Mga Pamangkot Gikan sa mga Bumalasa
◼ Ano bala ang “binhi sang Dios” nga ginsambit sa Malaquias 2:15?
Ining mabudlay hangpon nga bersikulo mabasa, sing bahin: “Kag may isa nga wala maghimo sini, bisan nga may nabilin sia sang espiritu. Kag ano bala ang iya ginapangita? Ang binhi sang Dios.” “Ang binhi” maathag nga nagapatuhoy sa pungsod sang dumaan nga Israel, nga sang tion nga ginsulat ang bersikulo yara sa katalagman sang relihioso nga pagkanadagtaan.
Si Malaquias nagtagna sadtong panag-on sang pagkadunot sa moral sang pungsod. Ang pila ka Israelinhon nga lalaki wala lamang nagakuha sa ‘mga babayi sang dumuluong nga dios subong mga asawa’ kundi nagdiborsio man sa ila orihinal nga Judiyong mga asawa, ang ‘mga asawa sang ila pagkapamatan-on,’ agod makakuha sang ayhan mas batabata nga paganong mga asawa. Apang, indi tanan nga Israelinhon nga mga lalaki ang naghimo sining “makangilil-ad nga butang.” (Malaquias 2:11, 13, 14; Deuteronomio 7:3, 4) Maathag nga nagapatuhoy sa mga indibiduwal nga nagadumili sa pagbugto sang ila katipan sa pag-asawahay upod sa isa ka masigka sumilimba ni Jehova, si Malaquias nagsulat: “Kay may isa nga wala maghimo sini, bisan nga may nabilin sia sang espiritu.”
Ang “espiritu” amo ang balaan nga espiritu sang Dios, nga ginpasagahay niya sa pungsod. Apang, ang dimatinumanon nga mga Israelinhon nagbato, kag busa ginpasubo, ina nga espiritu. (Isaias 63:10; Binuhatan 7:51-53; ipaanggid ang Efeso 4:30.) Ang iban nga indibiduwal nga mga Judiyo matutom sa kasuguan sang Dios, kag bangod sang ila pagkamatinumanon nahuptan nila kon ano ang ‘nabilin sa espiritu.’ Ining matutom nga mga sumilimba wala magtinguha nga tigayunon ang ila makagud nga kalipay. Tuhoy sa ila, si Malaquias nagsulat: “Ano bala ang iya ginapangita? Ang binhi sang Dios.” Ini nga “binhi” amo ang pungsod sang dumaan nga Israel, nga ginsiling ni Malaquias nga ‘gintuga sang Dios.’ Ini nga ‘pagpanuga’ natabo sang nakigkatipan si Jehova sa mga Israelinhon sa Bukid sang Sinai, naghimo sa ila nga iya “pinasahi nga pagkabutang” kag “balaan nga pungsod.” Ang matuod nga “binhi” ni Jehova nga magapakamaayo sa katawhan sang bug-os nga duta magahalin sa sining pungsod.—Malaquias 2:10; Exodo 19:5, 6; Genesis 22:18.
Apang, ang mga Israelinhon dapat nga magpabilin nga putli paagi sa indi pagminyo sa katawhan sang pungsod nga wala nagasimba kay Jehova. Ang pagkadidiosnon sina nga mga tawo makapalain, subong sang makita gikan sa natabo sang panahon ni Esdras. Ang mga Israelinhon sadto anay “nagkuha sa mga anak nga babayi [sang mga pungsod sa palibot] nga sa ila kaugalingon kag sa mga anak nga lalaki; sa bagay nga ang binhi nga balaan nagsimpon sa mga katawhan sang duta.” (Esdras 9:2) Ining amo man nga “dakung kalautan” natabo sang kaadlawan ni Nehemias, ang kontemporaryo ni Malaquias. Nakita sang Judiyong mga lalaki nga matutom sa Dios ang maathag nga espirituwal nga katalagman sa ila kaugalingon kag sa ila mga anak nga matawo sa sina nga pag-asawahay. Yara ang katalagman nga ipahilayo sa pagsimba kay Jehova sang asawa nga indi debotado sa Iya. Nagreport pa gani si Nehemias nga sa tunga sang mga Judiyo nga nagminyo sa tagaguwa, ‘ang ila mga anak indi makahambal sing Jinudiyo.’—Nehemias 13:23-27.
Ginpanikasugan sang dimatutom nga mga Judiyo nga matigayon ang ila kaugalingon nga kalipayan bisan kon daw ano ka makatalagam ang relihioso nga epekto sini sa ila pungsod, “ang binhi sang Dios.” Indi katingalahan nga si Malaquias nagpaandam: “Busa andami ang inyo espiritu, kag wala sing magluib sa asawa sang iya pagkapamatan-on”! (Malaquias 2:15) Gin-andaman sang matutom nga mga Judiyo ang ila espiritu, ukon panimuot, agod magpabilin nga matutom sa ila Judiyong mga asawa. Ginpabilihan nila sing daku ang relihioso nga kaputli sang ila “pungsod nga balaan.” Luyag nila nga ang ila mga anak magbasa sang Pulong sang Dios kag magdaku nga nagahigugma kay Jehova, nagaamot sa relihioso nga kabakud sang pungsod.
Ang dedikado nga mga Cristiano sa karon kinahanglan nga magpakita sing kaanggid nga kakugi sa ila espiritu, ukon dominante nga panimuot. Kon minyo, dapat likawan sining mga indibiduwal ang maluibon nga pagbulag sa ila mga tiayon. Kag dapat pamatian sang diminyo nga Cristiano ang laygay ni apostol Pablo nga magminyo “lamang nga sa Ginuo,” nagapakasal lamang sa isa ka dedikado, bawtismado nga saksi ni Jehova.—1 Corinto 7:39.