Mahalungon nga Pagsunod sa mga Sugo sang Hari
“Magapamalandong ako sang imo mga sugo, kag talupangdon ko ang imo mga banas. Magakalipay ako sa imo mga palatukuran. Indi ko pagkalipatan ang imo pulong.”—SALMO 119:15, 16.
1. Ngaa yara sa idalom sang mga sugo ni Jehova ang tanan nga tawo kag ang tanan nga butang?
ANG tanan nga tawo kag ang tanan nga butang yara sa idalom sang mga sugo sang Labing Gamhanan nga Dios nga si Jehova, ang dayon nga Hari. Sia ang tuburan sang tanan nga kabuhi. Ginhuman niya ang duta kag ginhanda ini agod puy-an. Sia ang Dios sang sugo, kag paagi sa pagpatuman sang iya mga palatukuran, matipigan ang kahim-ong sa tanan niya nga tinuga.—Salmo 36:9; Isaias 45:18; Bugna 15:3.
2. Sin-o ang nagakontrol sa mabituon nga kalangitan, kag paano?
2 Si Jehova nga Dios ang nagsugo sa mga bituon sa langit nga maglapta subong sang kayangkayang sa ibabaw sang duta kag dayon nag-agda sa iya katawhan: “Itangla ang inyo mga mata sa hitaas kag tan-awa. Sin-o bala ang nagtuga sini sa ila? Sia nga nagapaguwa sang ila kasoldadosan sa isip, ginatawag niya sila tanan sa ngalan.” Si Jehova ang namangkot kay Job: “Nahibaloan mo bala ang mga pagsulundan sang mga langit, ukon sarang mo bala matukod ang ila pagbulut-an sa duta?” Ang Iya kasugoan sang grabidad kag paghulag amo ang nagahugpong sa minilyonmilyon ka galaksiya upod ang ila binilyonbilyon ka bituon kag ginakontrol sina ang mga paghulag sa duta samtang nagalakbay ini sa kahawaan.—Isaias 40:26; Job 38:33.
3. Paagi kay sin-o mga sugo padayon nga nagakabuhi ang mga sapat, kag ano ang matabo kon maglalis sila?
3 Sia ang nagapatubo sa berde nga mga tanum nga subong sang alpombra sa duta. Paagi sa iya mga sugo ang mga binhi nagatugdo kag nagatubo kag nagadamo. Indi maisip nga mga bariedad sang sapat ang bugana sa duta—gikan sa matugnaw nga rehiyon tubtob sa mainit nga mga kagulangan, gikan sa mataas sa atmospera tubtob sa idalom sa duta, gikan sa kadaygan sang dagat tubtob sa pinakamadulom nga kadadalman. Agod magluntad, ang tagsatagsa sining indi maisip nga mga sahi dapat magsunod kay Jehova. Paagi sa duna, ginprograma niya sa ila ang iya mga sugo para sa kaluwasan. “Sila duna nga maalam.” (Hulubaton 30:24) Apang ano kon ang diutay nga blackpoll warbler sa Alaska magsiling sa iya kaugalingon, ‘Indi ako maglupad sing linibo ka milya padulong sa Bagatnan nga Amerika. Ngaa abi?’ Inang diutay nga warbler mapatay sa tugnaw. Apang indi ina magsiling sina. Naprograma ini sa pagsaylo agod mabuhi. Gani amo man sa tanan nga sapat. Sila duna nga nagasunod sang mga sugo nga gintanum sa ila ni Jehova nga ila Manunuga. Wala sing mapilian.
4. Ano ang mapilian sang mga tawo, kag ano ang mga resulta?
4 Tuhay sa mga tawo. Gintuga kita sa kaangay sang Dios, kag makapili kita. Apang, samtang wala kita ginprograma ni Jehova sa paghikot sing maalamon paagi sa duna lamang, wala niya kita ginpabay-an nga wala sing nahibaloan. Paagi sa iya Pulong nga Biblia, nagahatag sia sa aton sang iya mga sugo agod makatigayon sing kabuhi. Kon mahalungon nga sundon naton ining mga sugo sang Hari, mabuhi kita. Kon gamiton naton ang aton kahilwayan sa pagsikway sini kag mangin independiente, mapatay kita. Dapat naton iprograma ang aton kaugalingon para sa kaluwasan. Amo lamang sina ka simple. “Ang imo pulong suga sa akon mga tiil, kag kapawa sa akon banas,” siling sang salmista. Sa pihak nga bahin, ang lain nga “dalan mahimo nga daw matarong sa tawo, apang ang katapusan sini mga dalanon sang kamatayon.” (Salmo 119:105; Hulubaton 14:12, The New English Bible) Sa sining tion sang katapusan, kinahanglan nga ilugon naton ang mga pulong sang Salmo 119:15, 16, nga ginapatuhoy kay Jehova: “Magapamalandong ako sa imo mga sugo, kag magatulok ako sa imo mga banas. Magakalipay ako sa imo mga palatukuran. Indi ko pagkalipatan ang imo pulong.”
