Ginpakamaayo ni Jehova ang Akon mga Desisyon
Panugiron ni Samuel B. Friend
SADTO sang Hulyo 1952 nagakanta ako anay kada Sabado sang gab-i sa isa ka popular nga palaguwaon sa Little Rock, Arkansas. Ang tatlo ka oras nga palaguwaon paborito indi lamang sang kitaon nga tumalambong kundi sang linibolibo pa nga nagapamati sa sini sa 50,000 watt nga estasyon sang radyo nga KLRA. Wala pa sadto sing telebisyon sa sadtong bagatnan nga bahin sang Estados Unidos.
Isa ka gab-i, samtang nagahinakop ako sa pagkanta, ginpalapitan ako sang isa ka talent scout sang MGM (Metro-Goldwyn-Mayer) nga recording company. “Luyag ko nga magkanta ka para sa amon,” siling niya. Kag sadto gid nga tion gintanyagan niya ako sing kontrata sa pagrekord nga daku sing kitaon. Nagsiling sia nga nagtan-aw sia sang akon palaguwaon sa sulod sang pila ka semana, kag ginahunahuna niya nga may palaabuton ako sa pagrekord sing plaka.
Sang ginsingganan ko sia nga indi ako interesado, nakibot sia. Ginpaathag ko sa iya nga nagakanta lamang ako agod makabulig sa pagsakdag sang akon asawa kag sang akon kaugalingon sa bug-os tion nga ministeryo kag indi ko luyag nga madalahig sing dugang pa sa industriya sang musika.
Sang ulihi sadto nga tuig, ang telebisyon ginpakilala sa Arkansas—didto sa Little Rock. Ginpangabay ako sang direktor sang programa nga mangin master of ceremonies para sa unang programa, isa ka musikal nga palaguwaon. Nalipay ako kag ginbaton ko ang tanyag, nga nagapaathag nga apresyahon ko ang part-time nga trabaho sa estasyon. Nagsiling sia nga pahibaluon niya ako sa tapos sang nagabukas nga programa.
Yadtong nagabukas nga programa nagmadinalag-on gid. Ginpakilala ang may kinaadman nga mga manugkanta kag ako mismo nagkanta sing pila ka kanta. Pagkatapos namangkot ako kon mahimo ako makatigayon sing part-time nga trabaho. “Indi, indi ko luyag nga mag-part-time ka lang,” siling niya. “Luyag ko nga mag-full time ka.” Sanglit indi sia magkompromiso sa bug-os tion nga pagtrabaho, naghimo ako sing desisyon. Makasululay gid ang magtrabaho sa una nga panalgan sang una nga estasyon sang TV sa Arkansas. Apang, sa pagkamatuod, indi ini mapaanggid sa pag-alagad sa aton langitnon nga Amay, si Jehova nga Dios, sa bug-os tion nga pag-alagad subong payunir! Gani ginpangindian ko ang tanyag.
Sang manugid ako sa akon asawa nga si Jean sa tapos sang palaguwaon, nag-ugyon sia sing bug-os. Sadto nga gab-i sang magpauli kami, nahibaloan bala ninyo kon ano ang yara sa kahon sang mga sulat? Isa ka imbitasyon nga mag-alagad subong manugtatap sang sirkito, nga nagaduaw sa mga kongregasyon sang katawhan ni Jehova agod palig-unon sila sa espirituwal. Ginbatyag ko nga ginpakamaayo gid ni Jehova ang akon desisyon.
Isa Pa ka Tion sang Pagdesisyon
Indi yadto ang una nga desisyon nga dapat ko himuon. Sang makatapos ako sa hayskol sa Mount Ida, Arkansas, ang akon utod nga si Fred kag ako nagbuylog sa nakatundan nga grupo sang mga manugkanta nga ginatawag Texas Rangers. Sa halos tatlo ka tuig sa tion sang talipuspusan nga bahin sang katuigan 1930, naglakbay ako upod sa grupo sa madamo nga estado sa bagatnan. Ang amon banda nakabaton sing daku sing suweldo nga mga tanyag gikan sa mga sumalakdag nga subong kalayo sang Chicago. Nagdaug kami sing una nga premyo sa paindisanay sang estado sa Mississippi kag Arkansas, kag sa paindisanay sang estado sa Arkansas. Nagdaug ako sing una nga premyo subong labing maayo nga manugkanta sa mga lalaki. Gani maayo sing palaabuton ang akon karera.
