Paghinugyaw sa Tunga sang Katawhan sang Dios
ANG mga pulong ni Hari David, nga narekord sa Salmo 68, bersikulo 2-4, mainit nga nagaagda sa tanan nga nagahigugma sa matuod nga kahilwayan: “Amba kamo sa Dios, amba kamo sa iya ngalan; amba kamo sa Isa nga nagasakay palatas sa mga desyerto nga ang iya ngalan amo si Jah; kag maghinugyaw kamo sa atubangan niya.” Ano pa ang maglabaw sa pribilehiyo nga maghugyaw sa atubangan sang aton Dios? (Isaias 12:2, 3) Sa bug-os nga tuig sang 1986, makatilingala nga ginsakdag ni Jehova ang iya mga saksi, samtang nagpadayon sila sa pagbantala sing kahilwayan sa katawhan sang duta.
Ang masunod nga mga pahina nagahatag sing sumaryo sang nahimoan sang mga Saksi ni Jehova sa bug-os nga kalibutan sang 1986. Daw ano nga rason sa paghugyaw! Subong ginapakita sang mga numero, ang kadamuon sang aktibo nga mga Saksi sa 208 ka kadutaan nga nagreport nag-uswag tubtob sa 3,229,022, 6.8-porsiento nga pag-uswag sa sulod sang tuig. Ang kadamuon sang nabawtismohan 225,868.
Pagdumdom sang Kamatayon ni Jesus
Ang nagtambong sa nagapanguna nga miting sang tuig, ang Memoryal sang kamatayon ni Jesus, nag-uswag tubtob sa 8,160,597, bisan pa ang iban nga mga report wala mabaton bangod sang nagalain nga mga kahimtangan sa kalibutan. Ang kadamuon sang nag-ambit sa mga emblema sang Memoryal nagnubo tubtob sa 8,927 bangod nakompleto na sang tigulang nga mga hinaplas ang ila dutan-on nga pag-alagad.—Bugna 2:10.
Madamo sang mga nagtipon bilang pagtuman sa sugo ni Jesus ang nagpakita sing huwaran nga kaisog. (1 Corinto 11:23-26; Juan 16:33) Sa isa ka pungsod sa Aprika nga sa diin ginadumilian ang hilikuton ni Jehova, ang kongregasyon nagtipon sa balay sang isa ka utod nga babayi agod saulugon ang Memoryal. Mga walo ka minuto lamang ang nagligad sa pagsugod sang pamulongpulong, nag-abot ang lokal nga mga awtoridad agod dakpon ang mga utod. Nagmando sila nga untaton ang miting. Ang mga utod malolo apang malig-on nga nagpamilit nga dapat nila padunggan ining Memoryal sang mahalaron nga kamatayon ni Jesus. Sa tapos mangatarungan kag magpakitluoy sa polisiya, gintugutan sila sa pagpadayon nga nagapamati ang mga polis. Ang miting malinong nga natapos, kag dayon gindakop ang tanan. Sa tapos maimbestigar, lima ang ginbilanggo. Nabilanggo sila sa sulod sang isa ka tion kag ginpaguwa sang ulihi, nga malipayon nga nasaulog nila ang Panihapon sang Ginuo!—1 Juan 5:3, 4.
Sa Nigeria, nga sa diin ang kadamuon sang mga Saksi nag-uswag tubtob sa 128,461, 394,370 ang nagtambong sa ila Memoryal—ang pinakamataas. Ang isa ka miting sang Memoryal ginhiwat sa duog sang konstruksion sang bag-o nga Bethel sa Igieduma, kag kapin sa 700—halos ang bug-os nga lokal nga minuro—ang nagtambong!
