Dumilian ang Kabataan sa mga Miting?

‘ANG mga lapsag kag kabataan indi gid pagdalhon sa balay sang Dios.’ Amo sina ang ginsiling sang kilala nga komentarista sa Biblia nga si Adam ­Clarke. Sa pagkamatuod, naghatag sia sing konsiderasyon sa imol nga iloy nga ‘wala sing tawo nga mabilinan sang iya anak.’ Ina sila matugutan sa pagdala sang ila kabataan sa simbahan “bisan pa indi kombenyente sa kongregasyon, kag sa pila ka ministro, nga mabatian ang hibi sang bata.”

Ginpasad ni Clarke ang iya pagpamatok sa kabataan sa teksto sang Biblia sa Nehemias 8:2, nga mabasa: “Kag si Esdras nga saserdote nagdala sang kasugoan sa atubangan sang pagtilipon, nga mga lalaki kag mga babayi kag sang tanan nga makapamati nga may paghangop.” Apang, ina nga paghangop nagasumpakil sa espiritu sang Deuteronomio 31:12: “Tipuna ang katawhan, ang mga lalaki kag ang mga babayi kag ang mga magamay . . . agod nga mamati sila kag makatuon.”—Tan-awa ang 2 Timoteo 3:15.

Bangod sini, daw indi mahimo nga sang ginhimos ni Nehemias ini nga pagtipon may ginpuwera sia. Sa baylo, ang katuyoan sang pangagda mahimo nga amo nga ilakip ang tanan nga “makapamati nga may paghangop,” agod palig-unon nga makigbahin sing bug-os! Daw ano ka indi makatarunganon nga pangabayon ang mga ginikanan nga ibilin ang ila kabataan nga wala sing bantay!

Sing makawiwili, ang mga Saksi ni Jehova karon ginapalig-on nga dalhon ang ila mga lapsag kag kabataan sa Cristianong mga miting. Matuod, kon kaisa mahimo nga magtuga ini sing diutay nga mga tublag kag sing kabudlayan sa mga ginikanan. Apang ang Cristianong mga ginikanan nagapanikasog sa paghanas sa ila kabataan nga magpungko sing hipos. Sa ulihi ang ila mga magamay ‘magapamati nga may paghangop’ kag magakuha sing nagahatag-kabuhi nga impormasyon.—Hebreo 10:24,25.