Mga Saksi ni Jehova sa Latagon sang Pagmisyonero

ANG mga misyonero sang mga Saksi ni Jehova sa Asia kag bisan diin masami ginapamangkot: “Ngaa wala kamo sing mga klase sa Ingles kaangay sang iban nga mga misyonero?” “May mga eskwelahan bala kamo nga mapaeskwelahan ko sa akon mga anak ukon mga ospital para sa masakiton?” Ang sabat, siempre pa, amo ang wala. Ngaa wala? Sa katunayan, ano ang tuyo sang mga Saksi? Kag ano ang ginhimo nila para sa mga tawo sa sining mga pungsod?

Tuhay sing mga Punto-de-Vista

Indi mapanghiwala nga ang mga misyonero sang Cristiandad nakakombertir sing madamo bangod sa sosyal nga mga serbisyo nga ginaaman nila. Apang bangod ina nga mga buhat gindirekta lamang sa pagpaayaw sa materyal nga mga kinahanglanon sang tawo sa baylo sang sa ila espirituwal nga mga kinahanglanon, ining mga misyonero wala magmadinalag-on sa paghimo sing matuod nga mga disipulo ni Jesucristo. (Mateo 7:22, 23; 28:19, 20) Sing labi pa ka importante, wala nila matudlo ang permanente nga solusyon sa sosyal nga mga palaligban nga ginatinguhaan nila nga malandas.

Sa pihak nga bahin, ang mga Saksi ni Jehova nabalaka sa labi pa ka importante nga sugo tuhoy sa pagbantala sang maayong balita sang Ginharian sang Dios. (Mateo 24:14) Indi ini bangod wala sila makahibalo ukon wala sila mabalaka sa tanan nga pag-antos sang tawo kag inhustisya nga nakita nila. Sa baylo, bangod kay nahibaloan nila nga ang lamang nga remedyo sa sining mabug-at nga mga palaligban nasandig, indi sa tawhanon nga mga kamut, kundi sa Ginharian sang Dios.—Salmo 146:3-10.

Amo gid sina ang ginbantala ni Jesus kag sang iya mga disipulo sang nahaunang siglo. “Kinahanglan ako magwali sang maayong balita sang ginharian sang Dios,” siling ni Jesus, “kay sa sining katuyoan ginpadala ako.” (Lucas 4:43) Gintudlo kag ginwali ni Jesus ang Ginharian sang Dios subong ang lamang bug-os nga remedyo, kay nahibal-an niya nga ang mga palaligban sang kalibutan tuman kadaku para landason sang tawo lamang. Bisan pa si Jesus naghimo sing madamong milagruso nga pagpang-ayo, ginpalig-on niya ang iya mga disipulo nga ‘pangitaon anay ang ginharian kag ang pagkamatarong [sang Dios], kag ining tanan iban pa nga butang idugang sa inyo.’—Mateo 6:33.

Sang ulihi, sang ginpadala ni Jesus ang iya mga disipulo, ginsilingan niya anay sila: “Kag wali sa nagakadto kamo, nga nagasiling, ‘Ang ginharian sang langit malapit na.’” Nian gindugang niya: “Ayoha ang mga masakiton, banhawa ang mga patay, ayoha ang mga aroon, sobola ang mga yawa.” (Mateo 10:7, 8) Ginapahamtang sina ang unahon sang modernong-adlaw nga mga disipulo ni Jesucristo. Sila man dapat maghimo sa pagbantala sang maayong balita sang Ginharian subong ang ila nahauna nga tuyo, sa ibabaw kag labaw sa paghimo sing mga buhat sa kaluoy. Amo sina ang ginapanikasogan sang mga misyonero sang mga Saksi ni Jehova nga himuon.

Pagpuno sa Espirituwal nga mga Kinahanglanon sang Tawo

Subong isa ka grupo sang mga Cristiano, ang mga Saksi ni Jehova nagahimo sing tingob nga boluntaryo nga mga programa sa pag-aman sang literatura sa Biblia para sa mga tawo. Subong mga manugbantala sang maayong balita, interesado sila sa pagbulig sa iban nga makabenepisyo gikan sa kaalam kag laygay sang Biblia, sa karon kag sa palaabuton. (Salmo 68:11) Ngaa amo sini?

