Kahulugan sang Balita

Pag-ebanghelyo sa TV—Dalanon sang Dios?

Kon si Jesucristo yari karon sa duta, siling sang ebanghelisador sa TV nga si Jim Bakker, “mahimo nga yara sia sa TV.” Ngaa sa telebisyon? Bangod, siling ni Bakker, “amo lamang ina ang paagi nga malab-ot niya ang mga tawo nga ginahigugma niya.” Kaangay ni Bakker, madamo pa nga pundamentalista nga mga manugbantala sa Estados Unidos ang nagabatyag nga ang telebisyon amo ang labing maayo nga paagi sa pagpalapnag sa Pulong sang Dios. Apang, ang 1984 nga pagtuon nagpakita nga, sa kalabanan nga bahin, ang mga ebanghelisador sa TV “nagapabakud sa mga tawo nga natungod na nga daan sa ebangheliko nga relihion.”

Sing makawiwili, sa isa ka sulat sa editor sang magasin Ministry, ang isa ka bumalasa nagsulat: “Siling ninyo sila [mga telebisyon] amo ang pinakamakusog nga kagamitan sang iglesia sa pagsab-ug sa binhi sang ebanghelyo, apang ang Dios nagasiling nga ang labing kinahanglanon nga hilikuton amo ang pagduaw sa pamalaybalay—sa pagpangita sing kalag. . . . Ang aton Manluluwas nagapalagyo sa kadam-an, kag nian nagpamalaybalay Sia—sa pagpangita sing kalag. Ang isa ka kalag nga tumalambong amo ang Iya kalipay. . . . Indi bala naton ina mahimo man?”

Suno kay Jesucristo, ang katuyoan sang Cristianong ministeryo indi lamang ang ‘pagpalapnag sa Pulong’ kundi ang “paghimo sing mga disipulo.” (Mateo 18:19, 20) Ginsilingan niya ang iya mga sumulunod nga magkadto sa puluy-an sang mga tawo. (Mateo 10:7, 11-13) Ginbaton ni apostol Pablo ini nga paagi sa pagbantala kag nagsiling nahanungod sa iya ministeryo: “Wala ako mag-isol sa pag-asoy sa inyo sang bisan ano nga mapuslanon kag nagatudlo sa inyo sa dayag kag sa pamalaybalay.” Ang personal nga pamalaybalay nga ministeryo sang mga disipulo nag-ani sing maayong mga resulta.—Binuhatan 5:42; 20:20.

Kon ginpadaku ni Jesus ini nga paagi sa pagbantala agod makahimo sing mga disipulo, ngaa ginapakamaayo sang madamong ebanghelisador ang TV subong ang ila paagi? Ang The Courier-Mail sang Bris­bane, Aus­tralia, nagsiling nga ang mga ebanghelisador sa TV “nagakita sing tubtob sa $120 ka milyon kada tuig sa pagbaligya sa kaluwasan. Nagaguwa sila sa isa ka makapulukaw nga pasundayag kag himaya sa 300 ka estasyonan sang TV, kag ginasimba subong sang mga bantog nga idolo. . . . Para sa ila tanan nga mga taktika, ini nga mga tawo nga nagaangkon nga nagaimpluensia bisan sa Dios, nagadangat sa ulihi sa direkta nga transaksion sa negosyo. Padalhi sila sing $10 kag dal-on ka nila sa langit.”

Walay Pagtuo nga Pagpangulo

Si Jesucristo nagsiling: “Ako ang pagkabanhaw kag ang kabuhi.” (Juan 11:25) Apang, “madamo sa Katoliko nga mga teologo nga nagatudlo sa mga unibersidad kag mga seminaryo ang indi makasiling nga nagapati sila, sa dimagkubos literal nga nagapati, sa pagkabanhaw,” report sang nagabalita nga magasin nga Insight.

Paano mapabakud sina nga mga manunudlo ang mga Romano Katoliko nga hanuot gid nga maluyag sa pagsunod sa mga panudlo sang Biblia? Indi nila ina mahimo, kay si apostol Pablo nagsulat: “Apang kon walay pagkabanhaw, nian wala mabanhaw si Cristo. Kon si Cristo wala mabanhaw, nian walay pulos ang amon pagwali, kag walay pulos ang inyo pagtuo.”—1 Corinto 15:13, 14.

Kon Diin Wala sing Paghidait

Sang Oktubre 24, 1985, ang Gene­ral As­sem­bly sang Nasyones Unidas nagdeklarar sang 1986 nga mangin ang Internasyonal nga Tuig sang Paghidait. Ang resolusyon nagsiling nga ang tuig “ihugod agod ikonsentrar sang Nasyones Unidas kag sang iya Katapo nga mga Estado ang mga panikasog sa pagpauswag kag pagtuman sa katuyoan sang paghidait sa tanan nga paagi.” Paano sila naglaum nga himuon ini? Paagi sa “padayon kag positibo nga buhat sang mga Estado kag mga tawo sa tuyo nga tapnaon ang inaway.”

Apang karon nga nagahilapit na kita sa katapusan sang tuig sang “Paghidait,” ano ang nakita naton? Inang dungganon nga mga tinutuyo ginpakadiutay sang mga inaway militar nga padayon nga nagadabdab sa bug-os nga kalibutan. “Ang pag-alsa sang mga gerilya, mga inaway sa teritoryo, mga kinatuhayan sa ideolohiya kag rasa kag ‘balaan’ nga mga inaway nagadamo sing tubtob sa magkubos 19 ka dalagku nga inaway, kag madamo pa nga mga magagmay,” siling sang The West Australian. Ang artikulo sa pamantalaan nagsiling nga halos isa ka milyon ka soldado ang nagapakig-away karon sa naarmasan nga inaway sa bug-os nga kalibutan. Sing maathag, para sa minilyon nga biktima sinang mga inaway, wala sing paghidait.

Makalaum bala ang tawhanon nga mga lider sing matuod nga solusyon paagi sa palaabuton nga proklamasyon nga nagapanawag sing paghidait? Indi, kay ang Jeremias 10:23 nagasiling: “Nahibaloan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat sa pagmando sang iya mga tikang.” (Ipaanggid ang Jeremias 6:14.) Sa pagkamatuod, ang matuod nga paghidait magahalin lamang sa Dios.