Gikan sa Mexico naghalin ini nga report: “Bisan diin kami magkadto sa sulod sang pungsod, ang mga manugbantala mapagsik nga nagahambal, kag ang bug-os nga pungsod daw may kalayo sang kamatuoran. Ang kamatuoran nagahil-ob sa kauturan, kag ang ila kabuhi nasentro sa kamatuoran. Bug-os nga mga pamilya ang nagasulod sa kamatuoran. Madamo nga tawo nga nagatuon ang nagsugod man sa pagtambong sa mga miting. Nagabulig ini sa ila sa pag-uswag sing madasig.” Ang Mexico nagreport nga 838,467 ang nagtambong sa ila Memoryal. Sang Agosto, ang 198,003 ka manugbantala sang Ginharian sa sadto nga pungsod naghiwat sing 327,664 ka pagtuon sa Biblia sa mga puluy-an sang mga tawo. Daku gid ang posibilidad nga sila padayon nga magauswag!
Dugang Pa nga Pagsangkad sa Bilog nga Globo
Gikan sa alibutod sang Cristiandad naghalin ang kaanggid man nga mga report sang pagsangkad. Ang Italya nakalab-ot sing bag-ong kataason nga 139,570 ka manugbantala sang Agosto, kag 301,009 ang nagtambong sang ginsaulog ang Panihapon sang Ginuo. Sa pagkamatuod ang mga Saksi ni Jehova ‘nagapasilak sang ila kapawa sa mga tawo.’ (Mateo 5:16) Halimbawa: “Ang isa ka utod nga babayi nagasulod sing kuwarta sa makina sang tiket sa isa ka bus sang ang isa ka kilala nga tawo nagsiling sa iya nga indi na sia dapat magbayad bangod malapit lang ang iya panaugan. Ang utod nga babayi nagpaathag nga nagakaigo ang pagbayad sa tiket, bisan pa malapit lang ang panaugan. Sa tapos sadto, nanaug ang iya abyan. Sa sina, ang tsuper sang bus nagbalikid sa iya kag nagsiling: ‘Isa ka bala sang mga Saksi ni Jehova?’ ‘Huo,’ sabat sang utod, ‘Ngaa namangkot ka?’ ‘Nabatian ko ang inyo paghambalanay tuhoy sa pagbayad sa tiket sang bus, kag nahibaloan ko nga ang mga Saksi ni Jehova lakip sa pila lamang ka tawo nga nagabayad kag bunayag sila sa tanan nga butang.’ Pagligad sang pila ka bulan, ang isa ka lalaki nagpalapit sa utod nga babayi sa isa ka miting kag nagsiling, ‘Kilala mo bala ako? Ako ang tsuper sang bus nga nakighambal sa imo nahanungod sa pagbayad sa tiket. Bangod nakita ko ang imo paggawi, namat-od ako nga magtuon sing Biblia upod sa mga Saksi ni Jehova.’”
Ang Britanya may kataason nga 107,767 ka manugbantala sang Ginharian, lakip ining bag-o nabawtismohan nga utod nga lalaki: “Si George 84 anyos na karon. Pagligad sang 50 ka tuig subong manugbantala sa lego sa lokal nga simbahan, naton-an niya ang kamatuoran. Sang primero, sa tapos sang iya pagtuon sa Biblia sa puluy-an, nagadalidali sia sa pagkadto sa pihak nga kuwarto agod magsigarilyo. Regular sia nga nagapanigarilyo sa sulod sang 70 ka tuig. Apang sang maton-an niya ang kapitulo 26 sang libro nga Mahimu Ka Mabuhi sing Dayon sa Paraiso sa Duta, wala na sia magsigarilyo liwat. Si George isa ka tuig na nga nabawtismohan karon kag makugi gid sa pag-alagad sa latagon, nga nagasugid sa iban nahanungod sa mga pagpakamaayo nga ihatag ni Jehova sa Iya bag-ong sistema sang mga butang.”
