Ano ang Katuyuan sang Tagna?
ANG mga nagapangangkon nga ang ila nanuhaytuhay nga porma sang pagsimba mga bugna gikan sa labaw sa tawo nga mga ginhalinan nagabaton man nga may yara maayo kag malain nga labaw sa kinaugali nga mga gahom. Ining pagbaton nagapautwas sining mga pamangkot: Ginbugna bala ang tagsatagsa sining mga porma sang pagsimba gikan sa maayong ginhalinan? Ukon malain bala ang ginhalinan sini? Diin ang gin-inspirar sang matuod nga Dios?
Ang Una nga Relihion
Ang katawhan ginakilala nga isa ka pamilya, kag nahisanto ini sa kasaysayan sang Biblia tuhoy sa orihinal nga paris, sanday Adan kag Eva. Si Jehova, nga Manunuga, nagpakilala sa ila. Ginpahayag niya kanday Adan kag Eva ang ila papel sa iya katuyuan kag ang ila matuod nga kaangtanan sa iya. Ginhimo sang Dios si Adan subong iya una nga manalagna, nga may salabton sa pagpaliton sining balaan nga mga kapahayagan sa iya asawa kag sa ulihi sa ila mga anak, kon sayoron, ang tanan nga katawhan.—Genesis 1:27-30; 2:15-17.
Amo lamang ini ang relihion, ang isa ka porma sang pagsimba nga ginpahayag ni Jehova nga Dios. Ginpabutyag ini paagi sa pagkamatinumanon sa kabubut-on sang Dios. Wala sing mga rito, mga halad, mga altar, ukon mga orakulo nga ginkinahanglan.
Naglutaw ang Dimatuod nga Relihion
Ang una nga nagasumpakil nga “bugna” naghalin sa isa ka anghel nga naghandum nga simbahon. Nagtanyag sia sing tal-us sa matuod nga relihion kag ginhaylo niya sanday Adan kag Eva sa pagbuylog sa iya sa pagrebelde batok sa ila Manunuga. Naghimo ini sa iya nga Satanas, manugpamatok kay Jehova. Ang iya “tagna” nagpakunokuno sa pagtanyag sing pagdesisyon sa kaugalingon kag kahilwayan gikan sa Dios. Sa baylo, nagdul-ong ini sa pagkaulipon kay Satanas kag sa sala, kag nagdala sing kamatayon.—Genesis 3:1-19; Mateo 4:8-10; Roma 5:12.
Ginbuylugan si Satanas sang ulihi sang iban pa rebelyuso nga mga anghel, ukon mga demonyo. Wala sing duhaduha nga nagpadamo ini sa dimatuod nga relihioso nga mga pagpati nga nag-amot sa pagpalain sa katawhan. Sang kaadlawan sang apo ni Adan nga si Enos, “ang mga tawo nagsugod sa pagtawag sa ngalan ni Jehova.” Suno sa Targum of Palestine, ginhimo ini sing mapasipalahon subong bahin sang idolatroso nga pagsimba sadto nga tion.—Genesis 4:26; 6:1-8; 1 Pedro 3:19, 20; 2 Pedro 2:1-4.
Napapas ang dimatuod nga relihion sa Anaw sang adlaw ni Noe, kag ang nabilin lamang amo ang matuod nga porma sang pagsimba nga ginbuhat sang manalagna ni Jehova nga si Noe. (Genesis 1:5-9, 13; 7:23; 2 Pedro 2:5) Apang, yara gihapon ang mga demonyo kag nagtudlo sila liwat sing huwad nga mga tagna kag relihioso nga mga pagtuluohan. Gintuytuyan nila ang mga kaliwat ni Noe nga paakigon si Jehova paagi sa pagtukod sing siudad sang Babel subong sentro sang dimatuod nga pagsimba. Apang gingumon sang Dios ang ila hambal kag ‘gikan didto ginpaaplaag sila sa kadaygan sang bug-os nga duta.’—Genesis 11:1-9.
Ano ang ginasugid sa aton sining tanan? Kita tanan kaliwat ni Noe kag ni Adan. Gani ang tanan nga kultura may isa ka ginhalinan kag nagtipig sing pagpati sa Dios subong agi sang ihibalo nga nakalampuwas gikan sa adlaw ni Noe. Apang ining sadsaran nga pagpati ginpatiko sang dimatuod nga relihiosong mga ideya nga napanubli gikan sa mga katigulangan nga nag-aplaag gikan sa Babel (sang ulihi ginpasag-uli nga Babilonia) padulong sa tanan nga bahin sang duta. Makita ini sa kinaandan nga mga disparatis nahanungod sa espiritu sang mga patay, sa pagsimba sa katigulangan, kag sa pagbuhat sing astrolohiya, pagpamakot, kag pangaswang.—Daniel 2:1, 2.
