Maglaum kay Jehova

“Maglaum kay Jehova kag bantayi ang iya dalanon, kag sia magapataas sa imo sa pagpanubli sang duta. Kon ang malauton utdon makita mo ini.”—SALMO 37:34.

1, 2. Diin makita ang katawhan nga nagatindog, kag paano nadalahig ang Nasyones Unidas?

SING makatarunganon, natigayon sang tawhanon nga panimalay ang labing abanse nga halintang sang pag-uswag. Bangod sang mga panikasog sini, nalab-ot sini sang ulihi ang nuklear nga dag-on. Ang atomiko nga kusog makita nga makasarang sa pag-aman sing bugana nga enerhiya kag busa nabuksan ang dalagku nga mga butang sa bug-os nga globo. Apang, naghatag man ini sing dalan para sa daku nga ikahalit sang tawhanon nga rasa.

² Ano ang nagatindog sa dalanon sang paglaglag mismo sang tawhanon nga pamilya sang iya kaugalingon sa nuklear nga kalaglagan? Amo ang Nasyones Unidas, nga nagapabugal sang mga 159 ka miembro nga pungsod nga may madamong paagi sang gobierno. Sa politika, ining mga gobierno wala nagaulugyon sa isa kag isa, ang tagsa nagapati nga ang iya paagi sang pagginahom superyor, huo, labing maayo. Busa, sa sulod niya mismo, ang NU isa ka hubon nga wala sing paghiusa. Lapnag ang pungsodnon nga bugal kag handum para sa kahilwayan. Dugang pa, madamong pungsod ang nagsikway sa pagtuo sa Dios, nga nangin atiestiko.

3. Paano ang pagtamod sang Cristiandad sa Dios tuhay gikan sa iya sang Dios?

³ Ang tinaga nga Cristiandad naaplikar gihapon sa mga pungsod nga indi luyag iklase nga wala sing dios kundi nagaangkon nga nagatuo kay Jesucristo nga nahiusa sa “Dios nga Amay” sa trinidad nga kaangtanan upod kay Jesus kag upod sa nangin persona nga “balaan nga bahoy,” ukon espiritu santo. Ang mga miembro sang Trinidad ginasiling nga palareho. Apang ginpasulat sang Amay ni Jesus kay manalagna Isaias ining mga pulong sang identipikasyon: “Ako si Jehova. Amo sina ang akon ngalan; kag indi ko pag-ihatag kay bisan sin-o ang akon himaya, ukon ang akon pagdayaw sa mga larawan nga tinigban.” (Isaias 42:8) Ining si Jehova, ukon si Yahweh (The Jerusalem Bible), naghimo sing dimapaanggiran nga maragtason nga rekord para sa iya kaugalingon.

4. Gikan sa ano ginapalayo sang Nasyones Unidas ang katawhan?

⁴ Indi gid sa kaayuhan sini, ang Nasyones Unidas nag-untat sa paghatag sa ngalan sang Dios sing nagakabagay nga dungog kag pagkilala. Wala sini ginapalig-on ang katawhan, nga nagaatubang karon sang iya labing wala sing paglaum nga nadangtan, sa paglaum sa nagadala sina nga ngalan. Apang, makatarunganon nga ginhingadlan inang Isa nga “Dios sang paglaum,” naghimo sing paagi nga mahatag niya ang sadsaran para sa lamang nagakaigo nga paglaum nga mabinagbinag karon sang katawhan. (Roma 15:13, King James Version) Ang paglaum nga ginahatag niya nagpabakud kag nagsakdag sa madamong lalaki kag babayi.

Sadto Pa—Paglaum!

5. San-o ginhatag ang sadsaran sang paglaum?

⁵ Ang sadsaran para binagbinagon ina nga paglaum ginhatag sadto pa sa maragtas sang tawhanon nga panimalay. Huo, ginhatag ini sa gilayon sa wala pa mapaguwa ang aton unang ginikanan gikan sa ila Edeniko nga katamnan nga puluy-an sa Natung-an nga Sidlangan. Ang rekord nga ginsulat sa Hebreohanong pamulong nahanungod sina nga katamnan, ukon Paraiso, indi himuhimu lamang, indi patupato sang mga tawo nga nag-untat sa pagsimba sa ila Manunuga.—Genesis 2:7–3:24.

