Ang Daku nga mga Kagamhanan sa Kalibutan sa Maragtas sang Biblia Nagamartsa sa Ila Katapusan!

MAHANDURAW mo bala ang maragtas nga ginsulat sing abanse? ‘Imposible,’ siling mo? Apang, may yara isa ka libro nga nagsugid gid sing maragtas sing abanse—ginatos, kon kaisa linibo ka tuig sa wala pa matabo ang mga hitabo! Ina nga libro amo ang Biblia.

Wala lamang ginareport sang Biblia ang dumaan nga mga hitabo nga may pagkasibu kundi sa labing makatilingala nga paagi gintagna pa sini ang daku nga balayan sang maragtas sang kalibutan may kaangtanan sa mangin epekto sini sa katawhan sang Dios, kutob sang tion sang dumaan nga Babilonia, kapin sa 2,500 ka tuig ang nagligad, tubtob kag labang pa sa aton adlaw karon.

Si Daniel, nga isa ka manalagna nga nabuhi sang ikan-om nga siglo sa wala pa ang aton Kumon nga Dag-on, ginhatagan sing apat ka magkatuhay nga mga bugna may kaangtanan sa palaabuton sang maragtas sang kalibutan. Sa diin niya ginkuha ang iya impormasyon? Si Daniel nagsiling: “May isa ka Dios sa mga langit nga Manugpahayag sang mga tinago.” (Daniel 2:28) Ang mga arkeologo, nga nakakutkot sing mga bilin sang dumaan nga mga kagamhanan sa kalibutan, nakasapo sing makatilingala nga pamatuod sang pagkamaminatud-on sang maragtas kag sang tagna nga masapwan sa Biblia.

Ang duha ka daku nga kagamhanan sa kalibutan sa maragtas sang Biblia, ang Egipto kag ang Asiria, madugay na nga nagluntad sa wala pa ang tion ni Daniel. Ang Babilonia nagagahom sang adlaw ni Daniel, kag ang mga ngalan sang magabulos nga duha ka kagamhanan sa kalibutan ginpahayag sa manalagna. (Daniel 2:47, 48; 8:20, 21) Duha pa ang magasunod sa sini, nga magadala sa aton sa karon nga tion.

Pila?

Suno sa Biblia, pila sina nga kagamhanan ang magagahom sa kalibutan? Ang sabat ginhatag sa tigulang na nga si apostol Juan kag nagapakita kon sa diin na kita sa lakat sang tion. Ginsugiran sang anghel si Juan: “May pito ka hari: ang lima sa ila napukan, ang isa amo karon, ang isa wala pa mag-abot.”—Bugna 17:10.

Ano ang lima ka kagamhanan sa kalibutan nga nag-abot na kag nagtaliwan sang adlaw ni Juan? Egipto, Asiria, Babilonia, Medo-Persia, kag Gresya. Ano ang nagaluntad pa sadto? Roma. Kag ano nga kagamhanan ang “wala pa mag-abot”? Ang Anglo-Amerikano nga Kagamhanan sa Kalibutan sang aton adlaw. Amo ining mga kagamhanan sa kalibutan ang ginakabalak-an gid sang katawhan sang Dios, sang una kag karon.

Ang isa ka importante gid nga kamatuoran amo ini: Pito lamang ka kagamhanan sa kalibutan ang magabuslanay! Ang magadungan nga ikawalo nga kagamhanan, nga magalakip sa mga nagkalabilin sang pito, gintagna nga magaluntad sa malip-ot nga tion sa sulod sang mga adlaw sang ikapito. (Bugna 17:10, 11) Nagakahulugan ini nga nagakabuhi kita sa tion sang katapusan sang daku nga mga kagamhanan sa kalibutan nga ginagamhan sang tawo. Wala na sing magasunod!

Sa dili madugay karon, matapos na ang adlaw sang mga kagamhanan sa kalibutan. Gintagna ni Daniel nga ining tawhanon nga mga sistema pagadugmukon kag ‘paliron sang hangin.’ (Daniel 2:35) Ano ang magabulos sa ila? Ang mas maayo sa ila! Si Daniel nagreport: “Sa mga adlaw sadto nga mga hari magapatindog ang Dios sang langit sing ginharian nga dili gid malaglag. . . . Dugmukon sini kag papason ini tanan nga ginharian, kag ini magapadayon tubtob sa walay katubtuban.” (Daniel 2:44) Gani ang magabulos sa sining tawhanon nga mga kagamhanan sa kalibutan wala sing liwan kundi amo ang Ginharian sang Dios. Daw ano ka daku nga pag-uswag sa paggahom sa kalibutan!

Wala sing duhaduha nga may nahibaluan ka nahanungod sa mga kagamhanan sa kalibutan. Apang mabuligan ka bala sa paghangop sing dugang pa sang maragtas sang katawhan sa kapawa sang Kasulatan kon mahibaluan mo sing dugang pa ang ila mga kinabatasan, ang ila relihion, kag ang ila kaangtanan sa katawhan sang Dios kag ang tagna sa Biblia?

Huo, sa pagkamatuod. Gani nalipay kami sa pagbalhag, sugod sa sini nga guwa, sing isa ka serye sang walo ka artikulo tuhoy sa mga kagamhanan sa kalibutan. Ining mga artikulo dapat makabulig sa pagkombinse sa imo nga ang maragtas nga nasaysay sa Biblia masaligan kag makompiyansahan. Dapat man sini palig-unon ang imo pagtuo sa kamatuoran nga ang mga tagna sang Biblia matutom kag matuod!