Mga Pamatan-on​—Pasadyaha ang Tagipusuon ni Jehova

¹ Kon ginagamit sang isa ang kusog kag kapagros sang pagkapamatan-on sa husto nga paagi, ang kabuhi tunay gid nga makalilipay. Ang maalam nga si Hari Solomon nagsulat: “Magkalipay, pamatan-on nga lalaki, sa imo pagkapamatan-on, kag maglipay sa imo ang imo tagipusuon sa mga adlaw sang imo pagkapamatan-on.” (Manugw. 11:9) Kamo nga mga pamatan-on magapanabat sa Dios tungod sang inyo mga buhat.

² Daku gid ang mahimo indi lamang sa inyo kundi sa inyo man mga ginikanan kon paano kamo nagakabuhi. Ang Hulubaton 10:1 nagasiling: “Ang anak nga maalam nagahimo sing amay nga malipayon, apang ang anak nga buangbuang amo ang kabug-atan sang iya iloy.” Apang sing mas importante pa, ang inyo pagkabuhi nagaapektar sang inyo Manunuga, nga si Jehova nga Dios. Amo ina kon ngaa ang Hulubaton 27:11 nagapalig-on man sa mga pamatan-on: “Anak ko, magmaalam ka, kag pasadyaha ang akon tagipusuon, agod nga masabat ko sia nga nagapakahuya sa akon.” Paano ninyo nga mga pamatan-on mapasadya ang tagipusuon ni Jehova karon? Sarang ini mahimo sa pila ka paagi.

³ Paagi sa Maayo nga Halimbawa: Naeksperiensiahan ninyo nga mga pamatan-on ang “makahalanguyos nga tion nga mabudlay pakig-angutan” nga gintagna sa Pulong sang Dios. (2 Tim. 3:1) Ayhan ginaipit man kamo sang ditumuluo nga mga kabutho kag bisan sang mga manunudlo nga nagayaguta sang inyo pasad-sa-Biblia nga mga punto-de-vista. Halimbawa, ginpresentar sang isa ka manunudlo ang teoriya sang ebolusyon subong matuod kag ang Biblia subong patupato lamang. Apang, matutom nga ginpangapinan sang lamharon nga manugbantala sa sadto nga klase ang Biblia. Subong resulta, nasugdan ang pila ka pagtuon sa Biblia. Ang iban nga mga interesado nagsugod sa pagtambong sa mga miting. Ang pagtuo ninyo nga mga pamatan-on nga kauturan nga lalaki kag babayi nagapakamalaut sa didiosnon nga kalibutan kag nagaganyat sa mga bunayag sing tagipusuon sa kamatuoran.​—Ipaanggid ang Hebreo 11:17.

⁴ Sarang bala ninyo mapalig-on ang inyo mga katubotubo sa kongregasyon agod indi sila madala sang malain? Paagi sa pagpakita sing maayo nga halimbawa sa eskwelahan, sa puluy-an, kag sa kongregasyon, mapabakod ninyo ang pagtuo sang iban nga mga lamharon nga manugbantala. (Roma 1:12) Pasadyaha ang tagipusuon ni Jehova paagi sa pagpakita sing halimbawa sa iban.

⁵ Paagi sa Pamayo kag Pamustura: Ang isa ka lamharon nga utod nga babayi ginsunlog kag ginyaguta bangod sang iya maugdang nga pamayo kag gintawag nga “dimatandog.” Wala ini magpahog sa iya sa pagsunod sa didiosnon nga mga talaksan sang kalibutan. Sa baylo, ginpaathag niya nga isa sia sang mga Saksi ni Jehova kag ginasunod niya ang mataas nga talaksan sang mga Saksi. May amo bala kamo sina nga kaisog? Ukon ginatugutan bala ninyo ang kalibutan ni Satanas sa pagdihon sa inyo sa panghunahuna kag pagginawi sini? Daw ano nga kalipay makita nga madamo sa inyo nga mga pamatan-on ang nagasunod sa panudlo ni Jehova kag nagasikway sa baraghal nga mga estilo, uso, idolo, kag panudlo sang kalibutan. Sa pagkamatuod, subong sang natun-an naton sa aton ulihi nga distrito nga kombension, dapat naton kilalahon nga ina nga mga butang naghalin sa kalibutan nga ginaimpluwensiahan sang mga demonyo!​—1 Tim. 4:1.

