Isa Pa ka Daku nga Hitabo sa Pagtudlo sa Biblia

ANG Huebes, Oktubre 1, 1987, isa pa ka daku nga hitabo sa pagtudlo sa Biblia nga ginahatag sang bug-os kalibutan nga Sosiedad sang mga Saksi ni Jehova. Gintandaan ini sang inagurasyon sa bag-ong Ministerial Train­ing ­School. Ang una nga klase sang 24 ka soltero nga mga utod nga lalaki nagreport para sa espesyalisado nga paghanas sa malapad nga Pitts­burgh Assem­bly Hall sa Corao­polis, Penn­syl­vania. Ang mainabyanon nga mga tagbalay sa tunga sang mga Saksi sa sina nga lugar nagbukas sang ila puluy-an agod madayunan sining mga estudyante sa ila walo-ka-semana nga paghanas.

Ang mga estudyante ginrehistro sang aga, nagbaton sang ila mga libro nga tolon-an kag sang nagabukas nga mga instruksion. Sang 7:30 sina nga gab-i, ang Assem­bly Hall napuno sing 1,518 ka nakunyag nga mga Saksi nga nalangkag sa pagpakigbahin sa opisyal nga pagbukas sining bag-o nga eskwelahan.

Si Albert Schroe­der, katapo sang Nagadumala nga Hubon sang mga Saksi ni Jehova, amo ang tsirman. Pagkatapos sang ambahanon kag pangamuyo, ginpakilala niya si Rob­ert Daw­son, ang manugtatap sang siudad sa Pitts­burgh. Gin-abiabi sing mainit ni Rob­ert Daw­son ang 24 ka estudyante sa Pitts­burgh kag ginhatagan sing komendasyon ang 13 ka panimalay nga nagboluntaryo sa pag-aman sing dalayunan para sa ila. Ginpahanumdom niya sa mga tagbalay nga mangin pribilehiyo nila ang ipakita ang gugma nga nagasaksi, nagatuo, nagalaum, kag nagabatas sang tanan nga butang. (1 Corinto 13:7) Ginpahanumdom niya ang mga estudyante nga, subong mga bisita, dapat nila ipakita ang pasalamat, pagpaubos, kag pagkapisan. Sa sining paagi, magaresulta ang pag-inabyanay nga magalawig sa bug-os nga kabuhi.

Nian ginpakilala ang mga estudyante, ang tagsa naghatag sang ila ngalan kag nagsugid kon diin sia maghalin kag kon ano ang iya karera sa pag-alagad kay Jehova. Ang iban naghalin sa Puerto Rico, Argentina, Can­a­da, kag Hong Kong, ang iban pa gid naghalin sa nasidlangan nga bahin sang Estados Unidos. Luwas sa Ingles, ang iban sa ila nagahambal sing Espanyol, Pranses, Italyano, ukon Inintsik.

Masunod nga ginpakilala sang tsirman si ­James Hin­derer subong isa sang mga manunudlo. Nagapasad sang iya komento sa Mateo 7:24, 25, ginpadaku ni Broth­er Hin­derer ang importansia sang pagtuman paagi sa paghimo sang mga butang, paagi sa pagbuhat sa kon ano ang naton-an. Busa, ang mga estudyante magatukod sang ila “balay” sa igang sa baylo nga sa mahuyang nga balas.

Si Ran­dall Davis, isa pa ka manunudlo, amo ang masunod nga nagpamulongpulong sa mga estudyante. Nagapasad sang iya komento sa Isaias 54:13, nagsiling sia nga tudluan sila ni Jehova agod sarang nila mapaambit ang panudlo sa iban. Kinahanglan nila ang daku nga pagsalig sa matuod nga “kabulig,” ang balaan nga espiritu ni Jehova nga Dios.—Juan 14:26.

Si Albert Schroe­der masunod nga naghambal nahanungod sa kon paano sia ginpahanumdom sina nga gab-i sang isa pa ka daku nga hitabo sa pagtudlo sa Biblia. Gindumdom niya ang Pebrero 1, 1943, sang ang isa ka gatos ka estudyante, apat ka manunudlo (lakip sia), kag mga bisita gikan sa Brook­lyn nagtipon sa ­South Lansing, Nueva York, para sa pagbukas sang Watch­tow­er Bi­ble ­School of Gil­ead. Kapin sa 44 ka tuig kutob sadto, ang Gil­ead ­School ginpakamaayo ni Jehova, subong sang makita sa paglapta sang kapin sa 6,000 ka nahanas sa Biblia nga mga misyonero sa bug-os nga duta. Nian ginpatalupangod ni Broth­er Schroe­der ang lainlain nga mga topiko nga itudlo sa Minis­terial Train­ing ­School. Ang iban sini amo ang mga Panudlo sang Biblia, Teokratikong Organisasyon (nga nagahatag sing daku nga igtalupangod sa mga responsabilidad sang mga manugtatap kag ministeryal nga mga alagad), Administrasyon sang Dios, kag Paghambal sa Publiko. Gintawag man niya ang igtalupangod sa lainlain nga mga libro nga tolon-an, lakip ang Reason­ing From the Scriptures. Sa paghinakop, ginpatalupangod ni Broth­er Schroe­der ang katumanan sang Isaias 45:23, nagasiling nga ang relihiosong mga nagapamatok, sa katunayan, nagapilo sang ila mga tuhod sa Dios bangod dapat nila kilalahon nga ang mga Saksi ni Jehova husto sa patag sang medisina, kasuguan, kag kronolohiya sa Biblia.

