Report sang mga Manugbantala sang Ginharian

Naghambal ang Pangulo

MAKAPALIG-ON mahibaluan nga may yara pa karon mga tawo sa mataas nga palangakuan sa sining kalibutan nga nagahigugma sa pagkabunayag kag katarungan kag nagahambal sa pagsakdag sining mga kinaiya. Ang isa ka halimbawa amo ang isa ka pangulo sa isa ka pungsod sang Aprika nga sa diin ginadumilian ang hilikuton sang mga Saksi ni Jehova. Tuguti ang report sa pagsugid sa aton:

“Kasan-o lang ang nanuhaytuhay nga mga relihion naghiwat sing salamo nga kombension sa amon banwa, kag naglakip ini sa mga Katoliko, mga Presbeteriano, mga Pentecostal, kag iban pa. Ang Pinakamataas nga Pangulo gin-agda sa paghatag sing pamulongpulong sa kombension sa nagahingapos nga mga sesyon. Sa kakibot sang bug-os nga nagtipon, ginsugiran niya sila, lakip sa iban nga mga butang, nga ilugon ang pagkabunayag kag mataas nga mga talaksan sa moral sang mga Saksi ni Jehova, nagadugang nga kon ang tanan kaangay sang mga Saksi ni Jehova, magaluntad ang paghidait sa pungsod.

“Sang masunod nga adlaw ang nagapanguna nga mga katapo sang mga iglesia nga ginrepresentar sa kombension nagkadto sa palasyo sang Pangulo kag nagprotesta batok sa bahin sang iya pamulongpulong nga nagdayaw sa mga Saksi kag ginpamangkot sia kon bala wala sia makahibalo nga ang mga Saksi ginadumilian sa pungsod. Ang Pangulo nagsabat nga nahibaluan niya apang ginsugiran niya sila nga wala sia sing nakita nga sayop sa mga Saksi ni Jehova. Nagpadayon sia sa pagsiling: ‘Sa akon bug-os nga tinuig subong Pinakamataas nga Pangulo, wala pa gid sing Saksi ni Jehova nga gindala sa akon korte bangod sa daku nga sala. Sa pihak nga bahin, kon may balinghoy nga ginkawat sa uma, sa masami ang kawatan isa ka Katoliko. Kon may yam nga ginkawat, ang may sala isa ka Presbeteriano. Ang mga katapo sang inyo iglesia nagdagta sa akon pungsod sing mga aborsion, apang wala sing isa sa mga Saksi ni Jehova nga gindala sa akon korte bangod sina nga mga sala. Wala bala ginadumilian sang kasuguan sang Dios inang mga kalautan, ukon wala na bala ginatuytuyan ang mga iglesia sang kasuguan sang Dios?’ Wala makasabat ang mga klerigo.

“Sang ulihi, ginpatawag sang Pinakamataas nga Pangulo ang mga tiglawas sang mga Saksi ni Jehova kag ginlaygayan sila nga atipanon sing maayo ang ila kaugalingon agod nga indi mapakahuy-an ang ngalan sang ila Dios kag ang iya ngalan subong Pinakamataas nga Pangulo nga naghambal dampig sa mga Saksi ni Jehova.”

Ang report nagasiling nga karon madamo nga bag-uhan ang nagatindog sa kamatuoran. Ang isa ka Saksi nagsiling nga kasan-o lang nakasugod sia sing pagtuon sa Biblia sa tatlo ka pangulo sa ila duog, ang isa sa ila Pinakamataas nga Pangulo, kag sila nga tatlo nagatambong sa mga miting sang mga Saksi ni Jehova!

Ginatalupangod ni Jehova nga Dios ang mga nagahigugma sa kamatuoran kag sa pagkamatarong kag nagahambal dampig sa iya mga alagad.—Mateo 10:42.