Ang Pagpamuad sing Kabuhi—Paagi sa Ebolusyon ukon Gikan sa Dios?

“MASIBUD sing milagruso.” Amo sina ang paglaragway sang balasahon nga Science News sa sistema sa pagpamuad sang isa ka babayi. Apang ang isa ka itlog gikan sa obaryo sang babayi indi makapatubas sing kabuhi sa iya kaugalingon. Agod makapatubas ini, ang sperm nga selula gikan sa sistema sa pagpamuad sang lalaki dapat isimpon sa nucleus sang itlog. Apang ano ang ginahimo sang sperm agod magtubo ang itlog? Ina nga pamangkot nagapalibog gihapon sa mga sientipiko.

Ang pagpati sa ebolusyon nagapautwas sing isa pa ka pamangkot: Kon ang mga organo sa pagpamuad sang lalaki kag babayi nagtuhaw, diin nagahalin ang kabuhi sa wala pa ang bug-os nga pagkahuman sang duha?

Ang pagpamuad nagadalahig sa iban pa nga mga kalatingalahan. Ang genetiko nga materyal sa pertilisado nga itlog makita lamang paagi sa bulig sang mikroskopyo. Apang nagarepresentar ini “sa daku nga mga librarya sang impormasyon,” subong sang pagpaathag sa sini nanday Propesor Frair kag Davis sa ila libro A Case for Creation. “Wala na sing iban pa nga halimbawa sang pagkadiutay ang mapaanggid sa sini,” dugang nila. Ining diutay nga librarya nagapatuhoy sa pagtubo sang tanan nga bahin sang lawas, lakip ang mga detalye subong sang duag sang mata kag buhok.

Pagkatapos sang pertilisasyon, ang selula nagatunga sa duha, ang duha nangin apat, kag padayon pa, tubtob may yara isa ka masa sang mga selula. Ang pagtunga sa selula nagadalahig sang pagduplikado kag pag-areglo sa minilyon ka molekula. Kaangay ini sa isa ka pabrika nga awtomatiko nga nagatunga sa duha ka magkatuhay nga establisamento nga kompleto sing palareho nga makinarya nga nagapatubas sing pareho nga produkto, kag ini nga pagmuad (multiplikasyon) ginaliwat-liwat. Nian ang isa pa ka makatilingala nga butang nagakatabo.

Ang lainlain sing dagway nga mga selula nagasugod sa pagporma—selula sa nerbios, selula sa kaunoran, selula sa panit, kag tanan iban pa nga sahi nga nagahuman sa tawhanon nga lawas. Ang pagkalainlain sang selula isa ka misteryo. Amo man ang kabilogan sang selula. “Wala sing isa ang nakahibalo sing pat-od,” siling sang Science News, “kon ngaa ang pila ka selula nagatingob sa paghuman sing batobato samtang ang iban nagatingob sa paghuman sing atay, kag padayon pa.” Sa ulihi, ang tawhanon nga lawas nagatubo sing bug-os, kag ginahuman sing mga 100,000,000,000,000 ka selula.

Suno sa teoriya sang ebolusyon, ang tawhanon nga kabuhi nagtuhaw gikan sa simple nga diutay nga organismo. Apang, indi kaangay sang tawo, ang kalabanan nga diutay nga mga organismo naghalin sa isa lamang ka ginikanan. Nagapamuad sila sa ila kaugalingon. Paano ini nga dagway sang pagpamuad nagtuhaw nga mangin labi ka sibu nga dagway nga nagakinahanglan sang duha ka ginikanan? Ang mga ebolusyonista nabudlayan sa pagsabat sini, subong sang ginapakita sang mga komento sa nauna nga pahina.

Ining daku nga paglumpat matahom nga ginalaragway subong “ang pag-imbento sa seksuwal nga pagpamuad.” Apang ang iban nga mga sientipiko maisog nga nagapamatok. Si Propesor Jaap Kies, sang University of the Western Cape, South Africa, nagalaragway sini subong “malaw-ay nga pagbanabana.”

May isa lamang ka makaalayaw nga paathag para sa pagpamuad sing kabuhi. Isa ini ka dulot sang maalam gid nga Manunuga, si Jehova nga Dios. Subong sang ginasiling sang Biblia: “Ang tagsa ka maayong hatag kag ang tagsa ka dulot nga himpit nagagikan sa hitaas.”—Santiago 1:17.

[Kahon sa pahina 3]

Kon Ano ang Ginabaton sang mga Ebolusyonista Tuhoy sa Pagpamuad

“Wala gani naton mahibaloi bisan sing diutay lamang ang katapusan nga kabangdanan sang seksuwalidad; kon ngaa ang bag-ong mga tawo dapat ipatubas paagi sa paghiusa sang duha ka seksuwal nga elemento, sa baylo nga paagi sa proseso sang parthenogenesis [pagpamuad nga nagakinahanglan sing isa lamang ka ginikanan] . . . Ang bug-os nga bagay natago pa sa kadudulman.”—Charles Darwin, 1862.

Tuhoy sa pagtamod ni Darwin, ang Science News, sang Septiembre 8, 1984, nagadugang: “Ayhan nagasulat pa sia tubtob karon kon buhi pa sia.”

“Ini nga libro,” siling ni Propesor George C. Williams sa introduksion sang Sex and Evolution, “ginsulat bangod sang pagpati nga ang paglapnag sang seksuwal nga pagpamuad sang mas mataas nga mga tanum kag mga sapat indi pareho sa karon nga teoriya sa ebolusyon.”

Sa iya libro The Evolution of Sex, si Propesor John Maynard Smith nagapresentar sing “isa ka balayan sang ginhalinan sang sekso,” nagatawag sini nga “ang labing maayo nga balayan nga mahatag ko.” Nagsiling sia sa paghinakop: “Indi ako makapakunokuno sa pagsalig sing daku sa sining paathag.”

“Ang sekso amo ang reyna sang mga problema sa biolohiya sang ebolusyon. . . . Daw subong bala nga ang iban sang labing panguna nga mga pamangkot sa biolohiya sang ebolusyon malaka nga ginpamangkot . . . Ang pinakadaku kag pinakadiutay wala ginasapak kag ang pinakamabudlay sa sining mga pamangkot amo, ngaa ang sekso?”—The Masterpiece of Nature, ni Propesor Graham Bell.