Mga Pamatan-on nga Nagapahalipay sang Tagipusuon ni Jehova
“Pasadyaha ang akon tagipusuon, agod nga masabat ko sia nga nagapakahuya sa akon.”—HULUBATON 27:11.
1. Paano ang aton mga ginikanan kag ang aton Manunuga maapektohan sang aton paagi sang pagkabuhi?
NAREALISAR mo man ukon indi, importante ang paagi sang imo pagkabuhi. Halimbawa, importante ini sa inyo nga mga ginikanan. “Ang anak nga maalam nagapahalipay sa amay,” paathag sang Biblia, “kag ang anak nga buangbuang kasubo sang iya iloy.” (Hulubaton 10:1; 23:24, 25) Apang labi pa ka importante, ang imo pagkabuhi mahimo makapahalipay ukon makapasubo sa aton Manunuga nga si Jehova nga Dios. “Anak ko, magmaalam ka,” laygay ni Jehova, “kag pasadyaha ang akon tagipusuon, agod nga masabat ko sia nga nagapakahuya sa akon.”—Hulubaton 27:11.
2. Anong importante nga hulusayon ang ginpautwas ni Satanas, kag paano kita nadalahig?
2 Sa pagkamatuod, ang isa nga nagapakahuya kay Jehova amo si Satanas nga Yawa. Sa katamnan sang Eden, nagpautwas si Satanas sing isa ka importante nga hulusayon nga nagkinahanglan sing sabat gikan sa Dios. Sang daw mahapos nga nahaylo sang Yawa si Eva, kag dayon si Adan, sa paglapas sa sugo sang Dios, may pamatuod nga ginhangkat niya si Jehova. Sa epekto, si Satanas nagsiling: ‘Hatagi lamang ako sing kahigayunan kag mapatalikod ko ang bisan sin-o gikan sa pag-alagad sa imo.’ (Job 1:6-12) Busa, ginhimo ni Jehova ang makapahalipay nga pangabay nga narekord sa ibabaw, nga hatagan Sia sang iya anak sing “sabat” agod nga masabat niya ang hangkat ni Satanas.
3. Ngaa ang pangabay ni Jehova labi na nga naaplikar kay Jesus, kag sin-o pa ang magapahalipay sang tagipusuon sang Dios?
3 Apang, kay sin-o labi na, ginpatuhoy ni Jehova ining pangabay, nga ginatawag sia “anak ko”? Si Jesucristo sa isa ka tumalagsahon nga paagi anak sang Dios, subong amo lamang ang iya bugtong nga Anak. (Juan 1:14) Dugang pa, luwas kay Adan, nga nagpaslaw sa iya Manunuga, si Jesus amo lamang ang himpit nga tawo nga nagkabuhi sa duta, busa amo lamang ang tawo nga may ikasarang sa pagpamatuod sa bug-os nga kahulugan nga ang pagkatutom sa Dios sarang mahuptan. (1 Corinto 15:45) Sa amo ang pangabay ni Jehova naaplikar labi na kay Jesus. Kag wala pagpaslawa ni Jesus ang iya Amay. Paagi sa iya matutom nga dalanon, si Jesus naghatag sa Dios sing sabat sa bugalon nga hangkat ni Satanas nga ang mga tawo indi mag-alagad sa Iya sing matutom sa idalom sang pagtilaw. (Hebreo 2:14; 12:2) Dugang pa, ang tanan nga magahari upod kay Cristo sa langit magapahalipay man sang tagipusuon ni Jehova paagi sa ila katutom sa Dios bisan tubtob sa kamatayon.—Bugna 2:10.
