Mga Pamangkot Gikan sa mga Bumalasa

◼ Ano ang buot silingon sang 2 Samuel 18:8, nga nagasiling: “Ang kagulangan naghalunhon sing madamo pa nga katawhan sang sa ginhalunhon sang espada”?

Gin-agaw sang maambong nga anak ni Hari David nga si Absalom ang trono kag nagtiklod sa iya amay nga magpalagyo sa Jerusalem. Pagkatapos sadto, sa kagulangan sang Efraim (ayhan sa sidlangan sang Suba sang Jordan) nag-away ang mga puersa ni Absalom kag ang mga matutom sa gintangdo nga hari ni Jehova, nga si David. Ang kasaysayan sa 2 Samuel 18:6, 7 nagasugid nga sa mainit nga inaway napatay sang mga tinawo ni David ang 20,000 ka rebelde. Sing bahin, ang masunod nga bersikulo nagadugang: “Kag ang kagulangan naghalunhon sing madamo pa nga katawhan sang sa ginhalunhon sang espada.”

Ang iban nagasiling nga nagapatuhoy ini sa rebelde nga mga soldado nga gintukob sang mga sapat nga mapintas nga nagapuyo sa kagulangan. (1 Samuel 17:36; 2 Hari 2:24) Apang wala ina nagakahulugan sa literal nga paghalunhon sang mga sapat, kundi nga ang “espada” literal nga naghalunhon sadtong napatay sa inaway. Sa pagkamatuod, ang inaway “naglapnag sa bug-os nga kadaygan sang duta.” Gani ang mahimo pa nga paathag amo nga ang nagpalagyo nga tinawo ni Absalom, nga nagasinalasala nga nagpalagyo sa batuhon nga kagulangan, mahimo nga nahulog sa mga buho kag natago nga mga pil-as, kag nagtupa sa madabong nga mga tanum sa ubos. Sing makawiwili, ang kasaysayan padayon nga nagasugid nga si Absalom mismo nangin biktima sang kagulangan. Ayhan bangod sang iya madamol nga buhok, nagsangit sia sa isa ka daku nga kahoy, nga sa amo walay mahimo nga ginpatay sia ni Joab kag sang iya tinawo. Ang bangkay ni Absalom ‘ginhulog sa daku nga buho sa kagulangan, kag gintampukan sa ibabaw niya sing daku gid nga tinumpok sang mga bato.’—2 Samuel 18:9-17.