Mga Pamangkot Gikan sa mga Bumalasa

◼ Nagakaigo bala para sa Cristiano nga tugutan ang au­top­sy sa isa ka paryente?

Ang Biblia wala sing direkta nagakomento tuhoy sa au­top­sy, apang may yara pila ka may kaangtanan nga panghunahuna sa Biblia nga sarang mabinagbinag sang isa ka Cristiano. Nian ang personal nga desisyon sarang mahimo sa kapawa sina nga mga teksto kag sang nadalahig nga mga kahimtangan.

Ang au­top­sy isa ka eksaminasyon sa bangkay nga nagagamit sing pag-opera agod matukiban ang kabangdanan sang kamatayon. Makahatag man ini sing impormasyon nahanungod sa mga epekto ukon mekanismo sang balatian. Ang iban sang relihioso nga pagtamod sa au­top­sy naapektohan sang dimakasulatanhon nga mga panudlo. Halimbawa, ang isa ka Katoliko nga ensiklopedia nagasiling: “Ang lawas sang napatay dapat tahuron subong amo anay ang puluy-an sang iya kalag . . . Gintalana ini nga magabangon upod sa iya kalag, sa kabilugan nga pagkabanhaw, padulong sa dayon nga kabuhi . . . Mahimo nga may yara lang-at nga tion sa ulot sang medikal nga kamatayon kag sang pagtaliwan sang kalag.” Apang, ginapakita sang Biblia nga kon ang isa ka tawo (isa ka buhi nga kalag) mapatay, sia mangin patay nga kalag. (Genesis 2:7; 7:21-23; Levitico 21:1, 11) Kamusta naman ang iya lawas? Tuhoy sa “mga anak sang mga tawo” kag sa “mga sapat,” aton mabasa: “Sila tanan gikan sa yab-ok, kag sila tanan nagabalik sa yab-ok.” (Manugwali 3:18-20) Sa pagkabanhaw, indi pagbanhawon sang Dios ang lawas nga madugay na nangin yab-ok, kundi magaaman sia sing lawas suno sa iya nahamut-an.—Tan-awa ang 1 Corinto 15:38, 47, 48.

Ang isa pa ka bahin sang Biblikanhon nga pagtamod sa mga patay sarang mabinagbinag may kaangtanan sa au­top­sy. Ang Dios nagsugo sa Israel: “Dili ninyo pagpilasan ang inyo unod bangod sa patay, kag dili ninyo pagbutangan sing bisan ano nga pika ang inyo kaugalingon. Ako si Jehova.” (Levitico 19:28; Deuteronomio 14:1, 2; Jeremias 47:5; Miqueas 5:1) Huo, indi dapat pagsundon sang katawhan sang Dios ang mga pungsod sa palibot sa pagpilas sang ila unod subong tanda sang pagkasubo sa napatay ukon bangod sa iban pa nga kabangdanan sang dimatuod nga relihion. Ining sugo mahimo gid nga nagpalig-on man sa mga Israelinhon nga magpakita sing pagtahod sa ila lawas subong mga tinuga sang Dios.—Salmo 100:3; 139:14; Job 10:8.

Ang Cristiano dapat man magpakita sing nagakaigo nga pagtahod sa ila kabuhi kag lawas, nga ila gindedikar sa Dios. (Roma 12:1) Ang iban naghinakop nga ang ini matinahuron nga pagtamod sa lawas dapat magdihon sang ila panghunahuna nahanungod sa au­top­sy. Ginbatyag nila nga kon wala sing importante gid nga rason, mas pakamaayuhon nila nga ang bangkay sang hinigugma nga paryente indi maau­top­sy. Ayhan nahibaluan nila nga sa iban nga mga duog ang dugo nga ginkuha gikan sa mga bangkay gingamit sa mga pagtayon ukon sa iban nga mga katuyuan, kag indi nila luyag makaambit sa sini.a

Ti, ngaa, nga gintugutan sang iban nga mga Cristiano ang au­top­sy? Narealisar nila nga ang Biblia wala sing talangkod nagakomento sa sini nga paagi sang medisina. Ayhan natalupangdan man nila nga ang mga Israelinhon sa Egipto anay nagtugot sa Egiptohanon nga mga manugbulong sa pag-embalsamar kay Jacob kag kay Jose, nga mahimo gid nga nagdalahig sing operasyon agod kuhaon ang nasulod nga mga organo. (Genesis 50:2, 3, 26) Sa pila ka kaso karon, ang kasuguan sang pungsod nagapatuman sang au­top­sy. Halimbawa, kon ang isa ka pamatan-on kag mapagros nga tawo mapatay nga wala sing maathag nga kabangdanan, mahimo nga imando ang au­top­sy. Maathag nga kon ginapatuman sang kasuguan ang au­top­sy, ginadumdom sang mga Cristiano ang laygay nga “magpasakop sa superyor nga awtoridad.”—Roma 13:1, 7; Mateo 22:21.

Bisan sa kaso sang isa ka tawo nga ginaatipan sang doktor, kag indi mahibal-an ang ginbangdan sang kamatayon, ang au­top­sy mahimo nga maghatag man sing makabulig nga impormasyon. Mahimo nga luyag mahibaluan sang biniyaan nga kabataan ang sibu nga kabangdanan agod madugangan ang impormasyon nahanungod sa medikal nga maragtas sang pamilya. Ina nga impormasyon makaapektar sa bitula sang kabuhi ukon pagpabulong sa palaabuton sang ila pamilya. May iban pa nga mga rason kon ngaa gintugutan sang iban ang au­top­sy. Ang report tuhoy sa au­top­sy nga ginapamatud-an sang mga tisyu nga naton-an mahimo makabulig sa isa ka pamilya agod makalipikar para sa mga benepisyo sang mga biniyaan, subong sang paghatag sing pamatuod sa balatian sa baga nga may kaangtanan sa pagmina sing karbon. Ang iban nagbatyag nga ang au­top­sy makadugang sing kalinong sa ila hunahuna paagi sa pagbulig sa ila sa paghangop kon ano ang ginbangdan ukon indi ginbangdan sang kamatayon sang ila hinigugma. Mahimo nga madalahig man ang mga tawo sa guwa sang pamilya. Ang mga paryente mahimo sinsero nga magabatyag nga ang pagtugot sa au­top­sy makabulig sa manugbulong sa paghangop sang dalanon sang balatian, kag sa amo mahimo masangkapan sia sing mas maayo sa pagbulong sa iban.

Busa, nagakaigo para sa mga Cristiano nga magpakita sing pagtahod sa ila lawas, apang may yara iban pa nga mga butang nga ila mabinagbinag sa pagpamat-od kon bala tugutan ang au­top­sy sa isa ka partikular nga kahimtangan.

[Footnote]