⁶ Paagi sa Ginapili nga Kalingawan kag Liwaliwa: Dapat pirme dumdumon sang mga ginikanan ang pagkakinahanglanon nga buligan ang ila kabataan sa maalamon nga pagpili sing husto nga sahi sang kalingawan kag liwaliwa. Ang isa ka utod nga lalaki nagasugid sing malipayon tuhoy sa isa ka maayo nga pamilya nga ginhigugma gid niya sing daku. Bangod mahunahunaon sa espirituwal, ang mga ginikanan nag-aman sing panuytoy nga gin-aplikar man sa pagliwaliwa sang pamilya. Ang utod nagsiling: ‘Dayaw ako sa ginahimo nila. Indi lamang ginabuligan sang mga ginikanan ang mga kabataan sa paghanda para sa pag-alagad, kundi kon tion na sa pagliwaliwa, masadya sila nga nagalakat sing malawig, nagapamasyar sa mga museo, ukon nagatener lamang sa balay kag nagahampang ukon nagapangabudlay sa mga proyekto. Ang ila gugma sa isa kag isa kag sa iban nagapasalig sa imo nga magalakat sila sa kamatuoran sa palaabuton, bisan ano man ang matabo.’

⁷ Siempre pa, may mga tion nga indi posible para sa bug-os nga pamilya nga mag-inupdanay sa liwaliwa kag kalingawan. Dapat ninyo nga mga pamatan-on mahibaluan ini kag ang importansia sang pagpili kon paano ninyo ihinguyang ang inyo tion sa paglipaylipay. Determinado si Satanas nga patalangon ang pinakamadamo kon mahimo. Ang mga pamatan-on kag mga dieksperiensiado ilabi na nga masulay sa iya malimbungon nga mga buhat kag madayaon nga mga paghaylo. (2 Cor. 11:3; Efe. 6:11) Gani ginagamit karon ni Satanas ang lainlain nga mga paagi sa pagganyat sa inyo nga maglisa kag magkabuhi sing makagod nga nagapangita sing kalipayan kag pagkadimatarong.

⁸ Ang telebisyon isa ka lantip nga manugganyat nga nagapasanyog sang materyalistiko kag imoral nga estilo sang pagkabuhi. Ang mga pelikula kag mga video tayuyon nga nagasalida sang masingki kag malaw-ay nga sekso. Ang popular nga musika dugang nga nagalain kag nagalaw-ay. Ang mga pagsulay ni Satanas mahimo nga daw inosente, apang nasiod sini ang linibo ka Cristianong pamatan-on sa sayop nga panghunahuna kag paggawi. Agod mabatuan ina nga mga pag-ipit, dapat ninyo himud-usan sing lakas ang pagkamatarong. (2 Tim. 2:22) Kon kinahanglan ang mga pagbag-o sa inyo panghunahuna ukon paggawi may kaangtanan sa kalingawan kag liwaliwa, paano ini himuon? Ang salmista nagahatag sing sabat: “Sa bug-os ko nga tagipusuon ginapangita ko ikaw. Indi ako pagpatalanga gikan sa imo sugo.”​—Sal. 119:10.

⁹ Ang pag-idolo sa mga bituon sa isport kag kalingawan kinaandan na. Ang kahadlok kay Jehova magabulig sa inyo nga indi pag-idolohon ang dihimpit nga mga tawo. Bisan ang seksuwal nga imoralidad ginaidolo sang madamo sa karon. Makapangandam kamo batok sa sini nga huyog paagi sa paglikaw sa pornograpiya kag malain nga musika. Nahanungod sa musika, ang Abril 15, 1993, nga guwa sang Ang Lalantawan nagsiling: “Ang musika isa ka balaan nga dulot. Apang, para sa madamo nangin isa ini ka dimaayo nga hulunahunaon. . . . Himud-usi nga ibutang sa lugar ang musika kag himua ang buluhaton ni Jehova nga amo ang inyo pangunang ginakabalak-an. Mangin mapilion kag mahalungon sa musika nga inyo ginapili. Busa magamit ninyo​—indi maabusuhan​—ining balaan nga dulot.”