6. Paano ang katawhan nagakinahanglan sing paglaum?

⁶ Kapin sa 4,000 ka tuig sang ulihi, ang Cristianong si apostol Pablo gin-inspirar sa pagsulat: “Paagi sa isa ka tawo ang sala nagsulod sa kalibutan kag ang kamatayon paagi sa sala, kag busa ang kamatayon naglapnag sa bug-os nga katawhan bangod sila tanan nakasala.” (Roma 5:12) Sa isa pa nga ginsulat niya, ginpakilala niya ang nakasala nga tawo: “Subong nga kay Adan ang tanan nagakalamatay, amo man kay Cristo ang tanan buhion.” (1 Corinto 15:22) Gin-asoy sang manugbulong nga nagahingalan kay Lucas, sa ikatlo nga kapitulo sang iya Ebanghelyo, ang linya ni Jesus pabalik kay Adan, nga, sa wala pa mapaguwa sa Eden, nakabati sang mensahe sang paglaum ni Jehova.—Lucas 3:23-38.

7. Anong makapalig-on nga butang ang ginhimo sang Dios samtang si Adan buhi pa?

⁷ Natural, luyag mo hibaluon ang kaundan sina nga mensahe. Apang sa wala pa mabasa ini, tandai ang kamatuoran nga sa sulod sang malawig nga tion si Jehova pirme nagahatag sing paglaum. Sa umpisa si Adan isa ka dutan-on nga anak sang Dios, kag gintugutan sia ni Jehova sa pagpanganak. Kon makita mo nga daan ang makahaladlok nga kahimtangan, ayhan palig-unon mo ukon hatagan sing paglaum ang imo mga anak. Amo sina ang ginhimo sang Dios. Sang mabatian ni Adan ang mga pulong sang pagtagudili sang Dios nga ginpahibalo sa iya sing personal, nabatian niya ang mga pulong sang paglaum para sa iya mga kaliwat.

8. Paano ang Genesis 3:15 nagahatag sing sadsaran sang paglaum?

⁸ Ano inang mga pulong gikan sa sining nagapatudok sing paglaum nga Dios? Sa “man-ug” nga nadalahig sa sala ni Adan, ang Dios nagsiling: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi [kaanakan]. Sia magadugmok sang imo ulo kag dugmukon mo ang iya tikod.” (Genesis 3:14, 15) Ayhan magapalibog ka kon paano masiling ina nga mga pulong nga nagahatag sing paglaum. Una, nahibal-an naton nga ang “man-ug” pagadugmukon sa ulo.

9. Sin-o ang “man-ug” nga ginapatuhuyan sa Genesis 3:14, 15?

⁹ Sa Bugna 12:9 ginsulat ini: “Kag ginhulog ang dakung dragon, yanang dumaan nga man-ug, nga ginatawag nga Yawa kag Satanas, ang manugdaya sang bug-os nga kalibutan; ginhulog sia sa duta, kag ang iya mga anghel ginhulog kaupod niya.” Huo, ang “man-ug” nga nadalahig sa Eden wala sing liwan kundi ang malaut espiritu nga tinuga nga nakilal-an subong si Satanas nga Yawa. Indi lamang nga inang simbuliko nga man-ug may mga anghel sa langit kundi may “binhi” sia diri sa duta, ang “binhi” nga sa pat-od nga tion pagadugmukon sa kalaglagan kaupod niya.

10. Paano ginapalig-on ni Jesus ang identipikasyon sang “man-ug”?

¹⁰ Nagapalig-on sini nga identipikasyon sang Yawa subong ang “man-ug” sa likod sang pagpakasala sang aton unang mga ginikanan, ginsilingan ni Jesucristo ang Judiyong relihiosong mga lider sang unang siglo: “Kamo iya sang inyo amay nga Yawa, kag buot ninyo himuon ang mga kailigbon sang inyo amay. Sia manugpatay kutob sa ginsuguran, kag wala nagatindog sa kamatuoran . . . Kon nagabutig sia, nagapamulong sia suno sa iya kinaugali, kay butigon sia kag amay sang kabutigan.” (Juan 8:44) Gintawag man ni Jesus ang relihiosong mga manugpamatok nga “kaliwat sang man-ug.”—Mateo 12:34; 23:33.

Paglaum Ginhuptan nga Buhi

11. Anong dugang nga rason sang paglaum ang ginahatag sang Genesis 3:15?

¹¹ Ang balaan nga saad tuhoy sa pagdugmok sa ulo sang simbuliko nga man-ug aktuwal nga nagahatag sing makalilipay nga paglaum sa tanan nga tawhanon nga panimalay nga manugluntad pa lang. Makita naton kon ngaa paagi sa pag-usisa sa iban nga bahin sang Genesis 3:15. Ang “binhi” sang babayi ginsambit. Ang pagkilala sa sina nga “binhi” madugay na nga gintabunan sing misteryo. Apang maathag nga butangan ni Jehova nga Dios inang wala pa makilal-i nga “binhi” sing kaawayon sa simbuliko nga man-ug kag sa iya batok sa Dios nga “binhi.” Ginsaad ang kadalag-an, huo, gin­ga­rantiyahan, para sa “binhi” sang “babayi”! Ang iya kadalag-an ginbutang subong paglaum sa katawhan. Gani ang mga katapo sang tawhanon nga panimalay makalaum sa pagkari sina nga “binhi” sang “babayi.”