Apang natunga ang akon hunahuna. Sang bata pa ako sang katuigan 1920, ang amon pamilya nakita sang mga tiglawas sang Watch Tower Society. Sa kamatuoran, sang nagaduaw sila sa amon duog nga pila ka milya sa nakatundan sang Hot Springs, Arkansas, ang nagalakbay nga mga ministro (ginatawag mga pilgrim) nagadayon anay sa amon balay. Nalipay ang amon pamilya sa pagpamati sa ila kag sa masami ginbaton namon ang ila gintudlo.
Gani samtang nagadaku ako may yara ako sadsaran nga ihibalo tuhoy sa kamatuoran sang Biblia. Kag nagahambal pa gani ako sa akon mga abyan nahanungod sa mga butang nga ginasiling sining nagalakbay nga mga ministro kag sang amon nabasahan sa balay sa The Watchtower. Si Floyd Garrett isa sang akon mga abyan sang bata pa ako. Dungan kami nga nag-eskwela sang tunga-tunga sang katuigan 1930. Ginbaton ni Floyd ang mga butang nga ginsugid ko sa iya, kag, sang ulihi, nagdedikar sia sa Dios kag nagsulod sa bug-os tion nga ministeryo sang 1940. Sa karon nagaalagad sia subong nagalakbay nga manugtatap.
Bueno, sang nagalakbay ako upod sa banda, ginasulatan ako sang akon amay kag ginasugiran nahanungod sa mga pamulongpulong nga ginahatag sang nagalakbay nga kauturan didto sa amon duog. Nian, sang talipuspusan nga bahin sang 1938, sang didto kami sa Jackson, Mississippi, gin-agda ako nga mamati sa isa ka rekording sang lektura nga “Fill the Earth” nga ginpamulong sang presidente sang Watch Tower Society nga si J. F. Rutherford sa isa ka kombension sa London, Inglaterra. Ginpapagsik sadto liwat ang akon interes nga nagpahimunong sa sulod sang tinuig. Nahibaloan ko nga dapat ako magdesisyon. Sang masunod nga tuig naghalin ako sa banda kag nagpauli sa Arkansas.
Espirituwal nga Pag-uswag
Ang musika, subong man ang pagpangisda kag pagpangayam, ikaduha na karon sa akon kabuhi. Ang espirituwal nga mga butang labi nga nangin makahulugan samtang una ko nga ginpangita ang Ginharian. (Mateo 6:33) Si Jehova nangin matuod sa akon, kag nagadabdab gid ang handum ko sa pag-alagad sa iya. Nagdedikar ako kay Jehova kag nagpabawtismo sang Nobiembre 27, 1939, sa isa ka mabugnaw nga suba sang Arkansas. Pagkatapos sadto ginbawtismohan man ang akon iloy.
Nagbakal ako sing 11 ka tuig na nga awto sa $50, kag sang Nobiembre 1940, sa edad nga 23 anyos, nagsulod ako sa bug-os tion nga pag-alagad bilang payunir sa uma nga bahin sang Arkansas. Daw ano ka makalilipay nga adlaw yadto! Ang dalanon sang akon kabuhi maathag, kag nabatyagan ko nga ginasakdag ako ni Jehova kag amo ina ang importante.
Sadtong mga adlaw, indi mahapos ang pagpangita sa mga tulad-karnero nga mga tawo sa uma nga mga bahin sang Hot Springs. Kinahanglan ang lakas nga pagmaneho sa lunangon nga mga dalan, pagtabok sa mga sapa, kag paglakat sa yab-ukon nga mga dalan padulong sa nabaw-ing nga mga balay. Ginabaylo ko ang literatura sa Biblia sa mga prutas, ulutanon, manok, itlog, delata nga mga kalan-on, kag iban pa. Ginapakabahandi ko tubtob karon yadtong mga eksperiensia.
Mga Kabudlayan sa Tion sang mga Tuig sang Inaway
Sang magbuylog ang Estados Unidos sa Inaway Kalibutanon II sang 1941, lapnag ang pagpamatok sa mga Saksi ni Jehova bangod sang ila pagkawalay nadampigan. (Isaias 2:4) May mga grupo nga ginporma batok sa ila sa bug-os nga pungsod, kag linibolibo ka pamatan-on nga mga Saksi ang nabilanggo. Bisan pa nakabaton ako sing 4-D nga klasipikasyon subong isa ka ministro, mabaskog nga ginpamatokan ako, lakip ang pamahog sa akon kabuhi.
