Ang Pagpanaksi Nagapatubas sing Pag-uswag sa Ginharian
“Kabay nga si Jehova . . . magpamuad sa inyo sing makalibo pa sa kadamuon ninyo karon, kag magpakamaayo sa inyo subong sang ginsaad niya sa inyo.”—DEUTERONOMIO 1:11.
1, 2. (a) Ano ang ginsaad ni Jehova sa Israel? (b) Paano niya gintuman ang iya mga saad, apang, depende sa ano?
SA KA LIBO KA PILO NGA PAG-USWAG! Amo ina ang ginpangabay ni Moises sa “pungsod nga balaan” ni Jehova, ang Israel. Si Jehova nanaad sing dalagku nga mga butang para sa sina nga pungsod. (Exodo 19:5, 6; tan-awa man ang Genesis 12:2, 3.) Gintuman bala niya yadto nga mga saad?
2 Bueno, mga 500 ka tuig sa tapos ginhambal ni Moises ang mga pulong sa hitaas, ginreport ini: “Ang Juda kag Israel madamu, subong sang balas nga yara sa baybayon sang dagat sa kadamuon, sila nagkaon kag nag-inum kag nagpangalipay.” Ang reyna sang Sheba, nga nagkari gikan sa malayo agod tan-awon ang pagkahalangdon sang iya ginharian, nagsiling kay Solomon: “Toloka! Ang katunga wala masugid sa akon. Ang imo kaalam kag kauswagan nagalabaw sa kabantogan nga akon nabatian. . . . Kabay nga pakamaayuhon si Jehova nga imo nga Dios . . . bangod ginahigugma ni Jehova ang Israel tubtob sa tion nga dinapat-od.” (1 Hari 4:20; 10:7-9) Tubtob nagaalagad sila sing matutom subong mga Saksi ni Jehova, ginbugana kag ginpauswag niya sila.
3. (a) Ano ang ginapanaksi ni Pedro tuhoy sa “katawhan sa iya ngalan” sang Dios? (b) Ngaa ang ngalan mga Saksi ni Jehova nagakaigo sa sina nga katawhan?
3 Sing kapin sa isa ka milyon ka tuig pagkatapos sang adlaw ni Solomon, si apostol Pedro, samtang nagapanaksi sa atubangan sang Cristianong nagagahom nga hubon sa Jerusalem, “nagsugid kon paano ang Dios nagduaw sing una sa mga pungsod sa pagkuha sa ila sing katawhan sa iya ngalan.” (Binuhatan 15:14) Ang mga Israelinhon nangin katawhan tungod sa ngalan sang Dios. Apang karon, sa liwat, ang Dios nagatipon sing “katawhan sa iya ngalan”—ang Cristianong kongregasyon, ang espirituwal nga Israel—nga magapanaksi man kay Jehova, nagapahibalo sang katuyoan sang iya Ginharian. (Galacia 6:16) Sing nagakaigo, ini nga mga tawo ginakilala karon sa bug-os nga duta sa ngalan nga ginhimu kag ginpabantog ni Jehova sa Isaias 43:10-12, ‘mga Saksi ni Jehova.’ Ano ang nadalahig sa ila pagkanangin katawhan sa ngalan ni Jehova?
“Saksi Ko”
4. (a) Ngaa ang mga Saksi ni Jehova dapat man mangin ‘mga saksi ni Jesus’? (b) Suno sa Kasulatan, ano nga halimbawa ang ginbilin ni Jesus sa pagpanaksi kay Jehova?