Si Jehova ang Organisador sang Iya Katawhan
5. Sa anong mga paagi si Jehova Hukom, Manughatag sing kasugoan, kag Hari sang Israel?
5 Nagpamulong si Jehova kay Moises sa Bukid sang Sinai, kag naghatag sa iya sing mga sugo subong panuytoy para sa Israel. Ang talalupangdon sa sini amo ang Napulo ka Sugo, nga ginsulat sa mga tapitapi nga bato sang tudlo sang Dios. (Exodo 20:1-17; 31:18) Dugang sa Manughatag sing kasugoan sang Israel, si Jehova amo ang ila Hukom, nga nagahikot paagi kay Moises kag sa iban pa nga mga gulang. Ginlaygayan ni Moises ang mga gulang nga dumdumon: “Wala kamo sing pasulabihon sa mga tawo sa paghukom. Ang magamay kag ang dalagku pamatian ninyo sing alangay. Dili kamo magkahadlok sa nawong sang tawo, kay ang paghukom iya sang Dios.” (Deuteronomio 1:17) Si Jehova amo man ang ila Hari, nga nagaorganisar sining minilyon ka tawo para sa ila maayo nga paggawi. Bangod sining tanan, ang isa sang mga manalagna nakasiling: “Si Jehova aton Hukom, si Jehova aton Manughatag sing kasugoan, si Jehova aton Hari.”—Isaias 33:22.
6. Paano si Jehova nagpamatuod subong Organisador kag Tuytoy sang Israel sa kahanayakan?
6 Ang pungsod sang Israel gin-organisar sa mga tribo, mga pamilya, kag mga panimalay. Samtang nagalakbay sila sa kahanayakan, ginhatagan ni Jehova ang tagsa ka tribo sing lugar sa pagmartsa. Sang magkampo sila sa palibot sang tabernakulo, ang tagsatagsa ginhatagan sing duog. (Numeros 2:1-34; Josue 7:14) Paagi sa panganod, ginsugo ni Jehova ang ila mga hulag: “Kon ang panganod maghayaw sa ibabaw sang layanglayang, sa tapos sina ang katawhan sang Israel naglakat, kag sa duog diin ang panganod nagdulog, didto ang katawhan sang Israel nagpahamtang sing dulugan. Sa sugo ni Jehova ang katawhan sang Israel naglakat, kag sa sugo ni Jehova sila nagpahamtang sing dulugan.”—Numeros 9:17, 18.
7. Sin-o ang naghimo sing mga pagbalhin sa organisasyon sang Israel?
7 Kon kinahanglan ang pagbalhin sa sulod sang organisasyon. ginhimo ini ni Jehova. Si Moises nagreklamo: “Ako indi makadala nga isa lamang sini tanan nga katawhan, bangod nga tama kabug-at ini sa akon.” Si Jehova nagsabat: “Tiponi ako sing kapitoan ka lalaki sa mga gulang sang Israel, nga imo nahibaloan nga mga gulang sang katawhan kag mga manugdumala sa ila, . . . kag buligan ka nila sa pagdala sang lulan sang katawhan agod nga indi ikaw lamang ang magdala sini.” (Numeros 11:14, 16, 17) Bisan sang mangayo sang ulihi ang katawhan sing tawhanon nga hari, wala ginbiyaan sang daku kag dayon nga Hari ang Israel. Ang tawhanon nga hari may kopya sang Kasugoan ni Jehova. Ang mga manalagna nagpabutyag sang mga paghukom ni Jehova. Ang matutom nga mga hari nag-alagad gihapon subong mga manugdumala para sa Dios samtang sila ‘naglingkod sa trono ni Jehova.’—1 Cronica 29:23; Deuteronomio 17:18; 2 Hari 17:13; Jeremias 7:25.