Nagataya sang iya pusil sa akon, ang isa ka tawo nagmando: “Halin ka sa akon propiedad antes ko ikaw maluthang.” Nakilal-an niya ako nga isa ka Saksi samtang nagapadulong ako sa iya balay. Indi na paghambalon pa, naghalin ako dayon. Nian ang isa ka tawo nga akon ginaton-an sing Biblia nagpaandam sa akon nga nabatian niya nga may isa ka tawo sa sidlangan sang banwa nga nagaplano sa pagpatay sa akon sang makalab-ot ako sa iya balay.
Pila ka bulan sang ulihi samtang didto ako sa sadto nga duog, gin-agda ako sang isa ka babayi kag ginpatokar ko ang plaka sang isa ka lektura sa Biblia ni Utod Rutherford. Samtang nagatokar ang plaka, nag-abot ang bana kag nagtindog sa ulot ko kag sang puerta, nga nagpaguwa sang iya kutsilyo. Ginpamangkot niya ako kon ano ang akon tuyo apang indi niya ako pagpahambalon. “Masaludo ka bala sa bandera ukon magbuylog sa armada?” pamangkot niya, samtang ginahana niya ang iya kutsilyo sa akon. Sa gilayon nadumduman ko ang paandam sang akon abyan kag nagpalibog kon ano ang akon isabat.
“Ano ang batyagon mo,” pamangkot ko sa nagauyat sing kutsilyo, “kon may magsumbong sa imo nga ginasakdag mo ang Nazismo?” May kaakig, nagpadayon ako: “Indi ako dampig kay Hitler subong mo man. Interesado lamang ako sa pagbulig sa mga tawo nga mahangpan ang Biblia.” Nagkalma ang tawo, kag nakalakat ako nga wala mahaliti. Sang makahalin ako, nagpasalamat ako kay Jehova sa iya pag-amlig kag sa pagbutang sa akon bibig sang husto nga mga tinaga.
Sa isa pa ka okasyon, nagapatokar ako sing narekord nga lektura tuhoy sa Biblia para sa isa ka tawo sang matalupangdan ko nga daw naglain ang iya hitsura. Ang iya nawong diretso, kag nagpalamuti sia. Apang nagpadayon sia sa pagpamati. Sang matapos na ang rekording, ginpamangkot ko sia kon naluyagan niya ini. Nagdulog sia kag nagsabat: “Pagdumdom ko sang primero mga Saksi ni Jehova ini, kag patyon ko gid ikaw kuntani.” Gindayaw ko sia sa pagpamati sa isa ka butang antes maghukom kag ginhatagan ko sia sing naimprinta nga sermon kag naglakat ako. Luyag ko kuntani ipakilala sa iya kon sin-o ako apang nakahalin na ako.
May bag-o nga kongregasyon nga gintukod sa Bonnerdale nga gindak-an ko. Sa tapos makaalagad subong alagad sang kompanya ukon kongregasyon sing duha ka tuig kag makita ang grupo nga nag-uswag tubtob sa 17 ka manugbantala, ginpangabay ako sang nagalakbay nga manugtatap nga magsaylo sa Hot Springs kag mag-alagad subong manugtatap sang kongregasyon. Ginhimo ko ini sang 1942. Ang pagpakig-upod sa hamtong kag may edad nga mga utod didto mapuslanon gid sa akon espirituwal nga pagtubo.
Sadto nga mga adlaw, gin-aman ni Jehova ang akon mga kinahanglanon sa madamo gid nga paagi. Isa ka bes wala ako sing inugbayad nga $5 para sa pagpabag-o sang akon lisensya sa awto. Ginpangamuyo ko ini kay Jehova kag nagguwa sa ministeryo. Sadto nga aga nakabaton ako sing donasyon nga eksakto gid nga $5!
Pag-alagad sa Bethel
Sang 1944 gin-asayn ako subong espesyal payunir sa Joliet, Illinois. Samtang didto ako, may artikulo nga nagguwa sa Informant (karon Our Kingdom Ministry) nahanungod sa pag-alagad sa Bethel sa Brooklyn, Nueva York. Namat-od ako nga mag-aplay kag nabaton ako.
