Kon Ano ang Dapat Batyagon sang mga Cristiano Nahanungod sa Kahilwayan
ANG mga Cristiano batok sa “kahilwayan” nga nagasikway sa awtoridad nga ginapakita sing nagakaigo. Ngaa? Bangod sa kamatuoran wala ini nagahilway—kundi nagaulipon. Ang isa ka simple nga halimbawa makailustrar sini.
Ginakaugtan sang isa ka pamatan-on ang awtoridad sang iya mga ginikanan, nga nagadumili sa iya sa pagpanigarilyo kag sa pag-inum sing alkoholiko nga mga ilimnon. Wala nakaapresyar nga ang ila awtoridad para sa iya kaayohan, nagakalangkag sia sa kahilwayan. Kon mag-edad na sia kag wala na sa balay, sa ulihi matigayon niya ang kahilwayan nga madugay na niya ginahandum. Apang pagligad sang mga tinuig, bangod sang wala untat nga pagpanigarilyo kag malapit na nga pagkaalkoholiko, ginsilingan sia sang iya doktor nga bangod sang iya panglawas dapat niya untatan ang pagpanigarilyo kag pag-inum. Nabudlayan sia sa paghimo sini. Ang iya kahilwayan nagdul-ong sa pagkagiyan, sa pagkaulipon.
Kahilwayan Gikan sa Bug-os nga Awtoridad
Ang awtoridad sang Dios bug-os kag napasad sa iya pagka-Manunuga. Nagahatag ini sa iya sing kinamatarong sa pagpat-od para sa iya mga tinuga kon ano ang nagakaigo nga paggawi, kon ano ang moral kag kon ano ang imoral. Ining mga talaksan, nga ginpatok para sa kaayohan sang katawhan, maathag nga nasulat sa Biblia. “Dili kamo magtalang,” siling sini. “Bisan ang mga makihilawason, ukon mga nagasimba sa idolo, ukon mga makihilahion, ukon babayinhon, ukon mga lalaki nga nagahulid sa pareho nga lalaki, ukon mga makawat, ukon mga mahamkunon, ukon mga palahubog, ukon mga mapasipalahon, ukon mga malugos indi makapanubli sang ginharian sang Dios.”—1 Corinto 6:9, 10.
Ang tawo nagtinguha sa paghilway sang iya kaugalingon gikan sa mga panuytoy sa moral labi na sa sining kalibutanon kag moderno nga ika-20 nga siglo. Apang walay sapayan sang ginatawag nga kahilwayan, indi niya mahilway ang iya kaugalingon gikan sa mga resulta sang pagbuhat sang ginakilala sang Dios nga sala. Sa baylo nga mahilway, ina nga mga tawo nangin mga ulipon sang ila kaugalingon nga mga handum, mga kailigbon, kag mga balatyagon, subong maathag nga ginpakita ni Jesus sa pagsiling: “Ang tagsatagsa nga nagapakasala ulipon sang sala.”—Juan 8:34; tan-awa man ang Roma 6:16.
Kahilwayan Gikan sa Relatibo nga Awtoridad
Ang mga opisyales sang pangulohan may kinamatarong sa pagpakita sing awtoridad sa sulod sang estado, ang mga ginikanan sa sulod sang pamilya, ang mga manunudlo sa sulod sang eskwelahan, kag ang Cristianong mga gulang sa sulod sang kongregasyon. Sa pagkamatuod, ang awtoridad relatibo lamang. Halimbawa, ang bug-os nga awtoridad ni Jehova, nga nagasugo sa iya mga alagad nga basahon ang iya Pulong kag makig-upod sa mga masigka-Cristiano, dapat unahon sa relatibo nga awtoridad sang bana nga basi magpugong sa iya asawa sa paghimo sini.—Binuhatan 5:29.
Apang, bilang pagkilala sa relatibo nga awtoridad sang estado, ang mga Cristiano indi makapakigbahin sa mga kahublagan para sa kahilwayan agod pukanon ina nga awtoridad. Indi nila matugutan ang paglalis sang mga banwahanon bangod lamang wala sila nagaugyon sa pagsulundan sang pangulohan, ukon indi nila mapalig-on ang indi pagbayad sing buhis subong paagi sa pagprotesta batok sa pila ka pagsulundan. “Ang nagabato sa awtoridad nagasumpong sa kahimusan sang Dios,” siling ni apostol Pablo, nga nagdugang pa: “Ang mga nagasumpong magabaton sing paghukom.”—Roma 13:1-4.