4. Kon nagapamat-od kon ano ang himuon sa imo kabuhi, anong importante nga butang ang dapat mo binagbinagon?
4 Apang kamusta kita karon, lakip kamo nga mga pamatan-on? Nadalahig bala kamo sa sining hulusayon kon bala ang mga tawo mangin matutom sa Dios ukon indi? Sa pagkamatuod nadalahig kamo! (Salmo 147:11; 148:12, 13) Mahimo nga wala mo ini marealisar, apang ang imo ginahimo sa imo kabuhi nagasakdag sang bahin sang Dios sa hulusayon ukon sang bahin ni Satanas. Diin sa magapahalipay ini kay Jehova ukon kay Satanas. Sa pagkamatuod, ang pangagda ukon pangabay ni Jehova sarang man matamod subong ginapatuhoy sa imo sing personal: “Anak ko, magmaalam ka, kag pasadyaha ang akon tagipusuon, agod nga masabat ko sia nga nagapakahuya sa akon.” (Hulubaton 27:11) Indi bala isa ka makaalayaw nga tulumuron para sa imo nga pahalipayon ang tagipusuon sang imo Manunuga?
Kon Ngaa Maalamon Ini
5. Ngaa maalamon nga pahalipayon ang tagipusuon ni Jehova?
5 Talupangda nga si Jehova nagapalig-on, “Magmaalam ka.” Ngaa maalamon kita kon pahalipayon naton ang tagipusuon ni Jehova? Bangod si Jehova isa ka mahigugmaon nga Amay nga ang handum lamang amo ang labing maayo para sa aton, kag ang bisan ano nga ginapahimo niya sa aton para sa aton kaayohan. Subong ginasiling sang Isaias 48:17 kag 18: “Ako amo si Jehova nga imo Dios, nga nagatudlo sa imo sa kapuslanan, nga nagatuytoy sa imo sa dalanon nga laktan mo. O kon pamatian mo lamang ang akon mga sugo! Nian ang imo paghidait mangin subong sang suba, kag ang imo pagkamatarong mangin subong sang mga balod sang dagat.”
6. (a) Ano ang nagapakita nga luyag ni Jehova nga magkalipay kamo sa kabuhi? (b) Anong mga resulta ang indi mo malikawan?
6 Subong isa ka mahigugmaon nga ginikanan, luyag ni Jehova nga magkalipay ka sing bug-os sa kabuhi nga iya hamili nga dulot. Busa sia nagasiling: “Magkalipay, pamatan-on, sa imo pagkapamatan-on, kag tuguti ang imo tagipusuon nga maghimo sa imo sing maayo sa mga adlaw sang imo pagkapamatan-on, kag maglakat sa mga dalanon sang imo tagipusuon kag sa mga butang nga makita sang imo mga mata.” Ini, sa pagkamatuod, indi isa ka pangagda sa paghimo sing bisan anong makalilipay nga butang nga ginahandum mo. Ginapakita ini sang masunod nga paandam: “Apang kilalaha nga bangod sining tanan nga butang ang matuod nga Dios magadala sa imo sa hukmanan.” (Manugwali 11:9) Huo, indi mo malikawan ang mga bunga sang imo mga buhat; ikaw ang pasabton sang Dios sa imo ginahimo. Ang pagsulundan pat-od: “Bisan ano ang ginasab-ug sang tawo, ina man ang iya anihon.”—Galacia 6:7.
7, 8. (a) Paano mo makuha ang kasubo kag masikway ang kapahamakan? (b) San-o kadayawan ang pagkapamatan-on kag ang pamanagbanag sang kabuhi?
7 Bangod sini, si Jehova nagdugang: “Busa kuhaa ang kasubo [ukon kabangdanan sang kasubo] sa imo tagipusuon, kag isikway ang malaut gikan sa imo unod; kay ang pagkapamatan-on kag ang pamanagbanag sang kabuhi kadayawan.” (Manugwali 11:10) Sa pagkamatuod, maalamon nga likawan ang mga buhat nga magahatag sa imo sa ulihi sing makapasubo nga mga problema. May yara magasiling nga ikaw may nawasi—nga wala ikaw ‘nagakabuhi’ luwas kon magpahubog ka, maghimo sang ginadumilian nga seksuwal nga relasyon, ukon maghimo sing iban pa nga “mapangahason” nga butang. Apang daw ano ka buangbuang ini! “Indi gid yadto takus,” tuaw sang isa ka nagahibi nga estudyante sa tapos makakomiter sing pagpakighilawas. “Masubo ako kutob sadto.”
