“Sunda ang Iya mga Tikang sing Maayo”—Paano?
“INDI gid ako mangin himpit subong ni Jesus, bisan anhon ko ka pangamuyo ukon bisan anhon ko ka tinguha sing lakas.” Sa ginpamangkot sang U.S. Catholic, 89 porsiento ang nag-ugyon sa sina nga ginhambal. Sa pagkamatuod, ang handum nga maglakat suno sa mga tikang ni Cristo daw indi masarangan—labi na kon binagbinagon mo ang laragway ni Cristo nga ginapakita sang mga iglesia. Ang isa ka Katoliko nga tawo nagsiling: “Sa kabilogan, ginahunahuna ko nga si Jesus masinadyahon, mahigugmaon, mainulikdon kag indi estrikto nga tawo nga wala nagapaabot sing kapin sa akon. Apang kon magkadto ako sa simbahan, si Jesus ginasimba amo kon ngaa indi ako mapahamtang kag ginapaubos ako sang akon mga dikahimpitan.”
Apang, ang mga rekord sang Ebanghelyo, wala ‘nagasimba’ kay Cristo. Ginapakita sini nga si Jesus wala matawo gikan sa mga aristokrata kundi sa isa ka klase sang pamilya nga nagapangabudlay. Ang iya amay nga si Jose nga nag-adoptar sa iya isa anay ka panday. Bisan pa diutay lamang ang nahibaloan tuhoy sa pagkabata ni Jesus, ang isa ka hitabo makapahayag. Sang 12 anyos si Jesus, ginpaupod sia sang iya mga ginikanan sa ila tuigan nga pagduaw sa Jerusalem para sa Paskuwa. Sa sini nga okasyon nawili sia sa isa ka Makasulatanhon nga paghambalanay, kag ang iya pamilya naglakat nga wala sia. Nakit-an sia sang nabalaka nga sanday Jose kag Maria pagligad sang tatlo ka adlaw sa templo, “nga nagalingkod sa tunga sang mga manunudlo, nga nagapamati sa ila kag nagapamangkot sa ila.” Dugang pa, “ang tanan nga nakabati sa iya naurungan sa iya paghangop kag sa iya mga sabat.” Hunahunaa lamang, sa iya edad nga 12 anyos lamang indi lamang nga makapamangkot sia sing makapahunahuna kag espirituwal nga mga pamangkot kundi makahatag man sia sing maalamon nga mga sabat. Sa wala sing duhaduha nabuligan sia sang paghanas sang iya mga ginikanan!—Lucas 2:41-50.
Kon ikaw isa ka pamatan-on, posible bala nga masunod mo ang huwaran ni Jesus? Huo, sa pagkamatuod! Kay si Cristo nagbilin sa inyo sing “sulundan agod nga pagsundon ninyo ang iya mga tikang.”—1 Pedro 2:12.
Ang pagkapamatan-on isa ka maayong tion sa pagtigayon sing sadsaran nga ihibalo tuhoy sa Dios kag sa iya Pulong. Matuod, ang iban nga inyo kilala mahimo nga nagauyang sing tion sa komiks kag sa TV. Apang, ngaa indi sundon, sa baylo ang mga tikang ni Jesus, nga sang bata pa sia nalipay sa pagtuon nahanungod kay Jehova? Bangod sang iya gugma sa espirituwal nga mga butang, “si Jesus nag-uswag sa kaalam.” (Lucas 2:52) Gani auo man ikaw.
