Si Jesus, Isa ka Modelo nga Sulundon
“Sa kamatuoran, sa sining dalanon gintawag kamo, bangod bisan si Cristo nag-antos tungod sa inyo, nga nagabilin sa inyo sing modelo agod nga sundon ninyo ang iya mga tikang.”—1 PEDRO 2:21.
1, 2. Ano nga sahi sang disipulo si Pedro sa tion sang iya ministeryo kaupod ni Jesus?
SA SULOD sang tatlo ka tuig kag tunga, si Simon, nga nakilal-an subong Cefas, ukon Pedro, nakatigayon sing pribilehiyo nga makaupod sing suod si Cristo Jesus. (Juan 1:35-42) Sa tapos mangin disipulo sa mga isa ka tuig, napilian sia nga mangin isa sang 12 ka apostoles. (Marcos 3:13-19) Ang mga rekord sang Ebanghelyo nagapakita nga si Pedro masidla, padasudaso, kag may balatyagon. Sia ang nagsiling nga indi gid niya pag-ipanghiwala si Cristo, bisan ano man ang matabo. Apang, sang gin-ipit, ginpanghiwala niya sia sing makatlo, subong amo gid ang gintagna ni Jesus.—Mateo 26:31-35; Marcos 14:66-72.
2 Si Pedro ang apostol nga nagsiling kay Jesus, “Dili ka gid maghinaw sang akon mga tiil.” Nian sang ginlaygayan sia ni Jesus, nagpasobra naman sia kag nagsiling, “Ginuo, indi ang akon mga tiil lamang, kundi ang akon mga kamut kag ulo man.” (Juan 13:1-17) Si Simon Pedro man, sang gindakop si Jesus, ang maisugon nga naggabot sang iya espada kag ginilangan ang dulunggan nga tuo ni Malco, nga ulipon sang mataas nga saserdote. Bangod sadto ginsabdong man sia ni Jesus: “Itagob ang imo espada. Ang tagayan nga ginhatag sa akon sang Amay indi ko bala pag-imnon?”—Juan 18:10, 11.
3. Ano ang maton-an naton gikan sa huwaran ni Pedro?
3 Ano ang ginapakita sini kag sang iban pa nga mga hitabo nahanungod kay Pedro? Nga sa masami wala sia nagahunahuna kag nagapangatarungan kaangay ni Jesus. Dugang pa, wala sia pirme sing hunahuna ni Cristo. Matuod ina pirme sa aton bahin. Nagakapaslawan kita sa pagsentro sang aton igtalupangod sa mga butang nga nahisuno sa panghunahuna ni Jesus. Ang dihimpit nga pagkatawo may malain nga epekto sa aton mga reaksion.—Lucas 9:46-50; Roma 7:21-23.
4. Ano nga mga hitabo sang ulihi ang nag-apektar sa panghunahuna ni Pedro? (Tan-awa ang Galacia 2:11-14.)
4 Apang, nagbag-o si Pedro sugod sang Pentecostes. Ginpahulag sang balaan nga espiritu, nanguna sia sa pagbantala sa tunga sang mga Judiyo sa Jerusalem. (Binuhatan, kapitulo 2-5) Sa idalom sang pagpasanag sang balaan nga espiritu, ginpasibu man niya ang iya panghunahuna agod mahisanto sa hunahuna ni Cristo tuhoy sa mga Gentil. (Binuhatan, kapitulo 10) Nagpakita si Pedro sing pagkamapainubuson, isa ka kinaiya nga kinahanglanon para sa aton kon luyag naton mahisanto kay Cristo.—Mateo 18:3; 23:12.
Wala Makita Apang Nakilala
5, 6. Ang kamatuoran nga wala gid naton makita si Cristo isa bala ka sablag sa aton pagsunod sa iya huwaran?
