Pagpabilin nga Malapit sa Organisasyon sang Dios

PANUGIRON NI ROY A. RYAN

Sandhill, Missouri, ang nagakaigo nga ginhingalan sa sini, kay daw subong ini sang daku nga pukatod sang balas sa bulubungyudon nga minuro. Ining minuro sa krusing nahamtang mga lima ka kilometro nabagatnan sang Rutledge kag may mga walo ukon siam lamang ka pamalay, may simbahan sang Metodista, kag gamay nga pamandayan sing salsalon. Didto ako natawo sang Oktubre 25, 1900.

ANG akon amay amo ang panday sang salsalon sa minuro. Walay sapayan nga ang akon ginikanan malaka lang nagasimba, ginapakadto ako sang akon iloy sa simbahan sang Metodista agod magtambong sa ila Sunday school. Wala ko maluyagi ang ngalan nga Metodista, kay nagapati ako nga dapat tawgon ang tawo nga isa ka Cristiano; apang nagpatubo ako sing kauhaw sa kamatuoran sa Biblia kag interes sa kabuhi nga wala sing katapusan.

Sang mga 16 anyos ako, nagtrabaho ako sa riles sang Santa Fe. Isa sang mga International Bible Student (amo ang pagtawag sang mga Saksi ni Jehova sadto) nga nagahingalan kay Jim ang nagsulod sa trabaho, kag masami kami nga duha nagaupod sa pagtrabaho. Nagaistorya si Jim, kag nagapamati ako sa iya ginahambal tuhoy sa Biblia. Naluyagan ko ang iya ginahambal, gani nangabay ako nga maghulam sang isa sang iya mga libro.

Ginpahulam ako ni Jim sang una nga tomo sang Studies in the Scriptures, nga ginbalhag ni C. T. Russell sang International Bible Students Association. Sang gin-uli ko ini sa iya, ginpangabay ko sia nga kuhaan niya ako sing dugang pa nga mga tomo. Wala madugay sadto, naghalin si Jim sa trabaho, kag sang liwat ko sia nga makita didto sia sa kalye sa Rutledge, nga nagakuha sing mga order para sa malaragwayon nga libro nga Scenario of the Phopto-Drama of Creation. Sang ulihi gin-agda niya ako sa pagtambong sa miting sang grupo nga ginahiwat sa iya balay. Tagsa ka Domingo nagalakat ako sing mga lima ka kilometro pakadto sa Rutledge para sa miting.

Sang ginpakilala ang magasin nga Golden Age (karon Magmata!) sang 1919, luyag ko nga magsugod sa pagpakigbahin sa ministeryo sa latagon. Ako kag ang isa pa ka bag-o nga estudyante sa Biblia nagdesisyon sa pagpanagtag sini nga magasin sa mga ganhaan kag ganhaan. Daw ginhadlukan kami sa pagpalapit sa mga tawo sa amon nga lugar, gani nagsakay kami sa tren agod magkadto sa kaingod nga banwa. Sa amon pag-abot sang aga, nagbulagay kami kag nagpamalaybalay tubtob sang ugto, bisan pa wala kami mahanas sa sini nga hilikuton. Nakatigayon ako sing order para sa duha ka suskripsion, ang isa gikan sa kaupod ko sa trabaho.

Sang Oktubre 10, 1920, ginbawtismuhan ako sa isa ka sapa malapit sa Rutledge. Ang akon mga ginikanan indi ugyon sa akon pagpakig-angot sa mga International Bible Student. Ini bangod sang mabaskog nga pagpamatok sang mga klero nga naeksperiensiahan sang mga Bible Student sang panahon sang inaway sang mga 1914-18. Apang sang ulihi, ang akon amay nagsugod sa pagtambong sa mga miting sang mga Bible Student, kag nagabasa naman siya sang The Golden Age. Antes sia mapatay, ang akon iloy nag-ugyon naman sa amon paghangop sa kamatuoran sang Biblia. Apang wala sang bisan isa sa amon pamilya ang nagsulod sa kamatuoran.

Tion sang Pagtilaw

Sadtong tion, may yara lamang tatlo luwas sa akon nga tayuyon nga nagtambong sa mga miting sa pagtuon sa Biblia sa Rutledge. Apang sang ulihi nagbiya sa organisasyon ining tatlo. Ang isa maayo magpamulongpulong, kag sia ang nagahatag sing mga pamulongpulong publiko sa amon duog. Apang nangin bugalon sia tungod sang iya ikasarang kag ginbatyag niya nga manubo para sa iya pagkatawo ang pagbantala sa balay kag balay nga ginhimo sang una nga mga Cristiano.​—⁠Binuhatan 5:​42; 20:⁠20.