Sa pag-ilustrar: Sa isa ka eskwelahan sa Bagatnan nga Aprika, ang isa ka manunudlo ginpamangkot kon bala mapamatod-an niya nga ang Biblia matuod. Nagtu-ad sia nga indi niya mapamatod-an. Ang isa ka bata nga lalaki nga isa sang mga Saksi ni Jehova masidla nga nagsiling: “Mapamatod-an ko nga ang Biblia matuod!” Paano? Gindumdom niya ang impormasyon nga iya naton-an sa bag-o nga guwa sang Ang Lalantawan. Gani sa tapos makatigayon sing permiso sa paghambal, ginpaathag niya ang kahulugan sang tagna nga narekord sa Daniel kapitulo 2. Natingala ang klase samtang ginapakita niya kon paano gintagna ang pagbangon kag ang pagkapukan sang pasunod nga pangulohan sang kalibutan kag ang ila kalaglagan paagi sa Ginharian sang Dios. Nagsunod ang isa ka maayong paghambalanay nga sa sini nakatigayon sia sing kahigayunan nga sabton ang madamo nga pamangkot.
Pagkari sa Paghimo sang Kabubut-on sang Dios
Ang sadsaran nga ihibalo kag paghangop sa Biblia nga ginpahamtang ni Jesus sang pamatan-on pa sia nagpahulag sa iya sang ulihi sa paghimo sing serioso nga tikang. “Nag-abot si Jesus . . . kay Juan sa Jordan, agod magpabawtismo sa iya.” Karon na ang sibu nga tion agod abagahon niya ang iya mga salabton subong ministro sang Dios. Ang bawtismo nagkahulugan sing pagpresentar sang iya kaugalingon sa paghimo sang kabubut-on sang Dios.—Mateo 3:13-15.
Ang mga Cristiano ginaobligar man nga ilugon si Cristo paagi sa pagpabawtismo. Ang bawtismo isa ka balaan nga simbulo, isa ka naguwa nga tanda sang pagdedikar. Kon magsugot kita sa pagtrabaho para sa isa ka tawo ukon kompanya, ginapat-od anay naton ang mga kinahanglanon kag mga kondisyon kag sa masami ginasundan ini sang pagpirma sing kontrata. Apang kon wala sing pirma, ang kontrata wala sing gahom. Gani amo man sa bawtismo—ginahimo sini ang aton dedikasyon sa Dios nga malig-on. Sa isa ka kahulugan, kaangay ni Jesus kita nagasiling: ‘Yari karon! Nagkari ako sa paghimo sang imo kabubut-on, O Dios.’ (Hebreo 10:7) Sa amo nangin mga alagad kita sang Dios, iya mga ministro!—2 Corinto 3:5, 6.
Sa pagkamatuod, kaangay ni Jesus, dapat anay ikaw makatigayon sing sadsaran nga ihibalo tuhoy sa Dios. Apang makabulig sa imo ang mga Saksi ni Jehova—kag sa imo kabataan—sa paghimo sini paagi sa isa ka sistematiko nga pagtuon sa Biblia.
Pag-una sa Ministeryo
Sa tapos makapabawtismo, si Jesus nagpuasa, nagpamalandong, kag nangamuyo sa sulod sang isa ka tion. Wala sing duhaduha nga ginhanda sini sia para sa pagsulay nga iya masunod nga nasumalang. Gintanyag sa iya ni Satanas nga Yawa ang paggahom “sa tanan nga ginharian sang kalibutan.” Daw ano kuntani nga karera ang natigayon ni Jesus kon ginbaton niya ang tanyag sang Yawa! Apang, narealisar ni Cristo nga yadto nga karera indi magdugay. Sa gilayon ginsikway niya ang Yawa kag sa baylo “nagsugod sa pagbantala kag nagasiling: ‘Maghinulsol kamo, kay ang Ginharian sang mga langit malapit na.’” (Mateo 4:2, 8-10, 17) Tubtob sa nabilin sang iya kabuhi sa duta, si Cristo isa ka bug-os tion nga ministro sang Ginharian sang Dios.