8 Gani kamo nga mga pamatan-on, maalamon nga pamatii ang laygay sang Dios nga kuhaon gikan sa inyo tagipusuon ang bisan anong kabangdanan sang kabalaka ukon paghinulsol, subong sang naeksperiensiahan sang mga pamatan-on nga nagsunod sing isa ka patuyang ukon makagud nga pagkabuhi. Ang isa ka ensayista sang ika-17 nga siglo nagsiling: “Ang daku nga bahin sang katawhan nagagamit sang ila una nga mga tuig sa paghimo sang ila katapusan nga makaluluoy.” Matuod, apang daw ano ka makapasubo! Kon ubuson sang isa ka pamatan-on ang iya pisikal nga kusog kag mga ikasarang sa paagi nga magahimo sang iya kabuhi sa ulihi subong adulto nga mabudlay, ang iya pagkapamatan-on kag ang pamanagbanag sang iya kabuhi kadayawan sa pagkamatuod! (Hulubaton 22:3) Gani magmaalamon! Sunda ang dugang pa nga laygay: “Dumduma, karon, ang imo Dakung Manunuga, sa mga adlaw sang imo pagkapamatan-on.”—Manugwali 12:1.
9. Anong mga kaayohan ang maagom mo kon dumdumon mo si Jehova sa imo pagkapamatan-on?
9 Paagi sa pagdumdom kay Jehova sa imo pagkapamatan-on, magaayohan gid ikaw. Indi lamang nga malikawan mo ang kasubo kag ang malaglagon nga mga kabudlayan, kundi makaagom ikaw karon gid sing isa ka malipayon, makapaladya nga kabuhi sa pag-alagad sa imo Dakung Manunuga. Dugang pa, maalamon nga nagatipon ikaw sing mga bahandi sa langit nga magahatag sa imo sing kaayohan sing dayon. (Mateo 6:19-21) Kon dumdumon mo si Jehova karon paagi sa paghimo sang iya kabubut-on, dumdumon ka niya kag padyaan ikaw sing “mga handum sang imo tagipusuon,” huo, isa ka malipayon, bug-os nga kabuhi sa Paraiso sing dayon!—Salmo 37:4; 133:3; Lucas 23:43; Bugna 21:3, 4.
Ano ang Ginabatyag Mo Nahanungod kay Jehova?
10. (a) Ngaa ang imo desisyon sa pag-alagad sa Dios indi lamang mangin isa ka mabugnaw nga pagbantabanta sang kon ano ang maalamon? (b) Ano ang dugang pa nga ginapangabay ni Jehova?
10 Apang ang imo desisyon sa pag-alagad kay Jehova indi isa lamang ka mabugnaw nga pagbantabanta sang kon ano ang maalamon. Si Satanas isa gid ka malalangon nga kaaway nga kon ang ginahunahuna mo amo lamang ang imo personal nga kaayohan, sa ulihi ganyaton niya ang imo makagud nga huyog sa pagpalayo gikan sa pag-alagad kay Jehova. Gani si Jehova wala lamang nagaagda sa imo nga magmaalamon. Wala, kundi ginapangabay man niya ang isa ka personal nga dedikasyon sa iya. Si Jesus nagsiling: “Dapat mo higugmaon si Jehova nga imo Dios sa imo bug-os nga tagipusuon.” (Mateo 22:37) Nahibaloan mo bala kon ano ang kahulugan sang paghigugma kay Jehova sing bug-os nga tagipusuon?
11. (a) Ano ang kahulugan sang paghatag sang imo tagipusuon kay Jehova? (b) Paano ang eksperiensia ni Jose nagailustrar kon paano ang nagakaigo nga motibasyon sang tagipusuon makatiklod sa aton sa paghimo sang kabubut-on sang Dios?
