Matutom nga mga Pamatan-on nga Nangin Martir Tungod sa Ginharian sang Dios

Mga alas 8:30 sadto sang aga sang Oktubre. Ang pamatan-on nga si Elmer kag si Alex, 16 kag 14 anyos ang edad, nagahampang sa atubangan sang ila balay sa San Salvador, kapital nga siudad sang magamo nga El Salvador. Sa hinali nag-abot ang isa ka puti nga trak nga may lima ka naarmasan nga mga lalaki. Nanaug ang duha ka lalaki kag ginmanduan ang mga pamatan-on nga magsaka sa trak. Ginkuha sila lipod sa ila pamilya.

Sang marealisar sang ila mga ginikanan ang natabo, ginpahibalo nila ang mga gulang sang lokal nga kongregasyon sang mga Saksi ni Jehova, kag ginsugdan ang pagpangita. Ang kasingki bangod sa politika amo ang nagakatabo sa adlaw-adlaw sa El Salvador sa malawig na nga tion. Ginkulbaan ang mga ginikanan, nga si Napoleón kag Orbe, sa pinakagrabe nga matabo. Ginpahibalo ang mga awtoridad kag nagbuylog man sa pagpangita.

Sang masunod nga adlaw ang pila ka tawo, nga nagamaneho sing awto-ponebre para sa lokal nga tag-iya sing punerarya, nagpahibalo sa isa sang mga gulang nga nakita nila ang mga bangkay sang duha ka pamatan-on upod sa iban pa nga mga bangkay sa isa ka kinaandan nga dalan-ukan sing mga biktima sang kasingki. Huo, nakit-an si Elmer kag si Alex, ang ila bangkay puno sing bala. May mga tanda nga gintormento sila antes ginpatay sang ulihi. Ginapatihan nga ang isa sang rebelde nga mga grupo nagtinguha sa pagkombinse sa ila sa pagbuylog sa ila grupo sa pagpakig-away batok sa pangulohan nga nagagahom. Apang, ang mga pamatan-on, bangod mga Saksi ni Jehova, wala magbungkag sang ila Cristianong neutralidad paagi sa pagbuylog sa sina nga grupo. Mahimo gid nga bangod sining rason ginpatay sila. May duha pa ka martir sa malaba nga linya sang matutom nga mga Cristiano nga napatay tungod sa pagdumili nga madalahig sa kalibutanon nga politika. Gintuman nila ang Dios sa baylo sang mga tawo.—Juan 17:16; 18:36; Binuhatan 5:29.

Sa amo, sa isa ka adlaw, ang pamilya sang López nga may lima ka katapo nangin tatlo. Masakit gid yadto sa mga ginikanan. Sa tion sang ila daku nga pagkinahanglan nakabaton sila sing lugpay kag bulig gikan sa ila Cristianong kauturan sa sanga talatapan sang Watch Tower Society sa El Salvador kag gikan sa kongregasyon. Nagpadala sila kasan-o lang sing sulat sang apresasyon nga luyag namon ipaambit sa inyo nga mga bumalasa namon.

Ang Makapaayo nga mga Epekto sang mga Saad sang Dios

“Batuna palihog gikan sa akon asawa, nga si Orbe, sa akon anak nga babayi, nga si Reyna Noemi, kag sa akon ang amon pasalamat kag apresasyon sa pagpalig-on kag lugpay nga ginhatag sa amon sang tion nga kinahanglan gid namon ini sing daku. Nagapasalamat gid kami sa aton Amay, nga si Jehova nga Dios, nga paagi sa Kasulatan naghatag sing pagpalig-on nga kinahanglanon naton—huo, bangod sang trahedya nga natabo sa amon sang nagligad nga Oktubre 27. Subong nga indi namon malipatan ang amon palangga nga mga anak nga sanday Elmer kag Alex, indi man namon malipatan ang inyo gugma sadto nga tion.

“Matuod nga nagakasubo pa kami sing daku sa pagkapatay sang amon mga anak. Apang karon ginabatyag namon nga labi pa nga kinahanglan namon ang Bag-ong Kahimusan, kag ang ginahimo sining malaut nga sistema sang mga butang nagapadaku lamang sang amon apresasyon sa pagkinahanglan sa Ginharian sang Dios.

“Mga utod, labi pa nga ginpabilihan namon ining mga butang, kag nagapasalamat kami kay Jehova bangod may yara kita pat-od nga paglaum—indi lamang mga kastilyo sa hangin kundi matuod gid nga pangulohan.