12. Sang ulihi, ano ang dugang pa nga ginpahayag nahanungod sa “binhi” sang “babayi”?

¹² Sa sulod sang mga siglo, ginpahayag sang Dios nga ini nga “binhi” amo ang iya bugtong nga Anak, nga ginpadala sa duta agod mangin Mesias kag magahatag sang iya kabuhi subong halad nga gawad. (Genesis 22:17, 18; Galacia 3:16; 1 Juan 2:2; Bugna 5:9, 10) Bangod sini nga rason ang paglaum sang mga Saksi ni Jehova wala masandig sa Nasyones Unidas. Nasandig ini sa buhi nga si Jesucristo, ang Pangulo nga Humalambal ni Jehova nga Dios. Makasalig kita nga si Cristo buhi, bangod ginbanhaw sia gikan sa minatay agod maglingkod sa tuo nga kamot ni Jehova sa langit. Subong sang ginasiling ni Pablo: “Kon ang paglaum ta kay Cristo sa sining kabuhi lamang [ang kabuhi nga nagalakip sa aton ika-20 ka siglo], labi kakailo kita sa tanan nga tawo. Apang, karon si Cristo nabanhaw gikan sa minatay, ang panganay sang mga nagakatulog sa kamatayon.” (1 Corinto 15:19, 20) Subong sang masunson nga ginapakita sang Biblia sa mga pahina sini nga magasin, si Jesucristo ginpalingkod na karon subong langitnon nga Hari.—Bugna 11:15.

13, 14. Diin ginabutang sang mga Saksi ni Jehova ang ila paglaum, kag ano ang ginahimo nila tuhoy sa sini?

¹³ Sa pagkamatuod, wala pagbusli ni Jesus si Jehova subong ang paglaum sang katawhan. Ang Salmo 37:34 nagapabilin nga matuod: “Maglaum kay Jehova kag bantayi ang iya dalanon, kag sia magapataas sa imo sa pagpanubli sang duta. Kon ang malauton utdon, makita mo ini.” Kinahanglan gihapon ang magpabilin nga nagalaum kay Jehova kag palig-unon ang tanan nga tawo sa pag-untat sa paglaum sa hinimu sang tawo nga mga institusyon.

¹⁴ Nahisanto sa sining kamatuoran, ang mga Saksi ni Jehova aktibo sa 208 ka kadutaan, nga nagabantala sang maayong balita sang Ginharian. Indi sila mapauntat sa paghimo sina. Ang mga institusyon sa politika, nga ginasakdag kag ginasugyot sang relihiosong mga organisasyon, wala sing balaan nga kinamatarong sa pagtinguha nga pauntaton sila. Makapadayon kita nga mangin mga saksi ni Jehova kag makalaum sa iya, subong sang ginhimo ni David sang Betlehem, nga nagsulat:

15. Ano nga sahi ang paglaum si Hari David kay Jehova?

¹⁵ “Si Jehova akon manugbantay; wala sing makulang sa akon. Sa hilaw nga mga halalbon ginapapahuway niya ako; sa luyo sang mga tubig nga malinaw ginatuytuyan niya ako. Ginapahaulian niya ang akon kalag: Ginatuytuyan niya ako sa mga banas sang pagkamatarong tungod sa iya ngalan. Huo, bisan naglatas ako sang nalupyakan sang landong sang kamatayon, wala ako sing kahadlukan nga malaut; kay ikaw kaupod nakon; ang imo sungkud kag ang imo itulukod, nagalipay sila sa akon. Ginaaman mo ang latok sa atubangan ko sa ginatambungan sang akon mga kaaway: Ginahaplas mo ang akon ulo sing lana; ang akon tagayan nagaawas. Sa pagkamatuod ang pagkaayo kag ang kaluoy magasunod sa akon sa tanan nga adlaw sang akon kabuhi; kag ako magapuyo sa balay ni Jehova sa gihapon.”—Salmo 23, American Standard Version.