11 Ang imo tagipusuon nagapatuhoy sa imo pinakasulod nga kaugalingon, sa imo mga katuyoan, sa imo mga panimuot, kag sa imo tudok nga mga emosyon, upod ang imo mga ikasarang sa paghunahuna. Sa amo ang paghigugma kay Jehova sa imo bug-os nga tagipusuon nagakahulugan nga ginahigugma mo sia sing hugot kag labaw sa bisan ano nga butang sa imo kabuhi ang imo pilion amo ang pagpahalipay sa iya tagipusuon paagi sa paghatag sa iya sing sabat sa pagpakahuya ni Satanas. Inang nasulod nga paghantop kag tudok nga gugma kag kabalaka para sa Dios magahatag sa imo sing pinakamabaskog nga motibasyon sa paghimo sang iya kabubut-on, bisan pa daw makagalanyat ang paghimo sing tuhay. Ang pamatan-on nga si Jose may subong sina nga gugma kay Jehova, gani sang ang isa ka kilala nga babayi nag-agda: “Hulid ka sa akon,” si Jose nagsabat: “Paano ko mahimo ining daku nga pagkamalaut kag magpakasala batok sa Dios?”—Genesis 39:7-9.
12. (a) Paano mo ginapakita nga nahatag mo na ang imo tagipusuon kay Jehova? (b) Kon wala mo pa mahatag ang imo tagipusuon kay Jehova, anong mga pamangkot ang dapat mo binagbinagon?
12 Ginapakita mo nga ginahigugma mo si Jehova sa imo bug-os nga tagipusuon kon magpalapit ka sa iya sa pangamuyo kag sugiran sia nga luyag mo mangin iya, nga luyag mo mag-alagad sa iya sing dayon. Sa sining paagi ginadedikar mo ang imo kaugalingon kay Jehova. Nahimo mo na bala ini? Kon wala pa, ngaa indi mo himuon? Ano ang nagapugong sa imo? Tigulang ka na bala sa paghangop kag sa pag-apresyar sang daku nga hulusayon sa ulot ni Jehova kag ni Satanas? Kag luyag mo bala pahalipayon ang tagipusuon ni Jehova? Sa pagkamatuod indi luyag ni Satanas nga higugmaon mo si Jehova sa imo bug-os nga tagipusuon. Luyag niya nga sing makagud “himuon mo ang luyag mo,” agod pahamut-an ang imo kaugalingon. Sin-o ang pahalipayon mo, si Jehova bala ukon si Satanas? Binagbinaga ini sing serioso.
13. Kon dedikado ka na kag nabawtismohan, anong mga pamangkot ang dapat mo ipamangkot sa imo kaugalingon?
13 Kon nadedikar mo na ang imo kaugalingon sa Dios kag nasimbuluhan ini paagi sa bawtismo sa tubig, ginapakita bala sang imo dalanon sa kabuhi nga ang imo tagipusuon iya gid sang Dios? Sa diin nasentro ang imo mga intereses kag ang imo gugma? sa pagbakal sing bag-o nga awto? sa pagpangita sing kuwarta agod may ibakal sing mga panapton ukon iban pa personal nga mga butang? Kay sin-o intereses ang imo ginauna—ang imo bala ukon ang iya ni Jehova? Nasabat mo na gid bala ang pangabay ni Jehova nga ihatag mo sa iya ang imo tagipusuon?
14. (a) Ano ang mapuslanon nga pagkabutang sang mga pamatan-on? (b) Ngaa makapasubo kon wala ginadumdom sang isa ka pamatan-on ang iya Manunuga?