4 Si Jesus nagsugo sa sining katawhan, nga nagasiling: “Mangin saksi ko kamo . . . tubtob sa ukbong sang duta.” (Binuhatan 1:8) “Saksi ko”—ini bala nga mga pinamulong ni Jehova nagakahulugan nga kay Jesus lamang, kag indi kay Jehova, nga ihatag ang pagpanaksi? Indi! Sa sadtong makahalanguyos nga tion, sang ang kahamuot ginliton gikan sa undanon pakadto sa espirituwal, nagakaigo ang maghatag sing maid-id nga panaksi nahanungod kay Cristo nga sa iya ining bag-o nga kahimusan gintukod. Apang, si Jesus nagapabilin pirme nga napasakop sa iya Amay. Nagpahamtang sia sing halimbawa para sa aton sa pagpanaksi nahanungod sa ngalan kag Ginharian ni Jehova.—Juan 5:30; 6:38; 17:6, 26; 18:37.
5. (a) Nahanungod sa ano nga bahin may kahilabtanan kay Jesus dapat kita manaksi? (b) Sa sini, paano naton sundon ang mga tikang ni Jesus?
5 Si Jesucristo amo ang Manugpatunga sang bag-o nga katipan kag ang hinaplas nga mga Cristiano nga yara sa sini gintawag nga magapanubli sang Ginharian. Sia amo “Pangulo nga Ahente sang kabuhi” nga ginagamit ni Jehova sa paggawad sa katawhan gikan sa minatay. Si Jesus “magagahom subong hari” tubtob ang tanan nga kaaway sang Dios kag sang tawo mapasakop kag ang mahimayaon nga paraiso ipasag-uli sa sining duta. Sia amo “ang Anak sang Dios” nga nagatawag sa mga patay gikan sa ila lulubngan sa pagkabanhaw. (Hebreo 9:15; Binuhatan 3:15; Salmo 110:1, 2, 5; 1 Corinto 15:25-28; Lucas 23:42, 43; Juan 5:25-29) Busa, subong mga Saksi ni Jehova, nagapanaksi man kita nahanungod sa talalupangdon nga bahin sang Anak sa pagbindikar sa ngalan ni Jehova. Sa sini, ginasunod naton ang mga tikang sang aton Agalon, nga sia mismo ang talalupangdon nga saksi para kay Jehova—“ang Matutom nga Saksi.”—Bugna 1:5; 3:14; Juan 18:37; 1 Pedro 2:21.
Sin-o ang Nagapanaksi?
6. (a) Sin-o lamang karon ang nagahatag sing panaksi sa Ginharian? (b) Ngaa masiling nga nagahimu sila sing dalagku nga mga binuhatan?
6 Karon, ang nahiusa nga katawhan nagapanaksi “tubtob sa ukbong sang duta.” Amo ini ang katawhan nga ginahambalan ni apostol Pedro—ang ‘katawhan sa ngalan sang Dios’—nga nagapanaksi kay Jehova kag sa iya Ginharian paagi kay Cristo Jesus. Nahanungod sa sini, ginsilingan ni Jesus mismo ang iya mga disipulo: “Sia nga nagatuo sa akon magahimu man sa hilikuton nga akon ginahimu, kag himuon niya ang mga hilikuton nga labi pa sa sini, bangod magakadto na ako sa akon Amay.” (Juan 14:12) Gikan sa natuo sang iya Amay sa mga langit, ang Hari nga si Jesucristo nagatuytoy karon sa pinakamasangkad nga panaksi nga ginhimu diri sa duta. Subong sang gintagna ni Jesus, kon “ining maayong balita sang ginharian” “naibantala sa bug-os napuy-an nga duta nga panaksi sa tanan nga pungsod . . . ugaling magaabot ang katapusan.”—Mateo 24:14.
7. (a) Ngaa ang mga sekta sang relihion wala makapanaksi? (b) Sa kabaliskaran, ngaa ang mga Saksi ni Jehova makugi sa ila pag-alagad?