¹⁰ Ipalambo ang bug-os nga pagkangil-ad sa kon ano ang malain. (Sal. 97:10) Kon ginasulay sa paghimo sing malain, hunahunaa kon paano ini ginatamod ni Jehova, kag binagbinaga ang mga resulta: wala maluyagi nga mga pagmabdos, mga balatian nga ginliton paagi sa sekso, emosyonal nga kasubo, pagkawala sing pagtahod sa kaugalingon, kag pagkawasi sang mga pribilehiyo sa kongregasyon. Indi pag-ipadayag ang inyo kaugalingon sa mga palagguwaon sa telebisyon, mga pelikula, mga video, mga ambahanon, ukon mga paghambalanay nga nagapasanyog sang kalautan. Indi makig-upod sa mga ginaklase sang Biblia subong “mga buangbuang.” (Hulu. 13:19) Mangin mapilion; pilia subong mga suod nga kaupdanan yadtong nagahigugma kay Jehova kag sa iya matarong nga mga talaksan sa kongregasyon.

¹¹ Huo, ang mga pamatan-on nga luyag gid magpasadya sang tagipusuon ni Jehova magatuman sang maayo nga laygay nga makita sa Efeso 5:​15, 16: “Tan-awa sing mainandamon kon paano ang paggawi ninyo, indi subong nga dimaalam kundi subong nga mga maalam, nga nagahimulos sang kahigayunan, bangod nga ang mga adlaw malaut.” Ano ang magabulig sa inyo sa ‘pagtan-aw sing mainandamon’ sang inyo pag-uswag sa sining katapusan nga mga adlaw?

¹² Pag-atipan sa Espirituwal nga mga Kinahanglanon: Sa Mateo 5:​3, si Jesus nagkomento: “Malipayon ang mga mahunahunaon sang ila espirituwal nga kinahanglanon.” Mahimo man kamo magmalipayon paagi sa pagkamahunahunaon sa inyo espirituwal nga kinahanglanon. Ang pagpuno sa sinang kinahanglanon nagalakip sang makugi nga pagpakigbahin sa pagbantala sing maayong balita, kay nagapabakod ini sang aton pagtuo sa mga butang nga ginatun-an naton.​—Roma 10:17.

¹³ Gikan sa inyo personal nga inagihan nahibaluan ninyo nga indi pirme mahapos ang makigbahin sing tayuyon sa ministeryo. Bangod ini sa kakulang sing pagsalig. Busa, ang inyo malig-on nga determinasyon kinahanglanon. Paagi sa tayuyon nga pagpakigbahin sa ministeryo, mapasangkad ninyo ang inyo kalantip sa pagpanaksi kag mapalig-on ang pagsalig sa inyo ikasarang sa pagbantala.

¹⁴ Maghimo sing mga kahimusan nga mangabudlay upod sa mas eksperiensiado nga mga manugbantala sa kongregasyon, subong sang mga regular payunir kag mga gulang. Pamatii sing maayo ang ila mga presentasyon kag kon paano nila ginaatubang ang mga pagpamatok sa ganhaan. Gamita sing maayo ang Reasoning nga libro kag ang mga panugda nga ginahatag sa Ang Aton Ministeryo sa Ginharian. Sa indi madugay matigayon ninyo ang daku pa nga kasadya gikan sa ministeryo bangod ginahatag ninyo ang inyo bug-os nga masarangan kay Jehova.​—Binu. 20:35.

¹⁵ Ginhimuslan sang iban ang mga kahigayunan nga makapanaksi sa eskwelahan kag nangin madinalag-on sa paghimo sing mga disipulo. (Mat. 28:​19, 20) Ang isa ka Cristianong pamatan-on nagsiling: “Kon wala sing klase, madamo ako sing kahigayunan nga makapanaksi, ilabi na sa tion sang kalibutanon nga mga piesta-opisyal. Kon ibilin ko ang mga publikasyon tuhoy sa Biblia sa akon desk diin makita ini sang iban, madamong interesado nga mga estudyante ang nagapalapit sa akon.” Sang ulihi, ang pila ka estudyante kag bisan ang manunudlo nagsugod sa pagtambong sa Cristianong mga miting. Sa katunayan, ang manunudlo nag-uswag tubtob sa punto nga nangin isa ka dedikado nga Saksi. Si Jehova nagakasadya sing daku kon ang lamharon nga mga sumilimba kaangay ninyo nagadala sing kadayawan sa iya ngalan.