14 Samtang ang mga may edad may kapin nga eksperiensia kag sa masami kapin nga kaalam, ang mga pamatan-on may yara mapuslanon nga pagkabutang nga ila magamit sa pagpahamuot sa Dios. “Ang katahom sang mga pamatan-on nga lalaki amo ang ila kusog,” siling sang Biblia. (Hulubaton 20:29) Gani gamita karon ina nga kusog. Dumduma ang imo Manunuga “sa wala pa ang malaut nga mga adlaw” sang katigulangon “magpalapit,” kon ang lawas magluya kag ang mga organo sini mapierdi kag indi na magpanghikot sing nagakaigo. Daw ano kasubo para sa isa ka tawo nga napaslawan sa pagdumdom sa iya Manunuga sang pamatan-on sia kag sa iya katigulangon wala sia sing marekomendar sa iya kaugalingon sa Dios! Amo ini ang “labing daku nga kadayawan!” (Manugwali 12:1-8) Busa, sing maalamon, dumduma ang imo Manunuga samtang may yara ka pa kusog kag kapagsik. Magtukod sing isa ka rekord sang matutom nga pag-alagad sa Dios, nga magadumdom sa imo nga may paborable nga paghukom, huo, sa kabuhi nga walay katapusan.—Hebreo 6:10-12; Manugwali 12:13, 14.
Ginpahalipay Nila ang Tagipusuon sang Dios
15. Ano ang mga halimbawa sang Biblia tuhoy sa mga pamatan-on nga naggamit sang ila kusog sa pag-alagad sa Dios?
15 Ang Biblia puno sing mga huwaran sang mga pamatan-on nga naggamit sang ila “katahom”—ang ila kusog—sa pag-alagad sa Dios. “Mga pamatan-on” nga may kaabtik kag kapagsik ang naglampitaw sa Ginsaad nga Duta. (Josue 6:22, 23; 2:15, 16, 23) Si David, samtang 20 anyos pa lang, nagpadala sing “napulo ka pamatan-on nga lalaki” agod mangayo sing pabor kay Nabal. (1 Samuel 25:4, 5) Sang ginpatindog sang mga Judiyo sa idalom ni Gobernador Nehemias ang mga pader sang Jerusalem samtang ginapahog nga salakayon, sin-o ang naghimo sing makatalagam kag mabudlay nga buluhaton? “Ang katunga sang akon mga pamatan-on nga lalaki,” paathag ni Nehemias, “nagpangabudlay sa buluhaton kag ang katunga sa ila nag-uyat sing mga bangkaw, sing mga taming kag sing mga pana kag sing mga limbutong.” (Nehemias 4:16) Kag sang ginpatay sang Dios si Ananias kag ang iya asawa nga si Safira bangod nagbinutig sila, gindala sila sa guwa sang “mga pamatan-on nga lalaki” kag ginlubong sila.—Binuhatan 5:5, 6, 10.
16. Sa anong espirituwal nga hilikuton nagpakigbahin ang mga pamatan-on sang una?
16 Sa pagkamatuod, nagakalipay ang tagipusuon ni Jehova kon ang mga pamatan-on magtanyag sang ila kaugalingon sa bisan anong pag-alagad nga kinahanglanon sa isa ka tion. Apang ang mga pamatan-on nadalahig sa espirituwal nga hilikuton nga nagkinahanglan sing kapin pa sa pisikal nga kusog kag kapagsik. “Ako bataon,” ginbaton ni Elihu. Walay sapayan, gingamit sia ni Jehova sa pagtadlong kay Job. (Job 32:4-6) Si Samuel “bata” lamang sang magsugod sia sa pag-alagad sa tabernakulo ni Jehova sa Silo. (1 Samuel 2:18) “Isa ka diutay nga lin-ay” nga bisan pa ulipon sa panimalay ni Naaman, ang wala sing kahadlok nga naghambal sang sarang mahimo sang manalagna ni Jehova. (2 Hari 5:2-4) Sang gintangdo ni Jehova si Jeremias subong isa ka manalagna, si Jeremias nagsiling: “Bata lamang ako.” (Jeremias 1:5, 6) “Kag tuhoy sining mga bata, apat sila”—si Daniel kag ang iya tatlo ka Hebreo nga mga kaupod—daw ano sila ka talalupangdon nga mga alagad ni Jehova sang gintapok sila sa Babilonia! (Daniel, kapitulo 1 kag 3) Ang hinablos ni Pablo, isa ka “pamatan-on nga lalaki,” may kaisog nga naghikot para sa iya tiyo. (Binuhatan 23:16-22) Nian yara man ang pamatan-on nga si Timoteo, nga kutob sang iya pagkabata nakahibalo sang balaan nga mga sinulatan kag gingamit niya ang iya pagkapamatan-on sa pag-alagad kay Jehova.—2 Timoteo 3:15; Filipos 2:19-23; 1 Corinto 4:17).