7 “Ining maayong balita sang ginharian” amo ang pinakamakakulonyag nga balita nga naibantala sa mga tawo. Amo ini ang mahimayaon nga maayong balita nahanungod sa sini ang relihioso nag mga sekta sang relihion sang Cristiandad bug-os nga naghipos. Wala sila sing paglaum sa Ginharian para sa palaabuton. Indi katingalahan nga wala sila nagapanaksi! Wala nila pagtalupangda ang pinakamakakulonyag sa bug-os nga maragtas—ang pag-abot sa himaya sang Ginharian sang Anak sang Dios agod maglingkod sa iya mahimayaon nga trono kag magahukom sa mga pungsod kag sa mga tawo sang pungsod. Amo ina ang dapat panaksihan! Busa, sa idalom sang angheliko nga pagtuytoy, ang mga Saksi kay Jehova kag kay Cristo nagapahayag karon sang “maayong balita nga dayon . . . sa mga nagapuyo sa duta, kag sa tagsatagsa ka pungsod kag kabikahan kag hambal kag katawhan.” Makugi bala ikaw nga nagapakigbahin sa sining pagpanaksi?—Bugna 14:6, 7; Mateo 25:31-33.
Daku nga Panaksi sang 1984
8. (a) Ngaa dapat kita magkalipay sa Report 1984 nga Pag-alagad sang mga Saksi ni Jehova sa Bug-os Kalibutan? (b) Ano ang nagaganyat sa bag-o nga mga disipulo?
8 Ang Report 1984 nga Pag-alagad sang mga Saksi ni Jehova sa Bug-os Kalibutan, nga makita sa mga pahina 20-23 sini nga magasin, nagapakita kon daw ano ka bugana ginpakamaayo sang aton Dios, si Jehova, ang mga panikasog sang iya mapainubuson nga mga saksi. Sa kabilogan, 203 ka duta ang ginarepresentar. Tuhoy sa sini, 172 ka duta ang nagareport sing pag-uswag sa mga manugbantala. Kag sing malipayon, ining mga manugbantala sang Ginharian nagahambal man kon paano ‘ginpahanabo sang Ginuo ang pag-uswag, huo, nagpabugana sini, sa gugma sa isa kag isa kag sa tanan.’ (1 Tesalonica 3:12) Ang mahigugmaon nga paghiusa sa tunga sang katawhan ni Jehova, upod ang panaksi sang Ginharian, nagaganyat sa kadam-an sang bag-o nga mga disipulo. Sa ila, si Jesus nagsiling: “Kamo makakilala sang kamatuoran, kag ang kamatuoran magahilway sa inyo.”—Juan 8:31, 32.
9. (a) Paano ikaw mangin mahimu nga may pribilehiyo nga makigbahin sa paghimu sining report? (b) Ano ang ginapakita sang mga kadamuon tuhoy sa kay Jehova kag sa iya katawhan?
9 Paano gintipon ining makatilingala nga report sang pag-alagad? Gintipon ini gikan sa mga report sa pag-alagad sa latagon nga imo—indibiduwal nga manugbantala sang Ginharian—matutom nga ginhatag kada bulan. Wala bala ikaw malipay nga ikaw may yara diutay nga bahin sa sining daku nga report? Ini nga mga kadamuon nagapakita kon daw ano ka makatilingala nga si Jehova ‘nag-ula sang pagpakamaayo’ sa iya mga Saksi—ining “katawhan sa iya ngalan”—nga iya ginhiusa sa tugob-globo nga higut sang mahigugmaon nga pag-alagad.—Malaquias 3:10; Salmo 56:10, 11; Colosas 3:14.
10. (a) Ano ang nagapadaku nga ang mga saksi dapat mangin masinakripisyuhon sa kaugalingon? (b) Ano ang ginasiling sang Kasulatan nahanungod sining mga nagahupot sing integridad kag sa ila padya?