Ang Himpit nga Huwaran sang Pagsunod sa mga Sugo sang Hari
8. Paano, diin, kag upod ang anong mga resulta ginwali ni Jesus ang Ginharian ni Jehova nga magakari?
8 Sang mag-abot si Jesus subong ang ginsaad nga Mesias, ginsunod niya ang mga sugo sang iya langitnon nga Amay nga may daku nga kakugi. Sa umpisa sang daku nga ministeryo sa Galilea, sia “nagsugod sa pagwali, nga nagasiling: ‘Hinulsol kamo, kay ang ginharian sang langit malapit na.’ Kag naglibot sia sa bug-os nga Galilea, nga nagapanudlo sa mga sinagoga nila kag nagawali sing maayong balita sang ginharian kag nagapang-ayo sang tanan nga balatian kag sang tanan nga masakit sa katawhan. Busa daku nga kadam-an ang nagsunod sa iya gikan sa Galilea kag sa Decapolis kag sa Jerusalem kag sa Judea kag gikan sa tabok sang Jordan.” (Mateo 4:17, 23, 25; Juan 2:17) Wala sia magbantala sa mga sinagoga lamang. Ginwali niya ang maayong balita sang Ginharian sa bisan diin nga may yara mga tawo nga mamati: sa templo, sa higad sang baybay, sa higad sang bukid, sa uma, sa mga siudad kag mga minuro, kag sa mga puluy-an sang mga tawo. Ang kadam-an nagpanong sa iya, “nagpamati sa iya sing malipayon.” Sila “nawili sa iya pulong.”—Marcos 12:37; Lucas 19:48.
9. Ano ang ginhimo ni Jesus sa pagpasangkad sang pagbantala nga hilikuton, kag anong mga instruksion ang ginhatag niya?
9 Ginpatalupangod niya sa iya mga apostoles ang kinahanglanon sa dugang pa nga mga manugpangabudlay, gani “ining napulog-duha ginpadala ni Jesus, kag gintugnan sila: ‘Dili kamo maglakat sa dalan sang mga pungsod, kag dili magsulod sa siudad sang mga Samariahanon; kundi, sa baylo, kadto kamo sa mga nadula nga mga karnero sang panimalay sang Israel. Kag wali sa nagakadto kamo, nga nagasiling, “Ang ginharian sang langit malapit na.” Bisan diin nga siudad ukon minuro nga inyo sudlan, usisaon ninyo kon sin-o didto ang takus, kag pabilin kamo didto tubtob nga maghalin kamo. Sa nagasulod kamo sa balay, abiabiha ini; kag kon ang balay takus, ang inyo paghidait magdangat sa iya; apang kon indi takus, pabalika sa inyo ang inyo paghidait.’” (Mateo 10:5-7, 11-13) Nagpadala sia sang ulihi sing 70 pa nga may kaanggid nga mga tugon, kag paagi sa mahalungon nga pagsunod sining mga sugo, nagmadinalag-on sila kag nakaagom sing daku nga kalipay.—Lucas 10:1, 17.
10. (a) Sa tapos sang iya pagkabanhaw, anong dugang pa nga sugo ang ginhatag ni Jesus, kag ano ang resulta? (b) Ngaa kinahanglan ang pila ka pagtangdo sa mga lalaki, kag anong mga kinahanglanon ang dapat malab-ot?
10 Sang mapatay sia kag mabanhaw, ginpasangkad ni Cristo Jesus ang teritoryo sang iya mga sumulunod, nga nagasiling sa ila: “Ang bug-os nga pagbulut-an sa langit kag sa duta natugyan sa akon. Busa lakat kamo kag himuon nga mga gintoton-an ang mga tawo sang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo.” (Mateo 28:18-20) Sang magkayab sia sa langit, naghatag sia sing kaanggid man nga sugo: “Mangin mga saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Samtang ginapalapnag sang iya mga sumulunod ang mensahe sang Ginharian, linibolibo ang nagbuylog sa ila. (Binuhatan 2:41; 4:4; 5:14; 6:7) Natukod ang mga kongregasyon bisan diin. Ang mga manugtatap kag ministeryal nga mga kabulig nga nakalab-ot sang espesipiko nga mga kalipikasyon sang Kasulatan gintangdo agod magbantay sa sining mga panong sang mga lalaki kag mga babayi. Ang mga kongregasyon nag-uswag kag nagdamo.—1 Timoteo 3:2-10, 12, 13; Tito 1:5-9.