¹⁶ Ang isa pa ka paagi sa pagpaayaw sa inyo espirituwal nga kinahanglanon amo ang paagi sa personal nga pagtuon. Agod mapasadya ang tagipusuon ni Jehova, dapat kita magkuha sing ihibalo nahanungod sa iya, sa iya mga katuyuan, kag sa iya mga kinahanglanon para sa aton. Nagapain bala kamo sing tion para sa personal nga pagtuon? Regular bala kamo nga nagatuon, subong nga may tion kamo sa regular nga pagkaon? (Juan 17:3) May personal bala kamo nga iskedyul sa pagbasa sang Biblia dugang sa pagtinguha ninyo nga makadungan sa iskedyul sa pagbasa sang Biblia sa Teokratikong Eskwelahan sa Pagministro? Ginahandaan bala ninyo sing maayo ang tanan nga mga miting? Ginabasa bala ninyo sing tayuyon ang Lalantawan kag Magmata! nga mga magasin? Nagahinguyang bala kamo sing tion, ilabi na sa pagbasa sa kada artikulo sang “Pamangkot sang mga Pamatan-on . . . ” nga mga serye, mahalungon nga nagatan-aw sang tagsa ka kasulatan? Kag indi pagkalimti ang libro nga gindesinyo sang Sosiedad ilabi na para sa inyo personal nga mga kinahanglanon, ang Questions Young People Ask​—Answers That Work. Ang Cristianong mga pamatan-on kag ang ila mga ginikanan sa bug-os nga kalibutan nagsulat agod ipabutyag kon paano sila nabuligan sini nga libro nga magsuod sing labi pa kay Jehova.

¹⁷ Kon ginabasa ninyo ang Biblia kag ang teokratikong mga bulig sa pagtuon sa Biblia, nagasugid ini sa inyo nahanungod kay Jehova, sa iya panghunahuna, kag sa iya mga katuyuan. Binagbinaga kon paano ini nga impormasyon mangin mapuslanon sa imo. Iangot ang inyo ginabasa sa nabasa na ninyo sang nagligad. Nagalakip ini sang pagpamalandong. Ang pagpamalandong nagatugot sa impormasyon nga makalab-ot sa tagipusuon kag magapahulag sa inyo.​—Sal. 77:12.

¹⁸ Nalipay kami makita ang mga pamatan-on nga mahunahunaon sa ila espirituwal nga kinahanglanon nga nagatambong sa mga miting sang kongregasyon. Mapalig-on ninyo nga Cristianong mga pamatan-on ang iban paagi sa tayuyon nga paghatag sing makahulugan nga mga komento sa tion sang mga miting. Himua nga tulumuron ang magkomento sing dimagkubos makaisa sa kada miting. Palambua ang mainit nga mga kaangtanan upod sa tanan sing pang-idaron nga mga kauturan sa kongregasyon paagi sa pagpakigbahin sa makapalig-on nga pagpakig-upod antes kag pagkatapos sang mga miting. (Heb. 10:​24, 25) Ang isa ka pamatan-on nga lalaki nagkomento nga ginpalig-on sia sang iya mga ginikanan nga makigsugilanon sa dimagkubos sa isa ka mas may edad nga utod nga lalaki ukon babayi kada miting. Karon ginapakabahandi niya ang eksperiensia nga natigayon niya paagi sa pagpakig-upod sa mas may edad nga mga katapo sang kongregasyon.

¹⁹ Himud-usi ang Espirituwal nga mga Tulumuron: Makapasubo nga ang kabuhi sang madamong mga pamatan-on kulang sing katuyuan kag direksion. Apang, indi bala makalilipay ang balatyagon nga mabatyagan bangod sang pagpahamtang sing teokratikong mga tulumuron kag nian madinalag-on nga matigayon ini? Ining mga tulumuron, nga ginahimud-usan upod ang kapawa sang balaan nga pagpanudlo, personal nga makaalayaw sa karon kag sa ulihi magadul-ong sa dayon nga kaluwasan.​—Manugw. 12:​1, 13.

²⁰ Kon nagapahamtang sing mga tulumuron, ipangamuyo ini. Ipakigsugilanon ini sa inyo mga ginikanan kag sa mga gulang. Usisaa ang inyo kaugalingon kag ang inyo mga ikasarang, kag magpahamtang sing praktikal nga mga tulumuron suno sa masarangan ninyo himuon kag indi suno sa pagpaanggid sa iban. Ang tagsatagsa lainlain ang pagkahuman​—sa pisikal, mental, emosyonal, kag espirituwal. Busa, indi magpaabot nga mahimo ang tanan nga ginahimo sang iban.

