Report sang mga Manugbantala sang Ginharian
Ginapabaskog ni Jehova ang Iya Matutom nga mga Alagad
SI Jesus nagsiling: “Ang ulipon indi daku pa sa iya agalon. Kon ginhingabot nila ako, hingabuton man nila kamo.” (Juan 15:20) Apang ginapasalig ang matutom nga mga alagad ni Jehova nga pabaskugon niya sila. (Salmo 18:2; Nahum 1:7) Sa isa ka pungsod sa Aprika sa diin ang mahidaiton nga hilikuton sang mga Saksi ni Jehova ginadumilian, ginpabaskog ni Jehova ang iya mga alagad sa atubangan sang mga pagpanakit kag pagpangdakop, subong ginapakita sang masunod nga report:
“Ang manugtatap sa sirkito kag ang apat ka lokal nga utod gindakop kag ginlupot sa isa ka diutay nga hulot para sa nagtalang nga mga ido,” siling sang report. “Ginbukot sila didto sa 123 ka adlaw nga wala napanaptan sing bug-os kag wala gintugtan sa pagkadto sa kasilyas.” Nabatian sang isa ka katapo sang Parlamento ang sapatsapaton nga mga kahimtangan kag nagprotesta sia, kag sang ulihi, pagligad sang 123 ka adlaw, ginbuhian ang mga utod. Ginpabaskog ni Jehova ining matutom nga kauturan paagi sa iya espiritu.
Ang isa pa ka eksperiensia gikan sa sini gihapon nga pungsod nagapakita sang mapuslanon nga mga epekto sang aton pagbantala nga hilikuton. Ang report nagaasoy: “Sa isa ka minuro, kilala ang mga tawo sa kasingki kag pagrebelde. Apang, sa tapos makabantala didto ang mga Saksi ni Jehova, madamo ang nagtahod sa lokal nga awtoridad kag nagsugod sa pagpakigbahin sa semanal nga hilikuton sang komunidad sa mga dalan.” Luyag mahibal-an sang isa ka lokal nga pangulo kon ano ang nagpabalhin sa panimuot sang katawhan kag ginsugiran sia: “Ang kabangdanan amo ang gintudlo sang ‘pastor’ sang mga Saksi ni Jehova.” “Isa ka adlaw gin-agda ako sining pangulo sa iya balay,” siling sang Saksi, “kag ginpalig-on ako nga padayunon ining maayong hilikuton. Ginregalohan niya ako sing daku nga manok agod kaunon ko upod sa akon pamilya.” Sa isa pa ka okasyon, ginduaw sang lokal nga meyor ang utod, kag ginpasulod sia sang utod kag ginpanaksihan. “Nangabay [ang meyor] sing pila ka magasin kag nagsiling, ‘Sa banta namon indi kamo makahalalit. Padayuna ang inyo pag-apelar. Wala sing mando nga dakpon kamo. Sa banta ko husayon sang Estado ang inyo problema sa indi madugay.’ ”
Ang isa ka espesyal nga payunir nagsulat: “Sa tapos sang mga panumbungon sang sekretaryo sang partido politika, ginmando sang lokal nga pangulo nga dakpon ako kag ginlupot sa isa ka mahigko nga selda nga may ihi kag tai sang sapat. Ginbukot ako sa sining kadudulman sing lima ka adlaw. Pakadto didto, nangamuyo ako kay Jehova kag nadumduman ko ang Salmo 50:15. Naluoy sa akon ang mga guardia didto kag wala nila ginsira sing bug-os ang puwerta agod nga makahaklo ako sing preska nga hangin. Pagligad sang lima ka adlaw sa bilangguan, gintilawan nila ako sang ginpadul-ong nila sa akon ang kanding sa lokal nga pangulo, nga wala sing kaupod. Sanglit wala ako malagyo, ginhatagan ako sing kahilwayan kada adlaw halin sa alas 3:00 s.h. tubtob alas 7:00 s.g. Makabuylog ako sa mga kauturan, kag makabantala kaupod nila. Bisan pa nagmasakit ako sa tion sining mabudlay nga tion kag naglaum ang akon mga kaaway nga mapatay ako, wala ako pagbiyai ni Jehova. Labi pa nga nagpalapit ini sa akon kay Jehova, kag napat-od ko nga indi gid ako mabulag sang paghingabot gikan sa katawhan ni Jehova.”—Ipaanggid ang Roma 8:35-39.
Ginaapresyar sang mga Saksi ni Jehova ang pagpabaskog sa ila sang Dios sa tion sang kabudlayan. Ginaapresyar man nila ang mga nagapakita sa ila sing kaluoy samtang ginatuman nila ining labing importante nagaluwas kabuhi nga hilikuton sa pagbantala sing maayong balita. Indi gid pagkalimtan ni Jehova ina nga kaluoy.—Mateo 25:40.