10 Ang kalabanan sini nga panaksi ginhimu sa idalom sang paghingabot ukon kabudlayan kag sa daku nga pagsakripisyo sa kaugalingon. Amo sini ang paabuton, kay ang tinaga “saksi” subong gingamit diri amo ang pagbadbad sa Griego nga martýs ukon martyr, gikan sa sini naghalin man ang tinaga “martir,” nga nagakahulugan ang isa nga nagapanaksi paagi sa iya kamatayon. Nagapadaku ini nga kita subong mga Saksi ni Jehova, dapat mangin masakripisyuhon sa kaugalingon, pirme nga determinado nga gamiton ang aton kaugalingon kag huptan ang integridad sa idalom sang tanan nga sirkunstansia, bisan tubtob sa kamatayon kon kinahanglanon.—Lucas 9:23; ipaanggid ang Job 2:3; 27:5; 31:6; Binuhatan 22:20; Bugna 2:10.
Ginpakamaayo ang mga Nagahupot sing Integridad
11, 12. (a) Anong makapabakud nga pasalig ang ginahatag ni Jehova? (b) Paano nagmadinalag-on ang iya katawhan sa ibabaw sang totalitaryan nga mga pagpamigos?
11 Sa panahon sang paghingabot, ang ‘katawhan sa ngalan’ ni Jehova nagakinahanglan sing “gahom labaw sa kinaugali” agod landason ang makusog nga pagsalakay ni Satanas kag sang iya yawan-on nga mga kabon. Ginahatag ni Jehova ina nga gahom kag ginahilway kag ginabugana ang iya matutom nga mga Saksi. (2 Corinto 4:7-9; Isaias 54:17; Jeremias 1:19) Kuhaa halimbawa ang mga kahimtangan sa kagamhanan sang Axis sang Inaway Kalibutanon II, nga ginpangunahan sang Alemanya, Italya kag Hapon. Naggamit sang mapintas, diktatoryal nga mga pangulohan, ang Yawa ‘nagbuga sa iya baba sing suba’ sang paghingabot agod lumsan ang hilikuton nga pagpanaksi nga ginatuytuyan sang langitnon katulad-babayi nga organisasyon sang Dios. Apang nagmadinalag-on bala sila tanan sa sini? Wala gid! Ginmaniobra ni Jehova ang mga hitabo agod ang demokratiko nga mga pungsod sang duta magatulon sa sina nga baha. ‘Ang malaut gin-utod’ kag ang matutom nga mga Saksi ni Jehova karon nagabugana sing makatilingala sa sadtong mga duta.—Bugna 12:15, 16; Salmo 37:28, 29.
12 Sining karon lang, sa sadtong tatlo ka pungsod, ang Watch Tower Society nagkinahanglan nga magpatindog kag magsangkap sa daku nga pabrika agod ipadala ang lainlain nga sahi sang baha—minilyon ka minilyon nga mga Biblia kag may kahilabtanan sa Ginharian nga publikasyon para sa pagpabakod sa mga Saksi ni Jehova kag sa iban pa nauhaw sa kamatuoran nga mga tawo. Sa Alemanya, Italya kag Hapon, sa karon, kapin sa 300,000 ka manugbantala sang Ginharian ang nagadala sing panaksi sa mga kabalayan sang mga tawo. Kag sa bug-os nga kalibutan ginapakamaayo ni Jehova ang iya nagahupot sing integridad nga katawhan sing pagdugang!—Ipaanggid ang Salmo 115:12-15.
13. (a) Ano ang ginapakita sang Report sa Tuig nga ang matutom nga mga saksi nagpabilin sa 1984 nga tuigan nga teksto? (b) Paano kita sini dapat pahulagon?