Apang ano kon ang isa ka opisyal sang pangulohan indi makatarunganon kag nagaabuso sang iya awtoridad? Ano kon tamayon niya ang mga indibiduwal ukon indi kilala nga mga minoridad? Ang Biblia nagalaygay: “Kon makita mo ang pagpigos sa mga imol kag ang malugos nga nagakuha sang katarungan kag pagkamatarong sa puod, dili ka magkatingala sa butang, kay ang isa nga mataas pa sa mataas nagatamod.” (Manugwali 5:8) Ayhan posible nga mag-apelar sa mataas pa nga awtoridad ukon korte sang pangulohan. Apang bisan pa kon indi matigayon ang katarungan sa sina nga paagi, makasalig ang mga alagad sang Dios nga, “ang mga mata ni Jehova nagapanuluktulok sa bug-os nga duta sa pagpakita sang iya kusog para sa ila nga ang ila tagipusuon bug-os ayon sa iya.”—2 Cronica 16:9.
Amo man sa sulod sang pamilya. Kon ang mga bana ukon mga amay mag-abuso sa ila awtoridad, mapat-od naton nga sa ulihi tadlungon sang Dios ina nga mga butang, kag indi Niya pagtugutan nga magluntad ang bisan anong pagkadimatarong sa iya malapit na mag-abot nga matarong nga bag-ong sistema. Samtang sa karon, ang Cristianong mga babayi kag kabataan padayon nga nagatahod sang prinsipio sang Cristianong pagkaulo, bisan pa kon kaisa ginaabusohan ini. Nahangpan nila nga wala ini gintuyo agod magpakanubo kundi agod magpasalig sing paghidait kag paghiusa sa sulod sang pamilya kag sang Cristianong kongregasyon.—1 Corinto 11:3.
“Kahilwayan” Gikan sa Awtoridad sa Sulod sang Kongregasyon
Tuhoy sa pagkaulo sa Cristianong kongregasyon, ang Pulong sang Dios nagasiling: “Tumana ang mga nagapanguna sa inyo kag magpasakop sa ila, kay nagapulaw sila tungod sa inyo mga kalag subong nga sila ang magahatag sing husay.” (Hebreo 13:17) Bisan pa relatibo ining awtoridad sang mga gulang, sa gihapon ginhatag ini sang Dios sa ila paagi sa iya balaan nga espiritu. Sa amo ginhatag ini sa kapin ka talangkod nga paagi kon ipaanggid sa relatibo nga awtoridad nga ginhatag, halimbawa, sa mga opisyales sang pangulohan.—Binuhatan 20:28.
Ang iban nagbatyag nga ang mga regulasyon kag mga instruksion nga ginhatag sang kitaon nga organisasyon sang Dios tuman ka estrikto, kag wala nagahatag sa indibiduwal sing bastante nga kahilwayan. Bangod sini, nag-untat sila sa pagpakig-upod sa mga Saksi ni Jehova kag indi na luyag magpasakop sa mga nagapulaw tungod sa ila mga kalag. Bisan pa ining mga tawo mahimo nga nagakabig sang ila kaugalingon nga nahilway, ang ila “kahilwayan,” sa kamatuoran, nag-ulipon liwat sa ila sa dimatuod nga mga pagtuluohan kag mga buhat sang relihion.
Ang matuod nga mga Cristiano nagatahod sa awtoridad, sa bug-os nga awtoridad sang Dios kag sa relatibo nga awtoridad sang mga tawo. Ining nagakaigo nga pagtamod sa awtoridad nagapugong sa ila sa pag-abuso sang ila Cristianong kahilwayan nga ginhatag sa ila sang ihibalo sa kamatuoran.
[Blurb sa pahina 6]
Ang awtoridad sang Dios bug-os kag napasad sa iya pagka-Manunuga
[Blurb sa pahina 6]
Ang mga Cristiano wala nagarebelde batok sa estado bangod sang mga pagsulundan nga bangod sini manabat ini sa Dios
[Blurb sa pahina 7]
Ang matuod nga mga Cristiano nagatahod sa awtoridad, sa bug-os nga awtoridad sang Dios kag sa relatibo nga awtoridad sang mga tawo
[Mga Laragway sa pahina 7]
Pagbayad sa sekular nga awtoridad
Pagkilala sa relatibo nga awtoridad sa kongregasyon
Pag-apresyar sa Supremo nga Awtoridad, si Jehova nga Dios