Sang mag-abot ako sa Bethel sang Marso 1945, mga 230 lamang ang katapo sang pamilya sa pangkalibutan nga ulong-talatapan sa Brooklyn kon ipaanggid sa kapin sa 2,500 karon! Sa sulod sang lima ka tuig nalipay ako sa pagtrabaho sa nanuhaytuhay nga mga duog, lakip ang Departamento sang Serbisyo. Nian isa ka adlaw ginpatawag ako ni Utod Knorr nga presidente sang Sosiedad sa iya opisina.
“Napilian ikaw nga magdumala sang estasyon sang radyo sang Sosiedad nga WBBR,” siling niya. Indi ako makapati.
“Wala ako sing nahibal-an nahanungod sa pagdumala sing estasyon sang radyo,” siling ko.
“Indi bala nga nagakanta ka anay sa isa sang mga estasyon sang radyo?” pamangkot niya.
“Apang tuhay yadto sa pagdumala,” pamatok ko.
Ginpalig-on ako ni Utod Knorr nga batunon ang asaynment, kag nagsugot ako nga himuon ang akon labi nga masarangan. Isa gid yadto ka matuod nga hangkat apang isa man ka kalipay kag pribilehiyo. Kapin sa 90 ka katapo sang pamilya Bethel ang mangin sa nanuhaytuhay nga programa kada semana. Ang bag-o nga kahimusan amo nga mga 65 porsiento ang narekord nga musika, lakip ang 15 minutos nga programa sang pagkanta ko kada semana. Ang nabilin nga oras para sa mga lektura sa Biblia, mga pagtuon sa Biblia, pagsabat sing mga pamangkot sa Biblia, kag iban pa nga metodo sang pagpresentar sang impormasyon tuhoy sa Biblia, subong man mga balita kag impormasyon para sa kaayohan sang publiko.
Pagbawtismo sa Akon Amay
Sang magbakasyon ako gikan sa Bethel sang tig-ilinit sang 1950, naagom ko ang tumalagsahon nga kalipay sa pagbawtismo sa akon amay! Sa sulod sang 27 ka tuig ginabasa niya ang mga publikasyon sang Sosiedad, apang madamo nga tinuig ang nagligad antes niya ginbaton sing bug-os nga si Jehova nagagamit sing organisasyon nga paagi sa amo ginapaguwa Niya ang Iya mga kamatuoran. (Mateo 24:45-47) Sang isa ka tion, si Dad nangin ateista gid. Ngaa subong?
Bueno, sang ang akon 13 anyos nga utod nga si Jim napatay, ang klerigo nagwali nga makadto sia sa nagadabdab nga impierno bangod ang bata nga lalaki indi natungod sa simbahan. Nakibot sa sini si Dad. Sia nagpangatarungan: ‘Ngaa simbahon ko ang isa ka dios nga mapintas, nga manugpaantos?’ Nagdumdom sia nga ang ginsiling sang manugwali yara sa Biblia. Gani, nangin ateista sia. Apang ang iya pagtuo sa Dios napasag-uli sang, sa iya una nga pagpakighambal sa isa ka Estudyante sang Biblia (Saksi ni Jehova), ginkombinse sia pasad sa Biblia nga ang impierno indi isa ka duog sang pagpaantos kundi amo ang kinaandan nga lulubngan sang katawhan.
Pagpakasal
Sang 1952 nag-atubang ako sing isa pa gid ka desisyon. Si Jean Mylton, isa ka makugi nga payunir, kag ako namat-od nga magpakasal. May namangkot kay Jean kon ano ang iya mga plano para sa palaabuton, kag nagpaathag sia nga sanglit sadto nga tion wala pa sing kahimusan nga pasudlon ang asawa sa Bethel, mapayunir kami sa Little Rock, Arkansas. “Paano kamo makakadto didto samtang wala kamo sing bisan anong materyal nga butang?” pamangkot sang tawo.
Matuod, wala kami sing daku nga kuwarta, bangod yara ako sa bug-os tion nga pag-alagad sing 12 ka tuig kag si Jean 7 ka tuig. Nagpanugda ini nga tawo nga magtrabaho kami anay sing bug-os tion sing anum ka bulan agod “makabakal sing awto kag makasupot sing mga $600.” Sang ginpamangkot ako ni Jean nahanungod sini, nagsiling ako: “Paano naton mahibal-an nga mahimo naton ini—wala pa naton matilawi ini. Kon kinahanglan gid man, mauntat na lang kita sa ulihi kag magtrabaho sing bug-os tion, apang tilawan anay naton ini.”