16. Ngaa masiling nga si Jesus may pareho nga panimuot kay David?

¹⁶ Si Hari David amo ang espirituwal nga manugbantay ni Jehova para sa mga tribo sang dumaan nga Israel, kag ginhanda niya ang dalan para sa Jerusalem nga mangin kabisera sang pungsod, diin ang iya anak nga si Solomon naggahom sa sulod sang 40 ka tuig. Upod ang maayong rason, si Jesucristo gintawag subong ang “anak ni David.” (Lucas 1:31; 18:39; 20:41) Kon si David naglaum kay Jehova nga Dios, ang iya dutan-on nga kaliwat nga si Jesucristo makalaum man kay Jehova nga Dios. Kag naglaum sia.

17. Ano ang pamatuod nga si Jesus naglaum kay Jehova?

¹⁷ Subong pamatuod nga ang pinakabantog nga dutan-on nga kaliwat ni David, nga si Jesucristo, nagtuman sang laygay sang Salmo 37:34 sang nagatagumatayon sa usok sang pag-antos, si Jesus nagsiling: “Amay, sa imo mga kamot ginatugyan ko ang akon espiritu.” (Lucas 23:46) Ginbalikwat niya kag gintuman ang pinamulong ni David sa Salmo 31:5, nga napatuhoy sa Dios: “Sa imo kamot ginatugyan ko ang akon espiritu.” Ang paglaum ni Jesus wala mabang-awi, kaangay man sang kay Hari David. Si Cristo ginbanhaw gikan sa minatay sang ikatlo nga adlaw. Kap-atan ka adlaw sang ulihi nagbalik sia sa iya langitnon nga Amay. Sang talipuspusan sang Panahon sang mga Gentil sang 1914, ginpakataas ni Jehova ang iya Anak agod mangin Gumalahom sang duta.

Tion Para sa Paglaum Karon

18. Ngaa ang karon amo ang nagakaigo nga tion sa paglaum?

¹⁸ Sa karon, samtang ginadala sang bag-ong tuig 6,014 A.M. (sa Tuig sang Kalibutan) ang tawhanon nga panimalay pasulod sa palaabuton, ano nga paglaum ang mabinagbinag sang tawhanon nga panimalay? Ina nga pamangkot labi gid nga nagakaigo sa karon bangod halos 1,900 ka tuig na kita pasulod sa tapos sang Biblia nga dag-on. Madugay na nga tion kutob sang ginsulat ni David ang Salmo 37:34.

19. Ano ang ginhimo ni Jehova kay Jesus, nga nagahatag sa aton sing paglaum?

¹⁹ Si Jehova nga Dios, ang Labing Gamhanan nga Dios nga nagbanhaw kay Jesus gikan sa minatay, may mas daku nga papel para sa iya sang sa ginahanduraw sang malip-ot sing panan-aw nga mga tawo. Paagi sa pagbanhaw kag pagpakataas sa iya bugtong nga Anak sa iya tuo nga kamot sa mga langit, si Jehova nga Dios nagdugang sing rason para sa aton sa pagtan-aw sa Iya nga may dimabang-awan nga paglaum, ang aton pat-od nga paglaum. Magakahulugan ini sang aton walay katapusan nga kabuhi sa kalipay, subong sang ginsiling sang inspirado nga manunulat nga si Pablo: “Ginluwas kita sa sining paglaum.”—Roma 8:24.

20. Ngaa masiling naton nga si Jehova amo gihapon ang “Dios sang paglaum”?

²⁰ Ang apostol nagpadayon sa pagsiling: “Ang paglaum nga makita indi paglaum, kay sin-o bala ang nagalaum sang iya makita? Apang kon nagalaum kita sa wala naton makita, ginahulat ta ini nga may pagpailob.” (Roma 8:24, 25) Kag gani inang orihinal nga paglaum yara gihapon, huo, malapit na sa mahimayaon nga katumanan sang tawhanon nga rasa. (2 Pedro 3:13; Bugna 21:4, 5) Bangod sang rason mismo nga isa ini ka paglaum para sa tanan nga katawhan, nagakabagay ini nga ipahibalo sa tanan. Amo ini ang ideya sang aton “Dios sang paglaum.”

21, 22. Ano ang paabuton naton nga himuon sang mga pungsod sa malapit nga palaabuton?

²¹ Karon na sa tanan nga tion ang iya tion para matuman ini nga ideya. Bisan sa aton dag-on nga natigayon sang iban nga mga pungsod sang NU ang sientipiko nga pagkalantip sa pinakasentro sang tanan nga butang, ang mga lider sining mga gobierno wala nagabatyag nga kinahanglan itugyan ang paglubad sa mga problema sa mas mataas nga intelihensia.—Ipaanggid ang Genesis 11:6.