²¹ Ano ang pila sa mga tumuluron nga sarang ninyo malab-ot? Kon ikaw indi pa manugbantala kag indi pa bawtismado, ngaa indi ini himuon nga imo mga tulumuron? Kon ikaw isa ka manugbantala, mahimo mo nga tulumuron ang paghinguyang sing pila ka oras sa ministeryo kada semana. Pangabudlayi nga mangin isa ka sangkol nga manunudlo sa mga pagduaw liwat, kag himua nga tulumuron ang magdumala sing pagtuon sa Biblia. Kon ikaw isa ka bawtismado nga pamatan-on sa eskwelahan, ngaa indi himuon nga imo tulumuron ang mag-auxiliary payunir sa mga binulan sang tig-ilinit? ‘Madamo pa sing hilimuon sa buluhaton sang Ginuo.’​—1 Cor. 15:58.

²² Ang Bulig Gikan sa mga Ginikanan Kinahanglanon: Ang mga pamatan-on sa kongregasyon indi dapat magbatyag nga nagaisahanon sila sa ila mga panikasog nga matigayon ang kabuhi. Si Jehova, paagi sa iya organisasyon, nag-aman sing laygay agod buligan ang mga pamatan-on sa paghimo sing adlaw-adlaw nga mga desisyon kag sa paglandas sa mga problema sa kabuhi. Ang dedikadong mga ginikanan, siempre pa, may pangunang salabton sa pagbulig sa ila mga kabataan sa paghimo sing nagakaigo nga mga desisyon. Sa 1 Corinto 11:​3, ginatangduan sang Biblia ang bana subong ang ulo sang panimalay. Busa, sa Cristianong panimalay, upod ang asawa nga nagapangabudlay sing suod sa iya, ang amay nagapanguna sa pagtudlo sa mga kabataan sang mga sugo sang Dios. (Efe. 6:4) Ginahimo ini paagi sa maukod nga paghanas nga nagasugod sa pagkabata. Sanglit ang utok sang bata nagatatlo ka pilo sing kadakuon sa una nga tuig sang kabuhi, indi gid dapat pakadiutayon sang mga ginikanan ang ikasarang sang ila lapsag sa pagtuon. (2 Tim. 3:15) Samtang nagadaku ang mga kabataan, ang mga ginikanan dapat magtudlo sa ila sing progresibo nga higugmaon si Jehova kag palambuon ang maayong kaangtanan sa iya.

²³ Sa “Balaan nga Panudlo” nga Distrito nga Kombension, may pamulongpulong nga ginhatag nga natig-uluhan “Mangabudlay sing Lakas Para sa Kaluwasan sang Inyo Panimalay.” Lainlain nga mga punto ang ginhatag sa pagbulig sa mga ginikanan nga mahangpan ang praktikal nga mga paagi nga mabuligan nila ang ila mga anak. Ang maayo nga halimbawa sang mga ginikanan amo ang pinakamaayo nga panugod. Labi pa ang mahimo sini sa pagbulig sa imo mga anak sa espirituwal sangsa pagpakigsugilanon sa ila nahanungod sa dapat kag indi dapat nila himuon. Ang pagpahamtang sing nagakaigo nga halimbawa sang ginikanan magalakip sang pagpakita sang bunga sang espiritu sa sulod sang puluy-an, sa imo tiayon kag sa imo mga anak. (Gal. 5:​22, 23) Nakita sang madamo gikan sa eksperiensia nga ang espiritu sang Dios isa ka gamhanan nga impluwensia para sa kaayuhan. Makabulig ini sa inyo sa pagdihon sang hunahuna kag tagipusuon sang inyo mga anak.

²⁴ Ginsambit man sa kombension ang kinahanglanon nga ang mga ginikanan magpahamtang sing maayo nga halimbawa sa mga batasan sang personal nga pagtuon, pagtambong sa miting, kag regular nga pagpakigbahin sa ministeryo sa latagon. Kon mapagsik ninyo nga ginahambalan ang kamatuoran sa puluy-an, makugi nga ginapangunahan ang ministeryo, kag positibo sa inyo personal nga pagtuon, ang inyo mga anak mapalig-on sa pagpakita sing hanuot nga interes sa espirituwal nga mga butang.