“Ang isa ka utod nga lalaki mahigugmaon nga nagsiling sa akon: ‘Indi mo malipatan si Elmer kag si Alex, kag isa lamang ang remedyo sa imo kasubo—makighambal sa iban nahanungod sa imo paglaum. Huo, maghambal kag maghambal nahanungod sa Ginharian kon may kahigayunan ka sa paghimo sini.’ Matuod gid ini! Kon gab-i nagapakighambal kami sa amon mga kaingod, kag nakahatag ini sa amon sing daku nga paumpaw. Si Orbe, nga akon asawa, nakapanaksi sa ‘importante’ nga mga tawo nga nagpanikasog sa paghibalo nahanungod sa amon pagtuo. Sang isa ka adlaw ang isa ka doktor nagsiling sa iya: ‘May pagtuo ka bala?’ ‘Huo,’ sabat niya. ‘Ipakita sa akon kon ano ini,’ sabat niya. Ti, sa isa ka oras namati sia, nga nagapakita sing dakung interes bisan pa may mga pasyente nga nagahulat sa iya. Gintanyagan niya sia sing libro nga Ang Kamatuoran nga Nagadul-ong sa Kabuhi nga Dayon, kag ginbaton niya ini dayon.

“Isa ka adlaw ginpatawag ako sang manedyer sang pabrika nga akon ginaobrahan kag nagsiling: ‘Napoleón, luyag ko makighambal sa imo kag mamangkot sa imo. Nagapati ka bala nga magaabot ang katapusan sang kalibutan sa dili madugay?’ Ining tawo isa anay ka Katoliko nga pari apang ginbiyaan niya ang pagkapari. Sang ginpaathag ko nga ang Biblia nagahatag sing malig-on nga pamatuod nga yari na kita sa katapusan nga mga adlaw sining malaut nga sistema sang mga butang, nagsiling sia nga ginaduhaduhaan niya ang Biblia. Samtang nagahambal ako nahanungod sa organisasyon sang mga Saksi ni Jehova, nakibot sia sang ginpaathag ko nga indi kita bahin sang ebangheliko nga mga grupo. Nian ginsugiran ko sia nga wala kita nagapati sa mga doktrina. Nangayo sia sing halimbawa. ‘Halimbawa,’ siling ko, ‘nga si Maria amo ang iloy sang Dios.’ ‘Ano, wala kamo nagapati nga si Jesus Dios kag busa si Maria iloy sang Dios!’ ‘Wala,’ siling ko, ‘wala ginasakdag sang Biblia ina nga doktrina.’ Nakibot gid, nagtindog sia kag nagsiling: ‘Sa diin kamo nagamiting? Ihatag sa akon ang direksion, kay luyag ko magtambong.’ ‘Ngaa?’ pamangkot ko. Nagsabat sia nga sang yara sia sa seminaryo wala gid sia magpati sa sina nga doktrina kag naghinakop nga ang tanan nga relihion nagapati sa sini. Nakibot gid ako! Isa ka pari nga wala nagapati sa Trinidad!

“Sa pagkamatuod, mga utod, sa karon kapin sa bisan anong tion nagapangamuyo kami kay Jehova nga ‘magkari ang [iya] Ginharian’ kag tapuson ang tanan nga kalautan. Matuod, mga utod, nga wala pa kami makapasag-uli sing bug-os. Samtang nagaabot ang tagsa ka bag-o nga adlaw, ang memorya tuhoy sa amon mga anak yara sa atubangan namon, kag daw subong ini sa malain nga damgo. Apang malipayon gid kami nga ginabuligan kami ni Jehova! Huo, ginabatyag namon ang iya mahigugmaon nga kaluoy sa kongregasyon. Nagapasalamat gid kami sa saad ni Jehova nga paagi kay Cristo ang mga nagakatulog sa kamatayon MAGAKABUHI! (Binuhatan 24:15) Kag daw ano nga pagpakamaayo, kon mabanhaw na ang amon mga anak, nga sugiran sila kon paano ang ila ‘pagtaliwan’ naghatag sa amon sing kahigayunan sa paghambal nahanungod sa Ginharian sa mga tawo nga mahimo wala gid namon ginpalapitan!

“Bisan pa kon kaisa ginadaug pa kami gihapon sang kasubo, kag ang pagkadula sang amon mga anak nagapasubo sa amon, sa gihapon nagapasalamat kami kay Jehova sa adlaw-adlaw bangod sang amon pagtuon sang kamatuoran, bangod sang iya maluluy-on nga kamot kag bangod sang kauturan kag mga abyan kaangay ninyo nga nakabulig sa amon sa sadtong mga tinion sang kalisang.

“Madamo gid nga salamat,

Napoleón kag Orbelina López”

[Blurb sa pahina 31]

Kamo tanan nga pamatan-on nga mga Saksi—palig-una ang inyo kaugalingon kaangay ni Elmer kag ni Alex paagi sa inyo pagtuon sang Pulong sang Dios, agod nga kamo “makatindog sing malig-on” bisan ano man nga mga pagtilaw ang magaabot.—Efeso 6:11; 1 Pedro 5:8-10