Ginadayaw sang Isa ka Bata si Jehova

MADAMO nga kahigayunan para sa pagpanaksi ang bukas sa mga kabataan kon may yara sila mabaskog nga handum sa pag-alagad kay Jehova. Nakita ini sa eksperiensia sang singko-anyos nga bata nga lalaki sa nakatundan nga Kenya.—Manugwali 12:1.

Ginpamangkot sia sang iya iloy: “Ano ang luyag mo pagdaku mo?” Naobserbahan sang bata nga lalaki ang isa ka espesyal payunir sa kongregasyon kag nagsabat: “Luyag ko mangin espesyal payunir kaangay ni Broth­er F   .” Ang iloy nagsabat, “Apang indi ini posible; indi ka gani mahimo mangin regular payunir bangod wala ikaw sing pagtuon sa Biblia.” Ang bata nga lalaki namangkot: “Ano ang mahimo ko nian?” Ang iya iloy nanugda nga tudluan niya ang iya mga kahampang gikan sa iya Ang Akon Libro sang mga Sugilanon sa Biblia.

Ginkuha sang singko-anyos ang iya mga kopya sang Mga Sugilanon sa Biblia nga libro kag gintawag niya ang iya mga abyan, nga ginaagda sila sa pagtuon sa Biblia upod sa iya. Ang

resulta?

Nagporma sia sing isa ka grupo sang napulo nga iya matudluan. Gingamit niya ang mga laragway, nagpautwas sing madamo nagapanalawsaw nga mga pamangkot, kag namangkot sing repaso nga mga pamangkot sa katapusan sang pagtuon. Kon indi sila makadumdom, ginasulit niya ang materyal upod sa ila. Ginpaathag sang iloy nga makalilipay gid nga makita ining tanan nga kabataan nga nagapungko sa duta sa atubangan sang iya balay nga nagatuon sing tingob! Ang iya singko-anyos nga anak nagapamangkot sing mga pamangkot, kag dayon ang tanan nga kamot nagabayaw sa pagsabat.

Nadugangan pa ang kalipay sang iloy, subong man sang kongregasyon, nga makita ang walo sining kabataan nga nagtambong sa mga miting sang kongregasyon. Ang duha pa magagmay pa. Ini tanan natabo bangod ang singko-anyos naghandum sa pagdayaw kay Jehova kag sa pagbulig sa iban.