²⁵ Kon handaan sing maayo, ang regular kag makahulugan nga pagtuon sang pamilya sa Biblia mahimo mangin makawiwili kag makalilipay, isa ka tion sa pagpalig-on sang pag-inupdanay sang pamilya. Maghinguyang sing tion sa paglab-ot sa tagipusuon sang inyo mga anak. (Hulu. 23:15) Samtang ginagamit sang madamong mga pamilya ini nga okasyon sa paghanda para sa semanal nga Pagtinuon sa Lalantawan, sa tion kag tion makapalig-on binagbinagon ang isa ka partikular nga kinahanglanon sang pamilya. Ang pagpamangkot sing punto-de-vista nga mga pakiana kag ang pagpamati sa mga komento sang tagsa ka katapo sang pamilya makapabakod subong man makapapagsik. Ang pagdumala sing pagtuon nga nagabenepisyo sa tagsa ka katapo sang pamilya isa gid ka hangkat sa ulo sang pamilya. Apang daw ano ka makapaladya kon ang tanan magatubo sa espirituwal! Paagi sa paglakip sa tanan, ang masadya nga espiritu magapangibabaw.

²⁶ Ang inyo mahigugmaon, suno-sa-kahimtangan nga paghanas sa karon kinahanglanon sa pagluwas sa kabuhi sang inyo mga anak. (Hulu. 22:6) Nagahunahuna sini, mahapos hangpon nga ayhan amo ini ang pinakaimportante nga pagpanudlo nga mahimo ninyo. Indi maghunahuna nga nagaisahanon kamo sa sining pinasahi kag importante nga hilikuton. Magtuon sa pagsalig sing daku kay Jehova para sa panuytoy sa pag-atipan sa inyo mga salabton sa pamilya. Indi lamang ina. May iban pa nga makabulig man sing daku.

²⁷ Kon Ano ang Mabulig sang Iban: Sarang malakip sang mga gulang ang mga pamatan-on, upod ang ila mga ginikanan, sa pagtinlo sang Kingdom Hall. Palig-una ang mga kabataan sa mga miting sa kongregasyon. Ang mga gulang kag mga ministeryal nga alagad nga ginhatagan sing mga bahin sa Miting sa Serbisyo dapat mangin alisto sa mga kabataan nga nagabayaw sang ila mga kamot kon ginakinahanglan ang pagpakigbahin sang tumalambong. Mangita sing mga kahigayunan nga magamit ang huwaran nga mga kabataan sa mga pasundayag upod sa ila mga ginikanan. Ang iban mahimo mainterbyu kag mapakumento sing malip-ot.

²⁸ Indi pagpasapayani ang ila mga panikasog. Ang mga pamatan-on nangin daku nga bulig sa kongregasyon. Paagi sa ila maayo nga paggawi, ‘napunihan [sang madamo] ang panudlo sang aton Manluluwas, ang Dios.’ (Tito 2:​6-10) Magmahunahunaon sa kinahanglanon nga hatagan sing komendasyon ang mga pamatan-on nga nagapakigbahin bisan sa diutay nga paagi. Magapalig-on ini sa ila sa paghanda kag magahandum nga himuon ini liwat sa ulihi. Ina nga interes sang mga may edad sa mga pamatan-on bilidhon. Daw ano kasunson bala ninyo subong gulang ukon ministeryal nga alagad ginapalapitan ang mas batan-on nga mga katapo sang kongregasyon agod hatagan sila sing komendasyon tungod sa isa ka pamulongpulong ukon presentasyon sa miting?

²⁹ Mga payunir, ano ang inyo mabulig? Ngaa indi repasuhon ang inyo iskedyul agod tan-awon kon paano ninyo malakip ang mga kabataan nga nagaeskwela sa inyo mga kahimusan para sa mga hapon kag mga talipuspusan sang semana? Nagapamulong bala kamo sing positibo nahanungod sa inyo pinili nga bug-os tion nga pag-alagad? Ginapakita bala ninyo paagi sa inyo pangguyahon nga nalipay kamo sa inyo ministeryo? Gilayon bala ninyo nga ginarekomendar ini sa iban, ilabi na sa mga pamatan-on? Kon nagapamalaybalay, ang inyo bala pamulong makapalig-on kag positibo? Kon amo, nian subong payunir nagapakigbahin man kamo sa sining importante nga paghanas nga hilikuton.