13 Apang, ang Yawa, nakahibalo nga ang iya tion malip-ot, nagapadayon sa pagpakig-away sadtong “nagatuman sang sugo sang Dios kag nagapanaksi kay Jesus.” (Bugna 12:12, 17) Ang pagpamatok ni Satanas labi na nga mapintas sa mga kadutaan nga ginlista sa kaupod nga report subong “28 ka Iban nga Pungsod.” Ang mga Saksi sa sini nga mga teritoryo matutom nga nagpabilin sa aton tuigan nga teksto para sa 1984 “nagmasidla sing labi pa sa paghambal sang pulong sang Dios sa walay kahadlok.” (Filipos 1:14) Ang ila pag-uswag sa manugbantala nga 3.1 porsiento dalayawon! Ginpahulag sang ila halimbawa, kabay nga makugi kita nga magapadayon sa paghalad sa “Dios sing halad sang pagdayaw, nga amo, ang bunga sang mga bibig nga nagatu-ad sing dayag sang iya ngalan.”—Hebreo 13:15.
14. (a) Ano ang mahimu nga mangin kahigayunan sa aton “sa pagsaksi“? (b) Walay sapayan sang anong mga kahimtangan nga dapat kita padayon nga magpanaksi sing maisugon, kag ngaa?
14 Samtang nagalain ang mga kahimtangan sa kalibutan, ang iban sa aton, walay duhaduha, pagahingabuton, pagaitugyan sa hukmanan kag pagabilangguon. Si Jesus naghambal tuhoy sa sina nga mga eksperiensia sa tunga sang mga butang nga “malapit na mahanabo” antes ang katapusan, kag nagdugang: “Ini mangin kahigayunan ninyo sa pagsaksi.” Sa tanan nga mga kahimtangan, ang mga Saksi ni Jehova dapat nga magpanaksi sing padayon nahanungod sa Dios kag kay Cristo. Madamu ang nagapadayon sa paghimu sa sini walay sapayan sang mapait nga pagpamatok sang pamilya, pagyaguta sang kaupod nga mga empleyado ukon mga kabutho, ukon mga pasipala sa ila mga teritoryo nga ginabantalaan. Ikaw bala maisugon nga nagapanaksi walay sapayan sang mabudlay nga mga kahimtangan? Nian isa kamo sadtong ginsilingan ni Jesus: “Sa inyo pagbatas maangkon ninyo ang inyo mga kalag.”—Lucas 21:7, 9-19.
Pag-uswag sa Ginharian!
15. Ano ang pila ka talalupangdon nga mga punto sa tsart sa sining pahina?
15 “Pag-uswag sa Ginharian”—daw ano ka nagakaigo nga tema para sa distrito nga mga kombension sadtong 1984! Kay sa pagkamatuod amo ini ang pinakamaayo nga tuig sang pag-uswag. Tan-awa lamang ang tsart sa sini nga pahina! Gintipon ini gikan sa mga report sang 95 ka mga sanga sang Watch Tower Society nga nagadumala sa hilikuton nga pagpanaksi sa 203 ka kadutaan.
16. Sambita ang pila ka tipiko, makalilipay nga mga ekspresyon gikan sa palibot sang globo.
16 Wala ginapahanugot sang espasyo nga ibalhag namon ang tanan nasulat nga mga ekspresyon sang kalipay nga nabaton gikan sa sadtong sanga talatapan kaupod sang ila tuigan nga report, apang yari ang pila ka mga halimbawa gikan sa palibot sang globo:
Alaska: Ang bug-os nga minuro sang Metlakatla nakakita sing 230 ka mga Saksi ni Jehova nga nagpatindog sing isa ka matahom nga Kingdom Hall sa 32 ka oras; gindedikahan ini sang Domingo sadto man nga talipusposan sang semana.
Honduras: Ang 3,663 ka manugbantala amo ang amon pinakamataas nga kataason sa karon; bangod sang tumalambong sang Memoryal nga 17,005 kapin pa ang dapat nga hilimuon.
Brazil: Ang bag-o nga kataason naglab-ot sa 160,927 ka manugbantala, kag 474,450 ka tawo ang nagtambong sa Memoryal.
Thailand: Ang espiritu sa pagpayunir buhi, 22 porsiento sang kabilogan nga manugbantala ang nakigbahin sa sini sang Abril.