11. Ano ang sahi sang organisasyon sang mga Saksi ni Jehova karon, kag ngaa kinahanglanon gid karon ang maayo nga organisasyon?
11 Labi gid nga importante karon nga sundon sang mga kongregasyon sang mga Saksi ni Jehova ang huwaran ni Jesus sa pagbantala. Agod mahimo ini sing maayo, ginasunod nila ang balayan sang organisasyon nga ginpatok sang mga adlaw sang mga apostoles. Yari na kita sa tion sang katapusan, ang tion nga suno sa gintagna ni Jesus mahanabo ang pagbantala nga hilikuton sa bug-os nga kalibutan: “Ibantala ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Sa tapos sang Inaway Kalibutanon I, may pila ka libo nga nagsugod sa pagwali sining maayong balita sang Ginharian; karon ang ila kadamuon nagtimbuok lampas sa tatlo ka milyon! Hilingagawon ang tion karon nga sundon sing mahalungon ang mga sugo sang daku kag dayon nga Hari, si Jehova nga Dios, kag sang Hari sang mga hari, si Cristo Jesus.
Kinahanglan sang mga Gulang ang Inyo Pagtahod kag Pagsakdag
12. Ano ang kinahanglan sa mga gulang karon, kag paano mangin makalilipay ang ila pag-alagad?
12 Sa pagsunod sa mga sugo sang hari, daku ang papel sang mga gulang sang kongregasyon. Dapat sila mangin huwaran: “Bantayi ang panong sang Dios nga gintugyan sa inyo, indi sa pilit kundi sa kinabubut-on; indi suno sa didungganon nga daug, kundi sa may pagkahanda; indi nga nagapakaginuo sa panublion sang Dios, kundi nga nagahimo sang inyo kaugalingon nga mga huwaran sa panong.” (1 Pedro 5:1-3) Panong ini sang Dios. May salabton sa iya ang mga gulang, apang ang matinumanon nga pagbulig sang tanan makahimo sang ila hilikuton nga makalilipay: “Tumana ang mga nagapangulo sa inyo kag magpasakop sa ila, kay nagabantay sila sa inyo mga kalag subong nga sila ang magahatag sing husay; agod nga himuon nila ini nga may kalipay kag indi nga may pagbakho, kay ina wala sing kapuslanan sa inyo.”—Hebreo 13:17.
13. Ngaa dapat pakitaan sing pilo nga kadungganan ang mga gulang?
13 Ang tanan sa kongregasyon dapat tahuron, apang labi na ang nagapangabudlay sing lakas nga mga gulang: “Ang mga gulang nga nagadumala sing maayo pag-isipon nga takus sa pilo nga kadungganan, labi na gid ang mga nagapangabudlay sa pagwali kag sa pagpanudlo.” (1 Timoteo 5:17; Roma 12:10) Ngaa “pilo nga kadungganan” sa mga gulang? Bangod sang ila maayo nga pagpangabudlay. Nasulat nahanungod sa ila: “Ang balaan nga espiritu nagtangdo sa inyo subong mga manugtatap, sa pagbantay sa kongregasyon sang Dios.” (Binuhatan 20:28) Nagapangabudlay sila sing lakas sa pag-alagad sa inyo kag sa iban pa. Mahimo nga dapat nila disiplinahon ang pila ka indibiduwal kon ang mga sugo sang Hari ginasikway ukon ginalalis—indi makalilipay nga katungdanan kag mahimo nga makasaklaw sa iban. Ang laygay tuhoy sa pagpanapot ukon paggawi mahimo nga dapat ihatag kag mahimo nga kaugtan. Apang ining tanan nga butang ginahimo para sa espirituwal nga kaayohan sang kongregasyon. Ang mga gulang dapat tahuron kag padunggan.
14. (a) Bangod sang Santiago 4:12, paano lamang mangin nagakaigo ang mga paghukom nga ginahatag sang mga gulang? (b) San-o mahatag ang paghukom kag san-o ang kaluoy mangin superyor sa paghukom?