Ang Katuyuan sang Tagna
Nagakahulugan bala ini nga ang mga relihion karon napasad lamang sa mga ideya nga ginpanubli sadto anay? Wala. Si Satanas kag ang mga demonyo nagainspirar gihapon sing tagna sa paglimbong kag sa pagbahinbahin sa katawhan, sa paggumon sang matuod nga mga bugna nahanungod sa Dios, kag sa pagtukod sing dimatuod nga mga ideya kag mga relihion. (1 Timoteo 4:1; 1 Juan 4:1-3; Bugna 16:13-16) Ang Biblia nagasiling: “May dimatuod nga mga manalagna man nga naglutaw sa katawhan, subong nga sa inyo man magalutaw ang dimatuod nga mga manunudlo. Ini sila tago nga magapasulod sing malaglagon nga mga sekta.”—2 Pedro 2:1.
Sa pihak nga bahin, gintipigan ni Jehova ang matuod nga relihion nga ginhatag sa Eden. Nagdugang sia sing impormasyon agod padakuon ang aton ihibalo tuhoy sa iya kag ang aton salabton sa pagpanghikot sang iya katuyuan. Gani ginapakilala sang matuod nga mga tagna ang kamatuoran nahanungod sa Dios, sa iya kabubut-on, kag sa iya moral nga mga talaksan. Ginapaathag nila ang kaangtanan sang tawo sa iya agod ipahisanto liwat ang katawhan sa iya katuyuan, nga magadul-ong sa bug-os nga katumanan sini.—Isaias 1:18-20; 2:1-5; 55:8-11.
Sang magsugod ang pagrebelde sang tawo, nagpamulong si Jehova sing tagna nga naghatag sing paglaum sa mga anak ni Adan kag ni Eva. Ginpahayag niya nga may manluluwas nga magaabot, ang “binhi,” nga magalaglag kay Satanas kag sa iya mga kaliwat. (Genesis 3:15) Ang mga tagna sang ulihi nagbulig sa pagpakilala sining ginsaad nga “binhi,” ukon “hinaplas” sang Dios, kag nagpahayag nga magatungod sia sing una nga papel sa katumanan sang mga katuyuan sang Dios.—Salmo 2:2; 45:7; Isaias 61:1.
Sa amo ang una nga katuyuan sang tagna amo ang pagpakilala sa mga katuyuan sang Dios kag sa “hinaplas,” ukon “Cristo,” nga paagi sa iya matuman sila. Sanglit ining pinili napamatud-an nga amo si Jesus, ang anghel ni Jehova nagsiling: “Simbaha ang Dios; kay ang pagpanaksi kay Jesus amo ang nagainspirar [ukon, amo ang espiritu] sang pagpanagna.” (Bugna 19:10) Duha ka kamatuoran ang ginpaathag sini nga kapahayagan. Una, wala sing ahente sang matuod nga tagna ang magapangayo nga simbahon bangod ang matuod nga pagsimba para lamang kay Jehova nga Dios. (Mateo 4:4; Juan 4:23, 24) Ikaduha, ang katapusan nga tulumuron sang tanan nga matuod nga tagna amo ang pagpahayag sing mga hitabo kag mga kamatuoran nga naangot kay Jesus. Ginakilala sini ang yabi nga papel nga ginhatag ni Jehova sa iya sa pagpanghikot sang Iya katuyuan sa pagpakabalaan sang Iya ngalan kag sa pagpasag-uli sang duta sa nagakaigo nga duog sini anay sa Iya kahimusan sang mga butang.—Juan 14:6; Colosas 1:19, 20.
Bangod sini, ang inspirado nga mga mensahe gikan sa Dios nagatudlo una sa tanan kay Jesus. Ang bug-os nga espiritu, ukon katuyuan sang matuod nga tagna amo ang pagpanaksi sa iya. Dugang pa, ang pagkatuman sang mga tagna kay Jesus nagatanda sa ila subong matuod. Amo kon ngaa ang Biblia nagasiling nga “ang kamatuoran nag-abot paagi kay Jesucristo.” “Kay bisan pa daw ano kadamo ang mga saad sang Dios, nangin Huo sila paagi sa iya.”—Juan 1:17; 2 Corinto 1:20; Binuhatan 10:43; 28:23.
Ngaa sa mga Israelinhon?
Ginsugdan ni Jehova ang iya “pagpanaksi kay Jesus” paagi sa iya tagna nahanungod sa ginsaad nga “binhi.” Ginpahayag sang ulihi sang Dios ang dutan-on nga kaliwat sang “binhi” nga magaagi kanday Noe, Sem, Abraham, Isaac (indi Ismael), kag Jacob. Ining mga tawo nagpabilin nga matutom sa matuod nga relihion, sa amo nagpamatuod sang ila kaugalingon subong matutom nga mga manalagna ni Jehova samtang ang tanan nga pungsod ginpatiko sang pagsimba sa dimatuod nga mga dios. (Genesis 6:9; 22:15-18; Hebreo 11:8-10, 16) Ang kaliwat nagpadayon paagi sa mga kaliwat sining mga tawo—ang pungsod sang Israel kag labi na sa pamilya ni David, ang labing kilala nga hari sang Israel.—2 Samuel 7:12-16.
