Report sang mga Manugbantala sang Ginharian
Ang Singko-Anyos Nagpukaw sang Interes
SA TUNGA sang kapin sa 40,000 ka Saksi ni Jehova sa Venezuela yara ang singko-anyos nga bata nga may matahom nga eksperiensia. Napamatian niya sing maayo ang mga pamulongpulong publiko pasad sa publikasyon nga Life—How Did It Get Here?—By Evolution or by Creation? kag sang ulihi sa paghinun-anon pa sang iya pamilya tuhoy sa sini nga libro, nahangpan sining singko-anyos, nga naghalin sa teokratiko nga pamilya, nga ang ebolusyon nagapangangkon nga ang tawo nagluntad kuno gikan sa “sabaw.” Ang isa sang mga kapitulo sa libro nagahinun-anon sa panudlo sang ebolusyon nga ang kabuhi nagtuhaw gikan sa organiko nga sabaw.
Sa sulod sang 14 ka tuig, ang kaingod nga pamilya (ang bana, asawa, duha ka tin-edyer nga anak nga lalaki, kag isa ka siete-anyos nga anak nga babayi) wala gid nagasapak sa pangabay sang Saksi nga pamilya nga usisaon ang Biblia kag sa pangagda nga mag-upod sa Kingdom Hall.
Isa ka adlaw samtang ang Saksi nga asawa nagapanghugas sing pinggan, nabatian niya ang makawiwili nga paghambalanay sang iya anak nga lalaki kag sang kaingod nga bata nga babayi, malapit sa kudal. Ang bata nga lalaki nagsiling: “Wala ka lang makahibalo! Ang kalibutanon nga mga tawo nagasiling nga ang tawo naghalin sa sabaw!” Ang bata nga babayi nagsabat, subong sang pirme niya nga ginahimo: “Nagbuang ka na bala?” Ang bata nga lalaki nagsabat: “Indi, indi ako buang. Ang kalibutanon nga mga tawo nagasiling nga ang tawo naghalin sa sabaw; apang si Jehova ang naghimo sang tawo.” Ginyaguta sang bata nga lalaki ang ideya, nagahunahuna nga ordinaryo nga sabaw ini para kaunon, nga indi niya naluyagan. Nian ginsilingan niya ang bata nga babayi: “Dapat hatagan sang akon daddy sing Creation nga libro ang imo daddy agod makita niya nga gintuga sang Dios ang tawo.” Apang, ang bata nga babayi nagsiling nga mga Katoliko sila, kag dira natapos ang paghambalanay.
Sang ang bana sang sister, nga isa ka gulang, nagpauli halin sa trabaho, ginsugid niya ang nabatian niya nga paghambalanay. Bisan pa nga naham-ot sila sa hitabo sa ulot sang kabataan, ang utod naghunahuna nga ayhan luyag ni Jehova nga panaksihan niya liwat ining kaingod nga lalaki. Mga pila ka adlaw sang ulihi, ginpalapitan niya ang iya kaingod kag ginsugid ang paghambalanay sang kabataan. Nagsiling sia nga tungod sa iya anak nga lalaki, luyag niya sia hatagan sing isa ka kopya sang Creation nga libro. Ang Saksi nagrekomendar nga basahon ini sang kaingod nga wala sing ginadampigan, kay ginapakita sini ang ginhalinan sang kabuhi.
Sa kakibot sang utod, mga pila ka adlaw sang ulihi ining mag-asawa, nga madugay na nga wala nagasapak sa kamatuoran, nagkadto sa balay sang utod nga nagapabutyag sing kasubo bangod sang ila panimuot sa sulod sang madamong tinuig. Nagsiling sila nga natingala sila sa matahom nga kinaiya sang Creation nga libro.
Ang resulta amo nga nasugdan ang isa ka pagtuon sa Biblia kaupod sini nga pamilya. Nagsugod sila sa pagtambong sing regular sa mga miting kag sang ulihi nangin mga manugbantala sang maayong balita. Ang bana, ang iya asawa, kag ang duha ka tin-edyer nga mga anak nga lalaki ginbawtismuhan sa distrito nga kombension, kag ang bata nga babayi isa man ka manugbantala sang Ginharian. Ang asawa nagsugod sa pag-auxiliary payunir sing regular sa gilayon pagkatapos nga nabawtismuhan sia.
Nahibaluan ni Jesucristo nga yadtong mga tagipusuon maayo, kag sarang niya kag ginagamit niya ang mga kabataan sa paglab-ot sa sinang maayong mga tagipusuon.—Juan 10:14.