Espiritismo—Ngaa Nagadamo ang Interesado?

SI FRANS isa ka haligi sang lokal nga iglesia sang Protestante. Kon may hilimuon sa simbahan, sia ang una nga nagabulig. Si Wilhelmina mahinadlukon man sa Dios. “Dapat ka magsimba,” siling niya, kag sia man nagasimba. Si Es­ther regular man nga nagasimba kag wala nagapaligad sing isa ka adlaw nga indi makapangamuyo. Isa ka butang ang kinaandan sa ila nga tatlo: Sila man mga espiritista.

Ining tatlo ka pumuluyo sang Suri­name indi silahanon. Sa bug-os nga kalibutan, nagauswag ang interes sa espiritismo. Binagbinaga: Sa Estados Unidos lamang, mga 30 ka magasin nga may tingob nga sirkulasyon nga kapin sa 10,000,000 ang para sa nanuhaytuhay nga latagon sang psy­chic phe­nom­e­na. Ginabanta nga 2,000,000 ka tawo sa Inglaterra ang interesado sa sini gihapon nga tema. Ang surbe kasan-o lang sa Nether­lands nagpakita nga ang mga tumuluo sa labaw sa kinaugali nga mga hitabo masapwan sa tunga sang mga pumuluyo sa dalagku nga mga siudad, edukado nga mga tawo, kag mga pamatan-on. Dugang pa, subong mapamatud-an sang mga pumuluyo sang Aprika, Asia, kag Latin Amerika, ang espiritismo nangin bahin sang adlaw-adlaw nga pagkabuhi sa madamo nga kadutaan. Indi katingalahan nga ang mga awtor nga sanday John Weldon kag Clifford Wilson naghinakop sa ila libro nga Occult Shock and Psychic Forces: “Madamo nga komentarista ang daw nagapati nga yari na kita sa tion sang walay tupong nga pagbalik sang okultismo.”

Huo, ang espiritismo kag okulto—sa porma sang astrolohiya, hipnotismo, par­a­psy­chol­o­gy, ex­tra­sen­so­ry per­cep­tion, madyik, pagpatpat sa mga damgo, kag iban pa—nagaganyat sa mga tawo gikan sa tanan nga sahi sang pagkabuhi. Ngaa?

Una, ang pila ka iglesia sang Cristiandad nagapabaya kag nagatugot sa espiritismo. Nagasiling sila nga ang pagpakig-angot sa mga espiritu isa lamang ka paagi sa pagpalapit pa sa Dios.

Subong isa ka halimbawa, binagbinaga si Izaak Amelo, 70-anyos nga negosyante sa Su­ri­name. Sa pito ka tuig sia isa ka ginatahod nga katapo sang konsilyo sang iglesia kag isa ka kilala nga espiritista man. Sia nagsiling: “Kada Sabado ang amon bug-os nga konsilyo sang simbahan nagatipon sa guwa sang minuro agod magkonsulta sa mga espiritu. Nagapadayon kami sa bug-os nga gab-i. Pag-abot sang madason nga aga, ginabantayan sang diakono ang iya relo, kag sa mga alas singko, ginasinyasan niya kami sa pag-untat. Nagapaligo kami dayon, nagailis sing bayo, kag magkadto sa simbahan—nga igo-igo lamang para sa oras sa pagsimba sa aga sang Domingo. Sa sining bug-os nga tinuig ang pastor wala gid magmitlang sing isa ka pulong sang pagsaway.”

Sa tapos maton-an ang kaangtanan sang espiritismo kag sang mga iglesia sa Suri­name, ang Olandes nga si Propesor R. van Lier nagpalig-on nga madamo ang nagatamod sa espiritismo subong isa ka “suplementaryo nga relihion.” Sa isa ka pagtuon nga ginbalhag kasan-o lang sang Lei­den Uni­ver­sity, nagsiling man sia nga ang espiritismo ginakilala subong “isa ka bahin sang masangkad nga konstitusyon sang relihion nga sa diin ini nagatindog sa tupad sang Cristiandad.”

Apang mahimo magapalibog ka, ‘Ang pagbaton bala sang mga iglesia sang Cristiandad sa espiritismo isa ka pasalig nga ginakahamut-an ini sang Dios? Magalapit ka bala sa iya paagi sa pagpakig-angot sa mga espiritu? Ano gid ang ginasiling sang Biblia nahanungod sa espiritismo?’

[Laragway sa pahina 3]

Madumduman ni Izaak Amelo ang pagpakigbahin sang bug-os nga konsilyo sang simbahan sa espiritistiko nga mga miting