo 3:16) Paagi sa pagpangamuyo sa espiritu ni Jehova sa pagpadaku sang aton gugma kay Jehova kag sa aton mga kauturan. Kag paagi sa pagpakig-upod sa Cristianong kongregasyon, nga sa diin ang espiritu nagailig sing tayuyon.
Kinahanglan man nga usisaon naton ang aton kaugalingon agod hibaluon ang mga di-mahigugmaon nga mga buhat kag panghunauna. Dumduma nga ang gugma isa ka kinaiya sang tagipusuon, “kag ang tagipusuon labi ka malalangon sa tanan nga butang kag lakas gid ka dunot.” (Jeremias 17:9) Walay sapayan sang tanan nga bulig nga ginahatag sa aton ni Jehova, kon kaisa nagapanghikot kita sa di-mahigugmaon nga paagi. Mahimo nga magahambal kita sing indi nagakaigo kag matalom sa katulad naton nga Cristiano, ukon mahimo nga maakig kag magabalos kita sa kon ano ang ginhambal sa aton. Sa amo, mangin maayo kon aton ilugon ang pangamuyo ni David: “Usisaa ako O Dios, kag kilalaha ang akon tagipusuon. Tilawi ako kag kilalaha ang akon mga panghunahuna, kag tan-awa kon may bisan anong malaut nga dalanon sa akon, kag tuytuyi ako sa dalanon nga dayon.”—Salmo 139:23, 24.
Subong sang ginasiling sang Biblia, “ang gugma wala nagauntat.” (1 Corinto 13:8) Kon himuon naton nga batasan ang paghigugma sa isa kag isa, indi gid kita pagkulangon sa tion sang pagtilaw. Ang gugma nga nagaluntad sa tunga sang katawhan sang Dios nakaamot sing daku sa nagaluntad nga espirituwal nga paraiso sa karon. Yadto lamang ang nagahigugma sing mainit sa isa kag isa ang makasapo sing kalipay sa pagkabuhi sa bag-o nga kalibutan. Gani, iluga si Jehova sa pagpabutyag sing amo nga gugma kag sa amo mapalig-on mo ang higot sang paghiusa. Palambua ang gugma, kag hupti ang yabi sa matuod nga Cristianismo.