³⁰ Ang tanan sa kongregasyon dapat mangin alisto sing hanuot sa sining importante nga hilikuton sang paghanas sa mga pamatan-on. Makahimo bala kamo sing pat-od nga mga kahimusan sa pagpangabudlay upod sa ila sa ministeryo sa latagon? Maensayo bala ninyo upod sa ila ang isa ka presentasyon bilang paghanda sa pamalaybalay nga hilikuton? Alisto bala kamo sa mga kahigayunan nga ipalig-on ang palaabuton nga espirituwal nga mga hilikuton kon magkaupod sa ministeryo? Ang kada manugbantala dapat mangin alisto nga bisan ang diutay nga komento magaresulta sa positibo nga mga panghunahuna padulong sa tubtob-buhi nga espirituwal nga mga tulumuron, sa walay katapusan nga kaayuhan sang pamatan-on.

³¹ Mabuligan sang mga Pamatan-on ang Ila Kaugalingon: Mga pamatan-on, ginapalig-on namon ang tagsatagsa sa inyo nga padayon nga pamatian ang mga panudlo ni Jehova kag isikway ang ginatanyag sang kalibutan. Padayon nga tilawi ang inyo kaugalingon paagi sa pag-usisa sang inyo paggawi kag nasulod nga mga balatyagon. Ano ang inyo panimuot tuhoy kay Jehova kag ano ang ginapaabot niya sa inyo sa adlaw-adlaw nga pagkabuhi? Nagapakig-away bala kamo sing lakas batok sa impluwensia sang mga ideya ni Satanas? (1 Tim. 6:12) Sanglit ang mga tawo, kag ang mga pamatan-on ilabi na, kinaugali nga nagahandum nga maluyagan sang ila mga katubotubo, nasulay bala kamo sa pagsunod sa kadam-an sa paghimo sing malain? (Ex. 23:2) Nahangpan ni apostol Pablo nga may daku nga pag-ipit nga magpahisuno sa mga dalanon sang kalibutan.​—Roma 7:​21-23.

³² Nagakinahanglan sing kaisog agod batuan ang impluwensia sang kalibutan, agod maglakat sa dalanon nga tuhay sa kalibutanon nga mga katubotubo, kag agod pamatian ang mga panudlo sang Dios. Ang mga tawo sang dumaan nga panahon naghimo sini nga may daku nga kadalag-an. Binagbinaga ang kaisog ni Noe. Ginpakamalaut niya ang bug-os nga kalibutan paagi sa iya pagtuo kag paagi sa pagpahilayo sa mga makasasala sang panahon niya. (Heb. 11:7) Makig-away sing lakas bangod takus ini sa panikasog. Indi pag-iluga ang maluya, matalaw, mahadlukon nga mga tawo nga nagasunod sa kadam-an ni Satanas. Sa kabaliskaran, makig-upod sa sadtong kalahamut-an sa itululok ni Jehova. (Filip. 3:17) Palibuti ang inyo kaugalingon sang mga kaupdanan nga magamartsa kaupod ninyo pasulod sa ginsaad nga bag-ong kalibutan sang Dios. (Filip. 1:27) Dumduma nga isa lamang ang dalan nga nagapadulong sa kabuhi nga walay katapusan.​—Mat. 7:​13, 14.

³³ Kon nalipay kita nga makita ang mga pamatan-on nga nagadala sing kadayawan kag kadungganan sa aton Dios, mahimo gid nga nagapahalipay ini sa iya! Walay duhaduha nga nalipay si Jehova nga makita ang mga pamatan-on nga nagapakigbahin sing lubos sa pagbantala sang iya dakung mga katuyuan. Sila “panublion” halin sa iya, kag luyag niya ang pinakamaayo para sa ila. (Sal. 127:​3-5; 128:​3-6) Nagapamalandong sa interes sang iya Amay, daku ang kalipay ni Cristo Jesus sa pagpakig-upod sa mga bata, kag naghinguyang sia sing tion agod palig-unon sila sa ila pagsimba kay Jehova. Ginpakita niya ang malum-ok nga pagpalangga sa ila. (Mar. 9:​36, 37; 10:​13-16) Ginatamod man bala naton ang aton mga pamatan-on subong sang pagtamod nanday Jehova kag Cristo Jesus? Nahibaluan bala sang mga pamatan-on sa aton kongregasyon kon paano ginatamod ni Jehova kag sang mga anghel ang ila katutom kag maayong halimbawa? Dapat sila dayawon kag palig-unon nga pasadyahon si Jehova paagi sa paglab-ot sa espirituwal nga mga tulumuron. Mga pamatan-on, himud-usi ang mga tulumuron nga magaresulta sa mga kabulahanan para sa imo sa karon kag sa palaabuton.