Ang Republika Pederal sang Alemanya nagreport sing kataason nga 118,645 ka manugbantala. Linibolibo man ka matutom nga mga Saksi ang ‘nagapasilak sang ila kapawa’ sa kaingod nga Aleman nga Demokratiko nga Republika. Sa Alemanya, ang matutom nga mga tigulang nagdumili sa pagtagob sang ila “espada sang espiritu.” (Efeso 6:16, 17) Ang isa ka kongregasyon nagreport: “May yara kami isa ka utod nga babayi nga 103 anyos na kag nagakabuhi gihapon sing isahanon. Ang mga gulang naghimos nga ang isa ka grupo sang pito pa walo ka utod nga babayi magbulosbulos sa pag-atipan sa iya kada semana. Tatlo pa apat ka tuig na nga ginahimo nila ini. Ang mga social worker, nga ginasuweldohan sang komunidad, amo ang nagaligo kag nagailis sang iya bayo. Apang kon may masakit sila ukon bakasyon, ang mga utod nga babayi amo ang nagahimo sini. Ining pamatuod sang Cristianong gugma kag sakripisyo nangin isa ka maayong panaksi sa mga tagaguwa. Ang aton 103 anyos nga utod listo gihapon sa hunahuna kag nagakabig sa mga social worker subong iya, ‘teritoryo.’ Makugi nga nagabantala sia sa ila samtang ginapaligoan nila sia kag ginahatagan niya sila sing literatura.” Sa pagkamatuod, ang “ubanon nga ulo purongpurong sang katahom kon makita ini sa dalanon sang pagkamatarong.”—Hulubaton 16:31.
Apang, ang imbitasyon nga dayawon si Jehova ginahatag sa tanan nga edad sang katawhan—“kamo nga mga pamatan-on nga lalaki kag kamo man nga mga ulay, kamo nga mga tigulang nga lalaki pati ang mga bata nga lalaki.” Madamo nga pamatan-on ang ‘nagadumdom sa ila Dakung Manunuga sa mga adlaw sang ila pagkapamatan-on.’ (Salmo 148:12; Manugwali 12:1) Sa Brazil, nga sa diin 196,948 ang bag-ong kataason sang mga manugbantala, ang Watch Tower Society nakabaton sing sulat gikan sa malayo nga banwa nga napanaksihan sang duha ka pamatan-on nga utod sa pila ka bulan. Ini mabasa sa bahin: “Ginadayaw ko kamo bangod sang inyo maayong mga pamatan-on sa inyo relihion. Manunudlo ako sa eskwelahan kag nagapakig-angot sa mga pamatan-on, kag nahibaloan ko nga lain na gid karon ang mga pamatan-on. Ang inyo mga pamatan-on mga huwaran gid. Ginatahod nila ang ila mga gulang, mabuot sila kag maugdang mamayo. Kag maayo gid sila sa Biblia! Amo gid ina ang relihion! Kanugon nga naglakat sila.” Ang mga pamilya sang aton kauturan nagasaylo karon sing permanente sa iban sining nabaw-ing nga mga duog agod atipanon ang interes.
Ano ang pag-uswag sang kamatuoran sa di-Cristiano nga mga duog? Ang The Wall Street Journal sang Hulyo 9, 1986, nagbalhag sing malaba nga artikulo sa idalom sang ulong-dinalan nga “Baog nga Duta—Ang Cristianong mga Misyonero Nagsab-ug sing Binhi sa Hapon Apang Diutay Lamang ang Nagtubo.” Ang isa ka misyonero sang United Church of Christ ginreport nga nagsiling, “Wala gid sing paagi nga ang Cristianismo manggamot sa Hapon,” kag ang isa ka Franciscan nga pari nagsiling, “Ang adlaw sang tagaluwas nga misyonero sa Hapon tapos na.” Sila nga duha lunsay nga nagpangabudlay sa wala sing pulos sa kapin sa 30 ka tuig. Ang artikulo nagsiling: “Kubos sa 1% sang populasyon ang Cristiano, kag walay sapayan sang tanan nga ginhimo sang mga misyonero, ang porsiento naganubo.” Tama na para sa mga relihion sang Cristiandad! Apang kamusta ang mga Saksi ni Jehova, nga nagatudlo sing putli nga Cristianismo sa sadto nga pungsod? Sang nagligad nga 92 ka bulan sing pasunod, nagdugang ang kadamuon sang ila aktibo nga mga ministro, tubtob sa kataason nga 113,062 (lakip ang promedyo nga 46,390 ka payunir kada bulan). Sa Hapon, 146,316 ka pagtuon sa Biblia sa puluy-an ang ginadumalahan upod sa interesado nga mga tawo. Sa pagkamatuod palatandaan ini sang dugang pa nga pag-uswag. Makakita kita diri sing buhi nga katumanan sang Isaias 65:13, 14.