Pagpahalipay sa Tagipusuon sang Dios Karon
17. Ngaa dapat kita magpaabot nga makasapo karon sing mga pamatan-on nga nagapahamuot kay Jehova, kag amo bala ang masapwan naton?
17 Apang indi lamang mga pamatan-on sang una ang nagpahalipay sang tagipusuon sang Dios paagi sa ila matutom nga pag-alagad. “‘Sa katapusan nga mga adlaw,’ siling sang Dios, ‘ipasagahay ko ang akon espiritu sa tanan nga unod, kag ang inyo mga anak nga lalaki kag ang inyo mga anak nga babayi magapanagna kag ang inyo mga pamatan-on nga lalaki makakita sing mga palanan-awon.’” (Binuhatan 2:17; Joel 2:28) Gani dapat gid paabuton nga makasapo kita sa sining katapusan nga mga adlaw sing madamong pamatan-on nga mga Cristiano nga nagapahamuot kay Jehova. Kag may yara matuod! Samtang ang mga pamatan-on nga Saksi indi nga wala sing sala, subong nga wala sing bisan sin-o sa aton ang wala sing sala, madamo ang nagagawi sing maayo subong mga Cristiano. Nabalaka sila sa pagpahalipay sang tagipusuon ni Jehova.—Hulubaton 27:11; 3:1, 2.
18, 19. Anong hilikuton ang dapat nga himuon karon, kag ngaa bagay gid sa sini ang mga pamatan-on?
18 Sa sining katapusan nga mga adlaw, ang kabubut-on ni Jehova amo nga ihatag sa bug-os nga globo ang panaksi nahanungod sa iya Ginharian, nga nagakinahanglan sing daku nga panikasog. (Mateo 24:14) Kinahanglan tukuron ang mga Kingdom Hall, subong man ang dalagku nga mga tinukod para sa sirkito nga mga asambleya. Sa madamo nga pungsod, kapin nga espasyo sang pabrika para sa pagbalhag sing literatura sa Biblia ang kinahanglanon, subong man dugang pa nga mga puluy-an sa Bethel. Ang pag-aman sining bag-ong mga pasilidad nagakinahanglan sing mabug-at nga buluhaton sa pagtukod, kag subong sang pagpatindog sing pader sang adlaw ni Nehemias, ang mga pamatan-on nga may kusog kag kapagsik nagahimo sing daku nga bahin sang buluhaton.
19 Ang mga pamatan-on nagahimo man sang daku nga bahin sang mabug-at nga pagpangabudlay nga kinahanglan sa pag-imprinta, sa pag-bind, kag sa pagpadala sing linibo ka tonilada sang literatura sa Biblia kada tuig. Sa kamatuoran, sa ulong-talatapan sang mga Saksi ni Jehova sa Nueva York, lakip ang Watchtower Farms, may yara kapin sa 1,400 ka pamatan-on nga 25 anyos ang edad kag lamharon pa sa sini. Kag ang ila pag-alagad indi limitado sa mga buluhaton nga nagakinahanglan sing pisikal nga kusog nga ila ginahimo sa sulod sang semana; sa talipuspusan sang semana nagapakigbahin sila sa pamalaybalay nga pagbantala kag sa Cristianong mga miting upod sa lokal nga mga kongregasyon. Ginapahalipay gid nila ang tagipusuon ni Jehova!
