“Higugmaa ang Imo Isigkatawo”—Ano ang Labing Praktikal nga Paagi?

KON makita mo ang imo isigkatawo nga nagakinahanglan sing bulig, ano ang imo ginabatyag? Halimbawa, ano ang ginapahimo sa imo sang laragway sang nagakagutman nga kabataan? ‘Naluoy ako sa ila,’ isiling mo, ‘kag luyag ko magbulig sa ila.’ Ang daku nga kantidad sang kuwarta nga ginaamot kada tuig sa mga organisasyon sang buhat sa kaluoy kag mga ahensya sa pagtabang nagapakita nga madamo nga tawo ang subong man sina.

Dalayawon inang maayong mga buhat para sa kaayohan sang nagapamigado nga katawhan, labi na bangod sang sugo ni Jesus nga higugmaon ang aton isigkatawo subong sang aton kaugalingon. (Mateo 19:19) Madamo sang sinsero nga mga tawo ang nagapati nga ang labing praktikal nga paagi sa pagpakita sang ila gugma sa isigkatawo amo ang pagpatindog kag pagsakdag sa mga ospital kag mga eskwelahan, paagi sa pag-amot para sa maayong mga kausa, kag paagi sa pagpakigbahin sa nanuhaytuhay nga hilikuton para sa paghililuong. ‘Amo sina ang Cristianismo,’ mahimo isiling nila, ayhan magadugang, kon nagapakighambal sa mga Saksi ni Jehova, ‘sa pagkamatuod mas praktikal ina sang sa paghinguyang ninyo sing tion kag kusog sa pagbantala sa balay kag balay nahanungod sa inyo relihion.’

Apang amo bala? Paano naton mahigugma ang aton isigkatawo sa labing praktikal nga paagi kag para sa iya labing daku nga kaayohan?

Ano ang Mahimo sang Imo Kuwarta?

Ang mga donor para sa mapuslanon nga mga kausa may rason nga mamangkot: ‘Pila sang akon iamot ang direkta nga makabulig sa mga tawo nga gintigan-an sini?’ Ang pag-imbestigar sang 1978 sang 15 ka nagapanguna nga organisasyon sa buhat sa kaluoy sa Republika Pederal sang Alemanya, halimbawa, nagpahayag nga sa sadto nga tion ang gasto sa pagdumala kag gasto sa pagpanagtag nakagamit na sang mga 42 porsiento sang bug-os nga kita sang mga organisasyon.

Sang gin-usisa sang mga opisyales sang telebisyon ang deposito nga kuwarta sang anum ka “gin-adoptar nga kabataan” sa Bo­liv­ia, natukiban nila nga 6 pa 15 porsiento lamang sang bug-os nga kantidad nga gin-amot sang ila “manug-adoptar nga mga ginikanan” sa Republika Pederal sang Alemanya ang ginbutang sa kuwenta sa banko sang kabataan. Apang, ginpanghiwala sang babayi nga humalambal para sa organisasyon ang sumbong nga pangdaya, nga nagapaathag nga ang mga donor maathag nga ginsingganan nga ang matigayon sang kabataan mga un-tersia lamang sang mga amot sang ila “mga ginikanan”. Ang nabilin, sa tapos mabayaran ang kabilihanan sa pagdumala, suno sa report gamiton para sa edukasyon kag medisina.

Sa pagkamatuod, indi lipod ang mga halimbawa sang inabusuhan nga mga buhat sa kaluoy. Matuod ini sa mga bulig nga gintuyo para sa tiggulutom kasan-o lang sa Aprika. Sa Etiopia, bangod sang politikal nga mga problema daku nga bahin sang kalan-on ang indi makalab-ot sa mga nagakinahanglan sini, kag sa pila ka kaso ang donasyon nga mga kalan-on ginabaligya suno sa report—sa mataas nga bili—sa baylo nga ipanghatag nga wala sing bayad.

Ang publikasyon ni Carl Bakal nga Charity U.S.A. nagapaandam: “Kon dungganon ang kausa, wala gid ginaduhaduhaan kon paano ginagasto ang kuwarta. Indi ko luyag nga mag-untat ang mga tawo sa paghatag. Sa hunahuna ko dapat nga sabton ang mga pamangkot bangod nagapanghatag sila nga bulag ang ila mga mata.” Maathag nga ang bulag nga paghatag indi maalamon kag indi gid matamod nga praktikal.