Ang Latagon sang Pagpayunir
Kamusta ang sentro sining tanan dinamiko nga hilikuton—ang Estados Unidos sang Amerika? Didto, 744,919 ka manugbantala sang Ginharian ang yara sa latagon subong kataason. Apang kinahanglan gid bala inang ‘mga misyonero sa kaugalingon nga pungsod’? Kinahanglan sila sa pagkamatuod, bangod ang krimen, droga, imoralidad, balatian, kag ang kalautan tapat pa nga nagalain sang sa kalabanan sang ginatawag nga paganong mga pungsod. Ang mga tawo nga nagahandum sing mas maayong mga butang nagakinahanglan sing palig-on kag paglaum, kag yara sa mga Saksi ni Jehova ina nga mensahe. (Isaias 61:1, 2; Mateo 24:14) Sa Estados Unidos sang 1986, ining mga ministro nakahugod sing 146,673,490 ka oras sa pagwali sing maayong balita sang Ginharian. Pag-uswag ina sing 12.6 porsiento, ukon 16,449,229 ka oras ang kalabawon sang sa nagligad nga tuig. Ina nga tion mapuslanon nga ginhinguyang, bangod 6,138,938 ka libro ang napahamtang, 23.2 porsiento nga pag-uswag sang sa nagligad nga tuig. Sang Abril lamang, 1,000,000 ka libro ang napahamtang nga nagapaathag sang matuod nga paglaum para sa paghidait kag kalig-onan.
Ang isa sang labing makapakunyag nga mga bahin sang report sang Estados Unidos amo ang pagdamo sang mga payunir. Sang Abril may kataason nga 45,786 ka regular payunir, 23 porsiento nga pagdugang sang sa nagligad nga tuig. Kon itingob mo ina nga numero sa promedyo nga 43,369 ka auxiliary payunir kag sa promedyo nga 279 ka espesyal payunir, magakahulugan ina nga kada bulan halos 90,000 ang nagawali sang Ginharian sang Dios subong payunir. Mga pamatan-on ini kag mga tigulang man nga maalamon nga nagagamit sang ila tion sa pagdayaw kay Jehova.
Paghatag sing Bug-os nga Panaksi
Sa pagpanudlo sa publiko kag sa balay kag balay, si apostol Pablo “nagpanaksi sing bug-os” sa maayong balita. (Binuhatan 20:20, 21) Ang kaanggid nga pagpanaksi ginahatag sa madamo nga teritoryo karon. Halimbawa, ining report naghalin sa Guadeloupe: “Sang matapos ang tuig sang pag-alagad, may yara kami isa ka manugbantala sa kada 72 ka tawo. Indi na paghambalon pa, kilala kami sa bug-os nga pungsod! Sa kamatuoran, sa madamo nga duog nagakadto kami sa amo gihapon nga teritoryo kada semana. Ang iban nagasiling nga natak-an na ang mga tawo sa pagtan-aw sa amon, ukon nga makapaluya nga kada semana amo lang gihapon nga teritoryo ang ginakadtoan. Apang sa kabaliskaran, sa dugang nga pagpanghikot namon sa teritoryo, dugang pa nga interes ang amon nasapwan. Kag ang pamatuod? Bueno, amo ang kataason sang nagligad nga Abril nga 7,136 ka pagtuon sa Biblia sa mga puluy-an nga ginhiwat sang amon 4,558 ka manugbantala! Kasan-o lang ang isa ka magasin may ulong-dinalan nga: ‘Mga Saksi ni Jehova—Mga Hari sa mga Ganhaan’! Ginakabig namon ina nga isa ka kadungganan. Sa sulod sang tuig sang pag-alagad, 458 ka bag-o nga kauturan nga lalaki kag babayi ang nabawtismohan.” Katutom kag kalipay sa pagpanghikot sa aton teritoryo sa liwat kag liwat, pagkilala kag pagpakig-abyan sa mga tawo, mahigugmaon nga pagbungkag sang ila wala sing kabangdanan nga kaugot—makadul-ong ini sa pagsapo sing madamo nga mga tulad-karnero.