5 Sang ginsulat ni Pedro ang iya nahaunang inspirado nga sulat, mga 62-64 C.E., nakatigayon sia sing tion sa pagbinagbinag sang iya ministeryo upod kay Jesus kag sa paghangop sang hunahuna ni Jesus nahanungod sa mga butang. Sa una nga bahin sining sulat ginkilala sang apostol ang isa ka simple nga kamatuoran—nga ang kalabanan nga kauturan sa Asia Minor wala makakilala kay Jesus sing personal kasubong niya. Apang balagbag bala yadto sa pagtigayon sing hunahuna ni Cristo kag sa pag-ilog sang iya modelo? Si Pedro nagsiling: “Bisan pa wala gid ninyo sia makita, ginahigugma ninyo sia. Bisan pa wala kamo nagatulok sa iya sa karon, nagatuo kamo sa iya kag nagakalipay sing daku nga may indi mapabutyag kag mahimayaon nga kalipay, kon maagom ninyo ang bunga sang inyo pagtuo, ang kaluwasan sang inyo mga kalag.”—1 Pedro 1:8, 9.
6 Ang mga pulong ni Pedro dapat naaplikar man sa tanan nga katawhan ni Jehova karon. Wala naton makilala si Jesus sing personal, apang kon kita ‘maukod nga mangita kag magpanalawsaw sing maayo’ kag ‘magpadayon sa pagpangusisa’ subong sang ginhimo sang mga manalagna, nian sa daku pa nga kasangkaron, matigayon naton ang hunahuna ni Cristo.—1 Pedro 1:10, 11.
Si Jesus, ang Himpit nga Modelo
7, 8. (a) Anong laygay para sa tanan ang ginatanyag ni Pedro sa iya nahauna nga sulat? (b) Ano ang sadsaran nga kahulugan sang hy·po·gram·mosʹ? Paano ini ginaaplikar ni Pedro?
7 Upod ang iya nag-athag pa nga paghangop sa panghunahuna ni Jesus kag sa idalom sang pagtuytoy sang balaan nga espiritu, nakahatag si Pedro sing laygay sa iya mga masigkatumuluo sa kon paano ipabanaag ang hunahuna ni Cristo sa ila nanuhaytuhay nga mga kahimtangan. (2 Timoteo 3:16) Sa amo, ginlaygayan niya ang tanan nga Cristiano “subong mga dumuluong kag temporaryo nga mga pumuluyo” nga maglikaw sa undanon nga mga kailigbon. Ginpalig-on niya sila, bisan pa nagaantos sila tungod sa pagkamatarong, nga huptan ang maayong paggawi sa ila adlaw-adlaw nga pagkabuhi.—1 Pedro 2:11, 12.
8 Paagi sa pila ka dinalan sang ulihi si Pedro naghatag sing isa ka maayo gid nga ilustrasyon, nga nagasiling: “Kon, sa paghimo sing maayo, nagaantos kamo kag ginabatas ninyo ini, kalahamut-an ini sa Dios. Sa kamatuoran, sa sining dalanon gintawag kamo, bangod bisan si Cristo nag-antos tungod sa inyo, nga nagbilin sa inyo sing modelo agod sundon ninyo ang iya mga tikang.” (1 Pedro 2:20, 21) Ang Griegong tinaga nga ginbadbad “modelo,” ukon “huwaran” sa madamong iban pa nga pagbadbad, amo ang hy·po·gram·mosʹ. Literal ini nga nagakahulugan sing “pagsulat sa ubos,” ukon “pagkopya, lakip ang tanan nga letra sang alpabeto, nga ginahatag sa mga estudyante subong bulig sa pagtuon sa pagsulat sini.” (A Greek-English Lexicon of the New Testament, J. H. Thayer) Sa amo, ang mga bata sa eskwelahan ginahatagan kon kaisa sing wax nga mga tapitapi nga ginsulatan sang manunudlo sing modelo nga mga letra paagi sa stylus. Dapat sundon sang estudyante ang halimbawa kag kopyahon ini sing eksakto sa ubos. Mabaskog nga punto ang ginapadaku diri ni Pedro, kay sia lamang ang manunulat sang Griegong Kasulatan nga naggamit sing tinaga nga hy·po·gram·mosʹ. Sa amo ginpadaku niya ang kamatuoran nga si Jesus nagbilin sing himpit nga huwaran agod ilugon sang iya mga sumulunod.