“Mangin mga Manug-ilog ni Pablo” amo ang tema nga ginpili sang masunod nga humalambal, si Karl Klein sang Nagadumala nga Hubon. Ginpakita niya kon paano sulitsulit nga ginpangabay ni apostol Pablo ang iban sa pag-ilog sa iya. Sarang niya ini mahimo, bangod ginailog niya si Cristo. (1 Corinto 11:1) Ang mga estudyante ginlaygayan sa pag-ilog kay Pablo sa iya ihibalo kag malantipon nga paggamit sa Kasulatan, sa iya kasidla kag makugi nga pagbantala, sa iya pagkadimakagud, sa iya kaugdang kag pagpaubos, kag sa iya mapailubon nga pagbatas.

Si Theo­dore Ja­racz, katapo man sang Nagadumala nga Hubon, naghatag nian sang pamulongpulong sa inagurasyon, “Isa ka Bag-o nga Eskwelahan—Para sa Anong Katuyuan?” Nag-umpisa sia paagi sa pagsiling nga ang mga nagboluntaryo para sa sining eskwelahan nag-ugyon sa pag-alagad bisan diin nga kinahanglanon sila sa bug-os kalibutan nga latagon. Sa kapin sa tatlo kag un kuarto ka milyon ka Saksi sa kapin sa 54,000 ka kongregasyon, kinahanglan katama ang kalipikado nga mga lalaki sa pagbantay, pagtudlo, kag pagpanguna sa daku nga hilikuton sa pag-ebanghelyo. Sang una, gintagna ni Jehova nga magahatag sia sing “mga dulot sa dagway sang mga tawo.” (Salmo 68:18) Ginhimo niya ini sa panahon sang mga apostoles, subong sang ginsiling ni apostol Pablo sa Efeso 4:8-11. Karon, si Jehova nagaaman man sing ‘mga dulot sa mga tawo’ kag nagahanas sang iban sa ila paagi sining bag-o nga eskwelahan.

Nagsiling pa gid si Broth­er Ja­racz nga samtang ang tanan nga mga estudyante may kinaugali nga mga ikasarang, sarang ini mapasangkad ni Cristo. Apang nagakinahanglan ina sing panikasog, kag ang humalambal nagpabutyag sing pagsalig nga ang 24 ka estudyante magahimo sina nga panikasog. Ginpakita niya nga indi mahimo ang maglisa sa matarong nga mga talaksan ni Jehova kag nagsiling nga ang mga nagapanguna makabulig paagi sa ila personal nga huaran kag impluensia. Sa madamo nga bahin sang duta, kinahanglan katama ang kalipikado nga mga lalaki sa pagbaton sa responsabilidad sa organisasyon. Ini nga kinahanglanon nagadalahig sa dalagku nga kongregasyon nga mahimo may yara lamang isa ukon duha ka gulang kag limitado nga kadamuon sang ministeryal nga mga alagad. Gani maathag gid kon ngaa ang Minis­terial Train­ing ­School kinahanglan nga tukuron—magahanas sa diminyo nga mga gulang kag ministeryal nga mga alagad sa pag-alagad bisan diin sa bug-os kalibutan nga latagon. Subong resulta sang ila paghanas, masangkapan sila sing maayo sa pagtatap sa pag-uswag subong mga manugbantay.

Ang tanan nga mga Saksi ni Jehova sarang makapasalamat sa Dios sa pagpaposible sa Minis­terial Train­ing ­School. Sa paghinakop, si Broth­er Ja­racz nagsiling: “Napat-od ko nga kita tanan nahiusa sa panghunahuna kag balatyagon kay Jehova subong sang ginapabutyag sang Salmo 79:13: ‘Kami nga imo katawhan kag mga karnero sang halalban, magapasalamat sa imo sa walay katubtuban; magapakita sang imo pagdayaw sa tanan nga mga kaliwatan.’” Nian, paagi sa ambahanon kag pangamuyo, ining tuman ka halandumon kag malipayon nga okasyon natapos.