Pagsunod sa Huwaran nga Ginpahamtang ni Jesus

Sa pagkamatuod, makapasubo ini nga mga kamatuoran, apang bangod sini makatarunganon bala nga indi pagsakdagon ang mapuslanon nga mga kausa? Gin-ayo ni Jesus ang mga masakiton kag milagruso nga ginpakaon ang mga gutom, paagi sa amo nagpahamtang sing sulundan para sa mga Cristiano karon?

Matuod nga si Jesus napahulag sang kaluoy sang makita niya ang katawhan nga nagakinahanglan. Walo ka teksto sa Biblia ang nagasambit sini. Ang duha nagapatuhoy sa pagkinahanglan sang katawhan sing kalan-on (Mateo 15:32; Marcos 8:2), ang tatlo sa ila pagkinahanglan sing pisikal nga pag-ayo (Mateo 14:14; 20:34; Marcos 1:41), kag ang isa sa pagkinahanglan sing paglipay bangod sa pagkamatay sang mga hinigugma. (Lucas 7:13) Ang duha pa ka teksto nagapatuhoy sa daku pa nga pagkinahanglan. Ang Mateo 9:36 nagasiling: “Sang nakita niya ang mga kadam-an, naluoy sia sa ila, kay ginlapyo sila kag nag-aplaag subong sang mga karnero nga wala sing manugbantay.” Kag ang Marcos 6:34 nagareport: “Nakita niya ang daku nga kadam-an, kag naluoy sia sa ila, kay subong sila sang mga karnero nga wala sing manugbantay. Kag nagsugod sia sa pagpanudlo sa ila sing madamo nga butang.”

Sa kamatuoran, bisan pa ginpahulag si Jesus sang kaluoy nga atipanon sila sa pisikal nga paagi, ang iya una nga interes amo ang paghatag sa ila sing espirituwal nga bulig nga wala mahatag sang ila relihioso nga mga lider. (Tan-awa ang Mateo, kapitulo 23.) Si Jesus amo ang “maayong manugbantay,” nga handa sa paghatag sang “iya kalag tungod sa mga karnero.” (Juan 10:11) Bangod ginhatagan niya ining pagbantala nga hilikuton—indi ang hilikuton para sa paghililuong ukon pagpatindog sing mga ospital ukon pagpalakat sing mga ahensya para sa pagbulig—sing una nga duog sa iya kabuhi, nakasiling sia sang ulihi kay Pilato: “Tungod sini natawo ako, kag tungod sini nagkari ako sa kalibutan, agod nga magpanaksi ako sa kamatuoran.”—Juan 18:37.

Bisan pa ginhatagan ni Jesus ang iya mga apostoles sing ikasarang sa paghimo sing milagruso nga maayong mga buhat sang pagpang-ayo, wala niya pagsambita ini sang ginhatag niya ang iya katapusan nga mga sugo sa ila antes sia magkayab sa langit. Sa baylo, sia nagsugo: “Busa lakat kamo kag himuon nga mga disipulo ang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo.” Maathag, kon amo, nga ang kapin ka importante nga hilikuton amo ang ‘paghimo sing mga disipulo . . . nga ginabawtismohan sila . . . ginatudloan sila.’—Mateo 28:19, 20.

Kon Ngaa Praktikal ang Pagbantala

Praktikal ang pagbantala bangod ginabuligan sini ang mga tawo nga iaplikar ang mga prinsipio sang Biblia. Nian nagabulig ini sa ila nga likawan ang mga palaligban nga mahimo bangdan sang ila pagkinahanglan. Ang pag-aplikar sang mga prinsipio sang Biblia tuhoy sa trabaho kag sa aton panimuot sa materyal nga mga butang, halimbawa, makabulig agod mapunggan ang kaimulon. (Hulubaton 10:4; Efeso 4:28; 1 Timoteo 6:6-8) Ukon ang pagsunod sa laygay sang Biblia tuhoy sa paggamit sing mga droga kag pagtuman sang mga talaksan sa moral sini makapauswag sang aton panglawas kag makapasalig sing mas malipayon nga pagkabuhi sa pamilya.

Binagbinaga ang halimbawa sang 35 anyos nga taga-Yu­go­sla­via, nga nagapuyo sa Republika Pederal sang Alemanya nga nagbaton: “Sa edad nga 18 ukon 19 anyos nangin alkoholiko na ako. Sa edad nga 20 nagainum na ako sing isa ka litro sang ­schnapps kag sa dimagkubos sing isa ka kaha sang serbesa [20 ka botelya] kada adlaw. Tatlo ka beses nga naospital ako sa pagtinguha nga bulngon ang akon bisyo, apang wala makabulig ang mga doktor. Bisan pa DM1,300 ang suweldo ko kada bulan, daw halos wala ako sing ginapauli sa akon pamilya.” Ang ginsugid sang mga Saksi ni Jehova sa iya sang magbantala sila ang nagpatubo sa iya sing handum nga pauswagon ang iya kaangtanan sa iya Manunuga. “Paagi sa pangamuyo,” padayon niya, “nahimo ko ang wala mahimo sang mga doktor.” Mahanduraw naton ang positibo nga epekto sini sa iya kabuhi nga may pamilya.