Amo man sa karon, indi pagtugutan sang Cristiano ang kalibutan ni Satanas nga ganyaton sia nga himuon ang mataas sing sweldo nga trabaho kag ang mga karera nga iya katuyoan sa kabuhi. Ti, sang gintawag niya ang iya unang mga disipulo, “sa gilayon nagbiya sila sang ila mga pukot kag nagsunod sa iya.” (Marcos 1:17-21) Busa, maalamon bala nga masarawid sa lawa sang kalibutanon nga mga paghimud-os? Ginasugo karon ni Jesus ang iya mga sumulunod nga ‘ibantala ang maayong balita sang ginharian.’ (Mateo 24:14) Matuod, mahimo nga may pamilya ikaw ukon iban pa nga salabton nga talatapon. Busa madamo nga Saksi ni Jehova ang nagagamit sang mga gab-i kag mga talipuspusan sang semana sa pagtuman sang ila Cristianong salabton sa pagbantala. Ang iban nakahimo pa gani sini sing bug-os tion!
Ang isa ka pamatan-on nga lalaki sa Bagatnan nga Aprika nagplano sa pag-eskwela sa unibersidad. Apang, sa tapos masimbulohan ang iya dedikasyon kay Jehova paagi sa bawtismo, ginbatyag niya ang obligasyon nga magsulod sa bug-os tion nga ministeryo. Ang iya amay, nga indi Saksi, wala magsugot sang primero. Apang sa tapos sang malawig nga paghambalanay, nagsugot sia sang ulihi sa pag-alagad sang iya anak sa sanga talatapan sang mga Saksi ni Jehova sa Bagatnan nga Aprika.
Sa tapos sang siam ka makalilipay nga tuig, nangasawa sia kag nagsulod sa bug-os tion nga pagbantala nga hilikuton upod sa iya asawa. Sang ulihi nagbata sila. Walay sapayan, nangamuyo sila kay Jehova nga buligan sila sa pagpadayon subong bug-os tion nga mga ministro. Gindumdom nila ang saad ni Jesus nga kon unahon sang isa ang Ginharian sang Dios, “ining tanan iban pa nga butang [materyal nga mga kinahanglanon] idugang sa inyo.” (Mateo 6:33) Nagmatuod ini. “Nagkabuhi kami sing makinuton sa sulod sang mga tinuig,” siling sang amay, “apang nahatagan namon ang amon anak nga babayi sing maaliwanay nga puluy-an kag sang iya tanan nga materyal nga kinahanglanon.”
“Malolo kag Mapainubuson sa Tagipusuon”
“Kari sa akon, tanan kamo nga ginabudlayan kag ginabug-atan,” siling ni Jesus, “kag papahuwayon ko kamo. Itakod ang akon gota sa inyo kag magtuon kamo sa akon, kay malolo ako kag mapainubuson sa tagipusuon, kag makakita kamo sing kapahuwayan sa inyo mga kalag. Kay ang akon gota mahulas kag ang akon lulan mamag-an.”—Mateo 11:28-30.
Sang maghimo sing mga milagro, subong sang pagpaguwa sa mga demonyo, wala ginbaton ni Jesus ang kadungganan sa iya kaugalingon kundi dayag nga ginbaton niya nga nahimo niya yadtong mga butang “paagi sa espiritu sang Dios.” (Mateo 12:28) Kag bisan pa nakuha niya ang igtalupangod sang tumalambong sa isa ka paagi nga “sila natingala sa iya paagi sang pagpanudlo,” wala niya pagtinguhaa ang himaya para sa iya kaugalingon. (Lucas 4:32) Sa baylo, sia nagsiling: “Ang akon ginatudlo indi akon, kundi iya sang nagpadala sa akon.”—Juan 7:16.
Ang matuod nga mga Cristiano karon nagatinguha sa pagpakita sing pareho nga pagkamapainubuson. Halimbawa, kon nagapanudlo sa iban, wala nila ginaganyat ang igtalupangod sa ila kaugalingon. Sa baylo, maabtik sila sa paghatag sing kadungganan kay Jehova kag sa iya organisasyon sa bisan anong ikasarang nila sa pagpaalinton sang mensahe sang Pulong sang Dios. “Ano bala ang imo nga wala mo mabaton?” pamangkot ni apostol Pablo.—1 Corinto 4:7
Ginpakita man ni Jesus ang iya pagkamapainubuson sa iya kahanda sa paglakbay sang linibo ka milya, indi paagi sa kangga, kundi sa paglakat subong isa ka nagalakbay nga manugbantala. Sang isa ka okasyon lapyo gid sia kag ang iya mga disipulo nga kinahanglan sila “magpahuway sing diutay.” Apang sang mag-abot ang isa ka dakung kadam-an nga gutom sa espirituwal nga pagpalig-on, nalipatan ni Jesus ang iya kalapyo kag “nagsugod sa pagpanudlo sa ila sing madamo nga butang.”—Marcos 6:31-34.