9. Ano ang ginapahangop sang Griegong tinaga nga ginbadbad “panimuot sang hunahuna”? (Ipaanggid ang Mateo 20:28.)
9 Sang ulihi, naghatag si Pedro sing leksion para sa aton gikan sa pagbatas ni Cristo sang pag-antos. “Nian sanglit nga nag-antos si Cristo sa unod, sangkapi man ninyo ang inyo kaugalingon sing pareho nga panimuot sang panghunahuna [Griego, enʹnoi·an].” (1 Pedro 4:1) Diri sa liwat naggamit sia sing tumalagsahon nga tinaga, nga enʹnoi·a, nga makaduha lamang masapwan sa Griegong Kasulatan. (Tan-awa ang Hebreo 4:12, The Kingdom Interlinear Translation.) Suno kay J. H. Thayer, ang enʹnoi·a nagakahulugan sing “hunahuna, paghangop, kabubut-on; paagi sang panghunahuna kag balatyagon.” Busa, dapat kita magpasibu nahisuno sa panghunahuna kag balatyagon ni Cristo. Apang paano naton mahimo ina nga pagpasibu? Tubtob sa anong kasangkaron dapat ini himuon?
10. Ano ang buot silingon ni Pedro sa ekspresyon nga “sangkapi ang inyo kaugalingon”?
10 Gingamit ni Pedro ang singular nga Griegong berbo nga ho·pliʹsa·sthe, nga nagakahulugan ‘armasan ang kaugalingon subong isa ka soldado.’ Ang bisan sin-o nga soldado nga nagaarmas sang iya kaugalingon sing hapaw mahimo gid nga indi makalampuwas sa malawig nga inaway. Busa, ang mga pulong ni Pedro wala nagatugot sing alabaab nga pag-ilog sang panghunahuna ni Jesus. Dapat kita mangin bug-os-kalag sa aton handum nga matigayon ang “panimuot sang hunahuna” ukon “panghunahuna” ni Cristo. (1 Pedro 4:1, Today’s English Version) Ginapahanumdom kita sini kon paano ginpadaku ni Pablo nga dapat sangkapan sang isa ka Cristiano ang iya kaugalingon sing “bug-os nga hinganib sang Dios” agod nga makatindog sing malig-on batok kay Satanas kag sa iya kalibutan.—Efeso 6:11-18.
Ang Panimuot sang Hunahuna ni Cristo Para sa mga Asawa
11. Anong laygay ang ginahatag ni Pedro para sa mga Cristianong asawa?
11 Sa tungatunga sang iya sulat, ginliso ni Pedro ang iya igtalupangod sa mga asawa kag mga bana. Sa sadtong paganong kalibutan sang una, nga sa diin diutay lamang ang kinamatarong sang mga babayi, mabudlay gid para sa isa ka Cristianong babayi nga huptan ang iya integridad kon may bana sia nga ditumuluo. Mahimo sia pasipalahan, paantuson, kag ayhan diborsiohan pa gani bangod ginbiyaan niya ang mga diosdios sang ila katigulangan. Ang kahimtangan indi gid tuhay sa modernong mga tion. Apang sa liwat ginpadaku ni Pedro ang pagkaimportante sang paghupot sing panimuot sang hunahuna ni Cristo, nga handa sa pag-antos tungod sa pagkamatarong. Sia nagsiling: “Sa amo man nga paagi [subong sang kay Cristo, nga ginsambit sa nauna nga mga bersikulo], kamo nga mga asawa, magpasakop sa inyo mga bana, agod nga, bisan ang wala nagatuman sang pulong, mahimo nga madaug sila sa walay pulong bangod sang paggawi sang ila mga asawa, kon sila nagatan-aw sang inyo matinahuron kag putli nga paggawi.”—1 Pedro 3:1, 2.