Sa amon katingala, nakabaton kami sing regalo sa kasal nga isa ka awto kag eksakto nga $600. Nahibaloan ni Jehova nga kinahanglan namon ini, kag gin-aman niya ini bangod nagdesisyon kami nga magpabilin sa bug-os tion nga hilikuton. (Malaquias 3:10) Nagpayunir kami sing pila ka bulan, kag sang ulihi gin-agda ako sa hilikuton sa sirkito sang 1953, kag sang masunod nga tuig gin-agda kami sa Watchtower Bible School of Gilead. Pagkatapos sang gradwasyon gin-updan ako ni Jean sa hilikuton sa distrito sing duha ka tuig.
Pag-alagad sa Luwas kag Balik sa Bethel
Sang 1957 nagaalagad kami sa Pasco, Washington, sang gindala sang kartero ang special delivery nga sulat gikan sa The President’s Office. Nagguwa anay ako gikan sa miting antes mag-alagad sa latagon upod sa kauturan, kag nagsulod kami nga duha ni Jean sa isa ka hulot kag ginbuksan ang sulat. Ginaagda kami sa pagkadto sa Mexico, kag ginpangabay ako sa pag-alagad subong manugtatap sang sanga. Nakibot ako! Indi kami makahibalo maghambal sing Espanyol, kag diutay lang ang nahibaloan ko nahanungod sa hilikuton sa sanga. Apang nagsalig kami kay Jehova, kag kinahanglan gid namon ini. Ang latagon daku kag daku nga pag-organisar ang kinahanglanon, apang ang lokal nga kauturan handa kag ginpakamaayo ni Jehova ang hilikuton.
Sa tapos makaalagad sing pila ka tuig sa Mexico, ginhatagan ako liwat sing pribilehiyo nga mag-eskwela sa Gilead School sa Nueva York. Sang makagradwar ako, nakabaton kami ni Jean sing bag-o nga asaynment, sa hilikuton sa sirkito sa Guatemala. Si Jean may problema sa lawas, gani sang ulihi nagbalik kami sa Estados Unidos nga sa diin nagpadayon ako sa pag-alagad sa nagalakbay nga hilikuton. Sa pila ka tuig nakatudlo man ako sa tag-duha ka semana nga klase sang Kingdom Ministry School para sa mga gulang. Sang ulihi, nagbalik kami agod mag-alagad sa Bethel sa Brooklyn, kag yari kami sa sining ginpakamaayo sing labi nga duog kutob sadto.
Gani yari ako nga nagaedad sing 69 anyos, kag ginkalipayan ko ang madamo sang dibagay nga mga pribilehiyo sa bug-os tion nga pag-alagad sa kapin sa 45 ka tuig nga nagligad. Masiling ko nga si Jehova maayo kag ang iya mga pagpakamaayo bugana. Si Jean, ang akon matutom nga asawa sa sulod sang nagligad nga 34 ka tuig, nangin pinasahi gid nga pagpakamaayo sa akon. Nahibaloan ko nga mapakamaayo ni Jehova ang mga magamay subong man ang mga dalagku, kag ginaapresyar ko ang mga pagpakamaayo sa akon subong magamay. (Salmo 115:13) Desisyon ko kag handum nga magpadayon sa pag-alagad sa aton daku kag mahigugmaon nga Dios nga si Jehova sa bisan anong paagi nga iya itudlo, sa iya kadungganan kag kadayawan.
[Kapsion sa pahina 25]
“Ano ang batyagon mo,” pamangkot ko sa nagauyat sing kutsilyo, “kon may magsumbong sa imo nga ginasakdag mo ang Nazismo?”
[Laragway sa pahina 23]
Si Sam Friend sa tuo, sang maaga nga bahin sang iya karera sa musika
[Laragway sa pahina 24]
Pagtanyag sing The Watchtower sa kalye sa Hot Springs, Arkansas, sang 1942
[Laragway sa pahina 26]
Subong gin-asoy ni Samuel B. Friend
[Laragway sa pahina 26]
Si Sam Friend kag ang iya asawa nga si Jean karon