Sa pagkamatuod, indi malubad sang pagbantala ang tanan nga palaligban. Sa gihapon praktikal ini bangod nagahatag ini sing paglaum. Sa idalom sang Ginharian sang Dios ang tanan nga palaligban malubad. Nian sa amo nga tion himuon ni Jesus ang mga milagro sa pisikal nga paagi agod ang tanan mabuhi, indi lamang sing pila ka tuig. Sa baylo sang temporaryo lamang nga paumpaw, ang mga kaayohan mangin dayon, sa kamatuoran, wala sing katapusan. (Tan-awa ang Juan 17:3.) Gani ang pagtudlo sa mga tawo nga magtuo sa halad nga gawad ni Jesus kag sa mga aman sini makahimo sing labing maayo sa ulihi.

Madamong relihioso nga mga organisasyon sa Cristiandad ang nagatudlo nga may pagpabugal sa ila “maayong mga binuhatan” sa pag-atipan sa mga may balatian, may kinawad-on, kag sa mga makaluluoy. Apang mas maayo nga padakuon nila ang paghatag sing espirituwal nga bulig, subong sang ginhimo ni Jesus. Kaangay sang relihioso nga mga lider sang nahaunang siglo, napaslawan sila sa pagtuman sang kapin ka importante nga sugo. Mahimo nga nabusog nila ang mga tiyan sang pila ka imol nga katawhan sing literal nga kalan-on, apang ang ila hunahuna kag tagipusuon uhaw sa mga pulong sang kamatuoran. (Tan-awa ang Amos 8:11.) Mahimo nga nagdonar sila sing kuwarta sa pagbulig sa may kinawad-on nga mga pungsod, apang wala nila mabantala “sa kapungsuran ang maayong balita nahanungod sa dimatungkad nga kamanggaran ni Cristo” ukon nahanungod sa Ginharian nga pangulohan sang Dios. (Efeso 3:8) Mahimo nga ang ila mga misyonero nakabulig sa imol nga mga pungsod agod mangin kapin ka sangkol sa paggamit sang ila arado, apang wala nila sila paghayloha nga ‘salsalon ang ila mga espada nga mangin mga punta sang arado kag ang ila mga bangkaw nga mangin mga galab nga inughagbas.’—Isaias 2:4.

Mangin Balanse sa Paghigugma sa Imo Isigkatawo

Sa pagkamatuod, ang una nga pagpadaku sa espirituwal nga bulig sing nagakaigo, wala nagapuwera sa aton sa paghatag sing pisikal nga bulig—sa mga indibiduwal ukon sa mga grupo—kon kinahanglanon ini kag kon yara kita sa posisyon sa paghimo sini. Luyag naton sundon ang huwaran nga ginpahamtang sang nahaunang mga Cristiano. (Tan-awa ang Binuhatan 11:27-30.) Sa tion sang matuod nga kinawad-on ukon kapahamakan, dapat kita mangin maabtik sa pagsunod sang laygay ni Pablo nga ‘magbuhat sing maayo sa tanan nga tawo, kag labi na gid sa mga may kaangtanan sa aton sa pagtuo.’ (Galacia 6:10) Agod masigurado ang pagtigayon sing labing daku nga kaayohan, ginahimo ini sang mga Saksi ni Jehova sing personal. Kag sanglit ang mga Saksi nagahimo sina nga mga buhat sa pagbulig nga wala sing bayad, mabuhinan ang mga bili sa pagdumala.

Apang samtang nagabulig sa iban sa pisikal nga paagi, indi gid luyag sang mga Cristiano nga kalimtan ang ila una nga obligasyon, ang pagbantala sing maayong balita tuhoy sa natukod na nga Ginharian sang Dios. Sa indi madugay dulaon sina nga Ginharian sa kalibutan ang tanan nga balatian, kaimulon, kag kinawad-on. Daw ano ka makaalayaw nga makabulig sa mga tawo sa pagtigayon sing kabuhi sa isa ka kalibutan nga sa diin ang tinaga nga “kaluoy” indi na paggamiton. Posible ayhan nga mahigugma mo ang imo isigkatawo sa isa ka paagi nga praktikal pa sa sina?