Papua New Guinea: Ang mataas nga mga auxiliary payunir nagdugang sing 91 porsiento; ang nagtambong sa Memoryal nag-uswag sa kapin sa 1000—tubtob sa 7,704.
Austria: Ang espiritu sa pagpayunir popular, kag may yara kami lima ka sunodsunod nga kataason sa sina nga latagon; may yara kami pito ka kataason sa mga manugbantala, ang pinakaulihi amo ang 15,618.
Zambia: Nalab-ot namon ang pinakamataas nga kataason nga 58,925 ka manugbantala: ang nagtambong sa Memoryal 393,431—110,447 sing kapin pa sang sa nagligad nga tuig.
17. (a) Paano nagasangkad ang latagon sang pagpayunir? (b) Anong praktikal nga mga tulumuron ang ginarekomendar, kag para kay sin-o? (c) Ano ang bag-o nga kataason sa mga manugbantala, kag ano ang mahimu nga nag-amot sa sini?
17 Ginapakita sang report nga ang matutom nga mga misyonero kag mga payunir nagapadayon sa pagpanguna sa pagpanaksi sa mga teritoryo nga bag-o kag daan. Makapalig-on gid nga makita ang pagdugang sa mga payunir. Ang kabug-osan sang mga auxiliary payunir nga nagreport sang Abril madasig nga nagdamu tubtob sa kataason nga 323,644 para sa 49-porsiento nga pag-uswag. Madamu sa ila ang nagahangop sa ila pribilehiyo nga mag-uswag agod mangin regular payunir. Dugang pa, madamu sang aton lamharon nga mga manugbantala sang Ginharian ang nagpahamtang subong ila tulumuron sang payunir nga pag-alagad kag nagahimu sing praktikal nga paghanda tungod sa sina nga katuyoan sa ila katapusan nga tuig sa hayskul. Ang kabilogan nga resulta ginpakita sa daku nga pagdugang sa mga payunir. Nagbulig man ini nga lig-unon ang espiritu sang kakugi sa aton mga kongregasyon, nagaamot, walay duhaduha, sa bag-ong bug-os kalibutan nga kataason nga 2,842,531 ka manugbantala, nga 7.2-porsiento nga pag-uswag sang sa 1983 nga kataason. Wala bala ikaw malipay nga ikaw nakigbahin sa sining abante nga pag-uswag?
18. (a) Ano ang iban pa dalagku nga pagdugang ang natabo sang 1984? (b) Ano nga posibilidad ang ginapakita sang report sa Memoryal tuhoy sa pagpasangkad, kag paano magahulag ang amon mga bumalasa?
18 Ang malipayon nga panaksi nga ginhatag sang 1984 ginpakita man sang dugang nga napahamtang nga mga magasin kag iban nga literatura, sang narekord nga kadamuon sang mga oras sa pag-alagad sa latagon nga ginreport, sang talalupangdon nga pag-uswag sang mga pagduaw liwat sa mga interesado kag sa mga pagtuon sa Biblia sa balay nga ginhiwat kaupod sini. Nagapaabot kita sa dugang pa nga bunga gikan sa sining makugi nga pag-alagad! Kag daku pa ang posibilidad para sa mas daku nga pagtipon! Ginpakita ini sang talalupangdon nga nagtambong sa Panihapon sang Ginuo sang nagligad nga Abril 15. Sa mga kongregasyon sang mga Saksi ni Jehova sa palibot sang duta, ang kabilogan nga 7,416,974 ang nagtambong kag sa ila 9,081 ang nagpakita nga bahin sila sang “diutay nga panong” sang Ginuo paagi sa pag-ambit sa tinapay kag alak. Kabay nga ang amon tanan nga mga bumalasa magapadayon sa pagtubo sa espirituwal, agod, nga magahatag sing hulot nga makigbahin sa daku nga pagpanaksi kag pagtipon nga yara pa sa unahan.—Ipaanggid sa Efeso 4:15; Filipos 1:9-11.
