Mga Pamangkot Gikan sa mga Bumalasa

◼ Sin-o ang “napulog-duha” nga ginpakitaan ni Jesus, subong sang ginasambit sa 1 Corinto 15:5?

Ang pagpakita nga ginsambit sa 1 Corinto 15:5 daw pareho sa narekord sa Juan 20:26-29, nga nagadalahig kay Tomas. Apang, nagapatuhoy ini sa mga apostoles subong grupo kag ayhan naglakip kay Matias.

Sang nagahinun-anon sa pagkabanhaw, si Pablo nagsulat tuhoy sa pagpakita ni Jesus sa mga tawo sa tapos Sia ginbanhaw. Ang apostol nagsiling nga si Cristo “nagpakita kay Cefas, nian sa napulog-duha. Pagkatapos sina nagpakita sia sa kapin sa lima ka gatos ka mga kauturan.”—1 Corinto 15:5, 6.

Gikan sa tunga sang mga nagsunod sa iya subong mga disipulo, ginpili ni Jesus ang 12. (Mateo 10:2-5) Si Judas Iscariote isa anay sa 12, apang nangin traidor sia, nagluib kay Jesus, kag sang ulihi nagbitay sang iya kaugalingon. (Mateo 26:20-25; 27:3-10) Gani sang mapatay kag mabanhaw si Cristo, may yara lamang 11 ka matutom nga apostoles sa orihinal nga 12. Si Jesus nagpakita sa lainlain nga mga disipulo sa ulot sang iya pagkabanhaw kag pagkayab sa langit. Pagkatapos sina ginkilala sang mga apostoles ang kinahanglanon nga tal-usan si Judas. Paagi sa balaan nga pagtuytoy, si Matias ang napili, kag “naisipan sia kaupod sang napulog-isa ka apostoles.”—Binuhatan 1:6-26.

Gani natingala ang iban kon ngaa nagsulat si Pablo nga si Jesus nagpakita sa “napulog-duha,” kay sadto nga tion patay na si Judas kag wala pa mapili si Matias. Bangod ispisipiko, may yara lamang “napulog-isa ka apostoles” ang orihinal nga gintangdo kag ginpadala ni Jesus.—Lucas 6:13-16.

Kinaandan na ang maghambal tuhoy sa isa ka grupo sing tingob bisan pa nga kulang sing isa. (“Ang hubon sang mga direktor namat-od . . . ” “Ang hubon sang mga gulang nagmiting . . . ”) Gani ang termino nga “napulog-duha” mahimo nga gingamit sa pagpatuhoy sa bug-os nga grupo sang mga apostoles, bisan pa nga kulang sing isa ukon duha sina nga okasyon. (Ipaanggid ang Binuhatan 6:1-6.) Sang una nga magpakita si Jesus sa mga disipulo sa isa ka gintakpan nga hulot, “si Tomas, nga isa sang napulog-duha . . . indi nila kaupod.” Walo ka adlaw sang ulihi yara na sia kag nahusay ang mga pangduhaduha. (Juan 20:19-29) Bisan pa nga si Matias wala pa sadto matangdo sa pagtal-us kay Judas, madugay na sia nga isa ka disipulo. (Binuhatan 1:21, 22) Bangod suod sia nga nagapakig-upod sa orihinal nga mga apostoles kag wala madugay pagkatapos sina “naisipan kaupod” nila, ang nagapanumdom nga komento nahanungod sa pagpakita ni Jesus sa “napulog-duha” mahimo nga naglakip kay Matias.