Sang magdulog ining tatlo sa pagpakig-angot sa mga International Bible Student, nadumduman ko nga nagbatyag ako katulad ni apostol Pedro sang tion nga si Jesus naghambal sa katawhan tuhoy sa ‘pagkaon sang iya unod kag dugo.’ Nasandad sa iya panudlo, madamo sa ila sadto ang nagbiya sa iya. Sa amo ginpamangkot ni Jesus ang mga apostoles: “Indi kamo luyag nga maghalin indi bala?” Nagsabat si Pedro: “Ginuo, sa kay sin-o kami magakadto? Yara sa imo ang pulong sang kabuhi nga walay katapusan.”​—⁠Juan 6:​67, 68.

Bisan pa wala lubos mahangpan ni Pedro kon ano ang buot silingon ni Jesus sa ‘pagkaon sang iya unod kag pag-inom sang iya dugo,’ ginkilala niya nga si Jesus may pulong sang kabuhi nga wala sing katapusan. Amo sini ang akon nabatyagan tuhoy sa organisasyon. Yari diri ang kamatuoran bisan pa nga indi ko kon kaisa mahangpan ang tanan nga mabasa ko sa mga publikasyon. Apang sa kon ano ang indi ko nga mahangpan wala ako nagareklamo batok sa sini. Sang ulihi nangin maathag ang mga bagay, ukon gintadlong ang mga paghangop. Nalipay gid ako bangod nga mapailubon ako nga naghulat para sa kaathagan.​—⁠Hulubaton 4:⁠18.

Mga Pagpasibu Agod Makapayunir

Sang Hulyo 1924, nagtambong ako sa internasyonal nga kombension sa Columbus, Ohio. Ginalaragway yadto sang The Golden Age subong ang “pinakadaku nga kombension sang mga Bible Student nga ginhiwat sadtong panahon.” Didto ang makapahulag nga resolusyon nga “Indictment” ginbaton. Ang akon natigayon nga impormasyon kag ang espiritu sa amo nga kombension nagpabakod sa akon nga mangin isa ka bug-os tion nga ministro ukon payunir.

Pagbalik ko gikan sa kombension, naghalin ako sa akon trabaho sa riles, kag ako kag ang kaupod nga Bible Student nagsugod sa pag-alagad subong payunir. Walay sapayan, pagkatapos sang isa ka tuig, nagbalatian ang akon mga ginikanan kag nagkinahanglan sila sang akon bulig. Nag-untat ako sa pagpayunir kag nagtrabaho sa isa ka kompanya sang tubo, apang sanglit ang mga nagaulubra didto indi maayo nga impluwensia, naghalin ako sa trabaho kag nagnegosyo sing pagsagod sing putyukan kag pagbaligya sing dugos sini.

Sang tigragas sang 1933, napatay ang akon mga ginikanan, nga naghilway sa akon sa mga obligasyon. Gani sang tigpamulak sang 1934, ginhatag ko ang akon negosyo sang putyukan sa isa ka tawo, kag naghimo ako sang isa ka gamay nga trailer agod maistaran, kag nasugod liwat sa bug-os tion nga pag-alagad subong payunir. Sa una nagpanghikot ako upod sa isa ka may edad nga Saksi sa lugar malapit sa Quincy, Illinois. Kag sang ulihi nagbalik ako sa Missouri, sa diin nagpakig-upod ako sa isa ka grupo sang mga payunir.

Sang 1935 may sobra nga tigpalamangag sa Natung-an nga Nakatundan, kag sanglit nagapanghikot kami sa isa ka duog nga panguma lang ang palangabuhian, binudlayan gid kami. Wala sing kuwarta ang kalabanan, gani masami nga ginabayluhan sang mga maalwan nga tawo sing pagkaon ukon sang bisan ano nga pagkabutang ang ginabilin namon nga mga literatura.

Pagpayunir sa Nabagatnan

Sadto nga tigtulugnaw nagsaylo kami sa Arkansas agod magpalagyo sa matugnaw nga panahon. Nakapanagtag kami sing madamo nga literatura sa amo nga duog kag nakabaton kami sing madamo nga delata nga magamit namon. Pirme namon ginbaton ang mga butang nga sarang namon mabaligya, subong sang mga kagamitan nga himo sa aluminum, daan nga mga saway, daan nga mga radiator sang salakyan kag mga baterya. Ginabakal namon ini sing gasolina nga magamit namon sa akon Model A Ford nga salakyan nga amo ang ginagamit namon sa pagministeryo.

Nag-alagad man kami sa mga distrito sang Newton, Searcy, kag Carroll sa mabulubukid nga Ozark Plateau. Kon isulat ang mga naeksperiensiahan namon sa amon pagbantala sa mga taga-bukid nga mga tawo sang Arkansas, sarang ini makahuman sing isa ka libro. Tungod wala pa sing maayo nga mga dalan sadto, nagalakat kami sa laban nga tion sang amon nga pagbantala. Ang iban nga mga payunir sa amon grupo nagasakay sa kabayo agod malab-ot ang mga tawo sa naibabaw pa gid nga bahin sang bukid.