19. Tungod sa ano kita makapasalamat kay Jehova, kag ano ang aton pangamuyo nahanungod sa palaabuton?
19 Sa pagkamatuod, ginasulit namon ang ginsiling ni Moises tuhoy sa mga Saksi ni Jehova, ang modernong-adlaw nga “katawhan sa iya ngalan”: “Si Jehova nga inyo Dios nagpamuad sa inyo, kag yari karon, kamo sa sining adlaw subong sang mga bituon sa langit sa kadamuon.” (Deuteronomio 1:10) Ginapangamuyo namon nga ang aton Soberanong Ginuo, nga si Jehova, padayon nga magapabugana sang panaksi sa Ginharian kag magadugang sa pag-uswag!
Ano ang Imo Isiling?
◻ Ngaa ang mga Saksi ni Jehova dapat man nga mangin ‘mga saksi ni Jesus’?
◻ Ano nga daku nga panaksi ang ginhatag sang 1984?
◻ Ano ang nagapakita nga ginapakamaayo ni Jehova ang iya matutom nga mga saksi?
◻ Sa anong mga paagi dapat kita pahulagon sang 1984 nga report?
[Kahon sa pahina 26]
‘Masadya, Malipayon, Mapasalamaton’
Gikan sa isa ka pungsod diin ang hilikuton sang mga Saksi ni Jehova gindumilian sing kapin na sa 40 ka tuig naghalin ining report: “Ang pinakadaku nga kasadya nga [amon] naeksperiensiahan amo ang nagauswag nga pagbantala kag pagpanudlo nga hilikuton sa latagon. Madamu ang nagaalagad subong auxiliary payunir. Ang isa sa ila nagpabutyag sang iya balatyagon sa sining mga pulong: ‘Napuno ako sing kasadya kag kalipay kag hanuot nga kaayawan.’ Ang isa pa ka auxiliary payunir nagsiling: ‘Nalipay gid ako nga nakahimu ako sing kalahamut-an kay Jehova. Nakasugod ako sing lima ka bag-ong pagtuon sa Biblia sa balay.’ Ang isa pa nagsiling: ‘Nagapasalamat ako kay Jehova nga nagbulig sa akon nga palambuon ang gugma nga kinahanglan agod buligan ang iban nga tawo.’ Sa isa ka kongregasyon nga may 61 ka manugbantala 38 ang nag-axiliary payunir sa isa ka bulan. Subong resulta, 66 ka bag-ong pagtuon sa Biblia ang ginsugdan.”
[Tsart sa pahina 20-23]
REPORT 1984 NGA PAG-ALAGAD SANG MGA SAKSI NI JEHOVA SA BUG-OS KALIBUTAN
(Tan-awa ang tomo)
[Tsart sa pahina 25]
Pagpaanggid sa Bug-os Kalibutan nga Report
1984 1983 Pag-uswag
Sanga sang Watch Tower 95 94
Kadutaan nga Nagareport 203 205
Kataason sang Manugbantala 2,842,531 2,652,323 7.2%
Promedyo sang Manugbantala 2,680,274 2,501,722 7.1%
Promedyo sang Payunir 258,936 206,098 25.6%
Auxiliary Payunir (Abril) 323,644 217,860 48.6%
Kabilogan nga Oras sa Latagon 505,588,037 436,720,991 15.8%
Napahamtang nga Literatura 36,639,925 36,039,400 1.7%
Napahamtang nga Suskripsion 1,812,221 1,756,153 3.2%
Napahamtang nga Magasin 287,358,064 258,698,636 11.1%
Pagduaw Liwat 195,819,093 174,687,309 12.1%
Pro. nga Pagtuon sa Biblia 2,047,113 1,797,112 13.9%
Tumalambong sa Memoryal 7,416,974 6,767,707 9.6%
Nagpakigbahin sa Memoryal 9,081 9,292