14 Kon kaisa ang mga gulang dapat mag-alagad sa hudisyal nga mga komite kag maghimo sing mga paghukom—kon kaisa indi maluyagan. Paano ini nahisuno sa Santiago 4:12? Ini nagasiling: “Isa lamang ang manughatag sing kasugoan kag sia hukom, nga sarang makaluwas kag makalaglag. Apang sin-o ikaw bala nga nagahukom sang imo isigkatawo?” Huo, ang mga indibiduwal indi dapat maghukmanay. Dugang pa ang mga paghukom nga himuon sang mga gulang indi dapat nahisuno sa ila kaugalingon nga opinyon, kundi nahisuno sa Pulong ni Jehova. Talupangda kon paano ginpaandaman ni Hari Josafat ang mga hukom nga iya gintangdo: “Wala kamo nagahukom para sa tawo kundi para kay Jehova; . . . mangin sa inyo ang kahadlok kay Jehova. Mag-andam kag maghimo sini, kay wala sing kalautan kay Jehova ukon pagpasulabi sa mga tawo, ukon pagbaton sing mga hamham.” (2 Cronica 19:6, 7) Ang organisasyon dapat mangin matinlo. Ang mga gulang indi dapat mangin mapintas, ‘dimabinangigon.’ Ang kaluoy kag pagpatawad sarang mapakita kon ang kaugot sa sala nga nahimo tudok kag ang paghinulsol matuod. Nian, ‘ang kaluoy magadaug sa paghukom, subong superyor nga paghukom.’—1 Timoteo 3:3; Santiago 2:13; tan-awa ang mga footnote sang Reference Bible.
15. Ano nga mga serbisyo sang mga gulang ang takus sing pagtahod kag pagpadungog para sa ila?
15 Gani masami nga mabudlay kag nagakinahanglan sing tion ang mga katungdanan sang mga gulang, apang ang mga gulang nga sing matutom kag mahigugmaon nagaatipan sining mga salabton mahimo mangin tuburan sang espirituwal nga paumpaw kag pangamlig. “Ang tagsatagsa dapat mangin subong sang palalipdan sa hangin kag palanagoan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makalalapyo.” (Isaias 32:2) Ang maluluy-on kag mahigugmaon nga manug-amlig—indi ang madali magsumbong ukon mapintas nga manugdisiplina—ang nagadala sing kalipay sa tanan, kag ginabalusan sing pagtahod kag pagpadungog, kag makatigayon sang kahamuot ni Jehova.
Magpailob sa Isa kag Isa
16. (a) Ano ang reaksion sang iban sa mga sayop sang iban, kag paano sila mangin kapin ka indi mamulayon kundi mangin kapin ka mahinangpanon? (b) Paano ginatamod ni Jehova ang matutom nga mga alagad nga nagasayop?
16 Kon ang mga tawo tingob nga magpangabudlay, mahimo gid nga mag-utwas ang mga palaligban. Ang mga sayop ginahimo. Kon matabo ini, ang iban indi mapahamtang. Ginagamit pa gani sang iban ang mga sayop sang iban subong balibad sa paghimo sing daku sa tanan nga sayop—ang pag-untat sa pag-alagad kay Jehova! Apang, kon usisaon nila sing maayo ang ila kaugalingon nga mga sayop subong sang ginahimo nila sa sayop sang iban, mahimo gid nga indi sila mangin kapin ka mamulayon kundi mangin kapin ka mahinangpanon. Si Moises nakahimo sing mga sayop. Amo man si David. Amo man si Pedro. Amo man kita tanan. Apang padayon nga gingamit ni Jehova ining matutom nga mga lalaki sang una, kag padayon nga ginagamit niya kita. Gani, “sin-o ka bala nga nagahukom sang alagad sang isa? Sa iya kaugalingon nga agalon nagatindog ukon nagakapukan sia. Sa pagkamatuod, patindugon sia, kay si Jehova may gahom sa pagpatindog sa iya.”—Roma 14:4.