Sa Lesotho, Aprika, ang isa ka nagalakbay nga ministro sang mga Saksi ni Jehova (ginatawag manugtatap sa sirkito) kag ang iya duha ka kaupod nagpakita kasan-o lang sing kaanggid nga espiritu. Naglakat sila sing 22 ka oras latas sa kabukiran agod duawon ang pila ka kaupod nga mga Cristiano sa naligwin nga duog. Kinapoy sa paglakat, namat-od ang manugtatap sa sirkito nga magpahuway sang masunod nga adlaw. Apang may nag-abot nga kadam-an agod tamyawon sia kag mamangkot sa iya nga, bisan pa kapoy sia, nagbangon sia kag gintudloan sila nahanungod sa maayong balita sang Ginharian. Makapalig-on ang reaksion nga ginpakita sa bagay nga ang kapoy nga mga manuglakbay nagbatyag nga ginpadyaan ang ila mga panikasog.
Iloga Sia!
Ginapalig-on kita ni apostol Pablo nga ‘tulukon sing hanuot ang Pangulo nga Ahente kag Manughimpit sang aton pagtuo, si Jesus.’ (Hebreo 12:2) Mahimo naton ini paagi sa regular nga pagbasa sang rekord sang Ebanghelyo kag pagpamalandong sang mga paagi nga mailog naton si Cristo. Halimbawa, si Jesus nagpakita sing kaisog sang ginpakamalaut niya ang pagkasalimpapaw kag ang pagpakamatarong sa kaugalingon sang relihioso nga mga lider, bisan pa nahibaloan niya nga may dumot sila sa iya kag nagahandum sa pagpatay sa iya. (Mateo 23:1-36; 26:3, 4) Nagpabilin sia nga kalma kag ginapunggan ang kaugalingon sa idalom sang pag-atake. (1 Pedro 2:23) Sa iya pagpanudlo, nagpakita sia sing paghangop sa kinaugali sang tawo kag sing ikasarang sa pagpabutyag sing madalom nga mga kamatuoran sa simple nga hambal.
Apang ang labing talalupangdon nga dulot ni Jesus amo ang iya gugma. “Wala sing tawo nga may gugma nga daku pa sa sini, nga ihatag sang isa ka tawo ang iya kalag tungod sa iya mga abyan.” (Juan 15:13) Gindugangan pa niya sing bag-o nga kahulugan ang tinaga nga gugma paagi sa pagsugo sa aton nga higugmaon ang aton mga kaaway.—Mateo 5:43-48.
Daw ano ka supremo nga sulundan si Jesus para sa aton! Indi mahapos ang pag-ilog sa iya, kag mahimo nga masandad kita sa tion kag tion. Apang indi gid kita mag-untat. (Galacia 6:9) Kay minilyon na ang nagmadinalag-on sa pagsunod kay Jesus. Ti, ang tawo nga nagdala sa imo sining magasin wala sing duhaduha nga lakip sa ila, kag malipay gid sila sa pagbulig man sa imo nga sundon ang mga tikang ni Jesus—SING MAAYO!
[Blurb sa pahina 5]
Bisan sang bata pa, nagpakita si Jesus sing daku nga interes sa espirituwal nga mga butang. Ginailog mo bala sia sa sini?
[Blurb sa pahina 6]
Ginsikway ni Cristo ang kalibutanon nga karera pabor sa ministeryo