12. (a) Paano ang mapinasakupon kag malum-ok nga espiritu sang asawa nagapabanaag sang huwaran ni Jesus? (1 Corinto 11:3) (b) Paano ginatamod sang Dios ang iya malum-ok nga espiritu, kag ayhan sang iya bana?
12 Huo, ang isa ka ditumuluo nga bana mahimo nga madaug, indi paagi sa walay untat nga mga taktika sa pagbantala, kundi paagi sa “pagkamatinahuron” kag “matutom kag maayong” halimbawa sang mapinasakupon nga asawa. (1 Pedro 3:2, The Jerusalem Bible) Ang iya “malinong kag malum-ok nga espiritu, nga bilidhon gid sa Dios,” makabulig man sa iya bana sa paghangop sang mga resulta sang pagtigayon sang hunahuna ni Cristo sa matag-adlaw nga kabuhi. (1 Pedro 3:4) Ngaa ginapakita sinang malum-ok nga espiritu ang panimuot ni Jesus? Bangod si Jesus mismo nagsiling: “Itakud ang akon gota sa inyo kag magtuon kamo sa akon, kay ako malum-ok sing hunahuna kag malolo sa tagipusuon, kag makakita kamo sing kapahuwayan sa inyo mga kalag.”—Mateo 11:29.
Ang Panimuot sang Hunahuna ni Cristo Para sa mga Bana
13. Paano dapat tratahon sang mga bana ang ila mga asawa? (Efeso 5:28, 29, 33)
13 Ang mga bana dapat man magpakita sang panimuot sang hunahuna ni Cristo samtang nagapakita sila sing matuod nga gugma sa ila asawa. Si Pedro naglaygay liwat: “Kamo nga mga bana, magpadayon sa pagpuyo sa amo man nga paagi upod sa ila suno sa ihibalo, nga nagahatag sing dungog sa ila subong babayi nga maluya.” (1 Pedro 3:7) Para sa paganong kalibutan sadto, ining laygay makapakibot—maghatag sing dungog sa isa ka babayi! Apang ang Cristianong kongregasyon dapat mangin tuhay gikan sa kalibutan. Sa Cristianong pag-asawahay, dapat nga may yara kadungganan kag pagtahoray.—1 Pedro 4:3, 4.
14. Paano ang bana makapakita sing dungog kag konsiderasyon sa iya asawa?
14 Si Cristo pirme nga nagpakita sing konsiderasyon sa iya mga disipulo kag sa mga kadam-an nga nagsunod sa iya. (Marcos 6:30-44) Naangot gid ini sa laygay ni Pedro sa mga bana nga binagbinagon ang pagkababayi sang ila asawa. Ginpabutyag ini sang Espanyol nga badbad sa sining paagi: “Tuhoy sa mga bana: magpakita sing taktika sa inyo minyo nga kabuhi, nga nagapakita sing konsiderasyon sa babayi, bangod mas maluya sia.” (Nueva Biblia Española) Kon ginasunod sang isa ka bana ang modelo ni Cristo, binagbinagon niya ang maluya nga bahin sang kabuhi sang iya asawa. Nagalakip ina sang mabudlay nga mga adlaw nga kinahanglan niya ang dugang pa nga kalolo, pailob, kag konsiderasyon. Sa pagkamatuod ang isa ka mahigugmaon nga bana magapakita sing pagpugong sa kaugalingon kag indi mangin estrikto sa amo nga mga tion. Ang matuod nga gugma nagasakripisyo sang kaugalingon.—Ipaanggid ang Levitico 15:24; 20:18; 1 Corinto 7:3-6.