Sa pagpakita kon ngaa ginpili niya ang Israel, si Jehova nagsiling: “Indi bangod pinakamadamo kamo sa tanan nga katawhan . . . [kundi] bangod sang pagtuman niya sa iya sumpa . . . sa inyo mga ginikanan,” nga sanday Abraham, Isaac, kag Jacob. (Deuteronomio 7:6-8; 29:13) Matuod gid man nga isa lamang ka pungsod ang makahatag sing kaliwat para sa ginsaad nga “binhi.” Apang, ang matuod nga relihion wala ginlimitehan sa mga Israelinhon. Bisan pa ang mga kapahayagan sang kamatuoran wala ginhatag sa iban nga mga pungsod, ang mga indibiduwal gikan sa tunga nila nakabuylog sa Israel sa pagsimba, kag ang iban sa ila sini ginlakip sa kaliwat sang “binhi.” (Numeros 9:14; Rut 4:10-22; Mateo 1:5, 6) Ang magkatuhay nga mga kapahayagan nga ihatag sa mga kaliwat sang pungsod ukon rasa magatuga lamang sing relihioso nga pagbinahinbahin, bisan pa kabubut-on ni Jehova nga isahon ang katawhan sa isa ka pagsimba.—Genesis 22:18; Efeso 1:8-10; 2:11-16.
Ang mga kinahanglanon sang Dios pareho para sa tanan nga rasa. Sanglit wala sia nagabalhin sa iya moral nga mga talaksan kag katuyuan, ang iya mga pagpakig-angot sa Israel nagpakita kon paano sia magapakig-angot sa kaanggid nga mga kahimtangan sa bisan ano nga tion. (Malaquias 3:6) Gani nangin modelo ang Israel para sa tanan nga pungsod. Paagi sa sini ginpasundayag sang Dios ang mga kaayuhan sang matuod nga pagsimba kag ang kabuangan sang dimatuod nga mga kulto. Samtang nagpabilin ang mga Israelinhon nga matutom sa iya, gin-amligan kag ginpakamaayo niya sila. Sang magliso sila sa dimatuod nga mga dios sang iban nga mga pungsod, ginpigos sila sadto nga mga pungsod, subong sang ginpaandam sa ila ni Jehova.—Deuteronomio 30:15-20; Daniel 9:2-14.
Ang Israel nangin matagnaon man nga modelo, kag si David nangin matagnaon nga pigura ni Jesus, nga nakapanubli sing Ginharian nga katipan ni Jehova kay David. (1 Cronica 17:11, 14; Lucas 1:32) Ang Kasuguan nga ginhatag sa Israel, upod ang mga halad kag pagkasaserdote sini, naglaragway sa halad ni Jesus kag nagtudlo sa iya langitnon nga Ginharian kag pagkasaserdote. Sa amo ang Kasuguan nangin “manugtuytoy tubtob kay Cristo.”—Galacia 3:19, 24; Binuhatan 2:25-36; Hebreo 10:1-10; Bugna 20:4-6.
Ang Tolon-an sang Matuod nga Tagna
Ining impormasyon indi matipigan sing sibu paagi sa oral nga tradisyon ukon paagi sa nanuhaytuhay nga mga kapahayagan sa nanuhaytuhay nga mga pungsod. Ang labing maayong paagi sa pagtipig kag sa pagpaliton sa tanan nga pungsod amo ang isa ka nasulat nga rekord. Kag ginatuman sang Biblia ini nga papel. Amo lamang ini ang nagaunod sing inspirado nga mga kapahayagan sang Dios kag nagatipig sing maragtason kag matagnaon nga kasaysayan sang iya mga pagpakig-angot sa mga tawo. Amo lamang ini ang nagatudlo kay Jesucristo subong ang Ahente sang Dios para sa kaluwasan kag nagaunod sing hingapusan nga mga tagna tuhoy sa palaabuton nga katumanan sang iya Mesianiko nga tulumanon. Sa amo, amo ini ang kompleto nga inspirado nasulat nga Pulong sang Dios.—Roma 15:4; 1 Corinto 10:11; 2 Pedro 1:20, 21.
Kutob sang matapos ang Biblia, ang mga nagtudlo sing bag-o nga “mga tagna,” mga relihion, kag mga sekta wala gin-inspirar sang Dios. Ang matuod nga mga tagna wala ginhatag agod magpahayag sing bag-ong mga relihion. Ginatipigan nila ang isa ka matuod nga relihion subong amo gihapon kag ginapahibalo ang palaabuton nga pagpanghikot sang katuyuan ni Jehova. Ang katumanan nila nagahatag sing pamatuod sa iya tumalagsahon nga pagka-Dios kag gahom, sa amo nagapakita nga sia lamang ang makatagna sing mga hitabo nga abanse sing mga siglo kag makapatuman sini nga wala sing kapaslawan.—Isaias 41:21-26; 46:9-11.
Gani ang tanan nga nagahandum nga makahibalo sang matuod nga tagna kag magbuhat sing matuod nga relihion dapat magliso sa Biblia. Amo ini ang tolon-an sang tagna sang Dios—ang iya kompleto nga mensahe sa katawhan.—2 Timoteo 3:16, 17.
[Mga Laragway sa pahina 7]
Kaliwat sang ginsaad nga “binhi”
Noe
Sem
Abraham
Isaac
Jacob
David
Jesus