Sosyal nga Ministeryo—Kon Paano Ini Nagaapektar sa mga Tawo

PAAGI lamang sa lima ka tinapay nga sebada kag duha ka magagmay nga isda, milagruso nga ginpakaon ni Jesucristo ang kapin sa 5,000 ka lalaki, babayi, kag kabataan sadtong mga panahon sang Paskua (Marso-Abril) sang 32 C.E. (Mateo 14:14-21; Juan 6:1-13) Bangod sang posible nga mahimo ni Jesus, luyag sang mga tawo nga himuon sia nga hari nila. Ayhan nagbatyag sila nga sarang niya sila maluwas gikan sa Romanong gota kag mapauswag ang ila pangabuhi. Ano ang sabat ni Jesus?

Sa baylo nga magpasugot sa ginapangabay sang kalabanan, si Jesus “naglikaw liwat sa mga bakolod nga sia lamang.” (Juan 6:15) Apang wala dayon mag-ampo ang kadam-an. Ginkadtoan nila sia liwat sang masunod nga adlaw. Namutikan ang ila tago nga motibo, ginsilingan sila ni Jesus: “Nagapangita kamo sa akon, indi bangod nga nakakita kamo sing mga tanda, kundi nga nakakaon kamo sang mga tinapay kag nabusog.” Nian gindugang niya: “Pangabudlay kamo indi tungod sang kalan-on nga nagakawala, kundi tungod sang kalan-on nga nagapadayon sa kabuhi nga walay katapusan.”—Juan 6:25-27.

Ano ang maton-an naton gikan sa sining kasaysayan? Lakip sa iban nga butang, nagapakita ini sing maathag nga paagi sa materyal nga mga benepisyo mahapos katama maganyat ang mga tawo. Apang, ang pagtukod sing matuod nga apresasyon sa espirituwal nga mga butang—mga butang nga may mapinadayon nga balor—tuhay gid katama nga butang. Sa karon, ang huyog sa pagtan-aw sang mga butang sa materyalistiko lamang nga punto-de-vista mas daku pa gid.

Makusog nga Ganyat sang Sosyal nga Ministeryo

Sa mata sang mga tawo sa mainuswagon nga mga pungsod, ang abanse nga mga pungsod sa Nakatundan nagarepresentar sa tanan nga kahigayunan kag materyal nga mga benepisyo nga maluyagan sang isa—mga kahigayunan nga indi matigayon sa ila kaugalingon nga pungsod. Ginakahisaan ang kabuganaan, ginailog ang estilo sang pagkabuhi. Ang kahigayunan para sa mas mataas nga edukasyon ginabutang sa atubangan sang halos tagsa ka estudyante subong pasaporte pakadto sa kauswagan kag kadalag-an. Bangod sina indi mabudlay hangpon kon ngaa ang sosyal nga mga programa sang dumuluong nga mga iglesia may makusog nga ganyat sa sining mga pungsod. Apang ano ang mga resulta?

Sa Sidlangan, halimbawa, ang kahanda sang mga tawo sa paghimo sang halos bisan ano nga ginapangabay sang mga iglesia agod makalipikar sa mga dulot ukon mga regalo nagpautwas sa mayagutaon nga ngalan “rice Christians.” Ang pinakamasubo nga bahin, siempre pa, amo nga kon mag-untat na gani ina nga mga bulig ukon mga suporta, ang interes sang mga tawo nagauntat man. Madamo sang mga rice Christian ang nagakadula nga daw aso. Sa amo, sa tunga sang mga Can­tonese, may bantog nga hulubaton nga ginabadbad sing subong sini: “Ang Dios nagahigugma sa kalibutan, apang ang kalibutan nagahigugma sa pulbos nga gatas.”

Bisan pa kalabanan sang mga grupo sa iglesia wala na nagapalakat sing mga programa sa pagbulig, luwas ayhan sa panahon sang kapahamakan, ang natabo sang nagligad nagbilin sing agi. Sa madamong mga taga-Sidlangan, ang mga iglesia pareho sa mga organisasyon sa buhat sang kaluoy, kag ang lamang nga rason sa pagkadto sa simbahan amo ang pagkuha, indi ang paghatag. Wala nila makita ang kinahanglanon nga maghimo sing personal nga sakripisyo para sa iglesia. Ini nga panimuot ginapakita, halimbawa, sa ila pangalag-ag sa pag-amot para sa literatura sa Biblia bangod, sa ila hunahuna, ang butang nga ginapatubas sang iglesia dapat nga wala sing bayad.

Ang paggamit sa iglesia subong paagi sa pagtigayon sang katuyoan sa madali makita sa patag sang edukasyon. Sa madamong mainuswagon nga mga pungsod, ang pagtigayon sing estilo Nakatundan nga edukasyon ginatamod subong ang sigurado nga paagi agod magbantog kag magmadinalag-on. Suno sa isa ka ginhalinan, sang panahon nga matigayon sang India ang independensia gikan sa Britanya, 85 porsiento sang mga katapo sang parliamento sina nga pungsod ang nag-eskwela sa “Cristianong mga eskwelahan.” Kag, suno sa panghunahuna ni Confucius, sa Malayong Sidlangan, ang mangin edukado amo ang isa sa pinakamataas nga tulumuron sa kabuhi. Natural, ginatamod sang madamo ang mga eskwelahan sang iglesia, nga sa kalabanan nagagamit sang Nakatundan nga mga paagi kag mga talaksan, subong paagi para mag-uswag. Kag, sa paglaum nga paeskwelahon ang ila kabataan sa ginapalakat sang iglesia nga mga eskwelahan kag ayhan sa pungsod sa luwas sa ulihi, madamong taga-Sidlangan nga mga ginikanan ang kinaandan nga nagasunod sa tradisyonal nga mga relihion ang malipayon nga nagakadto sa simbahan kag nagapalig-on sa ila kabataan nga himuon man ina.