²² Subong sang wala pa gid matabo sang una, ang popular nga relihion handa sa pagpangapin, nga wala sing paagi nga makapalagyo. Ang nagabahinbahin nga impluensia sini dapat dulaon. Ginapakita sang Biblia nga ipilit sang nagagahom nga mga elemento ang ila pagkasuperyor kag magabulag sa nagasalig lamang sa ila nga mga relihion nga madugay na nagapanikasog sa pagsuyup sa kalibutanon nga sistema sang mga butang sang tanan nga makuha nila. Indi makakilibot, nian, nga himuon ini sang politikal nga elemento. Ang madinalag-on nila nga pagsalakay sa relihion magapakita, sa ila punto-de-vista, nga wala sing Dios nga nagakabagay simbahon kag alagaron. Ginapakita sang tagna nga magaliso sila nian batok sa mga saksi sang Dios, nga magpabilin. Pangitaon nila ang pinakamahapos nga pagdaug sa mga Saksi ni Jehova subong ang katapusan sang ila kampanya batok sa Dios.—Bugna 17:12-17; Ezequiel 38:10-23.

23, 24. Ano ang reaksion ni Jehova sa pagsalakay sang mga pungsod sa iya katawhan?

²³ Walay sapayan, mahibal-an nila sa ulihi ang makahuluya nga pagkapierde nga mahanabo sa isa nga maisog nga nagasulod sa pagpakig-away kay Jehova sang kasoldadosan, nga wala pa gid mapierde sa inaway. Nagaathag gid ini sing dimasaypan nga nagaalagad sila sa mga katuyuan sang panguna nga kaaway sang isa ka matuod nga Dios, nga amo, ang “man-ug,” nga si Satanas, “ang dios sining sistema sang mga butang.”—2 Corinto 4:4.

²⁴ Daw ano kadaku nga kahuluy-an ina para sa ila! Ang ginlauman nila nga ipakita mapamatud-an nga amo ang pinakadaku nga kahuluy-an, nga nagapaakig sa Dios sang langit kag sang duta sa matarong nga kasingkal. Sa kubos nga katawhan makasiling sia: “‘Kay ang akon mga hunahuna indi inyo mga hunahuna, kag ang inyo mga dalanon indi akon mga dalanon,’ siling ni Jehova. ‘Kay subong nga ang mga langit mataas pa sa duta, sa amo ang akon mga dalanon mataas pa sa inyo mga dalanon, kag ang akon mga painoino sa inyo mga painoino. Kay subong sang ulan nga nagakahulog kag sang nieve gikan sa langit kag wala nagabalik didto kundi nagatubig sang duta, nga nagapabunga sini kag nagapasalingsing, nga nagahatag sing binhi sa manugsab-ug kag kalan-on sa manugkaon, mangin subong sini ang akon pulong nga nagaguwa sa akon baba. Indi magbalik ini sa akon sa wala sing pulus, kundi magatigayon ini sang akon nahamut-an, kag magauswag ini sa butang nga akon ginpadal-an sini.’”—Isaias 55:8-11.

25. Ngaa, nian, may maayong rason kita sa karon nga maghulat kay Jehova subong ang aton “Dios sang paglaum”?

²⁵ Ining Manunuga sang tawo nagbutang sa tawhanon nga tagipusuon sing sobra nga pagkasensitibo, subong nga sia man sensitibo. “Kay amo ini ang ginasiling ni Jehova sang kasoldadosan, ‘Tungod sa himaya ginpadala niya ako sa mga pungsod nga nag-ati sa inyo; kay ang nagatandog sa inyo nagatandog sang tawotawo sang iya mata.’” (Zacarias 2:8) Gani, nian, ang mga Saksi ni Jehova dapat maglaum kay Jehova. May nagakaigo sia nga kalipikasyon sa sina nga paglaum sa pinakamatahom nga pagpuni sa iya bug-os uniberso nga pagkasoberano. Pamatud-an niya nga labaw sa dugang pa nga baisay nga sia amo ang labing mataas, gamhanan, dayon nga Dios, nga nagtuman sang pinakamataas nga paglaum sang iya mga tinuga sa bug-os nga langit kag duta. Hallelujah!—Salmo 150:6.

Paano Mo Sabton?

◻ Ngaa ang paglaum sang mga pungsod malimbungon?

◻ Paano ang Dios nagahatag sing sadsaran para sa paglaum sa Genesis 3:15?

◻ Ano ang tindog ni Jesus nahanungod sa Salmo 37:34?

◻ Ngaa may rason kita sa karon para maglaum?

[Laragway sa pahina 10]

Subong nga ang mga karnero nagatuman sa ila manugbantay, si David naghulat kag naglaum kay Jehova

[Ginkuhaan]

Pictorial Archive (Near Eastern History) Est.