Nahibaloan sang mga Saksi nga kon ang mga tawo mabuligan sa paghangop kag pagsunod sa laygay sang Biblia, masangkapan sila sing labi sa pag-atubang sa mga palaligban kag mga pag-ipit sang kabuhi. Sa isa ka bahin, matigayon nila ang kalig-onan sa moral nga kinahanglan agod malandas ang nagaulipon kag nagahalit sa lawas nga mga batasan subong sang pagsigarilyo, lakas nga pag-inum, pag-abuso sa droga, mapigaw nga katinlo, pagsugal, kag pagkasalamwanan sa sekso. Sa pihak nga bahin, ang kamatuoran sang Biblia nagabulig sa ila sa pagpamat-od, nagahatag sa ila sing katuyoan sa kabuhi kag realistiko nga paglaum para sa palaabuton.

Sa amo, paagi sa pag-aman sing pinakamataas nga dagway sang edukasyon—nga naghalin sa Pulong sang Dios, ang Biblia—ang mga Saksi ni Jehova nagahimo sing direkta nga kontribusyon sa pagpataas sa moral kag pisikal nga kapagros sang komunidad nga ila ginapuy-an kag ginabantalaan. Masunson ini nakita sang iban nga nagapanilag sa ila. Halimbawa, si Dr. Bryan Wilson sang Oxford University, nga nagtuon sang mga hilikuton sang mga Saksi ni Jehova sa Aprika, nagsiling sa isa ka sulat sa London Times:

“Ang mga Saksi ni Jehova mapisan kag sing masami mas mahunahunaon kag makugi sang sa kinaandan sa tunga sang ila mga masigka banwahanon. Ginalaygayan sila sang ila mga lider nga bayaran sing maaga ang ila mga buhis, untatan ang kasingki, kag likawan ang paghimo sing sala. Sila mahusay, bunayag kag kalma. Ini nga mga balor daku sing importansia sa ekonomiya kag sosyal nga kahimtangan sang Nakatundan nga katilingban, kag indi pagpasobra ang magsiling nga ang mga Saksi ni Jehova amo ang labing matadlong kag makugi nga banwahanon sang mga pungsod sa Aprika.”

Sa kaanggid nga mga pulong, ang isa pa ka tagpanilag sa Nabagatnan nga Amerika nagsiling sini sa editoryal sang isa ka pamantalaan:

“Ang mga Saksi ni Jehova mapisan, bunayag, mahinadlukon sa Dios nga mga tawo. Konserbatibo sila kag mahigugmaon sa tradisyon kag ang ila relihion napasad sa mga panudlo sang Biblia.”

Gani samtang wala ginapadaku sang mga Saksi ni Jehova ang ginatawag nga sosyal nga ebanghelyo, aktibo sila nga nagaamot sa intereses sang komunidad paagi sa pagbulig sa iban nga ipahisuno ang ila kabuhi sa mataas nga mga talaksan sang Biblia. (Roma 12:1, 2) Sing labi pa ka importante, ginabuligan man nila ang mga tawo sa tanan nga lugar sa pagtan-aw lampas sa mga inhustisya kag indi pagkapalareho sining madasig nagalain nga sistema sang mga butang pakadto sa bag-ong sistema sang Dios, nga magaabot sa dili madugay.—Bugna 21:5.

[Mga Laragway sa pahina 8, 9]

Mga Solusyon sang Ginharian sang Dios sa Sosyal nga mga Kalautan

Basaha sa inyo kaugalingon nga Biblia ang masunod nga mga kasulatan kag maumpawan sa pagtan-aw kon paano nagasaad ang Dios sa pagdula sa mga palaligban kag sosyal nga mga kalautan karon sa masunod nga mga bahin:

Kapagros Isaias 33:24; 35:5, 6; Bugna 21:4

Edukasyon Isaias 11:9; Habacuc 2:14

Palamugnan Isaias 65:21-23

Kalan-on Salmo 67:6; 72:16; Isaias 25:6

Hustisya Isaias 11:3-5; 32:1, 2