Isa ka bes, nakabati kami nga may isa ka interesado nga tawo nga nagahingalan kay Sam, kag sang ulihi nasapwan namon nga nagaistar sia sa ibabaw gid nga bahin sang bukid. Mainit kag malipayon nga gin-abiabi niya kami kag gin-agda nga magpalipas sang gab-i sa iya balay. Bisan pa indi interesado ang iya asawa sa amon mensahe, interesado gid ang iya 16-anyos nga anak nga lalaki nga si Rex. Sang maghalin kami, gin-agda kami ni Sam nga magbalik. Gani duha ka semana sadto, liwat kami nga nagpalipas sang gab-i sa ila.

Sang ikaduha nga tion sang amon paghalin, ang asawa na ni Sam ang nag-agda sa amon nga magbalik. Nagsiling sia nga maayo gid kami nga impluwensia kay Rex. “Kapalamuyayaw gid sina nga bata,” paathag niya, “apang wala na sia nagapamuyayaw sang yari kamo diri.” Mga tuig ang ulihi nagkitaay kami liwat ni Rex sang magsulod sia sa Gil­ead Mis­sionary ­School sa ­South Lansing, Nueva York. Ti ang mga eksperiensia kaangay sini naghatag sa akon sang daku nga kaayawan sa bug-os nga mga tinuig.

Pag-alagad sa Bethel

Sang mag-aplay ako sa pagpayunir, nag-aplay man ako sa pag-alagad sa ulong talatapan sang mga Saksi ni Jehova sa Nueva York, nga ginatawag Bethel. Sang tigpamulak sang 1935, ginpahibalo ako nga ginbaton ang akon aplikasyon kag kinahanglan nga magreport ako sa Kingdom Farm sang Watchtower Society sa South Lansing, Nueva York, agod sugdan ang akon pag-alagad sa Bethel. Sa gilayon naghimo ako sang kahimusan nga may isa ka utod nga magbulos sa trailer nga akon gingamit sa pagpayunir.

Nagbiyahe ako pakadto sa Nueva York sakay sa akon Model A Ford nga salakyan, kag mga alas diyes y media sang aga sang Mayo 3, 1935, nag-abot ako. Mga ala una sadto nga hapon, ginpabis-ak ako sing mga kahoy. Sa sunod nga adlaw ginsilingan ako nga magreport sa dairy ban agod magbulig sa pagkuha sing gatas sa mga baka. Nagtrabaho ako sa pagatasan mga pila man ka tuig, kon kis-a nagapanggatas kami kon aga kag gab-i kag nagatrabaho upod sa grupo nga nagaobra sa talamnan sa adlaw. Ako man ang nagtatap sang mga putyukan kag nagakuha sing mga dugos para sa pamilya Bethel. Sang 1953, ginsaylo ako sa departamento nga hilimuan sing keso.

Ang isa nga nagtandog sang akon kabuhi bangod sang iya talalupangdon nga huwaran sang pagkamapainubuson, katutom, kag pagkamatinumanon kay Jehova amo si Walter John “Pappy” ­Thorn. Isa sia sa 21 ka Bi­ble Stu­dent nga gintangdo subong mga peregrino sang 1894​—⁠mga tawo nga nag-alagad sa hilikuton kaangay sang mga alagad sa sirkito karon⁠—​nagaduaw sa mga kongregasyon agod palig-unon ang mga ini. Pagkatapos sang madamo nga tuig sa paglakbay nga hilikuton, si Utod Thorn nag-abot sa Kingdom Farm kag nagtrabaho sa poltri. Sa madamo nga tion nabatian ko sia nga nagasiling: “Sa tagsa ka tion nga ginapadaku ko ang akon kaugalingon, nagapahigad ako kag nagasiling sa akon kaugalingon: ‘Ikaw nga isa lamang ka yab-ok. Ano ang ginapabugal mo?’ ”

Ang isa pa ka mapainubuson nga tawo nga nangin modelo para sa akon amo si John ­Booth, nga karon isa na ka miembro sang nagadumala nga hubon sang mga Saksi ni Jehova. Sa madugay na nga mga tuig masami sia nagakutlo nga nagasiling: “Indi importante kon daw ano ka daku ang imo naalagad kundi kon sin-o ang imo ginaalagad.” Isa ka simple nga pinamulong apang daw ano ka matuod! Ang pag-alagad kay Jehova amo ang pinakadaku sa tanan nga pribilehiyo!