15. Anong huwaran ang ginhatag ni Jesus tuhoy sa pagkaulo?
15 Matuod, ang “bana amo ang ulo sang iya asawa.” Apang sin-o ang iya modelo sa pagpakita sina nga pagkaulo? Ginapaathag ini ni Pablo paagi sa pagdugang, “subong nga si Cristo man amo ang ulo sang kongregasyon.” (Efeso 5:23) Ining mga pulong wala nagatugot sang pagharihari kag pagkamapiguson sa Cristianong pag-asawahay. Sa iya pagpakig-angot sa mga disipulo, wala gid pag-abusohi ni Cristo ang iya gahom (ang iya pagkaulo) kundi, sa baylo, gingamit niya ang iya gahom nahisuno sa mga prinsipio sang Biblia.—Ipaanggid ang Mateo 16:13-17, 20; Lucas 9:18-21.
Ang Modelo ni Cristo Para sa mga Lalaki
16. (a) Ngaa nangin mahunahunaon gid si Pedro sa kinahanglanon nga mangin mapainubuson? (b) Sin-o labi na ang dapat magpakita sining kinaiya?
16 Sa iya ministeryo masunson nga ginpadaku ni Jesus ang kinaiya nga pagkamapainubuson. Sa iya ilustrasyon tuhoy sa mga gin-agda sa isa ka sinalusalo sang kasal, sia nagsiling: “Kay ang tagsatagsa nga nagapakataas sang iya kaugalingon paubson, kag ang nagapaubos sang iya kaugalingon pataason.” (Lucas 14:11) Mahunahunaon gid si Pedro sa panimuot sang hunahuna ni Jesus sa sini nga bahin. Indi niya bala madumduman ang huwaran ni Jesus sang ginhinawan niya ang mga tiil sang mga disipulo? (Juan 13:4-17) Busa, sa iya nahauna nga sulat ginlaygayan niya ang mga gulang kag mga pamatan-on nga magpakita sing mapainubuson nga panimuot. Ang mga gulang ‘indi dapat magpakaginuo sa kongregasyon kundi mangin mga huwaran sa panong.’ Ang mga pamatan-on dapat magpasakop sa mga gulang. Apang sila tanan, bata kag tigulang, dapat ‘magwagkus sang ila kaugalingon sing pagpaubos, bangod ginasumpong sang Dios ang mga bugalon apang ginahatagan niya sing dibagay nga kaluoy ang mga mapainubuson.’—1 Pedro 5:1-5.
17. Paano ang Griegong tinaga para sa “wagkusi ang inyo kaugalingon” nagapadaku sang mapainubuson nga pag-alagad?
17 Diri sa liwat tumalagsahon ang pagkagamit ni Pedro sa isa ka tinaga agod ipadaku ang punto nahanungod sa pagkamapainubuson. Sia nagsiling: ‘Wagkusi ang inyo kaugalingon [Griego, eg·kom·boʹsa·sthe] sing pagpaubos.’ Ang ginhalinan sini nga berbo nagakahulugan sing pagbalighot ukon paghigot, kag ang kahulugan sini naangot sa “puti nga bandana ukon apron sang mga ulipon, nga ginahigot sa paha sang bayo . . . kag nagpatuhay sa mga ulipon gikan sa hilway nga mga tawo; busa, . . . wagkusi ang inyo kaugalingon sing pagkamapainubuson subong inyo panapton sang pagkaulipon . . . kon sayoron, paagi sa pagsuklob sing pagkamapainubuson ipakita ang inyo pagpasakop sa isa kag isa.”—A Greek-English Lexicon of the New Testament, J. H. Thayer.
18. (a) Ano ang dapat tandaan sang dedikado nga mga lalaki tuhoy sa ila motibo? (b) Sa anong pinasahi nga paagi huwaran sa pagkamapainubuson ang madamong kauturan nga mga babayi?