17. Tuhoy sa paghimo sing mga sayop kag paghukom sa iban, anong dugang pa nga mga punto ang dapat naton dumdumon?
17 Dumdumon man naton: Diri sa duta, ginagamit ni Jehova ang dihimpit nga mga tawo—amo lamang ina ang sa iya karon. Ang matuod, nagapabanaag ini sing kadayawan kay Jehova. Daku gid ang iya ginahimo paagi sa diutay gid nga butang! Ang aton kaluyahon nagapadaku sang iya gahom: “Ang akon dibagay nga kaluoy tuman sa imo; kay ang akon gahom ginahimpit sa kaluyahon.” (2 Corinto 12:9) Ang pagpanaksi nga hilikuton sa bug-os nga kalibutan nagauswag bangod sang rason nga ginhatag ni Jehova: “Indi sa militar nga kusog, ukon sa gahom, kundi sa akon espiritu.” (Zacarias 4:6) Gani mangin mapinatawaron kita sa mga sayop kag dikahimpitan sang iban agod nga patawaron man ang sa aton. Dumduma, “kon patawaron ninyo ang mga tawo sang ila mga paglapas, ang inyo langitnon nga Amay magapatawad man sa inyo.”—Mateo 6:14, 15.
Organisado sa Pagsunod sa Sugo sang Hari nga Magbantala
18. Agod maghatag sing nahiusa nga pagtuytoy sa pagbantala sang mga kongregsyon, anong mga kahimusan ang nagluntad sang mga adlaw sang mga apostoles kag nagaluntad karon sa aton adlaw?
18 Ang mga apostoles kag mga gulang didto sa Jerusalem amo ang naghuman sang nagagahom nga hubon nga naghimo sing mga desisyon sa paghatag sing nahiusa nga pagtuytoy sa unang Cristianong mga kongregasyon. (Binuhatan 15:1-31; 16:1-5) Ang hinaplas nga mga saksi ni Jehova karon, “ang matutom kag mainandamon nga ulipon,” may yara Nagagahom nga Hubon sa ila ulong talatapan sa Brooklyn, Nueva York. (Mateo 24:45-47) Ginatuytuyan sini ang daku nga hilikuton sa pagpanaksi sa Ginharian sa bug-os nga kalibutan nga ginahimo karon sa bug-os nga duta bilang katumanan sang sugo nga ibantala ang Ginharian ni Jehova. (Mateo 24:14) Ining hilikuton indi gid mahimo kon wala sing organisasyon. Ang isa ka indibiduwal indi gid makahimo sini sa iya kaugalingon lamang.
19. Anong hilikuton nga indi mahimo sang mga indibiduwal lamang ang madinalag-on nga ginahimo sang mga Saksi ni Jehova paagi sa mahalungon nga pagsunod sa mga sugo sang Hari?
19 Wala sing indibiduwal kag wala sing indi organisado, nalapta nga mga grupo sang mga indibiduwal ang makabantala sa kapin sa 190 ka hambal kag sa 205 ka kadutaan, regular nga nagadumala sing kapin sa duha ka milyon kag un-tersia ka pagtuon sa Biblia sa mga puluy-an, kag kada tuig nagabawtismo sing mga 190,000 ka bag-ong mga ministro sang maayong balita sang Ginharian. Wala, halos anum ka gatos ka milyon ka oras sa pagbantala ang nahinguyang sang kapin sa tatlo ka milyon ka Saksi sa paghimo sina nga hilikuton sa sulod sang isa ka tuig sang 1985. Nahimo lamang nila ini bangod mahim-ong nga gin-organisar sila sa halos 50,000 ka kongregasyon, ang tanan sa idalom sang kitaon nga pagtuytoy sang ila isa ka Nagagahom nga Hubon. Walay sapayan sina, mahimo lamang ina bangod ang Nagagahom nga Hubon, ang 94 ka sanga, ang 50,000 ka kongregasyon, kag ang 3,000,000 ka indibiduwal nga mga Saksi nahiusa tanan sa mahalungon nga pagsunod sa mga sugo sang Hari.
Madumduman Mo Bala?
◻ Paano gin-organisar ni Jehova ang pungsod sang Israel?
◻ Anong himpit nga huwaran ang ginbilin ni Jesus para sa pagtuman sang hilikuton nga iwali ang Ginharian ni Jehova?
◻ Anong madamo nga serbisyo sang mga gulang ang takus sang aton pagpadungog sa ila?
◻ Ngaa indi mahimo sang independiente nga mga grupo ukon mga indibiduwal ang pagpanaksi nga hilikuton?
[Laragway sa pahina 23]
Ginprograma sang Manunuga ang tanan nga sapat para sa kaluwasan
Dapat iprograma sang mga tawo ang ila kaugalingon para sa kaluwasan paagi sa pagtuon sang mga sugo ni Jehova