20. (a) Ano ang bahin sang mga pamatan-on sa payunir nga ministeryo? (b) Anong mga pamangkot ang dapat ipamangkot sa ila kaugalingon sang mga pamatan-on nga wala sa bug-os tion nga ministeryo?
20 Sa Estados Unidos, kapin sa 12,700 ka iban pa nga katubotubo sining mga pamatan-on ang nagapangabudlay upod sa ila paagi sa pag-alagad subong regular nga payunir. Sa iban nga mga bahin sang kalibutan, kapin sa tignapulo ka libo sang mga pamatan-on ang nagapayunir man. Kon ikaw isa ka pamatan-on nga wala pa sa bug-os tion nga ministeryo, makahimo ka bala sing mga tulumuron para sa imo kaugalingon nga magauna kay Jehova sa imo kabuhi, sa baylo sang pagtuyo lamang nga makatigayon sing mataas sing sweldo nga trabaho, nian magminyo kag magtukod sing pamilya? Nahangpan mo bala ang daku nga hulusayon sa bug-os nga uniberso? Ginakalangkagan mo gid bala nga makita ang ngalan sang aton Dakung Manunuga nga matinloan sang tanan nga pagpakahuya? Kon amo, nian indi bala nagakaigo nga himuon mo ang imo labing masarangan sa pag-alagad kay Jehova? Kag indi bala ina maglakip, sa dimagkubos sa madamo sa inyo, sang pagboluntaryo sa pag-alagad sa mga puluy-an Bethel ukon sa pagpayunir?
21. (a) Anong pangagda ni Jehova ang dapat ninyo sabton, kag paano? (b) Ngaa makasalig kita nga madamo pa sang mga pamatan-on ang magasabat sa pangagda ni Jehova subong sang ginhimo ni Isaias?
21 Pamatii! Si Jehova nagaagda sa inyo, huo, nagapangabay sa inyo nga hatagan sia sing sabat sa malaut nga mga pagpakahuya ni Satanas. Mabatian bala ninyo, subong ni Isaias, ang Dios nga nagapamangkot: “Sin-o bala ang akon ipadala, kag sin-o ang magakadto tungod sa amon?” Magmaalamon kamo. Sunda ang ginsabat ni Isaias: “Yari ako! Ipadala ako.” (Isaias 6:8) Nagasalig kami nga madamo pa sa inyo nga mga pamatan-on ang magasabat bangod ang Pulong sang Dios nagasaad: “Ang imo katawhan magahalad sang ila kaugalingon sing kinabubut-on sa adlaw sang imo militar nga kusog. . . . Kaupod mo ang mga pamatan-on nga lalaki [kag mga babayi] subong sang mga tun-og.” (Salmo 110:3; 148:12, 13) Kag kon sabton ninyo, makatigayon kamo sing kalipay sa paghibalo nga si Jehova nagatan-aw kag nahamuot sia—nga inyo ginapahalipay ang iya tagipusuon!
KAHON PARA SA REPASO
◻ Ngaa importante kay Jehova ang aton paagi sang pagkabuhi?
◻ Ngaa maalamon nga pahalipayon ang tagipusuon ni Jehova?
◻ Paano mapakita nga nahatag naton ang aton tagipusuon kay Jehova?
◻ Sin-o sang una ang nagpahalipay sang tagipusuon ni Jehova, kag paano?
◻ Sin-o karon ang nagapahalipay sang tagipusuon ni Jehova, kag paano?
[Kapsion sa pahina 17]
Kon ginalapas sang mga pamatan-on ang kasugoan sang Dios, nagabayad sila sing makapasubo nga mga resulta sa ulihi
[Laragway sa pahina 18]
Ginpahalipay sang mga pamatan-on ang tagipusuon sang Dios paagi sa pagpatindog liwat sang mga pader sang Jerusalem