18 Paano maaplikar sang dedikado nga mga lalaki ina nga laygay karon? Paagi sa pagpakilala nga ang bisan anong posisyon sang salabton sa sulod sang Cristianong kongregasyon isa ka tulumanon sang mapainubuson nga pag-alagad. Ang iban sayop sa paghunahuna nga kon ang isa ministeryal nga alagad, isa ka gulang sa kongregasyon, manugtatap sa sirkito, sa distrito, ukon sa Bethel, nakatigayon sia sing posisyon nga may dungog kag gahom. Kon amo sina wala sila sing hunahuna ni Cristo sa sini nga bagay. Wala sing duog para sa makagud nga ambisyon kon may yara kita sang panimuot sang hunahuna ni Cristo. Ang aton motibo sa pag-alagad sa Dios kag sa aton mga utod dapat mangin putli. Halimbawa, madamo sang aton Cristianong utod nga mga babayi ang nagapanguna sa pag-alagad subong payunir kag misyonera. Ang iban makugi nga mga manugbantala sang maayong balita walay sapayan sang paghingabot ukon pagpamatok sa puluy-an. Kag ini tanan wala sing motibo nga mangin ministeryal nga alagad ukon manugtatap!
Gugma—Ang Batong Pamag-ang sang Huwaran ni Cristo
19. Ano ang batong pamag-ang sang huwaran ni Cristo? Paano naton nahibaloan ina?
19 Ano ang ginapadaku ni Pedro labaw sa tanan tuhoy sa hunahuna ni Cristo? Sia nagsulat: “Labaw sa tanan, magmainit kamo sa inyo paghigugmaanay, kay ang gugma nagatabon sang kadam-an nga mga sala.” (1 Pedro 4:8) Paano ni Jesus ginpakita ina nga gugma? Sia nagtudlo: “Ini amo ang akon sugo, nga maghigugmaanay kamo subong nga ako naghigugma sa inyo. Walay tawo nga may gugma nga daku pa sini, nga ihatag sang isa ka tawo ang iya kabuhi tungod sa iya mga abyan.” (Juan 15:12, 13) Wala madugay pagkatapos sadto, ginhalad ni Jesus ang iya kabuhi tungod sa katawhan. Kag gintabonan gid sang iya gugma ang kadam-an sang mga sala! Busa, kon may yara gid kita panimuot sang hunahuna nga subong sang kay Jesus, kita man ‘magmainit sa aton paghigugmaanay’ kag mangin mapinatawaron.—Colosas 3:12-14; Hulubaton 10:12.
20. Kon luyag naton sundon ang sulundan ni Cristo, ano ang dapat naton tanan himuon?
20 Ang huwaran ni Cristo nabilog sa isa ka pulong—gugma. Kon sundon naton ang modelo ni Jesus sa tanan nga ginahunahuna naton, ginasiling, kag ginahimo, magapakita man kita sing gugma. Subong ginsiling ni Pedro: “Sa katapusan, kamo tanan, mag-isa sa espiritu, nagapakita sing kahanuklog, mahigugmaon sa kauturan, maluluy-on, mapainubuson sing hunahuna, wala nagabalos sing malaut sa malaut ukon pasipala sa pasipala, kundi, sa baylo, nagapakamaayo, bangod gintawag kamo sa sining dalanon, agod nga makapanubli kamo sing pagpakamaayo.”—1 Pedro 3:8, 9.
Madumduman Mo Bala?
◻ Paano naton sundon ang sulundan nga ginbilin ni Cristo sa aton?
◻ Paano masunod sang isa ka Cristianong asawa ang huwaran ni Cristo?
◻ Paano mapadunggan sang Cristianong mga bana ang ila asawa?
◻ Paano ginpadaku ni Pedro ang pagkamapainubuson?
◻ Ano ang batong pamag-ang sang huwaran ni Jesus?
[Laragway sa pahina 18]
Nagsulat ang manunudlo sing sulundan nga teksto sa ibabaw nga mga linya; ang estudyante nagtinguha sa paghimo sing eksakto gid nga kopya (hy·po·gram·mosʹ)