Ang pinakatalalupangdon nga bahin sang akon pag-alagad sa Bethel amo ang pagbukas sang eskwelahan sa pagmisyonero sa Gilead sa Kingdom Farm sang 1943. Ang pagpakig-upod sa mga payunir halin sa madamo nga bahin sang duta makakulunyag gid. Sadto may yara mga isa ka gatos ka mga estudyante sa tagsa ka klase, gani sa tagsa ka anom ka bulan ginatos ka mga bag-uhan ang nagaabot sa Kingdom Farm. Ang adlaw sang gradwasyon nagaganyat sa linibo ka tawo padulong sa sini nga edukasyonal nga pasilidad sa nauma nga bahin sang Nueva York.

Pagbag-o sang Trabaho

Sang ginsaylo ang Gilead School sa Brooklyn kag ginbaligya ang pinakadaku nga dormitoryo kag hulot buluthuan sa South Lansing, ang pagatasan ginsaylo sa Watchtower Farms sa Wallkill, Nueva York. Gani sang tigragas sang 1969, ginsaylo ako sa Farm sa Wallkill kag nagpadayon sa paghimo sing keso tubtob sang 1983. Dayon ginhatagan ako sing bag-o nga trabaho, kag nagsugod ako sa pagtrabaho sa land­scaping.

Sang gin-interbyu ako sang nagligad, ginpamangkot ako kon ano ang ginabatyag ko bangod nga ginhatagan ako sing bag-o nga trabaho pagkatapos sang 30 ka tuig sa paghimo sing keso. “Wala ini nagatublag sa akon,” prangka nga sabat ko, “kay sa pagkamatuod wala ko maluyagi ang pagpanghimo sing keso.” Ang punto amo nga agod mahimo kita mangin malipayon sa pag-alagad kay Jehova sa bisan ano man nga mga asaynment kon huptan naton ang maayo nga pagtamod kag mapainubuson nga nagapaidalom sa teokratiko nga panuytoy. Gani bisan pa nga wala ko maluyagi ang paghimo sing keso, nalipay ako sa akon asaynment bangod nakabulig ini sa pamilya Bethel. Kon ginaalagad naton ang aton dakung Dios, nga si Jehova, sing matutom kag wala sing pagyamo, mangin malipayon kita walay sapayan kon ano ang aton asaynment.

Sa akon ulihi nga mga tuig, ginhunahuna ko nga wala ako sing matigayon nga mas maayo pa nga kahimtangan sang sa pag-alagad sa Bethel. Gintatap ako sing maayo kag nakapadayon sa paghimo sang akon mga hilikuton bisan pa 90 anyos na ako. Sa madamo na nga tuig karon, nakatigayon ako sing pribilehiyo sa pagpanguna sa programa sang pang-aga nga pagsimba para sa pamilya Bethel diri sa Watchtower Farm. Kon may kahigayunan ako, ginapalig-on ko ang mga bag-uhan sa Bethel nga himuslan ang pribilehiyo sang pag-alagad nga ginahatag sa ila kag magtuon nga mangin kontento kag magkalipay sa sini.

Sa nagligad nga mga tuig, makapila ako nakaduaw sa iban nga mga duog​—⁠sa India, Nepal, Asia, kag Europa. Ang masunod nga laygay mahimo makabulig sa sadtong yara sa ila kaugalingon nga mga kongregasyon sang mga katawhan ni Jehova sa bug-os nga duta: Magkalipay kag mangin kontento sa inyo presente nga kahimtangan kag magtubo sa espirituwal nga paagi sa duta nga sa diin ikaw natanom.

Ginpili ko nga magpabilin nga diminyo, sanglit nagpaposible ini sa akon nga makapadayon nga wala sing tublag sa pag-alagad sa Dios. Subong padya sa pagkatutom, ang aton Dios naghatag sa akon sing paglaum sa kabuhi nga wala sing katapusan. Para sa madamo, nagakahulugan ini sing kabuhi nga wala sing katapusan sa katulad paraiso nga puluy-an diri sa duta. Ang iban sa amon nagalaum sa kabuhi nga wala sing katapusan sa mga langit, kag magatatap sang kon ano man nga asaynment ang ihatag sa amon.

Mahimo nga maghunahuna ang iban nga ang akon 90 ka tuig nga kabuhi malawig na, kag puno sing manggad nga kabuhi. Ang akon kabuhi nangin manggaranon apang indi malawig. Paagi sa pagpabilin nga malapit sa organisasyon sang Dios kag sa iya pulong sang kamatuoran, mahimo pa naton palawigon ang aton kabuhi tubtob sa walay katubtuban.a

[Footnote]

[Retrato ni Roy A. Ryan sa pahina 24]

[Laragway sa pahina 26]

Si Utod Ryan sang bataon pa sia sa tupad sang Model T Ford