Bugana nga ginapakamaayo ni Jehova ang iya mga alagad sa isa ka pungsod sang Aprika nga sa diin ang hilikuton ginadumilian kag nagadabdab ang inaway sibil. Sa sadto nga pungsod madamo sang aton kauturan ang ginbilanggo, kag ang iban sang pamatan-on nga mga Saksi ginpamatay. Apang, ang Abril may talalupangdon nga report, nga may napulo ka kataason. Ang bag-o nga kadamuon sang mga manugbantala nagdugang sing 29 porsiento sang sa nagligad nga tuig. Daw ano nga kakugi ang ginapakita sining mahal nga kauturan! Ang promedyo nga oras sang Abril kapin sa 18 sa kada manugbantala, kag ang pagtuon sa Biblia sa puluy-an 2.6 sa kada manugbantala.
Ang sekreto nga mensahe nga nabaton sang sanga talatapan nga nagaatipan sining teritoryo tuman na sa pagpaalinton sing pila ka ideya tuhoy sa nagaluntad nga mga kahimtangan. Ini mabasa: “Ang init padayon sa pagsakit sa amon. Ang panikasog nga kinahanglanon sa paglakat kag pangitaon ang isa pamatuod gid nga ginasalakay kami sang init. Apang nahibaloan namon nga ginhimo kita sa isa ka paagi agod makapasibu sa bisan anong temperatura kag bisan anong palibot. Walay sapayan sang tanan nga butang, nagabatas kami kag nagasalig nga makalampuwas kami.” Daku gid nga integridad!
Ang indibiduwal nga nagahupot sing integridad nagahuman sing nagahupot sing integridad nga organisasyon. Amo gid sina ang bilog-globo nga organisasyon sang 3,229,022 ka saksi ni Jehova! Nagalaum sila nga maluwas sa nagapakari nga “dakung kapipit-an” kag sa pag-ambit, sa idalom sang Ginharian ni Cristo, sa dakung hilikuton sa paghimo sang duta nga isa ka paraiso. (Bugna 7:14; 21:3, 4; Isaias 65:17, 21-23, 25) Nagahugyaw sila sa pagpakamaayo ni Jehova bisan karon sa ila makugi nga pagpanghikot, kon bala nagabantala sila sang pulong “sa maayo” ukon “sa malain nga panag-on.” (2 Timoteo 4:2) Ang masunod nga mga pahina nagapakita kon paano nila gintuman ang tema sang ila 1986 nga tuigan nga teksto: “Lakat kamo . . . , ibantala ang ginharian sang Dios.”—Lucas 9:60.
[Kahon/Laragway sa pahina 7]
Pila ka Bahin sang Bug-os Globo nga Report sang mga Saksi ni Jehova
Pag-uswag:
Kataason sang mga manugbantala: 3,229,022 6.8%
Binulan nga promedyo sang mga payunir: 391,294 21.2%
Kabilogan nga oras sang pagbantala: 680,837,042 15.3%
Promedyo nga pagtuon sa Biblia sa
puluy-an sa binulan: 2,726,252 14.6%
Kabilogan nga nabawtismohan sang 1986: 225,868 19%
[Tsart sa pahina 10-13]
REPORT 1986 NGA PAG-ALAGAD SANG MGA SAKSI NI JEHOVA SA BUG-OS KALIBUTAN
(Tan-awa ang tomo)
[Mga Laragway sa pahina 8, 9]
PAGPANAKSI “SA DAYAG KAG SA PAMALAYBALAY” “TUBTOB SA UKBONG SANG DUTA”
Davao Pilipinas
Venice Italya
Castle Combe Inglaterra
Gålå Norway
Kowloon Hong Kong
Taipei Taiwan
Queenstown New Zealand
Bolgatanga Ghana
Paris Pransya
Quetzaltenango Guatemala
Kerala India
Banff Canada