Ano ang Bunga?

Kon ipaanggid sa mga iglesia sa tumandok nga lugar, ang misyon nga mga iglesia masami nga ginatambongan sing maayo. Sa amo madamong tawo ang ginapakilala sa mga panudlo sang iglesia kag sa pila ka ideya sang Cristianismo. Apang nakabulig bala ini sa ila nga mahangpan ang Biblia kag ang mensahe sini? Naghimo gid bala ini sa ila nga mga Cristiano, kon sayuron, mga sumulunod ni Jesucristo?

Kuhaa, halimbawa, si Kuo Tung, ang pamatan-on nga ginsambit kaina. Sang ginpamangkot kon bala nagatuo na sia karon sa Dios sa tapos makakadto sa simbahan sa malawig-lawig nga tion, nagsabat sia: “Wala. Ang pamatuod nga ang Dios nagaluntad wala paghambali.” Sa katunayan, ginbaton niya nga indi sia sigurado kon bala ang iya personal nga mga abyan nagapati sa personal nga Dios, bisan pa nga nagakadto sila sa simbahan kaupod niya. Nagkadto sila bangod lamang sa kahigayunan nga makatuon sing Ingles, siling niya.

Ang isa pa ka pamatan-on nagpauli para magbakasyon gikan sa kolehiyo sa Estados Unidos. Sang ginduaw sia sang isa ka Saksi ni Jehova, namangkot sia kon bala ang mga Saksi nagahiwat sing mga miting sa Ingles. Ngaa? “Agod indi ko malipatan ang akon Ingles,” siling niya. Sang ginsilingan sia nga ang mga miting ginahiwat sa tumandok nga hambal agod ang tanan makabenepisyo sa espirituwal, ang pamatan-on nagsiling nga magakadto sia kon diin ang Ingles nga mga miting ginahiwat makaduha sa isa ka semana.

Bisan yadtong mga nangin katapo na sang iglesia kag ginbawtismohan nagpakita sing diutay nga pagbalhin sa ila panimuot. Madamo sa ila ang nagapanguyapot gihapon sa ila anay mga pagtuluohan ukon mga batasan, sing masami upod ang pagpasugot, kon indi man ang pagpakamaayo, sang ila iglesia. Sa China, halimbawa, ang mga Romano Katoliko ginatugotan sa pagpadayon sang ila pagsimba sa mga katigulangan, bisan pa ginadumilian ini bisan diin. Ang mga plake nga nagapangabay sing pagpakamaayo sang dios sa ganhaan masami nga makita sa palibot sang mga ganhaan sang “Cristiano” nga mga puluy-an. Kag sa Okinawa, ang mga paglarawan sa sapat sang tumandok nga mga dios ginabutang sa mga kilid sang atop agod amligan ang pamilya.

Kamusta ang mga nakabenepisyo sa mga programa sang iglesia? Sa ila bag-ong nasapwan nga kalig-onan sa pinansial kag materyal, kinaandan na nga mabatian sila nga nagasiling nga ang sabat sa mga palaligban sa karon amo ang pagsalig sa kaugalingon. Ang resulta amo nga madamo sa ila ang bug-os nga nagbulag sang ila kaugalingon gikan sa bisan anong pagkanadalahig sa iglesia ukon, sa labing maayo, naghupot sang ila kaugalingon sa malayo gawa.

Ang mga misyonero sang mga iglesia may madamong matahom nga kahigayunan sa pagtudlo sa mga tawo kon ano ang ginatudlo sang Biblia. Apang sa baylo nga tudloan sila sang laygay ni Jesus nga “padayon, nian, nga pangitaa anay ang ginharian kag ang iya pagkamatarong, kag ining tanan iban pa nga butang idugang sa imo,” ginhatagan nila sing pagpadaku ang “iban pa nga butang.” (Mateo 6:33) Paagi sa ila sosyal nga mga programa, daku ang ila nahimo agod buligan ang mga tawo sa pisikal, sa mediko, kag sa edukasyon, apang ang mga benepisyo umalagi lamang. Bangod wala mag-aman sing espirituwal nga pagtamod, sing masami ina nga mga programa nangin insentibo lamang agod manikasog para sa dugang umalagi lamang, ukon kalibutanon, nga mga bentaha.

Ang mga iglesia nagsugod sa pagbantala sang ebanghelyo. Apang ang resulta, sa madamong hitabo, amo ang pagpauswag sa Nakatundan, materyalistiko nga dalanon sang kabuhi. Huo, nakatigayon sila sing madamong nakombertir. Apang subong sang nakita naton, madamo sa ila ang nangin labi ka kalibutanon kag nahuyog sa materyal sang sa nagligad. Sang adlaw ni Jesus, ginsilingan niya ang relihioso nga mga lider: “Nagalibot kamo sa kadagatan kag sa kadutaan sa paghimo sing isa ka pinaliso, kag kon pinaliso na sia, ginahimo ninyo sia sing makaduha pa nga anak sang Gehenna subong sa inyo.” (Mateo 23:15) Sa sining kahulugan, ang panikasog sang Cristiandad nga ibantala ang ebanghelyo paagi sa sosyal nga mga paagi nagbalandra. Wala gid ini magtuman sa sugo nga ginhatag ni Jesucristo: “Busa lakat kamo kag maghimo sing mga disipulo sa tanan nga kapungsoran, . . . nagatudlo sa ila nga tumanon ang tanan nga butang nga ginsugo ko sa inyo.”—Mateo 28:19, 20.